Kalaallit Nunaanni suliffissarsiuussisarneq pillugu Inatsisartut peqqussutaat nr. 11 ulloq 16. december 1988-imeersoq.
Suliffissaqartitsiniarnermut Inunnillu isumaginninnermut Kalaallit Nunaanni inatsimmi nr. 580-imi 29. november 1978-imeersumi § 2, tak. suliat Namminersornerullutik Oqartussanit tiguneqartussat pillugit inatsisit atuutilernissaannik Kalaallit Nunaannut ministeriap nalunaarutaa nr. 417 27. september 1979-imeersoq, naapertorlugu matumuuna makku aalajangersarneqarput:
Kapitali 1.
Pineqartut sorpiaaneri peqqussutillu atuuffii.§ 1. Suliffissarsiuussineq paasineqassaaq tassaasoq nuna tamakkerlugu illuinnaasiunngitsumik akeqangitsumillu sullissineq siunertaralugu sullivinnut tunngasut tamarmik piorsarnissaat, tamatumunnga ilaalluni sulisussat fagimiit fagimut aammalu nunap ilaanit ilaanut nooriataarsinnaanerulernissaannut nakussassarnissaat.
Imm. 2. Suliffissarsiuussisarfiup kiffartuutissavai suliffissarsiortut sulisitsisullu inuutissarsiutinit tamanit atorfiusartunillu tamanit pisut.
Imm. 3. lnatsit atuuppoq sulianut Kalaallit Nunaanni ingerlassanut ilanngullugittaaq suliffissarsiortut Kalaallit Nunaanni najugallit allallu Kalaallit Nunannut suliffissarsiortut killilersimaarneqarnissaat pillugu Inatsisartut inatsisaat nr. 18 ulloq 16. december 1988-imeersoq malillugu suliffinnut maaniittunut atorfinissinnaanissamut piumasanik eqqortitsisut.§ 2. Suliffissarsiuussisarnerup suliffissaqartitsiniarluni politikimut timitalimmut tapertatut
1) suliffeqarnermi pissutsit malittarissavai,
2) inuutissarsiutit piorsarneqarnerannut suliffissaqartitsinermullu pingaarutilinnut qanoq iliuuseqarnissat tunngavissiorlugillu nammineerluni aallartisartassavai aammalu
3) suliffeqarnermut tunngasunik paasissutissat katersorlugillu nalilersortassallugit.
Kapitali 2.
Kommunalbestyrelsep suliassai.§ 3. Kommunalbestyrelsep pilersissavaa suliffissaqartitsinermut ataatsimiititaliaq kommunalbestyrelset bygderådillu il.il. pillugit Inatsisartut inatsisaat nr. 19 28. november 1985-imeersumi ataatsimiititaliat ataavartut pillugit malittarisassat malillugit.
§ 4. Kommunalbestyrelsep pilersissavaa suliffissarsiuussisarfik immikkoortoq kommunemi suliffeqarnermut tunngasunik itsiniutinik suliaqartussaq, tak. § 5.
Imm. 2. Kommunemi suliffissarsiuussisarfik suliffissaqartitsinermut siunnersortimit siulersorneqassaaq.§ 5. Kommunalbestyrelse pisussaavoq kommunemi suliffissarsiuussisarneq isumagissallugu, ilanngullugit suliffissanik innersuussisarneq inuutissarsiutissanillu ilitsersuussineq, tak. kapitali 4.
Imm. 2. Kommunalbestyrelsep isumagissavaa suliffissaqartitsinermut pillugu ataatsimiititaliap allatseqarnissaa.
Imm. 3. Kommunalbestyrelsep kommunemi suliffissaqartitsinermut paasissutissat Naalakkersuisunut nalunaarutigisassavai.
Imm. 4. Peqqussut una malillugu kommunalbestyrelsep suliassaasa isumagineqarnerat pillugu Naalakkersuisut malittarisassiissapput.§ 6. Kommuneni inukitsuni imaluunniit pissutsit pisariaqartippassuk Naalakkersuisut kommunalbestyrelsep inassuteqarnera malillugu aalajangersinnaavaat kommunemi suliffissaqartitsinermut ataatsimiititaliamik § 3 malillugu imaluunniit § 4, imm. 1 malillugu suliffissarsiuussisarfimmik pilersitsisoqassanngitsoq.
