Utoqqalinersiutit utoqqarnullu paaqqinnittarfiit pillugit Inatsisartut peqqussutaata nr. 7-ip 28. oktober 1982-imeersup allannguutissaatut siunnersuummut nassuiaatit.

 

Ataatsimut isigalugu nassuiaatit:

1986-imi ukiakkut ataatsimiinnermi inatsisartut tunngaviatigut oqallinnerat tunngavigalugu utoqqalinersiutit utoqqarnillu paaqqinnittarfiit pillugit peqqussutip allannguutissaatut siunnersuusiortoqarsimavoq.

Siunnersuutip imarai utoqqalinersiuteqalersinnaartermut patsisissat allannguutissat, tassa inuit utoqqalinersiutimik saniatigut aalajangersimasumik annertussusilinnik isertitallit tunngaviatigut aningaasartanik pisartagaasa appartinneqartarnissaanik imalik. Siunnersuutip kinguneraa kaasarfimmiut annertuumik qaffaaffigineqarnerat, kiisalu aaqqiissuteqartarnerup akitigut aaqqiissuteqartarnermiit akissarsiat ineriartornerat ilaarlugu aaqqiissuteqartalernissamut nuunneqarnerat. Aammattaarlu siunnersuummi ilanngunneqarsimavoq utoqqalinersiutitigut akiitsunut ilanngaassuisinnaanermut allatigulluunniit eqqartuussivikkoortumik malersorneqarsinnaanermut inerteqquteqarneq; tassa Namminersornerullutik Oqartussat folketing-ip suliassaqartitsiniarnermik inunnillu isumaginninnermik Kalaallit Nunaannut inatsimmi nr. 580-imi 29. november 1978-imeersumi § 2, imm. 2 malillugu taamaaliorsinnaanermut pisinnaatinneqarsimanerat tunngavigalugu.

Allannguutissatut siunnersuutit sinneri tassaaginnarput allaffeqarfikkut naqqiissutit.

 

Aalajangersakkanut ataasiakkaanut nassuiaatit:

§ 1-imi a)-mut.

Aalajangersagaq Naalakkersuisunik erseqqinnerusunik malittarisassaliorsinnaanermut pisinnaatitsivoq qaqugukkut isumaginninnermi ataatsimiititat siusinaartumik utoqqalinersisitsisinnaanerannik, maannamullu kaajallaasitakkut tunaartassanik aalajangersakkanik erseqqissaaneruinnarluni; kaajallaasitaq pineqartoq tassaavoq Isumaginninnermi Pisortaqarfiup utoqqalinersiutit inuutissarsiorsinnaajunnaarnersiutillu pillugit kaajallaasitaa nr. 153 16. december 1982-imeersoq.

b)-mut.

Aalajangersakkap § 2, imm. 1-a utoqqalinersiutit tunngavimmikkut aningaasartaata ilivitsup 24%-ip missaani qaffanneqarnera imaraa. Tunngaviatigut aningaasartat aaqqiiffigineqartassapput ukiut tamaasa 1. april, takuut § 16.

Aalajangersakkap § 2, imm. 2-at nutaajuvoq, aalajangersaallunilu utoqqalinersiutit tunngavimmikkut aningaasartaat 3/4-nngortinneqartassasut 1986-imi akileraaruteqaataasussatut isertitat 50.000 kr.-it 69.999 kr. illu akornanniippata, aammalu taamannak 1987-imi ukiunilu tulliuttuni akileraarusigassatut isertitat 86.000 kr.-it 105.999 kr.-illu akornanniippata. Tunngaviatigut aningaasartat affarmut appartinneqassapput 1986-imi isertitat akileraarusigassat 70.000 kr. iuppata taakkuluunniit sinnersimappatigit, kiisalu 1987 ukiullu tulliuttut eqqarsaatigalugit isertitat akileraarusigassat 106.000 kr.-iuppata taakkuluunniit sinnersimappatigit tunngaviatigut aningaasartat affarmut appartinneqassapput.

