Namminersornerullutik Oqartussat nalunaarutaat nr. 32, 10. december 1987-imeersoq aalisarnermik nakkutilliinermut tunngasoq.

Inatsisartut inatsisaat nr. 11 21. november 1984-imeersoq inuutissarsiutigalugu aalisarnermut tunngasumi § 17 naapertorlugu aalajangersarneqarpoq:

 

§ 1. Nalunaarut Kalaallit Nunaata imartaani aalisarfiusumi inuutissarsiutigalugu aalisarnermut kiisalu angallatinut, Kalaallit Nunaata aalisarfiata avataani aalisartunut, Kalaallit Nunaanni nalunaarsorsimasunut atuuppoq.
Imm. 2. Nalunaarummi matumani "Kalaallit Nunaata Kitaa"-nik taasamik pineqarpoq NAFO-p killeqarfia 1,  Kalaallit Nunaata imartaata aalisarfianiittoq. "Tunu"- mik taasami pineqarput ICES-ip killeqarfii II, V, XII aamma XIV Kalaallit Nunaata imartaata aalisarfianiittut, tak. ilanngussaq.
Imm. 3. Nalunaarut kapisilinniarnermut, uiluinniarmut saattuarniarnermullu atuuttuunngilaq.

 

Angallatit maleruagassani pineqartut.

§ 2. Nalunaarummi pineqarput angallatit makku:
a) Angallatit aalisarnermik ingerlataqartut umiarsuullu allagartai malillugit BT 80-usut, 80 BRT-usut anginerusulluunniit (tak.-lli § 10).
b) Angallatit mikinerit akuersissutillit nalunaarsimasullu angallatip qanoq aalisartiginissaanik.
c) Angallatit aalisakkanik aalisakkanilluunniit tunisassianik nuussivigineqarsimasut Kalaallit Nunaata imartaata aalisarfittaaniit assartuisussanngorlugit.
Imm. 2. Nalunaarummi angallatit angissusii nalunaarsorneqarsimapput uuttueriaatsit folketingip inatsisaa nr. 203 18. maj 1977-imeersoq umiarsuarnik uuttuisarnermut tunngasoq naapertorlugu aalajangersarneqarsimasut malillugit, aamma maleruagassat siusinnerusukkut atuuttut malillugit. Umiarsuup usitussutsimut allagartaa aalajangiisuussaaq angallammut pineqartumut, nalunaarut malillugu usisinnaassutsimut killigitinneqartussap sorliup atorneqarnissaanut.

§ 3. Angallatit Kalaallit Nunaanni nalunaarneqarsimasut aalisarfimmi nunat allat maleruagassiorfigisinnaasaanni aalisartut Kalaallit Nunaanni Aalisarnermik Akuersissuteqartarnermut Nakkutilliisoqarfimmut (telegramadresse: Licenskon) aalisarfiup nalunaarnermi ilisarnaataata assinga nassiutissavaat. Tamatumalu saniatiguttaaq logbogsskema Kalaallit Nunaanni Aalisarnermik Akuersissuteqartarnermut Nakkutilliisoqarfimmut, Box 501, 3900 Nuuk, nassiunneqassaaq.
Imm. 2. Angallatinut Kalaallit Nunaanni nalunaarsorsimasunut nunarsuup imartaani tamani aalisarfigineqarsinnaasuni aalisartunut uani nalunaarummi maleruagassat atuupput.

 

Aalisarfiusumut anngunneq.

