Kulturimut atuartitsinermullu tunngasut siulersorneqarnerat pillugu inatsisartut peqqussutaat nr. 8, 7. maj 1988-imeersoq.
Inatsisit makku:
1) Kalaallit Nunaanni meeqqat atuarfii pillugit inatsit nr. 579, 29. november 1978-imeersoq,
2) Sunngiffimmi sammisassaqartitsineq pillugu Kalaallit Nunaannut inatsit nr. 584, 29. november 1978-imeersoq, aamma
3) Kalaallit Nunaanni bibliotekeqarnermik inatsit nr. 589, 29. november 1978-imeersoq naapertorlugit matumuuna imaattut aalajangersarneqarput:
Kapitali I
Namminersornerullutik Oqartussat suliassaat.§ 1. Naalakkersuisut meeqqat atuarfianni, sunngiffinni sammisassaqartitsiniarnermi, bibliotekeqarnermi aammalu kulturimut qaammarsaanermullu tunngasunik suliaqarnermi qullersaallutik aqutsisuupput, tamakkulu pillugit maleruagassanik erseqqinnerusunik aalajangersaasinnaallutik.
Imm. 2. Naalakkersuisut rådimik immikkut paasisimannilluartumik pilersitsisinnaavoq, tamanna pisariaqarsorinaraangat.§ 2. Suliassat immikkoortunut § 1-imi taaneqartunut tunngasut tamarmik aalajangiivigisassanngorlugit inatsisartunut saqqummiunneqassapput, landskassemut aningaasartuutaassappata inatsisartut aningaasanut inatsisaanni tamakkununnga atugassatut akuersissutigineqartunit matuneqarsinnaanngitsunik.
§ 3. Naalakkersuisut meeqqat atuarfiata, sunngiffimmi sammisassaqartitsiniarnerup, bibliotekeqarnerup aammalu kulturimut qaammarsaanermullu tunnqasut kiisalu pisortat ingerlataasa allat tamakkununnga assingusut pitsanngorsagaanissaat pillugu ataatsimoortumik pilersaarusiussapput. Pilersaarusiaq suliarineqassaaq kommunenit siunnersuutigineqartut ilaatigut tunngavigalugit.
§ 4. Naalakkersuisut kommunet iliniartitsinissamut pilersaarusiaat taakkununngalu allannguutigitinniagaat akuersissutigissavaat.
Imm. 2. Naalakkersuisut aalajangersaasinnaapput atuartut atuarnerminni pissarsiaat pillugit atuarfiup qanoq isiginninneranik atuartut angajoqqaallu nalunaarfigineqartarnissaat pillugu.§ 5. Nalakkersuisut suliassat § 1-imi taaneqartut, kommuneqarfiit avataanniittuni ingerlatassat, ingerlanneqarnerat isumagissavaat.
§ 6. Naalakkersuisut makkua pilersitaasarnissaat, qanoq ingerlanneqarnissaat aningaasalersorneqarnissaallu pillugu maleruagassiussapput:
1) kollegiat,
2) atuartitsinermut/tarnit pissusiinut tunngasutigut siunnersuisarfik,
3) ilinniutissanik naqiterisitsisarneq aamma
4) ilinniusiornermut centrali.§ 7. Naalakkersuisut kommuneni bibliotekit atuarfiullu bibliotekiisa qanoq aaqqissuunneqarnissaannut qanorlu ingerlanneqarnissaannut maleruagassat aalajangissavaat.
§ 8. Kalaallit Nunaanni meeqqat atuarfianni iliniartitsisut pisortallu naalakkersuisut kommuneni ataasiakkaani kommuneqarfiillu avataartni inoqarfinni atorfinitsittarlugillu soraarsittassavaat.
Imm. 2. Kommunet meeqqanut atuarfiini pisortanik atorfinitsitsinermi kommunalbestyrelsep inassutai tamatigut malinneqartassapput, qinnuteqartup atorfiup inuttalerneqarnissaanut piumasarineqartut naammassisimagaangagit.
Imm. 3. Kommunet atuarfinni pisortanik toqqaasarnerannut, meeqqat atuarfianni ilinniartitsisunut ikiortinik (timelærerinik) taartaasartunillu (vikarinik) aamma sunngiffimmi sammisassaqartitsinermi pisortanik, ilinniartitsisunik sulisunillu allanik aammalu bibliotekarinik atorfinitsitsisarnissaannut maleruagassat naalakkersuisut aalajangissavaat.§ 9. § 1 naapertorlugu suliassat isumagineqarnissaannut naalakersuisut direktørimik atorfinitsitsissapput.
Imm. 2. Direktørip kulturimut atuartitsinermullu pisortaqarfiup naalakkersuisut erseqqinnerusumik aalajangiinerat malillugu qitiusumik siulersuinermik sulianullu tunngasutigut ingerlatsinera siulersussavaa.