Appaasarneq 1. april atuutilertassaaq, ukiorlu ataaseq atuuttassalluni. Isertitatigut killiliussat § 16 malillugu aaqqiivigineqartassapput. Isertitatigut killiliussat kisimiittunut, aappariinnut katissimanatillu inooqatigiinnut assigiipput, tassa akileraarutitigut ilanngaatit pillugit malittarisassaat atuuttut malillugit aappariinnut katissimanatillu inooqatigiinnut ilanngaat marloriaatinngortarmat. Isertitatigut killissarititaasut aaqqiivigineqartarnerat ullorsiutit malillugit ukioq ilivitsoq atuuttartussatut siunnersuutigineqarpoq, tassa ukiumi qaangiuttumi akileraarusigassatut isertitaasimasut september-oktober missaani erseqqissumik nalunaallisarmat, taamaalillunilu ukiup tulliani 1. april aallarnerfigalugu appaasinnaanermut tunngaviusinnaalersartussaalluni.

Aalajangersakkap § 2, imm. 4-aat nutaajuvoq. Ikkunneqarsimavoq isumaginninnermi ataatsimiititat periarfissinniarlugit isertitat massakkut atuuttut tunngavigalugit annerusumik tunngaviatigut aningaasartaliinissaannut, tassa ukiup siuliani isertitanut nalunaarsorsimasunut § 2, imm. 2 malilugu tunngavigineqartussanut sanilliullugit isertitat annertuumik allanngorsimatillugit. Naatsorsuutigineqarpoq aalajangersagaq atorneqartassasoq akissarisatigut annertuumik appariaateqartoqarsimatillugu, soorlu aappap inooqatilluunniit toquneratigut allamilluunniit peqquteqartumik avinnikkut, taamaalilluni utoqqalinersiutit kisimik annerusumik inuuniutigineqalerpata. Tunaartassat erseqqinnerusut Naalakkersuisut nalunaarutaatigut nassiussorneqassapput.

c)-mut.

Aalajangersakkap ilanngunneqarnissaa siunnersuutigineqarpoq Naalakkersuisut inummut tapit pillugit erseqqinnerusunik nalunaarusiorsinnaanerat anguniarlugu, taamaaliornikkut utoqqalinersiutillit assigiinnik ajornartorsiutillit kommunimi sorlermiinnertik apeqqutaatinnagu assigiissaartumik pineqarsinnaalernissaat anguniarlugu. Tunaartassat taamaattut Isumaginninnermi Pisortaqarfiup utoqqalinersiutit inuutissarsiorsinnaajunnaarnersiutillu pillugit kaajallaasitaani nr. 153-imi 16. december 1982-imeersumi aalajangersarneqareersimapput, matumalu siunnersuutigineqarnerata siunertariinnarpaa tunaartassat nalunaarutinngorlugit saqqummiunnissaat.

d)-mut.

Tassani aalajangersarneqarpoq kaasarfimmiut ukiumut 13.200 kr.-nik annertussuseqassasut, tassa qaammammut 1.100 kr.-ninngorlugit, massakkut malittarisassat atuuttut malillugit annertussuseritinneqartut 70%-it missaanni qaffallugit. Taamaalilluni kaasarfimmiut ullumikkut ilinniagaqartut kaasarfimmiuinut missiliuutilerput. Aningaasartat akissarsiat ineriartornerat ilaarlugu aaqqiivigineqartassapput.

e)-mut.

Aalajangersagaq nutaaq utoqqalinersialinnik tunngaviatigut aningaasartatigut tapitullu tunniunneqartartutigut akiitsunut tunngatillugu ilanngaanneqarsinnaannginnerannik eqqartuussisutigullu tamakku pillugit malersuiffigineqarsinnaannginnerannik qulakkeerisoq. Aalajangersakkap taamaallaat kingunerissavaa akiitsutigut kinguartoorutinit ilanngaassisannginnissap qulakkeerneqarnera. Taamaalilluni periarfissaqartuartussaavoq aningaasartuutinut aalajangersimasunut, soorlu ineqarnermut akiliutinut, kallerup inneranut, kiassarnermut il.il. piffissami utoqqalinersiutit tunniunneqarnerisa nalaani akilerneqartussartut ilanngaatsittarnissamik isumaqatigiissuteqarnissamut.

f)-mut.