Kapitali 3
Suliffissaqartitsinermut ataatsimiititaliaq.§ 7. Suliffissaqartitsinermut ataatsimiititaliap ataatsimiinnerini sinniisit 3 ukunannga toqqakkat ataatsimeeqataasassapput:
1) kommuneqarfimmi aalisartut piniartullu peqatigiiffinneersoq,
2) Sulinermik Inuutissarsiuteqartut Kattuffiata kommunemi immikkoortortaqarfianneersoq aammalu
3) kommunemi sulisitsisut peqatigiiffinneersoq.
Imm. 2. Inuutissarsiutitigut siunnersortimik atorfeqartoqarpat taanna aamma ataatsimeeqataasassaaq.
Imm. 3. Ataatsimeeqataasartut imm. 1-imi 2-milu taaneqartut taaseqataasinnaanngillat.§ 8. Suliffissaqartitsinermut ataatsimiititaliap kommunalbestyrelse sinnerlugu inatsisillu iluani isuma gissavai najukkami sulisitsisut, sulisartut pisortallu immikkoortoqarfiata akornanni suleqatigiilluarnissap tatigeqatigiilluarnissallu pilersinneqarnissaat, taamaalilluni najukkami inuutissarsiutinut tunngasunik siuarsaaniarneq tunngavissaqalissammat, taamaalillunilu suliffissaqarniarneq siuarsarneqassammat, aammalu suli assaqartitsiniarnermut suliniutissanik kommunalbestyrelsemut siunnersuuteqartassalluni kommunep iluani sulisinnaasut pikkorissarneqarnissaat siunertaralugu.
Imm. 2. Ataatsimiititaliaq aalajangiisassaaq qinnuteqaatit Kalaallit Nunaanni najugaqartuunngitsunik sulisoqarniarnermut tunngasut pillugit, tak. Kalaallit Nunaannut suliffissarsiortut killilersimaarneqarnissaat pillugu Inatsisartut inatsisaanni nr. 18 ulloq 16. december 1988-imeersumi kapitali 3.
Imm. 3. Suliffissaqartitsinermut ataatsimiititaliap suliai pillugit, tamatumunnga ilaalluni ataatsimiititaliaq piginnaatitaasoq suliffeqarnermut tunngasut pillugit sulisitsisunut paasisassarsiorsinnaanissamut, Naalakkersuisut erseqqinnerusunik malittarisassiorsinnaapput.
Imm. 4. Suliffissaqartitsinermut ataatsimiititaliamik § 6 malillugu pilersitsisoqarsimatinnagu imm. 1-3-mi suliassat kommunalbestyrelsep isumagissavai.
Kapitali 4.
Suliffissamik innersuussineq inuutissarsiutissanillu siunnersuineq.§ 9. Suliffissanik innersuussineq paasineqassaaq tassaasoq suliffissarsiortut sulisitsisullu akornanni atassusiineq timitalimmik suliffeqalernissaq siunertaralugu.
Imm. 2. Inuutissarsiutissanik siunnersuinermut ilaavoq inuutissarsiutissanik ilinniagassanillu qinersinermi ikiorsiineq.§ 10. Suliffissanik innersuussineq sapinngisamik pisassaaq suliffissarsiortup aammalu sulisitsisup soqutigisaat sianigalugit.
§ 11. Suliffissanik innersuussisoqartinnagu akissarsiat, sulinermi atorfeqarnermilu atukkat allat pissarsiarineqartassapput.
§ 12. Suliffissamik innersuussineq najukkamiit allamut nuunnermik kingunilik pissappat apeqqutaassaaq
1) nutsernissaq kissaatiginarnermut najukkami faginilu suliffeqarnermut atatillugu pisariaqartitat aallaavigalugit nalilerlugit,
2) suliffissarsiortoq isumaqataanersoq,
3) innersuussaq angalanermut aningaasartuuteqartitaassannginnersoq aammalu
4) innersuussaq inissaqartitaanersoq.
Imm. 2. Pissutsit immikkut ittut pillugit Naalakkersuisut angalanermut aningaasartuutit isumagisinnaavaat, tak. imm. 1-imi nr. 3. Taakku pillugit malittarisassat erseqqinnerusut Naalakkersuisunit aalajangersarneqassapput.§ 13. Sulisitsisumut imaluunniit sullivimmut suliamut tunngasunik peqatigiiffiup soqutigisaqaqatigiiffiulluunniit allap nassuiaatai malillugit suliumajunnaarnermik imaluunniit mattussinermik eqqorneqartumut sulisussanik innersuussisoqarsinnaanngilaq taama pineq inatsisinik unioqqutitsinerusoq aalajangiiffigineqanngippat.