Imm. 3. Kulturimut atuartitsinermullu pisortaqarfimmi sulisussatut naalakkersuisut atorfinitsissavaat siulersuinermi, ilinniartitsinermi skolepsykologimullu tunngasutigut sulisussat pisariaqartut aammalu sulisussat immikkut paasisimasaqartut allat.§ 10. Naalakkersuisut landsbibliotekari Namminersornerullutik Oqartussat bibliotekeqarneranni ulluinnarni pisortaasussaq atorfinitsissavaat.
Imm. 2. Aammattaaq naalakkersuisut atorfinitsissavaat sulisussat nunatta atuagaateqarfiata ingerlatitaanerani pisariaqartinneqartut.§ 11. Naalakkersuisut immikkut ittumik pissutissaqarpat maleruagassaliorsinnaapput, ajornarunnaarsitsisumik peqqussummi matumani peqqussutigineqartunit allaasumik aqutsinermik aaqqissuussinissamik.
Kapitali II
Kommunemi oqartussat.§ 12. Kommunalbestyrelse kommunep meeqqanut atuarfiini, sunngiffimmi sammisassaqartitsinerani, bibliotekeqarnerani aammalu kulturimut qaammarsaanermullu tunngasunik ingerlatsinerani pissutsinut pisortanit allanit aalajangiiffigineqartussanngortitaanngitsunut tamanut aalajangiisussaavoq.
Imm. 2. Suliassat immikkoortunut imm. 1-imi taaneqartunut tunngasut tamarmik kommunalbestyrelsemut saqqummiunneqassapput, aningaasanit akuersissutigineqartunit aningaasalersorneqarsinnaanngippata.§ 13. Kommunalbestyrelsep kommunemut suliarissavai:
1) atuarfinnik pilersaarutit,
2) sunngiffimmi sammisassaqartitsiniarnermik pilersaarutit.
3) bibliotekeqarnermik pilersaarutit,
4) kulturimut qaammarsaanermullu tunngasunik pilersaarutit aamma
5) ilinniartitsinissamut pilersaarutit.
Imm. 2. Pilersaarutinut tamakkununnga allannguutissat taamattaaq kommunalbestyrelsemit suliarineqassapput.
Imm. 3. Pilersaarutit pilersaarutinullu allannguutissat suliarineqassapput kulturimut atuartitsinermullu udvalgimit missiliuusiat tunngavigalugit.
Imm. 4. Pilersaarutit Kulturimut atuartitsinermullu pisortaqarfimmut nassiunneqassapput.§ 14. Kommunalbestyrelsep pisariaqartitsineq naapertorlugu pitsanngorsaatissanik pilersaarusiussavai kommunemi:
1) meeqqat atuarfiat,
2) sunngiffimmi sammisassaqartitsiniarneq,
3) bibliotekeqarneq aamma
4) kulturimut qaammarsaanermullu tunngasumik sulineq.
Imm. 2. Pitsaanngorsaanissamik pilersaarut suliarineqassaaq kulturimut atuartitsinermullu udvalgimit missiliuusiarineqartoq tunngavigalugu.
Imm. 3. Pilersaarut Kulturimut atuartitsinermullu pisortaqarfimmut nassiunneqassaaq.§ 15. Kommunalbestyrelse kommunemi meeqqat atuarfianni pisortanik atorfinitsitsinissamik soraarsitsinissamillu inassuteqartassaaq.
§ 16. Kommunalbestyrelse atuarfimmi pisortanngortitsissaaq aammalu timelærerinik, vikarinik ikiortissanillu meeqqat atuarfianni pisariaqartinneqartunik aammalu pisortassanik, ilinniartitsisussanik sulisussanillu allanik sunngiffimmi sammisassaqartitsiniarnermi,
bibliotekeqarnermi aammalu kulturimut qaammarsaanermullu tunngasunik ingerlatsinermi sulisuusussanik atorfinitsissalluni.§ 17. Kommunalbestyrelsep meeqqat atuarfiannut, sunngiffimmi sammisassaqartitsiniarnermut, bibliotekeqarnermut aammalu kulturimut qaammarsaanermullu tunngasunik suliassaasa ingerlanneqarnissaannut kommunalbestyrelse kulturimut atuartitsinermullu udvalgimik kommunalbestyrelset aammalu bygderådit il.il. pillugit inatsisartut inatsisaanni udvalgi ataannartut pillugit aalajangersakkat malillugit pilersitsissaaq.
§ 18. Kommunep meeqqat atuarfiannik, sunngiffimmi sammisassaqartitsiniarnermik, bibliotekeqarnermik aammalu kulturimut qaammarsaanermullu tunngasumik sulinermik siulersuinerata ingerlanneqarnissaanut skoledirektøri imaluunnit skoleinspektøriuneq atorfinitsinneqassaaq.
§ 19. Skoledirektøri imaluunniit skoleinspektøriuneq kommunemilu ilinniartitsisut siunnersuisoqatigiivini siulittaasoq kulturimut atuartitsinermullu udvalgip ataatsimiinnerini peqataasassapput taaseqataasinnaanatik.
