Namminersornerullutik Oqartussat nalunaarutaat nr. 27, 27. december 1988-imeersoq rejerniarsinnaanermut, saarullinniarsinnaanermut suluppaagarniarsinnaanermullu akuersissutinut tunngasoq.

Inatsisartut inatsisaaani nr. 11-mi 21. november 1984-imeersumi inuutissarsiutigalugu aalisarnermut tunngasumi § 8, imm. 2 aamma 3, kiisalu § 10, § 12, § 14 aamma § 23 najoqqutaralugit aalajangersarneqarpoq:

 

§ 1. Nalunaarut Kalaallit Nunaata aalisarfittaani inunnut piginneqatigiiffinnullu kalaallit angallataannik inuutissarsiutigalugu kinguppanniarnermik, saarullinniarnermik suluppaagarniarnermillu ingerlataqartunut atortuuvoq, tak. inatsisartut inatsisaanni inuu-
tissarsiutigalugu aalisarnermut tunngasumi § 3.
Imm. 2. Nalunaarummi angallatit angissusii allassimapput uuttueriaatsit inatsit nr. 203-mi 18. maj 1977-imeersumi umiarsuarnik uuttuisarnermut tunngasumi aamma maleruagassani siusinnerusukkut atuuttuni aalajangersakkat naapertorlugit.

§ 2. Angallat sunaluunniit atorlugu rejerniarsinnaaneq akuersissummik tunngaveqartinneqassaaq. Angallatinik 75 BRT-iusunik 120 BT-usunilluunniit (angallatip qanoq uuttuuteqarneranut allagartaa malillugu) taakkunanngaluunniit anginerusunik saarullinniarneq suluppaagarniarnerluunniit akuersissuteqarnissamik piumasaqaateqarfiuvoq.
Imm. 2. Akuersissut qaammatisiutit malillugit sivisunerpaamik ukiumut ataatsimut qinnutigineqarlunilu tunniunneqartassaaq. Qinnuteqarnissamut killigititaq Naalakkersuisunut ilaasortamit aalajangersarneqartassaaq. Qinnuteqaat qinuteqarnermi immersugassamut Inuutissarsiornermi Pisortaqarfimmi pissarsiarineqarsinnaasumut allanneqassaaq.
Imm. 3. Akuersissut aalisarnissamut piumasaqaatinik erseqqinnerusunik imaqarsinnaavoq.
Imm. 4. Angallatit umiarsuarmi tunisassiorsinnaanermut akuersissuteqarfigineqartut aalisarsinnaanermut akuersissuteqarfigineqarneranni piumasarineqarsinnaavoq pisamik agguarneri aalajangersimasut nunami tunisassiorfinni tunisassiassanngorlugit nunniguttassagaat.
Imm. 5. Akuersissummi piumasarineqarsinnaavoq pisat tunisassiorfinnut aalajangersimasunut tunineqartarnissaat.
Imm. 6. Nalunaarutip immikkut ittup kalaalit aalisariutaasa inuttalersugaanerannut tunngasup atulersinneqarnissaata tungaanut akuersissuteqarnermi piumasarineqarpoq minnerpaamik angallatip inuttaasa 70%-iisa Kalaallit Nunaanni ukiuni kingullerni marlunni najugaqarsimanissaat najugaqartuarnissaallu kalaallinullu inuiaqatigiinnut aalajangersimasumik attuumassuteqarnissaat, uppernarsaatissaqartillugu aalisarnermik inuutissarsiuteqavinneq. Angallatinut angallatit pisassalinnut tunngatillugu piumasaqaatip naammassineqarsimaneranut uppernarsaatit umiarsualivimmiit aallarnerit tamaasa Kalaalit Nunaanni Aalisarsinnaanermut Akuersissutinik Naakutilliivimmut nassiunneqartassaaq inuttaasunut pisanullu allattuiffissap immersorneqarneratigut, tassunga ilanngunneqassaaq aalisarsinnaanermut allagartap normua.
Imm. 7. Immikkut pissutissaqartillugu Naalakkersuisunut ilaasortap imm. 6-imi piumasarineqartut maleruanngitsoortissinnaavai.