§ 4. Angallatit Kalaallit Nunaata imartaanut aalisarfiusumut tikinnissaminnik pilersaaruteqartut taanna pillugu nalunaaruteqassapput (aalisalernermik nalunaarut) siusinnerpaamik tikinnissaq nal.ak. 24-nik kingusinnerpaamillu nal.ak. 12-inik sioqqullugu. Nalunaaruteqarnermi makku ilisimatitsissutigineqassapput:
a) Nalunaarutip suunera (aalisalernermik nalunaarut).
b) Angallatip aqqa.
c) Nuna angallatip nalunaarsorneqarfia.
d) Normu angallatip saneraani allassimasoq.
e) Aalisarsinnaanermut akuersissutip normua.
f) Angallatip radiokkut attaveqarfigineqarsinnaaneranut ilisarnaat.
g) Nalunaaruteqarnerup nalerpiaani angallatip sumiissusia (nalunaarutigineqassapput allorniusat ammukartut sanimukartullu kiisalu decimalminutsit).
h) Pisanik lastimiittoqarpat suussusiat annertussusiallu (suliarineqanngitsut oqimaassusiat), kiisalu taakku sumi pisarineqarsimanerat.
i) Kalaallit Nunaata imartaanut aalisarfiusumut sukkut appakaannissaq (allorniusat ammukartut sanimukartullu nalunaarutigalugit) aamma aalisarneq sumi (tak. ilanngussaq) aallarnerniarneqarnersoq.
j) Aalisarnermik ingerlatsinissamik pilersaarut, tassunga ilanngullugu aalisariaasissaq.
k) Nalunaaruteqarnerup ullua nalunaaqqutarlu (GMT).
1) Angallatip naalagaata aqqa.

 

Sapaatip akunnikkoortumik nalunaaruteqarneq.

§ 5. Angallatit Kalaallit Nunaata imartaata aalisarfittaaniitillutik ataasinngornerit tamaasa nalunaaruteqartassapput (sapaatip akunnikkoortumik nalunaaruteqarneq) nal. 1000 GMT-nngortinnagu. Sapaatip akunnikkoortumik nalunaaruteqarnermi siullermi aalisarfissamut anngunnermiit imaluunniit Kalaallit Nunaanni umiarsualivimmiit aallarnermiit sapaammi siullermi nal.  2400 GMT tikillugu nalunaarusiorfigineqartassapput. Sapaatip akunnikkoortumik nalunaaruteqartarnerit allat piffissami ataasinngorneq nal. 0000-imiit sapaammi nal. 2400-mut GMT-p iluaniipput. Angallat umiarsualivimmiiginnarsimappat sapaatip akunnikkoortumik nalunaaruteqartoqartassanngilaq. Sapaatip akunneranut angallatip aalisarfimmiit aallarfianut imaluunniit Kalaallit Nunaanni umiarsualivimmut tikiffimmut sapaatip akunnikkoortumik nalunaarusiortoqartassanngilaq.
Imm. 2. Angallat ukiortaalernerani aalisarpat sapaatip akunnerani qassinngornerugaluarpalluunniit sapaatip akunnikkoortumik nalunaaruteqassaaq 1. januar kingullermik nalunaaruteqarnerup naaneraniit aallartillugu (aalisarfissamut pinermiit Kalaallit Nunaanniluunniit umiarsualivimmiit aallarnermiit) 31. december nal. 24.00 GMT tikillugu. Ukiortaamilu nalunaaruteqarneq siulleq aallartissaaq l.januar nal.00.00-imiit sapaammi siullermi nal. 24.00 GMT-mut.
Imm. 3. Sapaatip akunneranut nalunaaruteqarnermi makku ilisimatitsissutigineqassapput:
a) Nalunaarutip suunera (sapaatip akunneranut nalunaaruteqarneq).
b) Angallatip aqqa.
c) Angallatip radiokkut attavigineqarsinnaaneranut ilisarnaat.
d) Nalunaaruteqarnerup nalerpiaani angallatip sumiissusia (nalunaarutigineqassapput allorniusat ammukartut sanimukartullu kiisalu decimalminutsit).
e) Nalunaarummi piffissaq pineqartoq.
f) Piffissami pineqartumi aalisagartat (ilivitsuutillugit oqimaassusiat) suussusii immikkoortiterlugit, aalisarfimmilu sorlermi ilanngussami taaneqartuni pisarineqarsimanerat nalunaarlugu.
g) Piffissami taaneqartumi igeqqitat (ilivitsuutillugit oqimaassusiat), aalisarfimmilu sorlermi ilanngussami taaneqartuni pisarineqarsimanerat nalunaarlugu.
h) Pisanik allamut nuussisoqarsimatillugu (tamatumunnga tunngatillugu tak. inuutissarsiutigalugu aalisarneq pillugu inatsisartut inatsisaanni § 4): Pisat suussusii, annertussusii (nalunaarlugu tunisassiarineqarsimasut oqimaassusiat imaluunniit ilivitsuutillugit oqimaassusiat) aamma suminngaaniit imaluunniit sumut allamut nuunneqarsimanersut. Allamut nuussinermi pineqarput aalisakkat nuunneqarnerat imaluunniit aalisakkanik tunisassianik angallammiit angallammut allamut toqqaannartumik nuussinerit imaluunniit ittujaarsaanerit.
i) Nalunaaruteqarnerup ullua nalunaaqqutarlu (GMT).
j) Angallatip naalagaata aqqa.
Imm. 4. Angallatip pisassai imaluunniit pisassat,  tak. nalunaarut pisassanut tunngasoq, nungukkiartulerpata Kalaallit Nunaanni Aalisarnermi Akuersissuteqartarnermut Nakkutilliisoqarfiup piumasarisinnaavaa angallatip ullut tamaasa nalunaaruteqartarnissaa imalimmik sapaatip akunnikkoortumik nalunaaruteqartarnertulli. Taamaaliortoqartillugu sapaatip akunnikkoortumik sumiissutsimillu nalunaarutit (tak. § 8) nassiunneqartassanngillat.

