Kalaallit Nunaanni sumiissusersiortutut ilinniartitaanerit pillugit nalunaarut nr.17 17. juni 1988-imeersoq.
Inuussutissarsiutitigut ilinniartitaanerit, ilinniagaqarnermi tapisiat inuussutissarsiutitigullu ilitsersuisarneq Kalaallit Nunaannut atuuttoq pillugu inatsisartut peqqussutaanni nr. 2-mi 16. november 1984-imeersumi § 1, imm. 2 naapertorlugu Kalaallit Nunaanni sumiissusersiortut ilinniartitaanerannut makku aalajangersarneqarput:
Kapitali 1.
Aalajangersakkat nalinginnaasut.§ 1. Sumiissusersiortutut ilinniartitaanerit siunertaraat Kalaallit Nunaanni niuernikkut aalisarnikkullu angallatinut sumiissusersiortut aalisariutinilu naalagassat ilinniartinneqarnissaat. Ilinniartitaanerit aqqutigalugit qulakkeerneqassaaq sumiissusersiortutut soraarummeersimanermik allagartartaarnissaq Umiartornermik inuutissarsiuteqarnermut inatsimmi nr. 240-mi 6. juni 1985-imeersumi piumasaqaataasut naapertorlugit.
Imm. 2. Ilinniartitaanerit ilinniagassartaat kiisalu soraarummeernissamik siunnersuuteqarnerit soraarummeersitsinissallu piareersarneqassapput danskit umiartornermik ilinniartitaaneq pillugu inatsisaat naapertorlugu, takuuk inatsimmik nalunaarut nr. 518 4. december 1985-imeersoq, kiisalu tamatumunnga ilassutitut sumiissusersiortut ilinniartitaanerat pillugu suliffissuaqarnermut ministerip aalajangersagai maleruagassiaalu.
Imm. 3. Ilinniartunngorsinnaapput umiartornermik ilinniartitaaneq pillugu danskit inatsisaanni piumasaqaataasunik naammassinnissinnaasut.§ 2. Ilinniartitaanerit ingerlanneqassapput Kalaallit Nunaanni sumiissusersiornermik umiarsuaaqqallu naalagassaannut ilinniarfimmi Naalakkersuisunit akuerineqarsimasumi.
Imm. 2. Ilinniarfik Namminersornerullutik Oqartussanit ingerlanneqassaaq, aammalu Ilinniartitaanernut Pisortaqarfik ilinniarfimmut nakkutilliisuussalluni.
Imm. 3. Ilinniarfik immikkoortortanik pilersitsisinnaavoq Ilinniartitaanernut Pisortaqarfimmiit siunnersuuteqarneq tunngavigalugu, taakkununngalu ilinniarfik akisussaavoq nalunaarummi matumani aalajangersakkat naapertorlugit.
Imm. 4. Inuussutissarsiutitigut ilinniartitaanernut Naalakkersuisup Søfartsstyrelse-mut kiisalu Eksamenskommission-intut suliassiissutigisinnaavaa ilinniartitaanerit soraarummeernissallu pilersaarusiornissaat nakkutiginissaallu nalunaarut manna naapertorlugu.§ 3. Ilinniarfik forstander-imit pisortaaffigineqassaaq. Ilinniartitsisut siunnersuisoqatigiivi pilersinneqassapput, katitigaanissaat suliassaallu naalakkersuisumit akuerineqassallutik Kalaallit Nunaanni Ilinniartitaanermut Pisortaqarfiup siunnersuuteqarneratigut.
Imm. 2. Ilinniarfimmi ilinniartut akornanni ilinniartut siunnersuisoqatigiivi pilersinneqassapput, katitigaanissaat suliassaallu naalakkersuisumit akuerineqassallutik Kalaallit Nunaanni Ilinniartitaanermut Pisortaqarfiup siunnersuuteqarneratigut.
Kapitali 2.
Ilinniartunngortitsisarneq.§ 4. Ilinniarfiup siunnersuuteqarneratigut Kalaallit Nunaanni Ilinniartitaanermut Pisortaqarfiup ukiut tamaasa aalajangertassavaa ilinniartut qanoq amerlatigisut sumiissusersiornermik ilinniarfimmut ilinniartunngortassanersut.
Imm. 2. Ilinniartitaanerni sammivinni ataasiakkaani atuartitsinerup aallartinnissaanut ingerlannissaanullu tunngavigineqartassaaq ilinniartunngortussat naleqquttumik amerlassuseqarnissaat, tamanna aalajangerneqartassaaq Kalaallit Nunaanni Ilinniartitaanermut Pisortaqarfimmit ilinniarfiup siunnersuuteqarneratigut.
Kapitali 3.
Ilinniartitaanerit naggasernissaat.§ 5. Ilinniartut nalunaarummi matunami sumiissusersiortutut ilinniartitaanernut pineqartunut atatillugu angusillutik soraarummeersimasut, Søfartsstyrelse-mi direktør-imit soraarummeersimanermik uppernarsaammik tunineqartassapput.
Kapitali 4.
Aalajangersakkat immikkut ittut.§ 6. Aalajangiinerit nalunaarut manna naapertorlugu aalajangiunneqarsimasut pillugit naammagittaalliuutit maalaarutillu naalakkersuisumut tunniunneqarsinnaapput sivisunerpaamik sapaatit akunnerisa 4 ingerlanerisa iluanni.
§ 7. Ilinniarfiup siunnersuuteqarneratigut Kalaallit Nunaanni Ilinniartitaanermut Pisortaqarfiup direktøria Søfartsstyrelse-p direktørianik isumaqatiginninniarsinnaavoq nalunaarummi matumannga aammalu tamatumunnga tunngatillugu danskit nalunaarutaani atuuttunit nigortiterigallarnissamik akuerineqarnissamut.
§ 8. Nalunaarut atortuulersinneqarpoq ullormi 1. august 1988-imi.
Imm. 2. Umiartornermik ilinniartitaaneq pillugu inatsimmi nr. 70-imi 15. marts 1967-imeersumi, sumiissusersiortut pillugit inatsisikkut nr. 339-kkut 26. juni 1975-imeersutigut allanngortinneqartumi aalajangersakkat Kalaallit Nunaannut tunngatillugu atorunnaarsinneqarput.
Nuummi, ulloq 17. juni 1988
Jens Lyberth/
Ejvind Christoffersen