Allaffeqarnikkut allannguut, tassani aalajangersarneqarluni inuit kommunit agguataarsimanerisa avataanni najugaqartut Isumaginninnermi Pisortaqarfimmut utoqqalinersiaqalernissamik qinnuteqartassasut. Tamanna tassaavoq isumaginninnermi aqutsineq aaqqissuussaanerlu pillugit inatsisartut peqqussutaanni Isumaginninnermi Pisortaqarfiup taakkununnga "isumaginninnermi ataatsimiititatut" isumaginninnermilu allaffittut sulinissaanik aalajangersaasimanerup kingunera.

g)-mut.

Allannguallaat malittarisassanik atuutereersunik aalajangersaaqqinneq, taanna malillugu Isumaginninnermi Pisortaqarfiup aalajangigai aamma naammagittaalliorsinnaanermut malittarisassat atuuttut malillugit naammagittaalliuutigineqarsinnaapput, takuuk isumaginninnermi aqutsineq aaqqissuussinerlu pillugit inatsisartut peqqutaat.

h)-mut.

Aalajangersagaq allanngortinneqarpoq, taamaalilluni siunissami aaqqiissuteqarnermi SIK-p Pisortallu Isumaqatigiinniartartoqatigiivisa ilinniagaqarsimanngitsut akissarsiaat pillugit isumaqatigiissut atuuttoq aallaavigineqartalissalluni; ullumikkut akissarsiaq taanna akileraarutserneqannginnermini 48,50 kr.-iuvoq. Sulisitsisut sulisullu isumaqatigiissutigisimavaat ukiut isumaqatigiissutip atuuffiani ukiut ilaanni akissarsiat 1. april aaqqiivigineqartarsinnaasut. Taamatut isumaqatigiissuteqarsimaneq taamaalilluni aamma utoqqalinersiutit annertussusiannut sunniuteqartussaavoq. Misilittakkalli takutippaat akissarsiat pillugit isumaqatigiissutit taamaattut atuutilerfissartik kingoqquterujussuarlugu naammassillugit isumaqatigiinniutigineqartartut. Utoqqalinersiutit tunngavimmikkut aningaasartaasa kingumoortumik aaqqiivigineqarnissaat utoqqalinersiallit kommunillu eqqarsaatigalugit tulluartuusorineqarsimanngilaq. Taamaattumik siunnersuutip matuma aalajangersarpaa aaqqiissuteqartarneq utoqqalinersiutinut sunniuteqalertassasoq ukiup isumaqatigiissuteqarfiup tulliani 1. april aallarnerfigalugu, tassalu tunngaviatigut aningaasartat annertussusissaat siunnersuutigineqartoq tamanna tunngavigalugu aalajangerneqarsimalluni.

i)-mut.

§ 17, imm. 1-imi aalajangersagaq atorunnaarpoq, tassa 1. januar 1988-ip kingorna soqutaassuseeruttussaagami. § 17, imm. 2-mi massakkut § 17-inngortumi aningaasartaatinneqartut massakkut siunnersuutigineqartut annertussusiat aaqqiivigineqaqqittussaajunnaarlugu annertussusilerneqarsimapput. Aalajangersagaq taanna taamaallaat inunnut 1. april 1975 sioqqullugu 60-inik ukioqalersimasunut atuuppoq, taamanikkut landsrádet ileqqoreqqusaat 25. marts 1975 atuutilermat, tassa tamatuma kingorna utoqqalinersinissamik kinguartitsisimanerup kingunerisaanik tapisisitsisoqarsinnaajunnaarmat.

§ 2-mut.

Siunnersuutigineqarpoq inatsisartut peqqussutaat 1. april 1988-mi atuutilissasoq.