 

Aalisarfimmik qimatsineq.

§ 6. Angallatit Kalaallit Nunaata aalisarfittaanniit qimagunniarlutik pilersaaruteqartut taanna pillugu nalunaaruteqassapput (qimatsinermik nalunaarut) kingusinnerpaamik qimagunnissaq nal.ak. 48-nik sioqqullugu. Nalunaarummi makku ilisimatitsissutigineqassapput:
a) Nalunaarutip suunera (qimatsinermik nalunaarut).
b) Angallatip aqqa.
c) Angallatip radiokkut attavigineqarsinnaaneranut ilisarnaat.
d) Nalunaaruteqarnerup nalerpiaani angallatip sumiissusia (nalunaarutigineqassapput allorniusat ammukartut sanimukartullu kiisalu decimalminutsit).
e) Sumi qaqugulu Kalaallit Nunaata imartaata aalisarfittaa qimanneqassanersoq (sumiissuseq nalunaarutigineqassaaq allorniusat ammukartut sanimukartullu).
f) Nalunaarutip ullua nalunaaqqutarlu (GMT).
g) Angallatip naalagaata aqqa.
Imm. 2. Kalaallit Nunaata imartaata aalisarfiusup qimanneqarnerani tamanna pillugu nalunaaruteqartoqassaaq (aalisarunnaarnermik nalunaarut). Nalunaarummi makku ilisimatitsissutigineqassapput:
a) Nalunaarutip suunera (aalisarunnaarnermik nalunaarut).
b) Angallatip aqqa.
c) Angallatip radiokkut attavigineqarsinnaaneranut ilisarnaat.
d) Nalunaaruteqarnerup nalerpiaani angallatip sumiissusia (nalunaarutigineqassapput allorniusat ammukartut sanimukartullu kiisalu decimalminutsit).
e) Sapaatip akunnerata siuliani nalunaaruteqarnerup kingorna pisarisat (ilivitsuutillugit oqimaassusiat) suussusii immikkoortiterlugit, aalisarfimmilu sorlermi ilanngussami taaneqartuni pisarineqarsimanerat nalunaarlugu.
f) Sapaatip akunnerata siuliani nalunaaruteqarnerup kingorna igeqqitat suussusii immikkoortiterlugit, aalisarfimmilu sorlermi ilanngussami taaneqartuni pisarineqarsimanerat nalunaarlugu.
g) Pisanik allamut nuussisoqarsimatillugu (tamatumunnga tunngatillugu tak. inuutissarsiutigalugu aalisarneq pillugu Inatsisartut inatsisaanni § 4): Pisat suussusii, annertussusii (nalunaarlugu tunisassiarineneqarsimasut oqimaassusiat ilivitsuutillugilluunniit oqimaassusiat) aamma suminngaaniit imaluunniit sumut allamut nuunneqarsimanersut. Allamut nuussinermi pineqarput aalisakkat nuunneqarnerat imaluunniit aalisakkanik tunisassianik angallammiit angallammut allamut toqqaannartumik nuussinerit, imaluunniit nunakkoortillugit.
h) Angallatip pisai angallammiititat tamarmiusut pisat igeqqitat tamarmiusut kingullermiit nalunaarnermiit, nalunaarsorlugit aalisakkat suuneri (ilivitsuutillugit oqimaassusit) sumilu ilanngussaq tunngavigalugu pisarineqarsimaneri ilanngullugit.
i) Nalunaarutip ullua nalunaaqutarlu (GMT).
j) Angallatip naalagaata aqqa. Umiarsualivimmiit aallarneq umiarsualivimmullu tikinneq.

