Kalaallit Nunaannut suliffissarsiortut killilersimaarneqarnissat pillugu Inatsisartut inatsisissaat, nr. 18, ulloq 16 december 1988-imeersoq.
Kapitali 1.
Siunertat.§ 1. Sulisinnaasut Kalaallit Nunaanniittut suliffinnut maaniittunut siulliusussaatitaanerat qularnaarneqassaaq avataaniit suliartorniartut killilersimaarneqarnerisigut.
Kapitali 2.
Atuuffia.§ 2. Inatsit atuuppoq nunami umiarsuarnilu assartuutini makkununnga atorfinitsitsisarnerni:
1) atorfinni suliamik ilinniagaqarsimanngitsunik inuttalerneqarsinnaasuni,
2) atorfinni suliassamut naapertuuttumik ilinniagaqaqqaarluni atorfiniffigineqarsinnaasuni, inuutissarsiummik ilinniagaqaqqaarluni atorfiniffigineqarsinnaasuni imaluunniit Siamasissumik Tunngaviusumik Ilinniartitaaneq atorlugu ilinniagaqaqqaarluni atorfiniffigineqarsinnaasuni,
3) atorfinni annerusumik soorlu perorsaasutut isumaginninnermiluunniit siunnersortitut ilinniagaqaqqaarluni atorfiniffigineqarsinnaasuni,
4) atorfinni imarsiornerup tungaatigut annertune rusumik ilinniagaqaqqaarluni atorfiniffigineqarsinnaasuni.§ 3. Sulisartutut kalaaliusutut naatsorsuunneqarput inuit Kalaallit Nunaanni inunngorsimasut aammalu inunngornerminniit ukiuni siullerni 5--ni nunatsinni najugaqavissuusimasut.
Imm. 2. Kikkulluunniit § 3, imm. 1-imi piumasarineqartunik naammassinnissimanngitsut sulisartutut avataaneersutut isigineqarput allatulli isigineqarsinnaallutik immikkut ittumik Kalaallit Nunaannut attuumassuteqarsimagunik.§ 4. Atorfinitsitsinermi inuk immikkut ittumik Kalaallit Nunaannut attuumassuteqartutut isigineqassaaq pineqartoq
1) ukiut kingulliit 10 ingerlaneranni ukiuni 7-ni Kalaallit Nunaanni najugaqavissimaguni imaluunniit
2) inummik § 3, imm. 1-imi, imaluunniit immikkoortumi uani nr. 1-imi Namminersornerullutik Oqartussani, Kalaallit Nunaanni kommunet arlaanni Kalaallit Nunaanniluunniit pisortat suliffeqarfianni allami suliffilimmik pineqartumik aappaqaruni imaluunniit sivikin nerpaamik ukiumi 1-imi inooqateqarsimanerminik uppernarsaasinnaaguni.
Imm. 2. Imm. 1-imi nr. 1 malillugu Kalaallit Nunaanni najugaqavinnermut ilaatinneqassaaq ilinniarluni Kalaallit Nunaata avataani najugaqarneq pineqartullu ilinniarnermi aallartinnerani najugaqavinnissamut piumasat kalaallinut ilinniartunut tapisiaqarnissamik piumasarineqartartut eqqortikkunigit.
Imm. 3. Kalaallit Nunaanni Naalakkersuisut aalajangersinnaavaat atorfinitsitsinermi inuk peqqutinik imm. 1-imi 2-milu taasanit allanik peqquteqarluni Kalaallit Nunaannut immikkut attuumassuteqartutut isigineqassasoq.
Kapitali 3.
Akuersissutit nalunaarutiginnittarnerlu.§ 5. Sulisinnaasunik avataaneersunik atorfinnut § 2-mi pineqartunut taamaallaat atorfinitsitsisoqarsinnaavoq kommunep suliffissaqartitsinermut ataatsimiititaliaa akuersiseqqaarlugu.
Imm. 2. Sulisitsisoq pisussaavoq imm. 1 malillugu akuersissummik pissarsiniassalluni.§ 6. Atorfik sulisussamik kalaallimik inummilluunniit immikkut ittumik Kalaallit Nunaannut attuumassuteqartumik piumasarineqartut naapertorlugit ilinniagalimmik inuttassarsissunneqarsinnaanngippat suliffissaqartitsinermut ataatsimiititaliaq akuersissuteqassaaq § 5 naapertorlugu.
