Kalaallit Nunaanni nannut eqqissisimatitaanerat pillugu Namminersornerullutik Oqatussat nalunaarutaat nr. 7, 5. maj 1988-imeersoq.

Kalaallit Nunaanni pinngortitamik allanngutsaaliuineq pillugu Inatsisartut inatsisaanni nr. 11-mi 12. november 1980-imeersumi § 2, imm. 1 aamma Inuutissarsiutigalugu piniarnermut aallaaniarnermullu Inatsisartut inatsisaanni nr. 12-imi 22. november 1984-imeersumi § 4, imm. 1 a) naapertorlugit aalajangersarneqarput:

 

§ 1. Nannut (Ursus maritimus) taamaallaat piniarneqarsinnaapput inunnit Kalaallit Nunaanni najugaqartunit kalaallinullu inooqatiqiinnut aalajangersimasumik attuumassuteqartunit, kiisalu piniarnermik aallaaniarnermillu inuutissarsiuteqavinnerminnut allagartamik kommunemi najugarisaminni kommunalbestyreelsemit tunineqarsimasunit.
Imm. 2. Taamaattoq kinaluunniit, inunnit § 1-imi piumasaqaatinik naammassinninngitsunit angallanneqartoq imaluunniit akissarsiaqarluni ingiortaasoq nannunniarsinnaatitaanngilaq.
Imm. 3. Naak imm. 2-mi aalajangersagaq taamaakkaluartoq, akissarsiaqarluni ingiortaasoq nammineq imm. 1-imi piumasaqaatinik naammassinnittoq nannunniarsinnaatitaavoq, akissarsiffigalugu ingiugaa tassaasimappat pisortani atorfeqarluni angalasoq.

§ 2. Nannut piaqqat marlunnik ukioqalernertik tikillugu kiisalu nanut arnavissat taamaattunik piaqqisartut ukioq kaajallallugu eqqissisimatitaapput. Taamaattoq kommuneni Avanersuarmi, Upernavimmi kiisalu Illoqqortoormiuni nannut piaqqat qaammatit 12-it sinnerlugit pisoqaassusillit arnavissallu, taama piaqqisartut, imm. 2-mi taaneqartumik piffissap eqqissisimatitsiffiusup avataani pisaasinnaatitaapput.
Imm. 2. Nannut imm. 1-imi taaneqartunut ilaanngitsut Kalaallit Nunaanni tamarmi piffissami 1. juli - 31. august eqqissisimatitaapput, taamaattorli iasiilap kommuniani.
Imm. 3. Kisianni nannut angutivissat inersimasut kisermaat ukioq tamaat piniaqqusaapput.

§ 3. Nannut apissiminniittut akornusersornissaat, tamatumunnga peqatigitillugu assannissaat inerteqqutaavoq.

§ 4. Timmisartut, helikopterit qamutillu motorillit, tamatumani ilanngullugit snescooterit, kiisalu angallatit 40 BRT-it sinnerlugit angissusillit nannunniarnermi imaluunniit piniarfimmut utimullu angallatitut atorneqassanngillat.
Imm. 2. Toqunartut, kiisartut, nigartuutit aallaasilluunniit namminneq aallartussiat atorneqassanngillat.
Imm. 3. Qoorortuuaqqat, timmiarsiutit kiisalu aallaasit eqqarasuartartut eqittaannakkalluunniit nannunniarnermi atorneqassanngillat.

§ 5. Taamaallaat nannunik ilisimajunnaartitsisoqartarlunilu nalunaaqutsersuisoqartassaaq Namminersornerullutik Oqartussanit akuerineqarsimagaanni.

§ 6. Nannut piaraat ilanngullugit uumasuutigeqqusaanatillu Kalaallit Nunaannit aallaruteqqusaanngillat Namminersornerullutik Oqartussanit akuerineqanngitsumik.

§ 7. Nannup unioqqutitsinikkut pisarineqartup neqaanik amianik ilaanilluunniit sumik arlaanik pisineq pinerluunniit inerteqqutaavoq.

§ 8. maleruaqqusanik siuliini allassimasunik unioqqutitsineq akiliisitsissutaasinnaavoq, kiisalu nannut unioqqutitsilluni pisarineqarsimasut pissarsiarineqarsimasulluunniit neqaat amiilu pisataallu allat arsaarinnissutaassallutik. Arsaarinnissutaasut sumut atornissaat Kalaallit Nunaanni Namminersornerullutik Oqartussanit aalajangiiffigineqartassapput. § 4-mi aalajangersakkanik unioqqutitsinermi angallatigineqartut sakkugineqartullu arsaarinnissutaasinnaapput.
Imm. 2. §§-ini 1-2-mi aamma 4-mi aalajangersakkanik  unioqqutitsinermut piniartoq kisimi akisussaanngilaq, aammali akisussaavoq angallammik, qimussimik imaluunniit sakkumik allamik piniarnermi atorneqarsimasumik piginnittoq, piniariaqataasimaguni imaluunniit sakkut pineqartut taakku unioqqutitsilluni piniarnermut atorneqarumaarnissaat ilisimaguniuk.

§ 9. Namminersornerullutik Oqartussat ilisimatuut misissuinissaannut siunertanullu allanut nalunaarummi maleruaqqusanit allaasunik immikkut akuersissuteqarsinnaapput.

§ 10. Nalunaarut erniinnaq atulerpoq tamatumalu peqataanik Kalaallit Nunaanni nannut eqqissisismatitaanerat pillugu nalunaarut nr. 10, 19. marts 1985-imeersoq atorunnaarpoq.

Kalaallit Nunaanni Namminersornerullutik Oqartussat, 5. maj 1988.

Aqqaluk Lynge

/

Dorthe Johannsen