§ 20. Meeqqat atuarfiini tamani atuarfeqarnermut ataatsimiititanik pilersitsineqassaaq kulturimut atuartitsinermullu udvalgip sulinerani ikiortaasussanik. Taamaattoq kommunalbestyrelse aalajangiisinnaavoq nunaqarfimmi atuarfimmi minnerusumi atuarfeqarnermut ataatsimiititaliornissaq pinngitsoorneqassasoq. Taamaattoqartillugu nunaqarfimmi bygderådip atuarfeqarnermut ataatsimiititat suliassaat isumagissavai.
Imm. 2. Atuarfeqarnermut ataatsimiititat kommunalbestyrelsep aalajangiinera tunngavigalugu 3-nik imaluunniit 5-inik ilaasortaqassapput.
Imm. 3. Kommunalbestyrelse atuarfeqarnermut ataatsimiititanut tamanut ilaasortassamik ataatsimik toqqaassaaq. Toqqagaasoq illoqarfimmi imaluunniit nunaqarfimmi atuarfiup sananeqarfigisaani najugaqartuussaaq. Atuarfeqarnermut ataatsimiititani ilaasortat allat inuit qinersinerup nalaani atuarfimmi pineqartumi atuartunut angajoqqaajusut akunnerminnit toqqassavaat.
Imm. 4. Naalakkersuisut atuarfeqarnermut ataatsimiititani angajoqqaat qinigaannik taakkualu sinniisussaannik qinersinermut maleruagassanik aalajangiissapput.§ 21. Atuarfiup pineqartup pisortaa ilinniartitsisullu rådiata siulittaasua atuarfeqarnermut ataatsimiititat ataatsimiinnerini peqataasassapput taasisinnaassuseqarnatik.
Imm. 2. Naalakkersuisut aalajangersagaliussapput atuartut rådii atuarfinni taamaattunik rådeqarfiusuni atuarfeqarnermut ataatsimiititat ataatsimiinnerini qanoq annertutigisumik peqataatinneqartassanersut.
Imm. 3. Atuartut rådiisa sinniisui ataatsimiinnerni atuartut ilinniartitsisullu ataasiakkaat oqaluuserineqarfiini peqataassanngillat.§ 22. Kommunemi illoqarfinni imaluunniit nunaqarfinni tamani sunngiffimmi sammisassanut ataatsimiititaliorneqassaaq kulturimut atuartitsinermullu udvalgip sulinerani ikiortaasussanik. Taamaattoq nunaqarfinnut minnerusunut tunngatillugu kommunalbestyrelse aalajangiisinnaavoq sunngiffimmi sammisassanut ataatsimiititaliortoqassanngitsoq. Taamaattoqartillugu sunngiffimmi sammisassanut ataatsimiititat suliassaat bygderådip isumagissavai.
Imm. 2. Sunngiffimmi sammisassanut ataatsimiititat kommunalbestyrelsep aalajangiinera tunngavigalugu 3-nik imaluunniit 5-nik ilaasortoqassapput. Naalakkersuisut immikkut pissutissaqartillugu sunngiffimmi sammisassanut ataatsimiititat 7-inik ilaasortaqarnissaat akuersissutigisinnaavaat.
Imm. 3. Kommunalbestyrelse sunngiffimmi sammisassanut ataatsimiititanut tamanut ilaasortassamik ataatsimik toqqaassaaq. Toqqagaasoq illoqarfimmi imaluunniit nunaqarfimmi toqqagaaffigisantini najugaqartuussaaq. Ilaasortat 2 imaluunniit 4 (immikkut pisoqartillugu 6, tak. imm. 2) ataatsimiititaliaqarfiusussami suliniaqatigiiffiit peqatigiiffiillu sunngiffimmi sammisassaqartitsiniarneq pillugu inatsisartut peqqussutaanni imaluunniit kulturimut qaammarsaanermullu tunngasumik sulineq pillugu inatsisartut peqqussutaanni aalajangersakkat malillugit tapiiffigineqarsinnaasut qinissavaat.
Imm. 4. Naalakkersuisut suliniaqatigiiffiit peqatigiiffiillu sunngiffimmi sammisassanut ataatsimiititani ilaasortassasa taakkualu sinniisussaasa qinerneqartarnissaanni maleruagassiussapput.§ 23. Inersimasunik atuartitsinermi pisortaq aammalu bibliotekimi pisortaq, aamma illoqarfinni sunngiffinni sammisassaqartitsiniarnermut inspektøri imaluunniit sunngiffimmi sammisassaqartitsiniarnermi pisortaaneq, sunngiffimmi sammisassanut ataatsimiititat ataatsimiinnerini peqataasassapput taasisinnaassuseqaratik.
§ 24. Kulturimut atuartitsinermullu udvalgi, atuarfeqarnermut ataatsimiititat aammalu sunngiffimmi sammisassanut ataatsimiititat kommunalbestyrelsemut qinersereernerit kingorna sapinngisamik piaarnerpaamik pilersinneqartassapput. Udvalgit ataatsimiititallu sulisassapput qaammatip nutaamik qinersiffiusup naanissaata tungaanut.
Imm. 2. Piffissap qinigaaffiup ingerlanerani atuarfinnik nutaanik pilersitsisoqarpat, taakkunani atuarfeqarnermik ataatsimiititanik qinersineqassaaq § 20-mi maleruagassat malillugit.
