Savaateqarneq pillugu inatsisartut inatsisaat nr. 1, 21. april 1988-imeersoq.
Inatsisip siunertaa
§ 1. Savaateqarneq pillugu inatsisartut inatsisaata siunertaraa, naasoqassutsimut naleqqiullugu kiisalu uumassusillit pinngortitallu pissusiisa ataqatigiinnerisa oqimaaqatigiissilluarnerisigut savaateqarnerup siuarsarnissaa.
Siunertaq anguneqassaaq makku aqqutigalugit,
1. Uumasut illersornerisigut
2. Pinngortitap naasullu illersornerisigut
3. Nunaminertat nerukkaatissaqarfittut naggorissarnerisigut
4. Savaatilinngortussat pikkorissutsimik piumasarisaasunik angusisimanerisigut
5. Savaatit amerlassusiisa naleqqussarnerisigut
6. Kommunalbestyrelset paasisinnerisa qulakkeernerisigut.
Oqartussat
§ 2. Naalakkersuisut akisussaaffigaat inatsisip siunertaanut naapertuuttumik savaateqarnerup ingerlanneqarnissaa.
§ 3. Kommuneni savaateqarfiusuni tamani kommunalbestyrelse kommuneqarfimmini nakkutilliisuutitaliussaq pingasunik ilaasortalimmik. Savaatillit Peqatigiit Suleqatigiissut ilaasortaatitassaminnik marlunnik toqqaassapput, taassuma aappaa inuussutissarsiutigalugu savaateqartuusoq, kommunalbestyrelselu ataatsimik ilaasortaatitassaminik toqqaassaaq, nakkutilliisuutitaliami ilaasortaanermi saniatigut siulittaasuujutigisussamik.
Imm. 2. Kommunemi nakkutilliisuutitat nakkutigissavaat inatsimmi matumani aalajangersakkat savaatilinnit malinneqarnissaat.
Imm. 3. Savaatillit Peqatigiit Suleqatigiissut siunnersuisoqarfiat kommunemi nakkutilliisuutitalianut allattoqarfiuvoq.
Savaateqarnermi piumasaqaatit
§ 4. Savaateqarfik taamaallaat inunnit inersimasutut piginnaaneqartitaasunit savaateqarnermillu ukiuni pingasuni ilinniarsimasunit ingerlanneqarsinnaavoq.
Imm. 2. Taamaattorli aamma savaateqarfik inunnit inersimasutut piginnaaneqartitaasunit, sulinikkut ilinniartinneqarsimasunit aammalu savaatilinngorniat ilinniarfiata Savaatillillu Peqatigiit Suleqatigiissut immikkut pikkorissartitsinerinut peqataasimasunit ingerlanneqarsinnaavoq.
Imm. 3. Naalakkersuisut savaatilinngorniat ilinniarfiannik, kommunalbestyrelsemik Savaatillit Peqatigiit Suleqatigiissunillu isumasioqatiginnereernermikkut maleruagassanik qulaani allassimasunit allaasumik immikkut akuersissuteqarsinnaapput.§ 5. Savaatillit Peqatigiit Suleqatigiissut inassuteqarnerisigut nersutillu nappaataannik ilisimasallit oqaaseqaateqareernerisigut Naalakkersuisut savanik uumasunik angutikuluullu anisuuinik eqqussinissamut akuersissuteqarsinnaapput.
§ 6. Naalakkersuisut nersutaatit nappaataasa tunillaattartut eqqunneqarnissaat pinngitsoortinniarlugu erseqqinnerusunik maleruagassaliussapput.
§ 7. Savat hestillu paarinerlunneqarnissaat pinngitsoortinniarlugu, savaatilinngorlaanut piginnaassutsimik piumasarisaasunut, savat naasoqassutsillu akornanni pissutsinut, nunaminertanik naggorissaanernut, savat inaannut, oqqittarfinnut aamma nerukkaasarfinnut, nerukkaatissanik nunamut eqqussuinermut taakkuninngalu atuinermut nersutillu nakorsaataannik nunamut eqqussuinermut, agguaassisarnermut atuinermullu Naalakkersuisut erseqqinnerusunik maleruagassaliussapput.