§ 7. Kalaallit Nunaanni umiarsualivimmiit aallalersigani taanna pillugu angallat nalunaaruteqassaaq (aalisalernermik nalunaarut). Nalunaarummi makku ilisimatitsissutigineqassapput:
a) Nalunaarutip suunera (aalisalernermik nalunaarut).
b) Angallatip aqqa.
c) Nuna angallatip nalunaarsorneqarfia.
d) Normu angallatip saneraani allassimasoq.
e) Aalisarsinnaanermut akuersissutip normua.
f) Angallatip radiokkut attaveqarfigineqarsinnaaneranut ilisarnaat.
g) Umiarsualivik aallarfik.
h) Aalisakkat pisarineqarsimasinnaasut lastimiititat suussusii annertussusiilu (ilivitsuutillugit oqimaassusiat), kiisalu sumi pisarineqarsimanerat nalunaarlugu.
i) Pisanik allamut nuussisoqarsimatillugu (tamatumunnga tunngatillugu tak. inuutissarsiutigalugu aalisarneq pillugu Inatsisartut inatsisaanni § 4): Pisat suussusii, annertussusii (nalunaarlugu tunisassiarineqarsimasut oqimaassusiat imaluunniit ilivitsuutillugit oqimaassusiat) aamma suminngaaniit imaluunniit sumut allamut nuunneqarsimanersut. Allamut nuussinermi pineqarput aalisakkat nuunneqarnerat imaluunniit aalisakkanik tunisassiat angallammiit angallammut allamut toqqaannartumik nuussinerit, imaluunniit nunakkoortillugit.
j) Pilersaarusiukkamik aalisarnermik ingerlatsinissaq, tamatumunnga ilanngullugu aalisariaasissaq, aamma aalisarfimmi sorlermi (tak. ilanngussaq) aalisarneq aallarnerniarneqarnersoq.
k) Nalunaaruteqarnerup ullua nalunaaqqutarlu (GMT).
l) Angallatip naalagaata aqqa.
Imm. 2. Kalaallit Nunaanni umiarsualivimmut tikitsinnani tamanna pillugu angallat nalunaaruteqassaaq (aalisarunnaanermik nalunaarut). Nalunaarummi makku ilisimatitsissutigineqassapput:
a) Nalunaarutip suunera (aalisarunnaarnermik nalunaarut).
b) Angallatip aqqa.
c) Angallatip radiokkut attaveqarfigineqarsinnaaneranut ilisarnaat.
d) Nalunaaruteqarnerup nalerpiaani angallatip sumiissusia (nalunaarutigineqassapput allorniusat ammukartut sanimukartullu kiisalu decimalminutsit).
e) Umiarsualivik tikiffissaq piffissarlu tikiffissatut ilimagineqartoq (GMT).
f) Sapaatip akunnerata siuliani nalunaaruteqarnerup kingorna pisarisat (ilivitsuutillugit oqimaassusiat) aalisakkat assigiinngitsukkuutaarlugit aalisarfimmilu sorlermi ilanngussami taaneqartuni pisarineqarsimanerat nalunaarlugu.
g) Sapaatip akunnerata siuliani nalunaaruteqarnerup kingorna igeqqitat (ilivitsuutillugit oqimaassusiat) aalisakkat assigiinngitsukkuutaarlugit aalisarfimmilu sorlermi ilanngussami taaneqartuni pisarisimanerat nalunaarlugu.
h) Pisanik allamut nuussisoqarsimatillugu (tamatumunnga tunngatillugu tak. Inatsisartut inatsisaanni inuutissarsiutigalugu aalisarnermut tunngasumi § 4): Pisat suussusii, annertussusii (nalunaarlugu tunisassiarineqarsimasut oqimaassusiat imaluunniit ilivitsuutillugit oqimaassusiat) aamma suminngaaniit imaluunniit sumut allamut nuunneqarsimanersut. Allamut nuussinermi pineqarput aalisakkat nuunneqarnerat imaluunniit aalisakkanik tunisassianik angallammiit angallammut allamut toqqaannartumik nuussinerit imaluunniit nunakkoortillugit.
i) Aalisalernermik nalunaaruteqarnerup siuliata kingorna angallatip pisarisimasai igeqqitaalu tamakkerlugit, aalisakkat assigiinngitsut immikkoortiterlugit (ilivitsuutillugit oqimaassusii) aalisarfimmilu sorlermi ilanngussami taaneqartuni pisarineqarsimanersut nalunaarlugu.
j) Nalunaaruteqarnerup ullua nalunaaqqutarlu (GMT).
k) Angallatip naalagaata aqqa.