Imm. 3. Sinniisuusoq piffissap qinigaaffiusup ingerlanerani peqqissutsikkut qanoq issutsini, imaluunniit tamakkua assigisaannik pingaartumik peqquteqarluni suliaminit tunuarniarpat kommunalbestyrelsep aalajangissavaa qinnuteqaat taamaattoq akuerineqarsinnaanersoq. Aammattaaq angajoqqaat sinniisaat atuarfimmi atuartuutaarukkuni tunuarumasinnaavoq.
Imm. 4. Sinniisuusup tunuarnerani inissamut sinniisussaqanngippat piffissap qinigaaffiusup sinneranut ilaasortassamik qinersineqassaaq.§ 25. Ataatsimiititat siulittaasussartik namminneq qinissavaat suleriaasissartillu nammineq aalajangissallugu. Ataatsimiititat ataatsimiittassapput siulittaasup imaluunniit ilaasortat allat marluk tamanna pisariqartikkaangassuk.
Imm. 2. Siulittaasup qaqugu sumilu ataatsimiinnissaq aalajangissavaa aammalu ataatsimiinnissaq qanillivitsinnagu ilaasortat ataatsimeeqataasartullu immaqalu atuartut sinniisaat ataatsimiigiaqqussallugit. A-taatsimiinnissaq sioqqullugu siulittaasup taakku ataatsimiinnermi suut oqaluuserineqarnissaannik ilisimatissavai.
Imm. 3. Siulittaasup ataatsimiinnerit taasinerillu siulersussavai isumagissallugulu aalajangiinerit imaqarniliorneqartarnissaat. Imaqarniliaq ataatsimiinnermi tullermi akuerineqassaaq. Peqataasut tamarmik immikkut isumartik allaasoq imaqarniliorfimmut naatsumik allanneqaqqusinnaavaat aammalu aalajangiinerit pisortanut allanut nalunaarutigineqarnerini ilanngunneqaqqusinnaallugu.
Imm. 4. Atuarfiup pisortaata aamma inersimasunik atuartitsinermi pisortap siulittaasumut akisussaallutik aalajangikkat suliarineqarnissaat isumagissavaat.§ 26. Ataatsimiititat aalajangiisinnaassuseqarput ikinnerpaamik ilaasortat affaat najuuppata.
Imm. 2. Aalajangiinerit amerlanerussuteqarnikkut pisassapput. Taasinerit naligiippata siulittaasup taasinera aalajangiisuusassaaq.§ 27. Ataatsimiititat sulineranni aningaasartuutit kommunemit akilerneqassapput.
Kapitali III
Kulturimut atuartitsinermullu udvalgit sulinerat.§ 28. Kulturimut atuartitsinermullu udvalgip missiliuusiussavai:
1) atuarfinnik pilersaarutit,
2) sunngiffimmi atuartitsinermut pilersaarutit,
3) bibliotekeqarnermik pilersaarutit,
4) kulturimut qaammarsaanermullu tunngasunik pilersaarutit aamma
5) meeqqat atuarfiat, sunngiffimmi sammisassaqartitsiniarneq, bibliotekeqarneq aamma kulturimut qaammarsaanermullu tunngasumik sulineq pillugit pitsanngorsaatissanik pilersaarutit.
Imm. 2. Pilersaarutini allannguutissanut missiliuusiat taamattaaq suliarineqassapput kulturimut qaammarsaanermullu udvalgimit.§ 29. Kulturimut atuartitsinermullu udvalgi kommunep atuarfiini ilinniartitsinissamut pilersaarutissamut missiliuusiussaaq. Missiliuutit atuarfeqarnermut ataatsimiititanut susassaqartunut saqqummiunneqassapput oqaaseqarfigisassanngorlugit.
§ 30. Kulturimut atuartitsinermullu udvalgip nakkutigissavaa kommunemi meeqqat atuarfianni atuartussat tamarmik atuarnersut imaluunniit meeqqat atuarfianni piumasarineqartunut naapertuuttumik atuartinneqarnersut.
Imm. 2. Udvalgip kommunep atuarfiini atuartut ineriartornerminni immikkut qanoq iliuuseqarfigisariaqartut tapersertariaqartulluunniit immikkut atuartirtneqarnissaat aammalu allatut iliorluni perorsaanikkut pineqarnissaat isumagissavaa. Udvalgittaaq atuartut napparsimasut ajuuteqartulluunniit atuartinneqarnerminni pisariaqartumik immikkut qanoq iliuuseqarfigineqarnissaat isumagissavaa.§ 31. Kulturimut atuartitsinermullu udvalgip nakkutigissavaa meeqqat atuartuusussat namminersortumik atuartinneqartut, taakkununnga ilanngullugit meeqqat angerlarsimaffimminni atuartinneqartut, tamatumunnga aalajangersakkat malillugit imaqarluartumik atuartinneqarnersut.
