Namminersornerullutik Oqartussat nalunaarutaat nr. 4, 30. marts 1988-imeersoq tikaagullinniarnermut tunngasoq.

Inuutissarsiutigalugu piniarnermut aallaaniarnermullu inatsisartut inatsisaanni nr. 12, 22. november 1984-imeersumi § 4-mut naapertuuttumik aalajangerneqarpoq:

 

§ 1. Tikaagulliit Kalaallit Nunaata aalisarnikkut imartaani piniarneqarsinnaapput taamaallaat piffissami aprilip 1-aniit decemberip 31-at ilanngullugu.
Imm. 2. lmm. 1-imi taaneqartoq tikaagullinniarsinnaaneq kisimi atuuppoq inunnut Kalaallit Nunaanni najugaqartunut aalajangersimasumik inuiaqatigiinnut kalaallinut attaveqartunut, inuutissarsiutigalugu piniarsinnaanermut aallaaniarsinnaanermullu akuerineqarlutik kommunemit najugaqarfimminnit uppernarsaammik tunineqarsimasunut.
Imm. 3. Tikaagulliit kisimiillutik sikkussaasimasut imaluunniit kisimiillutik sassanut akuusut imm. 1-imi aalajangersagaq apeqqutaatinnagu januarimi, februarimi martsimilu pisarineqarsinnaapput.

§ 2. Tikaagulliit taamaallaat piniarneqarsinnaapput qamutilinnik tuukkartalinnik 50 mm-inik kaliberilinnik taakkunanngaluunniit kalibereqarnerusunik. Toqulertornissaat anguniarlugu qamutilinneqareernerisa kingorna qoorortuunik 7,62 mm-inik annernilluunniit kaliberilinnik nangillugit toqusarneqarsinnaapput.

§ 3. Aalisarnermut suliffissuaqarnermullu Naalakkersuisoq § 2-mi aalajangersakkat malinnagit immikkut ittumik akuersissuteqarsinnaavoq tikaagulliit amerlassusissaat aalajangeriikkat - ikittuinnaalli - pisarineqarsinnaasut, imaattoqarsimappat
a) taamaalioqqusinermik qinnuteqaat kommunalbestyrelsemit najukkamilu aalisartut piniartullu peqatigiiffiannit akuereqqullugu inassutigineqarsimappat,
b) allaganngorlugu uppernarsarneqassaaq tikaagullinniarnissaq peqataaniartunut nunaqqataannullu aningaasatigut annertuumik pingaaruteqartoq,
c) nutaanik neqitugassaqarnissaq ima pingaartigisoq najukkami angallatinit anginernik qamutililinnit tamanna tamakkiisumik isumagineqarsinnaanani.
Imm. 2. Immikkut ittumik akuersissuteqarnissamut makku piumasarineqarput, tassalu
a) tikaagullinniarneq ataatsimoorullugu tikaagullinniarnertut aaqqissuunneqassasoq ikinnerpaamik angallatinit tallimanit peqataaffigineqartumik,
b) tikaagullinniarneq qooroortuunik 7,62 mm-inik kaliberilinnik taakkunanngaluunniit kalibereqarnerusunik aallaaserluni ingerlanneqassaaq (qoorortuuararsorneq, timmiarsiusersorneq aallaasinillu eqittaannartakkanik atuinerit inerteqqutaapput),
c) angallatit tamarmik unaanik tuukkartalinnik, alernik (aminnerpaamik 12 mm-inik) puttaqutinillu tikaagullimmik puttatitsisinnaasunik peqassapput,
d) tikaagullinniarneq aallartinneqassanngilaq peqataasut tamarmik tikaagullinniarnerup aallartinneranik nalunaarfigineqartinnagit,
e) tikaagullik sukkanerpaamik toqunneqassaaq.

§ 4. 1988-imi kitaani amerlanerpaamik tikaagulliit 110-it pisarineqassapput.
Imm. 2. 1988-imi tikaagullittassat kommunenut agquataarneqarput ima:

Nanortalik 6
Qaqortoq 8
Narsaq 4
Paamiut 7
Nuuk 16
Maniitsoq 8
Sisimiut 10
Kangaatsiaq 5
Aasiaat 8
Qasigiannguit 6
Ilulissat 9
Qeqertarsuaq 5
Uummannaq 5
Upernavik 3

Imm. 3. Tikaagulliit qulit sillimmatiginiarlugit agguaanneqanngikkallarput. Taakkulu siusinnerpaamik 1. oktober 1988 Inuutissarsiornermi Pisortaqarfiup KNAPK-p KANUKOKA-llu isumasioqatiginerisigut agguaakkumaarpai.
Imm. 4. Kommuneni qulaani taaneqartuni kommunalbestyrelset namminneq kommunep pisassai angallatinut tuukkartalinnik qamutililinnut piniartunullu tikaagullissinnaanissaminnik § 3 tunngavigalugu qinnuteqartunut agguaatissavaat.
Imm. 5. Kommunalbestyrelsep pisassat agguaatereerunigit, paasissutissat tassunga tunngasut Inuutissarsiornermi Pisortaqarfimmut nassiutissavai.
Imm. 6. Kalaallit Nunaata kitaani 1988-imi allat tikaagulleqqusaanngillat.

§ 5. Tunumi 1988-imi amerlanerpaamik 12-it tikaagullittarineqarsinnaapput.
Imm. 2. Tikaagullittassat pisassaritinneqartut naammatsinneqarneri radiokkut tusagassiuutitigullu naalakkersuisumit nalunaarutigineqarsinnaapput.
Imm. 3. Nalunaarut taamaattoq nalunaarutigineqaraangat Tunumi tikaagullittoqarsinnaajunnaartassaaq.

§ 6. Tikaagullinnermik nalunaarutit piaartumik tikaagullittumit kommunemut ingerlatinneqartassapput (ataatsimoorluni tikaagullissimagaanni: kommunemut aalisartut piniartullu peqatigiiffiata nalunaarut nassiuttassavaa).
Imm. 2. Kommunet immersuiffissamut Inuutissarsiornermi Pisortaqarfiup immersuiffissiarisimasaanut nalunaarsuisassapput. Immersugarlu Inuutissarsiornermi Pisortaqarfimmut, Box 269, 3900 Nuuk, qaammatit aallartinneri tamaasa qanoq amerlatigisunik tikaagullissimanernik imaqartut nassiunneqartassapput, tak. Namminersornerullutik Oqartussat nalunaarutaat arfernut arfernullu pissatanut tunngasoq.

§ 7. Nalunaarummi maleruagassiarineqartunik unioqqutitsinerit akiliisitaanermik kinguneqarsinnaapput. Unioqqutitsisoqassagaluarpat suliassaq suliarineqassaaq inuutissarsiutigalugu piniarnermut aallaaniarnermullu inatsisartut inatsisaat malillugu.

§ 8. Nalunaarut erngiinnaartumik atuutilissaaq.
Imm. 2. Matumuunalu Namminersornerullutik Oqartussat nalunaarutaat nr. 12, 21. maj 1987-imeersoq arfernut arfernullu pissatanut tunngasoq atorunnaarpoq.




Nuuk, ulloq 30. marts 1988




Moses Olsen

/

Einar Lemche