 

Sumiissutsimik nalunaarut

§ 8. Aalisalernermik nalunaaruteqareernerup kingorna (tak. § 4, imm. 1, aamma § 7, imm. 1) angallat nal. 0800-ip 1000-illu (GMT) nalunaaruteqarnerup nalerpiaani sumiissutsiminik ullut tamaasa nalunaaruteqassaaq (sumiissutsimik nalunaarut). Nalunaarummi makku ilisimatitsissutigineqassapput:
a) Nalunaarutip suussusia (sumiissutsimik nalunaarut).
b) Angallatip aqqa.
c) Angallatip radiokkut attavigineqarsinnaaneranut ilisarnaat.
d) Nalunaaruteqarnerup nalerpiaani angallatip sumiissusia (nalunaarutigineqassapput allorniusat ammukartut sanimukartullu kiisalu decimalminutsit).
h) Nalunaaruteqarnerup ullua nalunaaqqutarlu (GMT).
f) Angallatip naalagaata aqqa.
Imm. 2. Angallatit Kitaaniittut Tunumut killeqarfimmik qaangiigunik ilua-tungaanulluunniit pigunik nalunaaruteqassapput (sumiissutsimik nalunaarut). Nalunaarummi makku ilisimatitsissutigineqassapput:
a) Nalunaarutip suunera (sumiissutsimik nalunaarut).
b) Angallatip aqqa.
c) Angallatip radiokkut attaveqarfigineqarsinnaaneranut ilisarnaat.
d) Aalisarfimmi sorlermi (tak. ilanngussaq) aalisarnerup aallarnerneqassamaarnera.
e) Nalunaaruteqarnerup ullua nalunaaqutarlu (GMT).
f) Angallatip naalagaata aqqa.
Nalunaarutinik nassiussineq.

