1988-imi kapisilinniarsinnaanermut akuersissutit pillugit Namminersornerullutik Oqartussat nalunaarutaat nr. 18, 8. juli 1988-imeersoq.
Inuutissarsiutigalugu aalisarneq pillugu inatsisartut inatsisaanni nr. 11 21. november 1984-imeersumi §§ 7, 8, 9, 12 aamma 14 tunngavigalugit makku aalajangersarneqarput:
§ 1. Nalunaarut Kalaallit Nunaata kujammut isuata kitaani NAFO-llu killeqarfiisa ilaasa 1-imik taaneqartartup iluani inuutissarsiutigalugu aalisarnermut tunngavoq. Tassa tassani nammineq nerisassatut aalisarneq ilaatinneqanngilaq.
Imm. 2. Tunngaviusumik killeqarfimmiit (basislinien) avammut 40 sømilit avataani kapisilinniartoqaqqusaanngilaq.§ 2. Akuersissummik tunineqarsimasut kisimik inuutissarsiutigalugu kapisilinniarsinnaatitaapput.
Imm. 2. Kapisilinniarsinnaatitaanermut akuersissut taamaallaat tunniunneqarsinnaavoq inunnut piginneqatigiinnullu il.il. inuutissarsiutigalugu aalisarnermik ingerlatsinermik uppernarsaatilinnut. Akuersissut angallammut inummullu qinnuteqarnermi tunuliaqutaasumut tutsinneqartassaaq.
Imm. 3. Angallatit 50 BRT/BT 50-inik angissusillit taannalu qaangerlugu angissusillit akuersissummik tunineqarsinnaanngiilat.
Imm. 4. Angallatit angissusaannut uuttueriaaseq inatsit nr. 203 18. maj 1977-imi aalajangersagaq siusinnerusukkullu aalajangersakkat nalunaarummi atorneqarput. Angallatip usitussusiata allagartaa malillugu nalunaarummi killiliussatut piumasarineqartut aalajangiunneqartassapput.
Imm. 5. Nalunaarummi piumasarineqartut malillugit akuersissutinik tunineqarsinnaasut, kommunenit allagartanik tunineqartassapput, kommunet aalisarnermi suliffissuaqarnermilu naalakkersuisoq sinnerlugu qinnuteqaatinik akuersisinnaatitaammata. Akuersissutinik tunineqartussat ataasiakkaat qanoq annertutigisunik pisassaqarsinnaatitaanerat kommunet ataasiakkaat namminneq kommunemi piniartut aalisartullu peqatigiiffiata inassuteqaataa tunngavigalugu aalajangertassavaat. Akuersissut immersugassamik kommunenut Inuutissarsiornermi Pisortaqarfimmiit nassiunneqarsimasumik immersuinikkut tunniunneqartassaaq.
Imm. 6. Aalisartut akornanni naleqquttumik agguaassinissaq anguniarlugu naalakkersuisunut ilaasortap piniutinut, piniutit ilusaannut imaluunniit piniariaatsinut inerteqqutinut killilersuinernulluunniit tunngasunik aalajangiisinnaavoq. Aalajangiineq pisassaaq KNAPK-p isumaqatiginiareerneratigut, taakkununngalu tunngasut tusagassiuutitigut nalunaarutigineqarsinnaapput.
Imm. 7. Qinnuteqaatinik itigartitsinerit aalisarnermi suliffissuaqarnermilu naalakkersuisumut maalaarutigineqarsinnaapput uunga: Inuutissarsiornermi Pisortaqarfik, Box 269, 3900 Nuuk.§ 3. Kapisilinniarneq taamaallaat qarsorsanik qassutinillu 140 mm-inik nigartalinnik (tasillugit) ingerlanneqassaaq, nigartaasa annertussusiat 8 pct-imik nikingatinneqarsinnaatitaavoq.
