Namminersornerullutik Oqartussat nalunaarutaat nr. 25, 27. december 1989-imeersoq uiluinniarnermut tunngasoq.

Inatsisartut inatsisaanni nr. 11 21. november 1984-imeersumi inuutissarsiutigalugu aalisarnermut tunngasumi § 8, imm. 2 aamma 3, kiisalu § 10, § 12, § 14, § 16, § 17 aamma § 23 najoqqutaralugit aalajangersarneqarpoq:

 

§ 1. Nalunaarut Kalaallit Nunaata aalisarfittaani   inuutissarsiutigalugu uiluinniarnermik ingerlatsisunut, inunnut piginneqatigiiffinnullu Kalaallit Nunaanni aalisarsinnaanermik akuersissuteqartunut atuuppoq.
Imm. 2. Nalunaarummi angallatit angissusii allassimapput uuttueriaatsit inatsit nr. 203-mi 18. maj 1977-imeersumi umiarsuarnik uuttuisarnermut tunngasumi aamma siusinnerusukkut maleruagassani atuuttuni aalajangersakkat naapertorlugit. Angallatip uuttuutaanut allagartaq aalajangiisuussaaq nalunaarut malillugu angallatip pineqartup usisinnaassusianut killigitinneqartup sorliup atorneqarnissaanut.

§ 2. Uiluinniarsinnaaneq uiluinniarsinnaanermik akuersissummik tunngaveqartinneqassaaq.
Imm. 2. Akuersissut qaammatisiutit malillugit sivisunerpaamik ukiumut ataatsimut qinnutigineqarlunilu tunniunneqartassaaq.Qinnuteqarnissamut killigititaq Naalakkersuisunut ilaasortamit aalajangerneqartassaaq. Qinnuteqaat qinnuteqarfissamut allanneqassaaq Inuutissarsiornermi Pisortaqarfimmiit tunniunneqartumut.
Imm. 3. Akuersissut aalisarnissamut piumasaqaatinik erseqqinerusunik imaqarsinnaavoq.
Imm. 4. Angallatinut umiarsuarmi tunisassiorsinnaanermut akuersissuteqarfigineqartunut piumasarineqarsinnaavoq pisamik agguarneri aalajangersimasut nunami tunisassiorfinni tunisassiassanngorlugit nunniguttassagaat.
Imm. 5. Akuersissummi piumasarineqarsinnaavoq pisat tunisassiorfinnut aalajangersimasunut tunineqartarnissaat.
Imm. 6. Nalunaarutip immikkut ittup kalaallit aalisariutaasa inuttalersugaanerannut tunngasup atulersinneqarnissaata tungaanut uiluinniarsinnaanermut akuersissutinik tunniussinissamut piumasarineqarpoq angallatip inuttaasa minnerpaamik 70 %-iisa Kalaallit Nunaanni aalajangersimasumik ukiuni marlunni najugaqarsimanissaat najugaqartuarnissaallu kiisalu kalaallinut inuiaqatigiinnut aalajangersimasumik attuumassuteqarnissaat, uppernarsaatissaqartillugulu aalisarnermik inuutissarsiuteqavinneq. Angallatinut pisassalinnut tunngatillugu, piumasaqaatip naammassineqarsimaneranut uppernarsaat umiarsualivimmiit aallarnerit tamaasa Kalaallit Nunaanni Aalisarsinnaanermut Akuersissutinik Nakkutilliivimmut nassiunneqartassaaq inuttaasunut pisanullu allatuiffissap immersorneqarneratigut, tassunga ilanngunneqassaaq aalisarsinnaanermut allagartap normua uppernarsaat nassiunneqartassaaq.
Imm. 7. Immikkut peqqutissaqartillugu imm. 6-imi aalajangersakkat Naalakkersuisunut Ilaasortap maleruanngitsoortissinnaavai.

§ 3. Akuersissut piumasaaqaateqarfigineqarsinnaavoq pisassat qaqugu sumilu aalisarneqassanerinik. Tamannalu tunngaveqassaasq pisassat qanoq amerlatiginerinik, angallatip qanoq aalisarsinnaatigineranik aammalu inuutissarsiutigalugu aalisarnerup eqqornerusumik sinerissami ineriartortinnissaata siammarnissaa siunertaralugu.

§ 4. Angallatinut angallammi tunisassiorsinnaanermik akuersissuteqartunut akuersissummi angallatip aamma piginnittup qanoq annertutigisumik aalisagarsinnaanera allanneqassaaq. Angallatinut allanut tunngatillugu akuersissummi allanneqarsinnaavoq angallatip aamma piginnittup qanoq annertutigisumik aalisarsinnaanera.
Imm. 2. Naalakkersuisunut Ilaasortamit imm. 1-imi pisassaritinneqartut annertussusissaattut aalajangerneqarsimasut allanngortinneqarsinnaapput, pisassaritinneqartut tamarmiusut aalajangiivigineqarneranni pisassaritinneqartut tamarmiusut pisarineqarnissaat eqqarsaatigalugu Naalakkersuisunut Ilaasortap naliliinera malillugu allannguuteqartitsinissaq pisariaqartinneqarpat. Aamma taamatut allanngortitsisoqarsinnaavoq piffissaq aalisarfiillu aalajangersimasut eqqarsaatigalugit.
Imm. 3. Aalisarneq taamaatinneqassaaq,
a) pisassat annertussusii imm. 1-imi 2-milu aalajangerneqarsimasut pisarineqarpata,
b) imm. 2-mi aalajangersakkat malillugit qanoqiliuuseqartoqartariaqarpat imaluunniit
c) pisassatut akuersissutigineqartut tamarmiusut pisarineqarpata. Aalisarnerli kingusinnerpaamik taamaatinneqassaaq Naalakkersuisunut ilaasortaq radiokkut tusagassiuutitigulluunniit taanna pillugu nalunaaruteqarpat. piffissamut aalisarfinnullu aalajangersimasuinnarnut taamatut nalunaaruteqarneq attuumassuteqarsinnaavoq.
Imm. 4. Akuersissut umiarsuarmiitinneqassaaq.