§ 8. Narssaatit toqunartulimmik seqqittarneqarnissaannut, ikuallanneqarnissaannut assigisaannullu nunalerinermik ilisimasallit inassuteqarnerisigut Naalakkersuisut erseqqinnerusunik maleruagassaliussapput, taamaalilluni uumasuaqqat ajoqutaasut ajoqusiisinnaanerat killilerniarlugu aammalu avatangiisinut tunngassuteqartut illersorniarlugit.
§ 9. Tunillaassortunik nappaalasoqartillugu imaluunniit tamanna ilimagineqarpat immikkoortitaalluni tikeqqusaannginnermut, nersutaatinik toqoraanermut assigisaannullu nersutit nappaataannik ilisimasaqartut inassuteqarnerisigut Naalakkersuisut erseqqinnerusunik maleruagassaliussapput.
Tapiissutit
§ 10. Nutaanik savaateqarfiliornernut, savaateqarfioreersuni piginnittut aamma kinguaariit paarlaannerinut, nerukkaatissanut, naggorissaatissanut, savaateqarnerup ineriartortinnissaanut pilersaarutinut, misileraavimmut Upernaviarsummut, Savaatillit Peqatigiit Suleqatigiissut siunnersuisoqarfiannut, Savaatillit Peqatigiit Suleqatigiissut nalunaarsuisoqarfiannut, kommunemi nakkutilliisuutitaasunut nunalerinermilu iluaqutissanut ilisimatusarnernut Namminersornerullutik Oqartussat kommunelu najugarineqartoq tapiissuteqarsinnaapput.
Pineqaatissiissutit
§ 11. §§ 6-9-mut savaatilik aalajangersakkanik maleruaanngippat, kommunemi nakkutilliisuutitaasut taanna mianersoqqusinnaavaat.
Imm. 2. Mianersoqqusinerup kingornatigut pissutsit iluarsineqanngippata kommunemi nakkutilliisuutitat apeqqut eqqartuussivinnut mianersoqqusineqartussanngorlugu akiliisitsisoqartussanngorluguluunniit suliassanngortissinnaavaat.§ 12. Savaatillip § 11 tunngavigalugu iliuuseqartoqarneratigut §§ 6-9-mut aalajangersakkat malinngittuarsinnarpagit Naalakkersuisut kommunemi nakkutilliisuutitat inassuteqarnerisigut aammalu Savaatillit Peqatigiit Suleqatigiissut, kommunalbestyrelsep savaatillillu pineqartup oqaaseqartereernerisigut savaatilik piumaffigisinnaavaat sivikinnerpaamik qaammatit arfinillit sivisunerpaamillu ukiup ataatsip ingerlanerani savaateqarfik tuneqqullugu.
Imm. 2. Piffissarititaasup iluani savaatillip savaateqarfini tunisimanngippagu Naalakkersuisut taanna savaateqarfimmik atuisinnaajunnaarsissinnaavaat, tassunga ilaapput ingerlatsinermi nersutaateqarnermilu illuutit.§ 13. Savaateqarfimmik atuisinnaajunnaarsitsisoqartillugu, immikkut toqqakkat, Naalakkersuisunit ataatsimik, atuisup toqqagaanik ataatsimik taakkulu marluullutik isumaqatigiissitsiniartussatut toqqagaannik ataatsimik inuttallit ingerlatsinermi aamma nersutaateqarnermi illuutinik, pigisanik atortunik, ungallunik aamma nersutaatinik il.il. naliliissapput. Isumaqatigiinnginneqartillugu isumaqatigiissitsiniartartup aalajangiinera atortussaavoq.
Imm. 2. Nunaminertanik naggorissarneqarsimasunik pitsanngorsaanerit maannamut atuisumit suliarineqarsimasut naliliinermi ilanngunneqassapput.
Ulloq atuutilerfia
§ 14. Inatsisartut inatsisaat manna ulloq 1. august 1988-imiit atuutilissaaq. Taamaalilluni savaateqarneq pillugu Inatsisartut Maleruaqqusaat 24. august 1979-meersoq atorunnaarpoq.
Imm. 2. Savaateqarneq pillugu Inatsisartut Peqqussutaanni 24. august 1979-imeersumi imaluunniit savaateqarneq pillugu siornatigut maleruagassaliarineqarsimasuni allassímasut taamaalillutik atuutiinnassapput inatsisartut inatsisaatigut matumuuna aalajangersakkatigut atorunnaarsinneqarnissamik tungaannut.
Namminersornerullutik Oqartussat, ulloq 21.april 1988
Jonathan Motzfeldt/
Kaj Egede