Inatsisartut inatsisaat nr. 16, 24. november 1988-imeersoq inuutissarsiutigalugu aalisarneq pillugu inatsisartut inatsisaannik allanngortitsinermut tunngasoq.

 

§ 1.

Inuutissarsiutigalugu aalisarneq pillugu inatsisartut inatsisaanni nr. 11, 21. november 1984-i-meersumi allanngortinneqassapput makku:

1) § 3 allanngortinneqassaaq imatut:
"§ 3. Kalaallit Nunaata aalisarnikkut imartaani inuutissarsiutigalugu aalisarneq ingerlanneqarsinnaavoq taamaallaat angallatinit Kalaallit Nunaanni najugaqavissunit pigineqarnertik tunngavigalugu Kalaallit Nunaanni angerlarsimaffeqavissunit. Angallat atavissumik motorilik taamatut aalisarsinnaatitaassaaq pigineqaraangami imatut:
a) inummit ataatsimit inunnilluunniit ataasiakkaanit ataatsimoortunit, namminneq ataasiakkaarlutik aningaasatigut ajutoortoqassagaluarpat ikioqatigillutik toqqaannartumik akisussaasunit, aammalu imm. 2-mi piumasarineqartunik naammassinnissimasunit,
b) imaluunniit selskabimit ataatsimit, imm. 3-mi piumasarineqartunik naammassinnissimasumit,
c) imaluunniit Kalaallit Nunaanni oqartussanit, Kalaallit Nunaanni selskabimik oqartussanit pigineqartumit selskabimilluunniit namminersornerullutik oqartussanit piginneqataaffigineqartumit.
Imm. 2. Angallat, tak. imm. 1, a) inunnit ataasiakkaanit pigineqaraangat piumasarisat makku naammassineqarsimasassapput:
a) inuit pineqartut tamarmik inuiaqatigiinnut kalaallinut aalajangersimasumik attuumassuteqassapput,
b) inuit pineqartut tamarmik Kalaallit Nunaanni najugaqartutut inuit aqqisa allattorsimaffianni nalunaarsorneqarsimassapput, Kalaallit Nunaannilu inuit aqqisa allattorsimaffianni ukiuni kingullerni marlunni nalunaarsorsimassallutik,
c) Inuit pineqartut tamarmik Kalaallit Nunaannut tamakkiisumik akileraartartuussapput, Kallaallit Nunaannilu tamakkiisumik akileraartartussaasimassallutik ukiuni kingullerni marlunni,
d) inuit pineqartut tamarmik ukiuni kingullerni marlunni inuutissarsiutigalugu aalisarnermik suliaqarsimassapput, akissaajaatillu ilanngaatigereernagit nammineq sulinikkut ukiuni kingullerni marlunni isertitat 2/3-ii inuutissarsiutigalugu aalisarnermiit isertinneqarsimassapput. Inuutissarsiutigalugu aalisartuunermut nallersuunneqarput piniartutut, savaatilittut, tuttuutilittut assigisaannillu ingerlatsinerit.
Imm. 3. Angallat tak. imm. 1, b), selskabimit pigineqarpat piumasarineqartut makku naammassineqarsimassapput:
a) selskabi aktieselskabitut, anpartselskabitut, andelsselskabitut partsrederitulluunniit aaqqissuunneqarsimassaaq,
b) ikinnerpaamik inuit piginnittut ataasiakkaartut 2/3-ii selskabip aningaasaataanik toqqaannartumik toqqaannanngikkaluamilluunniit piginnittut inuutissarsiutigalugu aalisartuussapput, taakkulu imm. 2, a) - d)-milu piumasarineqartut
naammassisimassavaat,
c) selskabip aningaasaataasa ikinnerpaamik 2/3-ii (rejerniarnermi: selskabip aningaasaatai tamakkiisut) toqqaannartumik toqqaannanngikkalua.milluunniit inunnit ataasiakkaanit imm. 2, a) - c)-mi piumasaasunik naammassinnittunit pigineqassapput,
d) ikinnerpaamik selskabip aningaasaataasa 2/3-ii aalisarnermik inuutissarsiuteqartut toqqaannartumik toqqaannanngitsumilluunniit pigissavaat, taakkulu imm. 2, a) - d)-milu piumasarineqartut naammassisimassavaat,
e) siulersuisut aqutsisulluunniit ikinnerpaamik 2/3-ii inuutissarsiutigalugu aalisartuussapput, imm. 2 a) - d)-mik naammassinnissimasut. Siulersuisut aqutsisulluunniit sinneri selskabimi nammineerlutik aalajangiisinnaanermik allanngortinneqarsinnaanngitsumik piginnaaffilerneqassanngillat.
Imm. 4. Naalakkersuisut immikkut akuersissuteqarsinnaapput:
a) imm. 2, b) aamma c)-mi piumasarineqartunit allatut iliortoqarsinnaavoq qinnuteqartoq ilinniagaqarluni allamilluunniit assigisaanik pissuteqarluni Kalaallit Nunaata avataani najugaqarallarsimappat,
b) imm. 2, d)-mi piumasarineqartunit allatut iliortoqarsinnaavoq, qinnuteqartoq piffissap pineqartup ingerlanerani ilinniarfimmi angallammiluunniit aalisartunngorniarluni ilinniagaqarsimappat,
c) imm. 2, d)-mit piumasarineqartunit allatut iliortoqarsinnaavoq, uppernarsarneqarsinnaappat aningaasanit isertinneqartunit pissarsiassat annertussusissaattut piumasarineqartut immikkut pissuteqartumik naammassineqarsimanngikkaangata.
Imm. 5. Naalakkersuisut pissutsini immikkorluinnaq ittuni imm. 1-3-mi piumasarisarineqartunit allatut ittumik akuersissuteqarsinnaapput, taamaaliorneq kalaallit aalisarnikkut inuutissarsiornerannut imaluunniit Kalaallit Nunaanni suliffissuaqarnermut pingaaruteqarsorinaraangat.
Imm. 6. Naalakkersuisut imm. 1-3-mi piumasarisat naammassisimanissaannut tunngatillugu uppernarsaatinik takujumallutik piumasaqarsinnaapput".