§ 14. Atorfimmut inuttaqanngitsumut sulisussanik naleqquttunik innersuussineqaraangat suliffissarsiuussisarfik sulisitsisumut tamanna pillugu nalunaaruteqartassaaq.
Imm. 2. Sullissineq piviusunngunngitsoorpat suliffilluunniit tigugaluaannaq taamaatinneqarpat sulisitsisoq pisussaavoq tamanna suliffissarsiuussisarfimmut piaartumik nalunaarutigissallugu.§ 15. Sulisitsisup erseqqinnerusumik patsiseqarluni sulisussaq innersuussaq naaggaarsinnaavaa. Innersuussaq peqqutit suunerinik ilisimatinneqassaaq.
Kapitali 5.
Aalajangersakkat assigiinngitsut.§ 16. Sulisitsisoq suliffissarsiortunik suliffissarsiuussisarfiup imminut innersuussaanik itigartitsisoq pisussaavoq taarsíssallugit angalanermi aningaasartuutit itigartitsinermut pissutaasimappat sulisussanik allanik tigusineq aammalu sulisitsisup suliffissarsiuussisarfik piffissaalluarallartillugu nalunaarfigisimanngippagu suliartorfimmut angalaneq pinngitsoorneqarsimasinnaagaluartoq.
§ 17. Naalakkersuisut fagimik tunngaveqarlutik peqatigiiffinnik piginnaatitsisinnaapput faget piffiilluunniit ataasiakkaat iluini immikkoorluinnaq pisariaqartitsiviusuni suliffissarsiuussinissanut namminersorluni ingerlanneqartussanut.
Imm. 2. Akuersissut tunniunneqarsinnaavoq
1) peqatigiiffiup allaffia pingaarneq Kalaallit Nunaanniippat aammalu
2) peqatigiiffiup suliffissarsiuussisarfia siulersorneqarpat suliffissarsiuussinermik immikkut paasisimasalimmik.
Imm. 3. Akuersissummi pissutsit allat piumasarineqarsinnaapput.§ 18. Naalakkersuisut akisussaaffigaat suliffissarsiuussisarfinni sulisut ilinniartinnissaat aammalu kommunet suliffissaqartitsinermut ataatsimiititaliaanni ilaasortat kursusertittarnissaat.
Imm. 2. Kursusinut imm. 1-imi taasanut kommunalbestyrelset aningaasaleeqataasinnaanerat pillugu Naalakkersuisut malittarisassiorsinnaapput.§ 19. Suliffissaqartitsiniarluni qanoq iliuutsit Naalakkersuisut tapiiffigisinnaavaat. Tapiissutit annertussusii aningaasartuutissat pillugit inatsisini ukiumoortuni aalajangersarneqartassapput.
Imm. 2. Tapiissutisisinnaanermi malittarisassat erseqqinnerusut pillugit Naalakkersuisut aalajangersaassapput.§ 20. Suliffissarsiuussisarfiit atorfilittaallu sulisitsisut sulisullu pillugit paasissutissanik peqqussut manna malillugu sulinertik tunuliaqutaralugu paasisaminnik pinngitsoornatik susassaqanngitsunut nipangiussisussaatitaapput, taakku saniatigut tak. Kalaallit Nunaanni pinerluttaalisitsineq pillugu inatsimmi § 29, tak. inatsisinik atortitsinermik ministeriap inatsimmik nalunaarutaa nr. 49 13. februar 1979-imeersoq.
Kapitali 6.
Maalaarneq.§ 21. Kommunalbestyrelsep aalajangiinerinut maalaarutit sapaatit akunneri 3 qaangiutsinnagit Naalakkersuisunut tunniunneqarsinnaapput.
Kapitali 7.
Atortuulerfissaq.§ 22. Inatsisartut peqqussutaat una atuutilissaaq 1. januar 1989. Tamatumunnga peqatigitillugu suliffissarsiuussisarneq pillugu Inatsisartut peqqussutaat nr. 4 29. oktober 1985-imeersoq atorunnaassaaq.
Imm. 2. Kommuneni suliffissaqartitsiniarnermut tapiissutit pillugit nalunaarut nr. 20 20. juni 1986-imeersoq atuinnarallassaaq malittarisassanik nutaanik taarserneqarnissami tungaanut.
Namminersornerullutik Oqartussat, ulloq 16. december 1988.
Jonathan Motzfeldt/
Jens Lyberth