Namminersornerullutik Oqartussat nalunaarutaat nr. 30, 28. december 1988-imeersoq arfanniarnerup killilersugaaneranut tunngasoq.
Inatsisartut inatsisaat nr. 12 22. november 1984-imeersumi inuutissarsiutigalugu piniarnermut aallaaniarnermullu tunngasumi § 4 najoqqutaralugu aalajangersarneqarpoq:
§ 1. Nalunaarut arfanniarnermut, tikaagullinnit annerusunut, immami ?alaallit Nunaata aalisarfittaani immanilu Kalaallit Nunaata eqqaaniittuni atuuttuuvoq.
Imm. 2. Imm. 1 malillugu piniarsinnaatitaapput inuit Kalaallit Nunaanni najugaqarlutik aalajangersimasumik inuiaqatigiinnut kalaallinut attaveqartut, inuutissarsiutigalugu piniarsinnaanermut aallaaniarsinnaanermullu akuerineqarlutik kommunemit najugaqarfimminnit uppernarsaammik tunineqarsimasut.§ 2. Piniarneq pillugu nalunaarummi aalajangersakkami pineqarput arfernik § 1-imi taaneqartunik pisaqarneq imaluunniit piniarneq qanorluunniit ittoq.
Imm. 2. Arfernik taakkuninnga eqqaassineq pisaqarnissamik siunertaqanngitsoq inerteqqutaavoq.§ 3. Arferit arnavissat piaqqisarpata taakku piaraalluunnit pisarineqassanngillat.
§ 4. Arfiviit (grønlandshval) arfiviilluunniit allat piniaqqusaanngillat.
§ 5. Tunnullit piniaqqusaanngillat.
§ 6. Qipoqqaat piniaqqusaanngillat.
§ 7. Kigutilissuit piniaqqusaanngillat.
§ 8. Tikaagulliusaarnat piniaqqusaanngillat.
§ 9. Arfanniarnermi qamutillit tuukkartallit igeriuttakkat 50 mm-imik qaangerluguluunniit sulloqqortussusillit (kaliber) taammaallaat atorneqaqqusaapput.
§ 10. Qaammatisiutit malillugit ukiup ingerlanerani tikaagulliusaat amerlanerpaamik 23-t Kitaani pisarineqarsinnaapput.
Imm. 2. Ukiumut tikaagulliusaartassat kommunenut agguataarneqarput ima:
Nanortalik 0 Qaqortoq 2 Narsaq 0 Paamiut 3 Nuuk 5 Maniitsoq 2 Sisimiut 2 Kangaatsiaq 1 Aasiaat 1 Qasigiannguit 1 Ilulissat 2 Qeqertarsuaq 1 Uummannaq 0 Upernavik 0 Imm. 3. pisassanit sillimmatissatut tikaagulliusaat pingasut illuartinneqarput. Sillimmatissatut illuartitat siusinnerpaamik 1/10-89 Inuutissarsiornermi pisortaqarfimmiit KNAPK KANUKOKA-lu suleqatigalugit agguaanneqassapput.
Imm. 4. Imm. 1-imi, 2-mi aamma 3-mi pisassat eqqaaneqartut ukiup ingerlanerani sinnerlugit pisaqartoqassagaluarpat ukiup tulliani sinnernerisa amerlaqataannik ilanngaasoqassaaq.
Imm. 5. Tikaagulliusaat 15,2 meterinit anginerusut taamaallaat pisarineqarsinnaatitaapput.
Imm. 6. Qulaani kommuneni eqqaaneqartuni tamani kommunalbestyrelset kommunet pisassaat angallatinut qamutililinnut agguaatissavaat, ikinnerpaamik angallatit marluk ataatsimik tikaagulliusaartassittarlugit.
Imm. 7. Kommuneni ataaseq sinnerlugu tikaagulliusaartassiviusimasuni kommunalbestyrelset tikaagulliusaartassanik ataasiakkaaginnarnik pisassiisinnaapput.
Imm. 8. Piffissami 1. junimiit 31. august ilanngullugu tikaagulliusaartoqaqqusaanngilaq.§ 11. Tikaagulliusaartassat tamakkerneqarsimanerat pillugu Naalakkersuisunut ilaasortaq radiokkut tusagassiuutitigullu nalunaaruteqarsinnaavoq.
Imm. 2. Naalakkersuisunut ilaasortaq taamatut nalunaaruteqareeraangat qaammatisiutit malillugit ukiumi pineqartumi tikaagulliusaartoqaqqittassanngilaq.§ 12. Arfertat piniartunit kommunemut piaarnerpaamik nalunaarutigineqartassapput tassanngaanniillu piaarnerpaamik Aalisarnermut Suliffissuaqarnermullu Naalakkersuisoqarfimmut, telex nr. 90613-imut, nassiuteqqinneqarlutik, tak. nalunaarut arfertanut pissatanullu tunngasoq.
§ 13. Nalunaarummi aalajangersakkanik unioqqutitsinerit mianersoqqussummik akiliisitsinermilluunniit kinguneqarsinnaapput. Suliassat tassunga tunngassuteqartut inuutissarsiutigalugu piniarnermut aallaaniarnermullu Inatsisartut inatsisaani malittarisassat malillugit suliarineqartassapput.
§ 14. Nalunaarut 1/1-89 atortuulerpoq.
Imm. 2. Nalunaarutip atuutilerneratigut Namminersornerullutik Oqartussat nalunaarutaat nr. 18 24. juni 1987-imeersoq arfanniartarnerup killilersugaaneranut tunngasoq atorunnaarsinneqarpoq.
Nuuk, ulloq 28. december 1988
Kaj Egede/
Jørn Graversen