§ 32. Kulturimut atuartitsinermullu udvalgi kommunep atuarfiini atuarfimmi nakorsaqartitsineq, meeqqat kigutit-nakorsaqartitaanerat aammalu atuarfimmi nerisaqartitsineq pillugit siunnersuutit pillugit kommunalbestyrelsemut oqaaseqaateqartassaaq pisariaqarpallu siunnersuutit taamaattut suliarineqarnissaat isumagissallugu.
§ 33. Kulturimut atuartitsinermullu udvalgip isumagissavaa sunngiffimmi sammisassaqartitsineq pillugu inatsisartut peqqussutaanni maleruagassat malillugit sunngiffimmi sammisassaqartitsinermik pilersitsisoqarnissaa, pilersitsisoqaraangallu pilersinneqartut akuerineqartarnissaat.
Imm. 2. Inerisimasunik atuartitsinermik aammalu soqutigisaqaqatigiit suliniutigiiffigisassaannik pilersitsineq akuerineqassapput sunngiffimmi sammisassanut atatsimiititat inassuteqarnerat malillugu.§ 34. Kulturimut atuartitsinermullu udvalgip kulturimut qaammarsaanermillu sulinermut pisariaqartinneqartutut tapersiisarnissaq, tassunga ilanngullugu ininik pisariaqartinneqartunik atugassiisarnissaq isumagissavaa.
§ 35. Kulturimut atuartitsinermullu udvalgi ukiumoortumik kommunep atuarfiisa, sunngiffimmi sammisassaqartitsinerup, bibliotekeqarnerup aammalu kulturintut qaammarsaanermullu tunngasumik sulinerup aningaasartuu tissanut siunnersuusiortassaaq kommunalbestyrelsemi akuersissutigineqartussanik.
§ 36. Kulturimut atuartitsinermullu udvalgi apeqqutit kommunemi meeqqat atuarfiannut, sunngiffimmi sammisassaqartitsiniarnermut, bibliotekeqarnermut aammalu kulturimut qaammarsaanermullu tunngasumik sulinermut tunngasut suulluunniit pillugit oqaaseqaateqarsinnaavoq kommunalbestyrelsemullu siunnersuuteqarsinnaalluni. Udvalgi apeqqutit taamaattut kommunalbestyrelsemit udvalgimut saqqummiunneqartut tamaasa pillugit oqaaseqaateqartussaavoq.
§ 37. Kulturimut atuartitsinermullu udvalgip atuarfeqarnermut ataatsimiititat peqatigalugit kommunep atuarfii aammalu aalajangersakkat meeqqat atuarfiinut atortuusut eqqortinneqarnissaat nakkutigissavai.
§ 38. Kulturimut atuartitsinermullu udvalgip sunngiffimmi sammisassanut ataatsimiititat peqatigalugit nakkutigissavai:
1) kommunep sunngiffimmi sammisassaqartitsinera aammalu sunngiffimmi sammisassaqartitsineq kommunep tapiiffigisartagaa, aammalu aalajangersakkat sunngiffimmi sammisassaqartitsinermut atortuusut eqqortinneqarnissaat,
2) kommunemi bibliotekit, aammalu aalajangersakkat bibliotekeqarnermut atortuusut eqqortinneqarnissaat aamma
3) kommunemi kulturimut qaammarsaanermullu tunngasumik sulineq, aammalu aalajangersakkat kulturimut qaammarsaanermullu tunngasumik sulinermi atortuusut eqqortinneqarnissaat.
Kapitali IV
Atuarfeqarnermut ataatsimiititat sulinerat.§ 39. Atuarfeqarnermut ataatsimiititat suliassaraat:
1) atuarfiup nakkutiginissaa,
2) nakkutigissallugu atuarfimmi atuartuusut atuartitsinermik naammaginartumik malinnaanissaat aamma
3) isumagissallugu atuanngitsoortarneq akiorniarlugu aalajangersakkat atortuusut eqqortinneqarnissaat.§ 40. Atuarfeqarnermut ataatsimiititat isumaginninnermut tunngasut atuarfimmut attuumassuteqartut anigorniarneqarneranni suleqataassapput. Aammattaaq meeqqat inuusuttullu 20-t inorlugit ukiullit ikiorneqarneranni qanoq iliuutsit pillugit oqaaseqarsinnaapput.
§ 41. Atuarfeqarnermut ataatsimiititat ilinniartitsisut rådiat suleqatigalugu atuarfiup angerlarsimaffiullu akornanni suleqatigiinnissaq periarfissinniassavaat, qaammarsaanerlu atuartut atuarfimmi qanoq innerannik paasinninnissamik anguniagaqartoq isumagissallugu.
§ 42. Atuarfeqarnermut ataatsimiititat ilinniartitsisut rådiata inassuteqarneratigut suliap ilinniartitsisut akornanni agguataarneqarnerani periusissat kiisalu sapaatip akunnerannut suliassanut pilersaarut akuersissutigissavaat.
§ 43. Atuarfeqarnermut ataatsimiititat ilinniartitsisut rådiata inassuteqarneratigut atuartitsinermut atortut suut atuarfimmi atorneqartariaqarnerat akuersissutigissavaat.