Imm. 2. Qassutit nigartaasa uuttornerat pisarpoq aalisakkanik misissuisup nigartanut uuttuutaata ikkunneratigut 1/2 kg-mik oqimaassusilimmik ikkussiffigalugu taannalu nakkartillugu. Nigartat tamarmik imm. 1-imi piumasaqaat malissavaat.§ 4. Kapisilinniarneq aamma kapisilinniarluni atortunik ningitsineq ullut uku nallertinnagit aallartinneqarsinnaanngilaq.
a) 1. augustiutinnagu ukunani: Nanortalik, Qaqortoq Narsarlu.
b) 25. augustiutinngagu ukunani: Paamiut, Nuuk, Maniitsoq, Sisimiut, Kangaatsiaq, Aasiaat, Qasigiannguit, Ilulissat, Qeqertarsuaq, Uummannaq Upernavillu.§ 5. Kapisilinniarnermi pisassaritinneqartut 25. september 1988-iutinnagu ima killilersorneqarput:
Pisassat taaneqartut nunguppata, kingorna qarsorsarsorluni 20 tonsit aalisarneqarsinnaapput. Aalisarneq qanoq ingerlanneqassanersoq KTU-p KNAPK-llu akornanni isumaqatigiissutigineqassaaq.
Imm. 2. Pisat Kalaallit Nunaanni tunitsivinnut tulaanneqassapput. Tunisassiorfiup aalisarnissamut akuersissummi qanoq kapisileertigineq nalunaartassavaa. Qanoq kapisileersinnaatiginermik akuersissutaasimasut qaangerneqannginnissaat tunisassiorfiup akuersissutillu inuttaata akisussaafigaat.
Imm. 3. Aatssat kommunemut kapisileerfigineqarsinnaalereersunut kapisileertoqarsinnaavoq.§ 6. Naalakkersuisunut ilaasortap KNAPK isumasioqatigeriarlugu kommunekkuutaarlugit pisassarititat pisarineqanngitsut kommunenut allanut nuussinnaavai. Kisiannili aatsaat taamatut iliortoqarsinnaavoq 25. september 1988-ioreerpat. Tassungalu atatillugu immaqa annertunerusunik pisassiisoqarsinnaavoq. Taakkulu tunniunneqartut nungulerpata qaqugu pisassat aalisarunnaarneqarnissaannik naalakkersuisoq nalunaaruteqassaaq.
Imm. 2. Pisariaqartillugu nalunaarutigisassat imm. 1-mi taaneqartut tusagassiuutitigut tusarliunneqartassapput. Aalisarnerup unitsinneqarnerata kingorna arlaannaatigulluunniit inuutissarsiutigalugu kapisilinniarneq inerteqqutaavoq, aamma nunatta iluani sumulluunniit tuniniaanissaq siunertaralugu aalisarneq inerteqqutaavoq.§ 7. Nalunaarummi aalajangersakkanik unioqqutitsineq akiliissitsinernik/akuersissummilluunniit arsaarinninnermik kinguneqarsinaavoq. Suliassallu tassunga tunngassuteqartut Inatsisartut inatsisaanni inuutissarsiutigalugu aalisarnermut tunngasumi maleruagassat malillugit suliarineqartussaapput.
Imm. 2. Akiliisitsinerit aningaasartaasa affai naalagaaffiup karsianut nakkartinneqassapput, affai Namminersornerullutik Oqartussanut taakkulu KNAPK-p ikiorsiisarnermi aningaasaateqarfianut (Carl Egedes fond) aalisartunut atugarliortunut aalisartullu qimataannut ikiuutitut agguaatassanngorlugit nakkartinneqassapput.§ 8. Nalunaarut 22. juli 1988 atuutilerpoq. Ilutigalugu Namminersornerullutik Oqartussat nalunaarutaat nr. 19 6. juli 1987-imeersoq kapisilinniarsinnaatitaanermut akuersissutinut tunngasoq atorunnaarpoq.
Nuuk, ulloq 8. juli 1988.
Kaj Egede/
Einar Lemche