§ 3. Angalatit 75 BRT-illit 120 BT-illilluunniit annerusulluunniit (angallatip qanoq uuttuuteqarneranut allagartaa malillugu) akuersissutaanni allanneqassaaq angallammit aamma piginnittumit pisarineqarsinnaasut annertussusii.
Imm. 2. Angallatit 75 BRT-init 120 BT-inilluunniit minnerusut akuersissutaanni allanneqarsinnaavoq angallatip piginnittuulluunniit pisarisinnaasaasa annertussusii.
Imm. 3. Akuersissummi pisat annertussusissai piffissanut sumiiffinnullu agguataarneqarsinnaapput, soorlu aamma akuersissut tamarmiusoq piffissamut alajangersimasumut atortussanngortinneqarsinnaasoq.
Imm. 4. 1-imiit 3-mut aalajangersakkani taaneqartuni akuersissutinik tunniussinermi piumasarineqartuni tunngavigineqassapput pisassarititaasinnaasut annertussusiisa nalilerneqarneri, angallatit pisaqarsinnaassusii aamma inuutissarsiutigalugu aalisarnerup eqqornerusumik sinerissami ineriartortinnissaata siammarnissaa siunertaralugu.
Imm. 5. Imm. 1, 2 3-miluunniit pisassarititaasutut aalajangersarneqarsimasut annertussusii Naalakkersuisunut ilaasortamit aaqqiivigineqarsinnaapput, pisassarititaasut tamarmiusut aalajangiiffigineqarnerini Naalakkersuisunut ilaasortap naliliinera malillugu aaqqiissuteqarnissaq pisariaqarsorinartinneqarpat. Taamatut aaqqiisoqarsinnaavoq piffissat sumiiffiilluunniit aalajangersimasut eqqarsaatigalugit. Taamatuttaaq piffissat sumiiffiilluunniit imm. 3-mi aalajangersarneqarsimasut pillugit Naalakkersuisunut ilaasortaq aaqqiissuteqarsinnaavoq.
Imm. 6. Aalisarneq unitsinneqassaaq
a) pisassarititaasut imm. 1-imi 2-milu malillugit aalajangerneqarsimasut pisarineqarpata,
b) imm. 3-mi qanoq iliuusissatut aalajangersarneqarsimasut malinneqartussanngortillugit imaluunniit
c) pisassatut akuersissutigineqartut tamarmiusut (TAC) pisarineqarpata. Aalisarnerli kingusinnerpaamik unitsinneqassaaq taanna pillugu Naalakkersuisunut ilaasortaq radiokkut tusagassiuutitigulluunniit nalunaaruteqarpat. Taamatut nalunaaruteqarneq piffissanut sumiiffinnulluunniit aalajangersimasuinnarnut killilerneqarsinnaavoq.
Imm. 7. Akuersissut angallammiitinneqassaaq angallammut akuersissummi allassimappat angallatip piginnittullu qanoq amerlatigisunik pisaqarsinnaaneri.

§ 4. Akuersissut uterteqquneqarsinnaavoq naalakkersuisunut ilaasortaq isumaqarpat aalisarnissamut piumasaqaataasut malinneqarsimanngitsut.

§ 5. Akuersissut allamut tunniunneqarsinnaanngilaq.
Imm. 2. Akuersissut atorunnaassaaq,
a) piginnittup toqunerani,
b) piginneqatigiiffiup akuersissummik piginnittup
c) nunap allap imartaani aalisarsinnaanermut akuersissummik pissarsinermi imaluunniit
d) angallatip akuersissummik piginnittup tunineqarnerani annaanneqarsinnaajunnaarluniluunniit umiiarnerani.
Imm. 3. Akuersissummik tunniussaqarnermi piumasarineqartut allannguuteqarsimappata, tassunga ilanngullugu piginnittuusut allannguuteqarneranni, tamanna Naalakkersuisunut Ilaasortamut akuerisassanngorlugu saqqummiunneqassaaq.

§ 6. Nalunaarummi matumani aalajangersakkanik unioqqutitsineq akiliisitaanermik kinguneqarsinnaavoq. Suliassallu tassunga tunngassuteqartut Inatsisartut inatsisaanni inuutissarsiutigalugu aalisarnermut tunngasumi maleruagassat malillugit suliarineqartassapput.

§ 7. Nalunaarut manna atortuutilerpoq 1. januar 1989.
Imm. 2. Nalunaarutip atortuulerneratigut Naaminersornerullutik Oqartussat nalunaarutaat atortuujunnaarsinneqarput makku:
a) nr. 29 4. december 1987-imeersoq 1988-imi rejerniarnissamut akuersissummut tunngasoq,
b) nr. 30 4. december 1987-imeersoq 1988-imi saarullinniarnissamut akuersissummut tunngasoq kiisalu
c) nr. 31 4. december 1987-imeersoq 1988-imi suluppaagarniarnissamut akuersissummut tunngasoq.

Nuuk, ulloq 27. december 1988

Kaj Egede

/

Jørn Graversen