§ 44. Atuarfeqarnermut ataatsimiititat init atuartitsiviusut pissarsiarineqarnissaat pitsanngorsarneqarnissaallu kiisalu taakkua pequsersugaanissaat atortulersugaanissaallu pillugit kulturimut atuartitsinermullu udvalgimut siunnersuuteqarsinnaapput.
§ 45. Apeqqutaalersimappat atuartoq atuarfimmi immikkut atuartinneqartariaqarnersoq, atuarfeqarnermut ataatsimiititat apeqqutip inaarutaasumik aalajangiiffiginissaanut saqqummiussiffigineqartussaapput.
§ 46. Atuarfeqarnermut ataatsimiititat aningaasartuutissat atuarfimmut pineqartumut tunngasut pillugit siunnersuuteqarsinnaapput.
§ 47. Atuarfeqarnermut ataatsimiititat atuarfimmut malittarisassiussapput.
§ 48. Atuarfeqarnermut ataatsimiititat atuarfimmi ilinniartitsinissamut pilersaarummut missiliuummut kulturimut atuartitsinermullu udvalgimit suliarineqarsimasumut oqaaseqaateqassapput.
§ 49. Atuarfeqarnermut ataatsimiititat ilinniartitsisut rådiata inassuteqarnera malillugu atuarfimmi atuartunut atuarnerup nalaani ataatsimut sammisassaqartitsinissat sammisassallu suunissaat akuersissutigissavaat. Atuarfeqarnermut ataatsimiititat atuarfiup pisortaanut siunnersuuteqartarsinnaapputtaaq atuarfimmi atuartunut atuarnerup avataani sammisassaqartitsisarnissanik.
§ 50. Atuarfeqarnermut ataatsimiititat apeqqutinut atuarfimmut tunngassuteqartunut tamanut oqaaseqaateqarsinnaapput aammalu siunnersuuteqarsinnaallutik kulturimut atuartitsinermullu udvalgimut. Ataatsimiititat apeqqutinut tamanut kulturimut atuartitsinermullu udvalgimit imaluunniit kommunalbestyrelsemit oqaaseqarfigisassanngorlugit ataatsimiititanut saqqummiunneqartunut oqaaseqaateqartussaapput.
Kapitali V
Sunngiffimmi sammisassanut ataatsimiititat sulinerat.§ 51. Sunngiffimmi sammisassanut ataatsimiititat suliassaraat:
1) inersimasunik sunngiffimmi atuartitsinermut periarfissiinissaq,
2) sunngiffimmi allanik sammisassaqartitsiniarnermik tapersersuinissaq suliniuteqalersitsinissarlu,
3) sunngiffimmi sammisassaqartitsiniutinik assigiinngitsunik ataqatigiissaarinissaq, tamakkununnga ilanngullugu sunngiffimmi sammisassaqartitsineq ingerlanneqartoq meeqqat atuarfii pillugit inatsisartut peqqussutaat naapertorlugu,
4) najugarisami bibliotekeqarnermik nakkutilliinissaq,
5) kulturimut qaammarsaanermullu tunngasumik sulinermik, tassunga ilanngullugit tamanut ammasumik ataatsimiititsisarnernik aaqqissuussisarnernillu tapersersuinissaq annertusaasarnissarlu aamma
6) tamanut ammasumik ataatsimiititsinerni suleqataasarnissaq.§ 52. Sunngiffimmi sammisassanut ataatsimiititat pisariaqarfiatigut najugarisami peqatigiiffinnut suliniaqatigiiffinnullu allaffeqarnikkut ikiuussinnaapput.
§ 53. Sunngiffimmi sammisassanut ataatsimiititat najugarisami bibliotekki suleqatigalugu qaammarsaanermi atortussat qitiusumik najugarisamiluunniit pisortaqarfinniit nuna tamakkerlugu imaluunniit kommunemi qaammarsaanermi atugassatut suliarineqarsimasut aqunneqarnerat nassiussorneqarnerallu isumagissavaat.
§ 54. Sunngiffimmi sammisassanut atatsimiititat inersimasunik atuartitsinerup aamma soqutigisagaqatigiit ingerlassaasa sunngiffimmi sammisassaqartitsineq pillugu inatsisartut peqqussutaat naapertorlugu ingerlanneqartut akuerineqarnissaat kulturimut atuartitsinermullu udvalgimut inassutigissavaat.
Imm. 2. Sunngiffimmi sammisassanut ataatsimiititat ingerlassaq imm. 1 naapertorlugu akuerineqartoq pilersinneqarsimasorlu nakkutigissavaat.§ 55. Sunngiffimmi sammisassanut ataatsimiititat sunngiffimmi atuartitsinermi pisortaasut ilinniartitsisullu isumasioqatigereerlugit ininik sunngiffimmi atuartitsinermut atortussanik pissarsiniarnissaq pitsanngorsaanissarlu kiisalu init sunik atortulersugaanissaat pillugit kulturimut atuartitsinermullu udvalgimut siunnersuuteqarsinnaapput.
