Kalaallit Nunaanni Naalakkersuisunut, Inatsisartunut il.il. ilaasortat aningaasarsiaqartitaanerat il.il. pillugit Inatsisartut inatsisaata allannguutaatut Inatsisartut inatsisaat nr. 12, 20. oktober 1988-imeersoq.

 

§ 1.

Kalaallit Nunaanni Naalakkersuisunut, Inatsisartunut il.il. ilaasortat aningaasarsiaqartitaanerat il.il. pillugit Inatsisartut inatsisaanni nr. 1-imi 27. februar 1986-imeersumi makku allannguutigitinneqarput:

 

1. § 1, imm, 6-imi naggatip siornatigut imaattoq ilanngunneqassaaq:
"Taamaattorli Naalakkersuisut aningaasaqarnermut ataatsimiititaliap akuersissutigippagu Inatsisartunut ilaasortat ataatsimiititaliani sinniisoqarfinnilu Inatsisartunit Naalakkersuisunilluunniit pilersinneqarsimasuni immikkut suliassaqarfioqisuni siulittaasut aningaasarsiaqartissinnaavaat. Aningaasarsiaqartitsineq ukiumut ataasiarluni aalajangersarneqartassaaq aningaasanut inatsisip akuersissutigineqarneranut atatillugu. Aningaasarsiat qaammammoortumik siumoortumik tunniunneqartassapput. Aningaasarsiaqartitsineq qaammatip siulittaasuujunnaarnerup naanerani taamaatissaaq imaluunniit Naalakkersuisut aalajangerpata taamaatitinneqassaaq."

2. § 5 imatut oqaasertaqalerpoq:
"Inatsisartut siulittaasuat, Naalakkersuisut siulittaasuat Naalakkersuisunullu ilaasortat aningaasarsiaqartinneqassapput tjenestemanditut atorfillip najugaqavissup akissaateqarfimmi (lønramme) 39-imi skalatrin 52-imiittup aningaasarsiaasa amerlaqataannik, tamatumani nalinginnaasumik tapisiat ilanngunnagit.
Imm. 2. Naalakkersuisunut ilaasortat saniatigut Inatsisartunut ilaasortaajutiginngitsut tapisiaqartinneqassapput Inatsisartunut ilaasortat aningaasarsiaat pillugit § I, imm. 1-mi taaneqartut malillugit.
Imm. 3. Inatsisartut siulittaasuat, Naalakkersuisut siulittaasuat Naalakkersuisunullu ilaasortat aningaasarsiaqartinneqassapput qaammatip Naalakkersuisunut ilaasortatut qinigaaffimmik aallaqqaataaniit qaammatip Naalakkersuisunut ilaasortaajunnaarfimmik naanerata tungaanut. Aningaasarsiat qaammammoortumik siumoortumik tunniunneqartassapput.
Imm. 4. Inatsisartut siulittaasuat Naalakkersuisunullu ilaasortat aningaasartuutiminnut matussutissanik aammalu sumiiffik tunngavigalugu tapiisaqartinneqassanngillat.
Imm. 5. Naalakkersuisut siulittaasuat ineqarnerminut akiliisassanngilaq. Naalakkersuisunut ilaasortat sinneri Inatsisartullu siulittaasuat inissaqartinneqassapput, malittarisassallu nalinginnaasut malillugit ineqarnerminnut akiliisassalutik".

3. § 7, imm. 1, imatut oqaasertaqalerpoq:
"Inatsisartut siulittaasuat Naalakkersuisunullu ilaasortat Inatsisartut siulittaasuattut Naalakkersuisunullu ilaasortatut angalaneri Landskassimit akilerneqartassapput".