§ 5. Akuersissut uterteqquneqarsinnaavoq naalakkersuisunut ilaasortaq isumaqarpat aalisarnissamut piumasaqaataasut malinneqarsimanngissut.

§ 6. Akuersissut allamut tunniunneqarsinnaanngilaq.
Imm. 2. Akuersissut atorunnaassaaq
a) piginnittup toqunerani,
b) piginneqatigiiffiup akuersissummik piginnittup atorunnaarnerani,
c) nunap allap imartaani aalisarsinnaanermut akuersissummik pissarsinermi imaluunniit
d) angallatip akuersissummik piginnittup tunineqarnerani annaanneqarsinnaajunnaarluniluunniit umiiarnerani.
Imm. 3. Akuersissutip tunniunneqareernerata kingorna allanguisoqarpat, aammattaaq piginnittut allanngortinnerinut tunngasut Naalakkersuisumut saqqummiunneqassapput akuerisassanngorlugit.

§ 7. Ministereqarfiup nalunaarutaani nr. 629-imi 22. december 1976-imeersumi amma nr. 176-imi 14. maj 1980-imeersumi ?alaallit Nunaata aalisarfittaanut tunngasuni aalajangersakkat najoqqutaralugit tunngaviusumik killigititat avataanni 3 sømilimit avasinnerusumi titarnerup sinerissallu akornani angallatit 75-BRT-llit 120 BT-llillu taakkunanngalu annerusut uiluinniarsinnaatitaanngillat.
Imm. 2. Immikkorluinnaq peqqutissaqartillugu Naalakkersuisunut Ilaasortaq imm. 1-imit allaanerusumik angallatinut ukiuni siuliini uiluinniareersimasunut aalisarsinnaanermik akuersissuteqarsinnaavoq, taamaaliorneq pisuussutit uumassusillit angallatillu pisaqarsinnaassusiisa atorluarneqarnissaat eqqarsaatigalugit iluaqutaappat.

§ 8. Umiarsuarmi tunisassiornermi perlukut ikkannersuarnut uilueqarfinnut iginneqassanngillat.

§ 9. Immersugassaq Inuutissarsiornermi Pisortaqarfimmi pissarsiarineqarsinnaasoq atorlugu allattuisoqartassaaq (logbog). Immersugassaq uunga nassiunneqassaaq: Aalisarsinnaanermut Akuersissutinik Nakkutilliivik, Postbox 501, 3900 Nuuk.

§ 10. Kalaallit Nunaanni Aalisarnermut Akuersissuteqartarnermik Nakkutilliisoqarfimmut ataasinngornerit tamaasa nal. 1100-lertinnagu sapaatip akunnikkoortumik nalunaaruteqartoqartassaaq. Sapaatip akunnikkoortumik nalunaarut imaqartassaaq makkunannga:
a) Sapaatip akunneranut nalunaarut.
b) Angallatip aqqa.
c) Angallatip umiarsualivimmiinnermini ilisarnaataa.
d) Angallatip radiokkut attaveqarnermi ilisarnaataa.
e) Angallatip nalunaaruteqarnermini sumiissusia.
f) Sapaatip akunnerani qaangiuttumi uiluiit pisarineqarsimasut ammarneqaratik salissimallutilli oqimaassusii (ataasinngornermi nal. 0000-miit sapaatikkut nal. 2400-mut). Kg-nngorlugit nalunaarutigineqartassapput.
g) Sapaatip akunnera pineqartoq.
h) Ulloq nalunaaqqutarlu nalunaarfik.
i) Angallammi naalagaasup aqqa.
Imm. 2. Sapaatip akunnerata ingerlanerani angallammut allamut pisanik usingiarsimagaanni nalunaarutigineqassaaq uiluiit ammarneqanngitsut salissimasulli qanoq annertutigisut usingiarneqarsimanersut.
Imm. 3. Sapaatip akunneranut nalunaarutit telefonikkut (2 32 99) telexikkulluunniit (90 400) nalunaarutigineqartassapput.

§ 11. Nalunaarummi aalajangersakkanik unioqqutitsineq akiliisitaanermik kinguneqarsinnaavoq. Suliassallu tassunga tunngassuteqartut Inatsisartut inatsisaanni inuutissarsiutigalugu aalisarnermut tunngasumi maleruagassat malillugit suliarineqartassapput.

§ 12. Nalunaarut manna atortuulerpoq 1. januar 1989.
Imm. 2. Uuma nalunaarutip atortuulernerani nalunaarut nr. 28 4. december 1987-imeeersoq uiluinniarnermut tunngasoq atortuujunnaarsinneqarpoq.

Nuuk, ulloq 27. december 1988

Kaj Egede

/

Jørn Graversen