§ 56. Sunngiffimmi sammisassanut ataatsimiititat ininik silamilu ingerlatsivinnik sunngiffimmi sammisassaqartitsiniarnermi, bibliotekeqarnermi aammalu kulturimut qaammarsaanermullu tunngasumik sulinermut atorneqartussanik pisariaqartitsineq pillugu kulturimut atuartitsinermullu udvalgimut inassuteqarsinnaapput.
Kapitali VI
Atuarfiit pisortaat suleqatigiillu rådii.§ 57. Meeqqat atuarfii tamarmik atuarfimmi pisortamik imaluunniit skoleinspektørimik taaguutilimmik pisortaqassapput.
Imm. 2. Atuarfinni skoleinspektørimik pisortaqanngitsuni atuarfiup ilinniartitsisuisa ilaat atuarfimmi pisortanngortinneqassaaq.
Imm. 3. Pisortaq atuarfiup pineqartup siulersorneqarnerani aammalu atuartitsinermi pisortaavoq.§ 58. Kommunemi skoledirektørintik atorfinitsitsisoqarsimanngippat qitiusumik atuarfiup pisortaa skoleinspektøritut qullertut atorfinitsinneqassaaq. Skoledirektøri imaluunniit qullertut skoleinspektøri kulturimut atuartitsinermullu udvalgip nakkutilliinerani ikiuutissaq.
§ 59. Meeqqat atuarfiini tamani marluk sinnerlugit aalajangersimasunik atorfeqarlutik ilinniartitsisulinni ilinniartitsisut rådiannik pilersitsineqassaaq. Taakku tassaassapput atuarfiup pisortaa, viceskoleinspektørit, sunngiffimmi sammisassaqartitsinermi inspektørit, ilinniartitsisut tjenestemandiusut, timelærerit, ukioq kaajallallugu vikariusut kiisalu perorsaanermut tunngasumik suliallit. Skolepsykologit konsulentillu atuarfimmi aalajangersimasumik nal. akunnerinik atuartitsiffeqartut ilinniartitsisut rådianni ilaatinneqassapput. Ilinniartitsisut atuarfinni ataatsimit amerlanerusuni aalajangersimasumik nal. akunnerinik atuartitsiffeqartut ilinniartitsisut rådianni ataasiinnarmi ilaasortaasinnaapput.
Imm. 2. Atuarfinni aalajangersimasumik atorfilimmik ataasiinnarmik marlunilluunniit ilinniartitsisulinni taakku ilinniartitsisut rådiattut sulissapput.
Imm. 3. Kommuneni ataatsimit amerlanerusunik meeqqanut atuarfeqartuni kommunemi ilinniartitsisut siunnersuisoqatigiivinik pilersitsineqassaaq. Taakku tassaassapput atuarfiup pisortaa ataaseq, kommunemi atuarfimmi taamaattumik atorfeqartoqarsimappat viceskoleinspektøri ataaseq imaluunniit sunngiffimmi sammisassaqartitsinermi inspektøri ataaseq kiisalu kommunep atuarfiini tamani ilinniartitsisut sinnersaat ataasiakkaartut.
Imm. 4. Kommunemi ilinniartitsisut siunnersuisoqatigiivinut qinersineq ukioq atuarfiusoq ataaseq atortuusarpoq immikkoortukkuutaallu iluanni pisassalluni maleruagassat naalakkersuisut aalajangigaat malillugit. Ilinniartitsisut siunnersuisoqatigiivi ilaasortaaffigineqassapput skolepsykologimit ataatsimit, kommunemi skolepsykologeqarpat meeqqat atuarfianni aalajangersimasumik nal. akunnerinik atuartitsiffeqartunik.
Imm. 5. Ilinniartitsisut rådiata kommunemilu ilinniartitsisut siunnersuisoqatigiivisa siulittaasussatik namminneq qinertassavaat suleriaasissatillu namminneq aalajangersassallugit. Rådi siunnersuisoqatigiillu forretningsudvalgimik rådi siunnersuisoqatigiilluunniit
sinnerlugit rådip siunnersuisoqatigiilluunniit suleriaasissaminni aalajangiinerat malillugu oqaaseqaateqartartussanik pilersitsisinnaapput.§ 60. Kulturimut atuartitsinermullu udvalgi kommunemi meeqqat atuarfiinut tunngatillugu makkununnga tunngasut pillugit kommunemi ilinniartitsisut siunnersuisoqatigiivinit paasissutissanik piumasaqartassaaq:
1) kommuneni atuarfinnik pilersaarummut tassanilu allannguutissanut missiliuut kiisalu kommunemi meeqqat atuarfiani pitsanngorsaatissanut missiliuut,
2) kommunep atuarfiini ilinniartitsinissamut pilersaarutinut pilersaarutinilu taakkunani allannguutissanut missiliuut aamma
3) kommunep atuarfiini atuarfimmi nakorsaqarnermut, meeqqat kigutit-nakorsaqarnerannut kiisalu atuarfimmi nerisitsisarnermut tunngasunik siunnersuutit.