4. § 8-ip kingornagut imaattoq ilanngunneqassaq:
"§ 8a. Inatsisartunut siulittaasoq atuutilernermini pisortat inuilluunniit ataasiakkaat suliffeqarfiutaanni, ingerlatsiveqarfianni imaluunniit suliffeqarfiit sullissiffianni inuutissarsiuteqaruni, taakkunanngaanniit tunuassaaq. Inatsisartunut siulittaasup isiginninnera naapertorlugu inuutissarsiutit taamaattut ingerlannerat Inatsisartut siulittaasuattut pisussaaffiit ingerlanneranni ajornartorsiortitsilersinnaangippat, Inatsisartullu siulittaasuata taaneqartut ilaat ingerlatiinnarusukkunigit, Inatsisartunut siulittaasup tamanna qinersinerup misilinneqarnissaanut Inatsisartut pilersitaannut ataatsimiititaliamut piaartumik nalunaarutigissavaa. Ataatsimiititaliap nalunaarutip tiguneraniit sapaatit akunneri pingasut qaangiutsinnagit Inatsisartunut siulittaasoq inuutissarsiutinik taaneqartunik ingerlatsiinnarnissaanik itigartitsissuteqarfigisinnaavaa. Piffissap taaneqartup naareernerani Inatsisartunut siulittaasup Inatsisartut nalunaarfigissavai, inuutissarsiutit suut Inatsisartut siulittaasuannut ingerlanneqarsinnaatitaanersut.
Imm. 2. Naalakkersuisunut ilaasortaq atuutilernermini imm. 1-mi taaneqartutut ilusilinnik inuutissarsiuteqaruni, taakkunanngaaniit tunuassaaq. Taamaattorli Naalakkersuisunut ilaasortaq Naalakkersuisut siulittaasuannit inuutissarsiutit tamaattut ingerlannissaannut akuersissuteqarfigineqarallarsinnaavoq, ingerlatsineq Naalakkersuisut siulittaasuata isiginninnera naapertorlugu Naalakkersuisunut ilaasortatut pisussaaffiit ingerlanneranni imaluunniit Naalakkersuisunut ilaasortap Namminersornerullutik Oqartussat ingerlatsiveqarfiini assigiinngitsuni sulliveqarfiinilu susassarisaani ajornartorsiortitsilersinnaanngippat. Taamaaliortoqarpat Naalakkersuisunut siulittaasup tamanna qinersinerup misilinneqarnissaanut Inatsisartut pilersitaannut ataatsimiititaliamut piaartumik nalunaarutigissavaa. Ataatsimiititaliap nalunaarutip tiguneraniit sapaatit akunneri pingasut qaangiutsinnagit Naalakkersuisunut ilaasortaq inuutissarsiutinik taaneqartunik ingerlatsiinnarnissaanik itigartitsissuteqarfigisinnaavaa. Piffissap taaneqartup naareernerani Naalakkersuisunut siulittaasup Inatsisartunut siulittaasoq nalunaarfigissavaa, inuutissarsiutit suut Naalakkersuisunut ilaasortamut pineqartumut ingerlanneqarsinnaatitaanersut.
Imm. 3. Naalakkersuisunut siulittaasoq atuutilernermini imm. 1-imi taaneqartutut ilusilinnik inuutissarsiuteqarpat, tamanna qinersinerup misilinneqarnissaanut ataatsimiititaliamut nalunaarutigineqassaq, Naalakkersuisunullu siulittaasup taaneqartut ilaat ingerlatiinnarusuppagit, imm. 2-mut napertuuttumik iliuuseqartoqassaaq.
Imm. 4. Inatsisartunut siulittaasoq, Naalakkersuisunut siulittaasoq Naalakkersuisunullu ilaasortaq taamatut atuukkallarnerminni imm. 1-mi taaneqartutut ilusilinnik inuutissarsiutinik nutaanik ingerlataqalissanngillat".

5. § 9 imm. 7-tut imaattoq ilanngunneqassaaq:
Inatsisartunut siulittaasoq siulittaasuujunnaarnersiuteqassaaq Naalakkersuisunut ilaasortanut malittarisassat assingi naapertorlugit. Inatsisartunut siulittaasutut Naalakkersuisunullu ilaasortatut atuuffinnut ataatsikkoortumik siulittaasuujunnaarnersiaqartitsisoqarsinnaanngilaq ilaasortaajunnaarnersiaqartitsisoqarsinnaananilu, taamaallaalli atuuffinnut taaneqartunut marlunnut siulittaasuujunnaarnersiaqartitsisoqarsinnaavoq/ ilaasortaajunnaarnersiaqartitsisoqarsinnaavoq. Qanoq sivisutigisumik atuussimaneq naatsorsorneqassaaq atuuffiit sivisussusaasa katinnerat naapertorlugu.

6. § 12, imm. 2 imatut paasineqassaaq:
"Inatsisartunut ilaasortaanngitsut 1. januar 1986-ip kingorna Namminersornerullutik Oqartussat sinnerlugit sinniisuutitaalersut ullormut aningaasarsiaqartinneqassapput aningaasarsiat § 1, imm. 1-mi taaneqartut 1/365-erarterutaannik. Naalakkersuisut aningaasaqarnermut ataatsimiititaliap akuersissutigippagu Inatsisartunut ilaasortanngitsut ataatsimiititaliani sinniisoqarfinnilu Inatsisartunit Naalakkersuisunilluunniit pilersinneqarsimasuni immikkut suliassaqarfioqisuni siulittaasut aningaasarsiaqartissinnaavaat. Aningaasarsiaqartitsineq ukiumut ataasiarluni aalajangersarneqartassaaq aningaasanut inatsisip akuersissutigineqarneranut atatillugu. Aningaasarsiat qaammammoortumik siumoortumik tunniunneqartassapput. Aningaasarsiaqartitsineq qaammatip siulittaasuujunnaarnerup naanerani taamaatissaaq imaluunniit Naalakkersuisut aalajangerpata taamaatitinneqassaaq."

7. § 12, imm. 3-mi naggatip kingornagut imaattoq ilanngunneqassaaq:
"Taamaattorli Naalakkersuisut aningaasaqarnermut ataatsimiititaliap akuersissutigippagu aalajangersinnaavaat pissutsini immikkoorluinnaq ittuni aningaasarsiaqartitsineqassasoq."

 

§ 2.

Inatsit atortuulerpoq 1. november 1988.

Namminersornerullutik Oqartussat, ulloq 20. oktober 1988

Jonathan Motzfeldt

/

Lars Vesterbirk