Imm. 2. Akuersissut tunniunneqarsinnaavoq piffissami aalajangersimasumik sivisussusilimmi atuuttussanngorlugu.
Imm. 3. Akuersissut tunniunneqartutut isigineqassaaq qinnuteqaamminik tunniussinerminiit ullut 14 qaangiutsinnagit sulisitsisoq allamik tusagaqanngippat.§ 7. Sulisitsisut sulisussanik avataaneersunik atorfinitsitsinissaminnut akuerineqartut atorfinitsitsinertik soraarsitsinertillu ullut 8 qaangiutsinnagit nalunaarutigisassavaat kommunep suliffissarqartitsinermut ataatsimiititaliaanut taamaattoqanngitsunilu kommunalbestyrelsemut.
§ 8. Nalunaaruteqartarneq nalunaarutillu qanoq suliarineqartarnerat aammalu akuerineqarnissamik qinnuteqartarneq pillugit Kalaallit Nunaanni Naalakkersuisut erseqqinnerusunik malittarisassiussapput.
Kapitali 4.
Maalaaruteqarneq.§ 9. Suliffissaqartitsinermut ataatsimiititaliap § 6 tunngavigalugu aalajangigaa sulisitsisup Kalaallit Nunaanni Naalakkersuisunut maalaarutigisinnaavaa aalajangerneq pillugu nalunaarfigineqarnerminiit ullut 14 qaangiutsinnagit.
Imm. 2. Akuersissut tunniunneqartutut isigineqassaaq qinnuteqaamminik tunniussinerminiit qaammat 1 qaangiutsinnagu sulisitsisoq allamik tusagaqanngippat.
Kapitali 5.
Aalajangersakkat assigiinngitsut.§ 10. Inatsisip eqqortinneqarnissaa anguniarlugu Namminersornerullutik Oqartussat aamma kommunet paasiniaasarsinnaapput pisortat allaffeqarfiinut susassaqartunut.
Kapitali 6.
Pineqaatissiisarneq.§ 11. § 5-imik § 7-imillu unioqqutitsinerit akiliisitaaneq kingunerisassavaat.
Imm. 2. Piginneqatigiiffiit (aktieselskabet), ingerlatseqatigiiffiit (anparts- imaluunniit andelsselskabet) assigisaalluunniit unioqqutitsippata tamatuma kingunerissavaa piginneqatigiiffiup ingerlatsiviulluunniit akiliisussanngortinneqarnera.
Imm. 3. Namminersornerullutik Oqartussat, Kalaallit Nunaanni kommunet kommunelluunniit ataatsimut ingerlatseqatigiiffiat unioqqutitsippat unioqqutitsisoq akiliisussanngussaaq.
Kapitali 7.
Atulersitsineq.§ 12. Inatsit atuutilerpoq 1. januar 1989, ilanngulluguli takuuk imm. 3.
Imm. 2. Atuutilernera peqatigalugu atorunnaarpoq Kalaallit Nunaanni sulisussanik atorfinitsitsisarnermut inatsit nr. 1 12. marts 1980-imeersoq, allanngortinneqartoq inatsisikkut nr. 6-ikkut 14. juli 1982-imeersukkut.
Imm. 3. Inatsit overassistentit kontorfuldmægtigillu atorfiinut HK-mi sulisut tikisitat pillugit Kalaallit Nunaanni Pisortat Isumaqatiginninniartartuisa aamma Danmarkimi Handels- og Kontorfunktionærernes Forbundip Københavnimilu Handels- og Kontorfunktionærernes Foreningip akissarsiat pillugit isumaqatigiissutaanni 19. marts 1987-imeersumi § 14-imi pineqartunut atuutilissaaq isumaqatigiissut atuuttoq naappat.§ 13. Inatsisartut inatsisaat sakkutooqarfinni atuutinngilaq Kalaallit Nunaata illersorneqarnissaa pillugu isumaqatigiissut 27. april 1951-imeersoq naapertorlugu. Kalaallit Nunaanni Naalakkersuisut akuersinerisigut inatsisartut inatsisaat allanissaaq aalajangersimasuni atuuttussaajunnaarsinneqarsinnaavoq.
Namminersornerullutik Oqartussat, ulloq 16.december 1988.
Jonathan Motzfeldt/
Jens Lyberth