Eqquiniaasitsinermi akileraarutit pillugit Inatsisartut inatsisaat nr. 7, 31. oktober 1987-imeersoq
§ 1. Kalaallit Nunaanni eqquiniaasitsisoq eqquiniaasitsinermi eqqugassat tamarmiusut nalinginit akileraartussaavoq, akileraarutit ukiut tamaasa Inatsisartunit aalajangerneqartartut naapertorlugit.
Imm. 2. Eqqugassat aaningaasaanngippata, eqqugassat nalingat akileraaruserneqartussaq naatsorsorneqassaaq eqqugassat nalinginnaasumik niuernermi nalingat tunngavigalugu.
Imm. 3. Immikkoortut 1 aamma 2 naapertorlugit akileraartussaaneq atortuussanngilaq, peqatigiiffiup kattuffiulluunniit il.il. qaammatisiutit malillugit ukiup ataatsip ingerlanerani eqquiniaasitsinerani eqqugassarititaasa katillugit nalingat 5.000 koruuniuppata minneruppataluunniit.§ 2. § 1 naapertorlugu eqquiniaasitsinermit eqqukkat eqquisumut akileraaruteqaataassanngillat.
§ 3. Akileraartussaasup eqqugassat nalingat Akileraartarnermi Pisortaqarfimmut nalunaarutigalugillu akileraarutitassai akilereersimassavai, eqquiniaasitsinerup kingorna kingusinnerpaamik ullut 14-t qaangiutsinnagit. Nalunaarutiginninneq pissaaq immersugassaq, Akileraartarnermi Pisortaqarfimmit sananeqarsimasoq atorlugu.
Imm. 2. Peqatigiiffimmi il.il. eqquiniaasitsisumi siulersuisunut ilaasortat akileraarutit akilerneqarnissaannut akisussaasuupput.
Imm. 3. Akileraarutit piffissaagallartillugu akilerneqanngippata akileraarutit akileraarutissat 2 %-i-annik taperneqartassapput, eqquiniaasitsinermiit qaammatit aallartinneri, tamaasa akileraarutit akilerneqarnissaasa tungaanut.§ 4. Inatsisartut inatsisaata matuma atuutilernissaanut maleruagassanik sukumiinerusunik Naalakkersuisut aalajangersaasinnaapput, tamatumani ilaalluni eqquiniaasitsinermi inimik attartortitsisup paasissutissiisussaaneranut maleruagassiineq.
Imm. 2. Naalakkersuisut, Naalakkersuisulluunniit tamatumunnga piginnaatitaata, akileraarutit imaluunniit § 3, imm. 3-mi taaneqartut tapiissutit akilersinngitsoorlugilluunniit, oqilisaaffigalugilluunniit utertissinnaavaat, pissutsit immikkut ittut atuutsillugit.§ 5. Eqqunngitsunik nalunaarutiginnittoq imaluunniit § 3 naapertorlugu piffissaagallartillugu nalunaarutiginninngitsoq akiliisinneqarsinnaavoq.
Imm. 2. Selskabit, peqatigiiffiit assigisaalluunniit unioqqutitsippata, selskabi akiligassiissuummut akisussaatinneqarsinnaavoq.§ 6. Naalakkersuisut, Naalakkersuisulluunniit tamatumunnga piginnaatitaanit, inatsimmi matumani aalajangersakkanik unioqqutitsisoq nalunaarfigineqarsinnaavoq suliassaq eqqartuussinertaqanngitsumik inaarneqarsinnaasoq, unioqqutitsisoq unioqqutitsinerminik nassuerpat piffissallu aalajangersimasup iluani, qinnuteqarnikkut sivitsorneqarsinnaasumi, nalunaarummi akiligassaritinneqartoq akilerumassappagu.
Imm. 2. Nalunaarutiginninnissamut, imm. 1-imi taaneqartumut atatillugu inatsisinik atortitsinermut inatsimmi aalajangersakkani unnerluutiginninnermut allassimasut atuutissapputtaaq.
Imm. 3. Akiligassiissutigineqartoq piffissaagallartillugu akilerneqarsimappat imaluunniit akiligassiissutigineqareernermini akilersinneqarpat, qanoq iliuuseqartoqaqqissanngilaq.§ 7. Inatsisartut inatsisaat 1. januar 1988-imiit atuutilissaaq, eqquiniaasitsinernullu 1. januar 1988-imi kingusinnerusukkulluunniit ingerlanneqartunut atuutissalluni.
Namminersornerullutik Oqartussat, oktoberip 31-anni 1987
Jonathan Motzfeldt/
Emil Abelsen