2) Kapitel 7 allanngortinneqassaaq imatut:

"Kapitel 7.
Ilisimatuut aalisarnermik misissuinerat, misileraalluni aalisarneq ilinniartitsiniarlunilu aalisarneq.

§ 15. Ilisimatuut aalisarnermik misissuineri kiisalu misileraalluni aalisarnerit inuutissarsiutigalugu aalisarnermi qanorluunniit killilersuisoqaraluarpat Kalaallit Nunaanni Aalisarnermik Misissuisunit Kalaallit Nunaatalu Avatangiisiinut paasiniaasarfianit allanilluunniit naalakkersuisunit akuerineqarsimasunit ingerlanneqarsinnaapput. Naalakkersuisut misileraalluni aalisarnermi atugassaritinneqartut aalajangersinnaavaat Kalaallit Nunaanni Aalisarnermik Misissuisut tusarniaaffigereernerisigit.
Imm. 2. Ilinniartitsiniarluni aalisarneq inuutissarsiutigalugu aalisarnermi killilersuineqaraluarpalluunniit ingerlanneqarsinnaapput Naalakkersuisunit akuersissuteqarfigineqarnikkut. Taamatut aalisarnermi atugassarititat Naalakkersuisut aalajangersinnaavaat."

3) § 23, imm. 1, a)-mi "§ 3, imm. 1 aamma 2," allanngortinneqassapput "§ 3, imm. 1-3,"-nngorlugit.

4) Inatsimmi tamarmi "naalakkersuisoq" atorunnaarlugu "naalakkersuisut" atorneqalissaaq.

 

§ 2.

Inatsit 1. juli 1991 atortuulissaaq. Kapitel 7-imili allannguut 1. januar 1989 atortuulissaaq.
Imm. 2. Selskabinut rejerniarnissamut 1988-imi angallatip pisassaanut akuersissutilinnut § 3-mi imm. 3 c) immikkut ittumik rejerniarnissanut aalajangersakkanut tunngasoq 1. januar 1993 aatsaat atortuulissaaq.
Imm. 3. 1. juli 1991-imi namminersornerullutik oqartussat nalunaarutaat nr. 1 19. januar 1981-imeersoq aalisarnermut piniarsinnaanermullu allagartanik agguaassinermut tunngasoq atorunnaassaaq.

Namminersornerullutik Oqartussat, 24. november 1988

Jonathan Motzfeldt

/

Kaj Egede