Imm. 2. Kommunemi ataasiinnarmik meeqqanut atuarfeqartumi nalunaarutit imm. 1-imi taaneqartut ilinniartitsisut rådiannit nalunaarutigineqassapput.§ 61. Ilinniartitsisut rådiata aalajangissavaa atuartoq atuarfimmi immikkut atuartinneqassanersoq. Ilinniartitsisut rådiata aalajangiinera atuarfeqarnermut ataatsimiititanut saqqummiunneqarsinnaavoq.
Imm. 2. Atuarfeqarnermut ataatsimiititat makku pillugit oqaaseqaatit ilinniartitsisut rådiannit pissarsiariniassavaat:
1) atuarfimmi ilinniartitsinissamut pilersaarummut tassanilu allannguutissanut missiliuut,
2) suliassat ilinniartitsisut akornanni agguataarneqarneranni periaasissat aammalu sapaatip akunnikkuutaartumik sulinermut pilersaarut,
3) atuarfimmi atuartitsinermut atortut nutaat atorneqarnissaat,
4) init atuartitsiviusut atortulersorneqarnissaannik siunnersuut,
5) aningaasartuutissat atuarfimmut tunngasut pillugit atuarfeqarnermut ataatsimiititat siunnersuutaat,
6) atuarfiup atuartuinut atuarnerup nalaani atuarnerullu naliginngisaani iliuusissanut siunnersuut aamma
7) atuarfimmi malittarisassanut siunnersuutit.
Imm. 3. Ilinniartitsisut rådiat naalakkersuisut maleruagassiaat malillugit atuarfimmi pineqartumi sanaartugassanut tunngasut suliarineqarneranni suleqataassaaq.§ 62. Ilinniartitsisut rådiat kommunemilu ilinniartitsisut siunnersuisoqatigiivi apeqqutit kommunemi atuarfeqarnermut tunngasut tamaasa pillugit oqaaseqaateqarsinnaapput aammalu atuarfeqarnermut ataatsimiititanut imaluunniit kulturimut atuartitsinermullu udvalgimut siunnersuuteqarsinnaallutik. Rådit apeqqutit kulturimut atuartitsinermullu udvalgimit imaluunniit kommunalbestyrelsemit saqqummiunneqartut tamaasa pillugit oqaaseqaateqartussapput. Rådit oqaaseqaataat siunnersuutaallu atuarfiup pisortaa imaluunniit skoledirektøri imaluunniit skoleinpektøri qullersaasoq aqqutigalugit taassuma oqaaseqaataanik ilallugit ingerlateqqinneqartassapput.
Imm. 2. Ilinniartitsisut rådiata aammalu kommunemi ilinniartitsisut siunnersuisoqatigiivisa sulineranni maleruagassat naalakkersuisut aalajangersassavaat.§ 63. Ilinniartitsisut rådiata aammalu kommunemi ilinniartitsisut siunnersuisoqatigiivisa sulineranni aningaasartuutit kommunep akilissavai naalakkersuisut maleruagassiaat malillugit.
Kapitali VII
Assuarlersinnaatitaaneq.§ 64. Kommuneni pisortat aalajangigaannut assuarliutiginiakkat naalakkersuisunut saqqummiunneqarsinnaapput. Taamaattorli naammagittaalliutit nuna tamakkerlugu ingerlatanut imaluunniit suliassarititaasunut tunngagunik aatsaat, imaluunniit meeqqat atuarfiat, sunngiffimmi sammisassaqartitsineq, bibliotekeqarneq aamma kulturimut qaammarsaanermullu tunngasumik sulineq pillugit peqqussutit ammalu inatsisartut naalakkersuisulluunniit aalajangigaasa allat qanoq paasineqarsinnaanerannut tunngasunik aatsaat saqqumiunneqarsinnaapput. Assuarliut saqqummiunneqarsinnaavoq pisortanit, suliniaqatigiinnit imaluunniit inunnit aalajangiinermi pineqartunit.
Imm. 2. Kommunemi pisortat aalajangigaannut allanut tunngatillugu assuarliutit kommunalbestyrelsemit inaarutaasumik aalajangiiffigineqassapput, inatsisikkut imaluunniit inatsisartut peqqussutaatigut allatut aalajangiisoqarsimanngippat.
Kapitali VIII
Ikaarsaariarnermi aamma atortuulersitsinermi aalajangersakkat.§ 65. Naalakkersuisut qanoq iliuusissat peqqussummi taaneqartut naammassineqarnissaat aammalu ikaarsaariarnissamut tunngsut pillugit maleruagassiorsinnaapput.
§ 66. Peqqussut atulissaaq 1. august 1988. Tamanna peqatigalugu atorunnaassaaaq kulturimut atuartitsinermullu tunngasut siulersorneqarnerat pillugu landstingip peqqussutaa nr. 5, 16. oktober 1979-imeersoq.
Imm. 2. Landstingip siusinnerusukkut peqqussutaa taanna naapertorlugu aalajangersagaasimasut atortuuinnarallassapput inatsisartut peqqussutaat una tunngavigalugu maleruagassiatigut taarserneqarnissaamik imaluunniit atorunnaarsinneqarnissamik tungaannut.
Namminersornerullutik Oqartussat, Nuuk, ulloq 7/5-1988.
Jonathan Motzfeldt/
Jens Lyberth