Namminersornerullutik Oqartussat atuartunik kalaallisut oqaasiliunngitsunik atuartitsineq pillugu nalunaarutaat nr. 11, 11. maj 1988-imeersoq.
Meeqqat atuarfii pillugit landstingip peqqussutaani nr. 6-imi 16. oktober 1979-imeersumi kingusinnerusukkut allannguutilimmi § 12, stk. 3 naapertorlugu atuartunik kalaallisut oqaasiliunngitsunik atuartitsineq pillugu erseqqinnerusumik aalajangersakkat matumuuna aalajangerneqarput.
§ 1. Nalunaarummi uani atuartunik kalaallisut oqaasiliunngitsunik oqarnermi eqqarsaatigineqarput atuartut kalaallit oqaasiinik ima ilikkartigisimanngitsut atuartitsineq kalaallit oqaasii atorlugit ingerlanneqartoq malinnaaffigisinnaanagu.
Stk. 2. Atuartoq kalaallisut oqaasiliunngitsutut taassallugu pissutissaqartumik qularineqarpat nalunaarut manna malillugu atuartinneqarnissaanik angajoqqaat kissaatigisaat akuerineqassaaq, tamanna allakkatigut nalunaarutigippassuk atuarfiup pisortaanut, taassumannga siunnersorluarneqarsimanertik tunngavigalugu.§ 2. 4. - 12. klassetrinnini kalaallit oqaasiisa allamiut oqaasiisut ilinniartitsissutigineqarnissaat unnersuussutigineqassaaq.
Stk. 2. 2. - 3. klassetrinnini kalaallit oqaasiisa allamiut oqaasiisut ilinniartitsissutigineqarnissaat unnersuussutigineqarsinnaavoq.
Stk. 3. Aatsaat ilinniartitsisussaqanngippat stk. 1 aamma 2 naapertorlugit ilinniartitsilluarsinnaasunik, kalaallit oqaasii allamiut oqaasiisut ilinniagassatut unnersuussutigineqanngissinnaapput.§ 3. Atuartitsinerup illersorneqarsinnaanera naapertorlugu atuartut kalaallisut oqaasiliunngitsut atuartut kalaallisut oqaasillit peqatigalugit atuartinneqassapput, atuartut taakkua marluiusut akornanni inuttut inooqatigiinnermi peqatigiinnerup annertusarnissaa anguniarlugu.
§ 4. Atuartitsineq aaqqissuunneqassaaq atuartut qallunaat Danmarkimi ukiumikkut taamaaqatimik atuarfiini ingerlaqqinniarunik sukkulluunniit atuaqataasinnaalissutissaannik.
§ 5. Atuartut kalaallit imaluunniit qallunaat oqaasiinik atuilluarsinnaanngitsut periarfissat naapertorlugit inunnguutsiminnik oqaasiinik ilinniartinneqarnissaat aaqqissuunneqarsinnaavoq.
§ 6. Klassemi kalaallisut oqaasiliunngitsunik ukioqatigiinnik, 18-inik imaluunniit taakkunannga amerlanerusunik ilinniartulimmi tiiminik agguaassineq ukununnga ilanngunneqartoq atorneqarsinnaavoq. Klassenut ukioqatigiinnik 18-it inorlugit atuartoqartunut tiintit ikilineqarsinnaapput, naleqq. klasset kalaallisut oqaaseqarfiusut pillugit aalajangersakkat.
Stk. 2. Klasset ukioqatigiinnut agguagaanngitsut 12-inik imaluunniit taakku sinnerlugit atuartoqartut pissutsit najoqqutaralugit sap. akunneranut tiimii amerlineqarsinnaapput.
Stk. 3. Holdit kalaallisut oqaasiliunngitsunik 11-nik imaluunniit taakkunannga ikinnerusunik atuartoqarsimappata sap. akunneranut tiimissat ikilineqartassapput. Taamaattorli holdi 1 - 3-nik atuartoqarpat minnerpaamik 5 tiimit 5 atuartumut ataatsimut atorneqassapput.§ 7. Nalunaarut una atulissaaq 1. auqust 1988, taarsissavaalu Kultureqarnermi atuartitsinermilu Pisortaqarfiup kaajallaasitaa 6/84.
Nuuk, ulloq 11.05.1988.
Jens Lyberth/
Aqigssiaq Møller
Ilanngussaq (pdf-format)