§ 9. §§ 4-miit 8-imut naapertorlugit nalunaarutit kalaallisut, qallunaatut tuluttulluunniit oqaasertaqartinneqassapput.
Imm. 2. Nalunaarutit nalunaarasuaatigineqassapput sinerissamiluunniit radio atorlugu oqarasuaatigineqassallutik Kalaallit Nunaanni Aalisarsinnaanermut Akuersissutinik Nakkutilliivimmut (telegramadressea: LICENSKON), imaluunniit telexerutigineqassallutik uunga (telexnummer 90400).
Imm. 3. Nalunaarut telexikkut nassiunneqarpat kisitsisit tamarmik sumiissutsimullu nalunaarsuutit ilanngullugittaaq oqaasinngorlugit nalunaarsorneqassapput kisitsisinik ungaluutit iluanni ilallugit (soorlu: 1010 kg saarulliit nassiunneqassaaq imatut "en nul en nul (1010) kg saarulliit"). Telexikkut nalunaarutit nassiunneqartassapput Kalaallit Nunaanni Aalisarnermi Akuersissuteqartarnermut Nakkutilliivimmut (telexnummer 90400) Grønlands Kommandomullu (telexnummer 90502).

 

Angallatip allattaavia logbogi.

§ 10. Aalisariutit BT 50-illit 50-BRT-illillu taakkulu qaangerlugit angissusillit angallatit allattaaviannut logbogimut allattuisussaapput, ullullu tamaasa paasissutissat makku ilanngunneqartassallutik:
a) Kilisalluni aallartinnerit tamaasa, imaluunniit ningittakkernermi qassusernermiluunniit sumiissuseq (nalunaarlugu allorniusat ammukartut sanimukartullu kiisalu decimalminutsit).
b) Kilisannerit, ningittakkernerit qassusernerilluunniit tamaasa pisat annertussusii, igeqqitat ilanngullugit, aalisakkat suussusii immikkoortiterlugit,
c) Ulloq-unnuarlu qaangiuttumi kilisannerit, ningittakkernerit qassusernerilluunnit tamaasa piniarnermut atortut atorneqartut suussusii.
d) Aalisarnermi pisaqarsinnaassuseq, tassa qassutit, oqummersat kilisannerilluunniit amerlassusii, piffissarlu aalisarnermut atortut kilisannerni, ningittakkernerni qassusernerniluunniit ataasiakkaani atorsimasaq.
e) Kilisannerit tamaasa pisat qanoq suliarineqarsimanerat, tassa suut tunisassiarineqarsimanersut, kiisalu igeqqitat kingullermik nalunaaruteqarsimanerup kingorna ullut tamakkiallugit.
f) Aalisariarnermi pineqartumi angallatip pisarisai tamakkerlugit, igeqqitat ilanngullugit, aalisakkat suussusii immikkoortiterlugit aalisarfimmilu sorlermi ilanngussami taaneqartuni pisarineqarsimanersut nalunaarlugu.
Imm. 2. Imm. 1., b)-mi, e)-mi aamma f)-imi taaneqartunik igeqqitaqarsimatinnagu taanna nalunaarutigineqassaaq imaallillugu "igeqqitaqanngilaq" imaluunniit "0".
Imm. 3. Kalaallit angallataasa nalunaarsuinerminni nalunaarsuiffissiaq (logbog) Inuutissarsiornermi Pisortaqarfimmiit sananeqarsimasoq atortassavaat. Angallatit EF-ip nunaanni, Norgemi Savalimmiuniluunniit nalunaarsorsimasut nalunaarsuinerminni Inuutissarsiornermi Pisortaqarfimmi nalunaarsuiffissatut sanaaq imaluunniit nalunaarsuiffissaq Ilanngussaq 11-mitut ittoq EF-ip kommissioniata peqqussutaani nr.2807/83 22. september 1983-imeersoq najoqqutaralugu nalunaarsuiffigisassavaat.
Imm. 4. Nalunaarsuiffissat marlunngorlugit angallat  umiarsualivimmut pigaangat nassiunneqartassapput uunga: Grønlands Fiskerilicenskontrol, Box 501, 3900 Nuuk.
Imm. 5. Nalunaarsuiffissat ukiup ingerlanerani nalunaarsuiffigineqarsimasut tamarmik umiarsuarmi pigineqartarssapput.

 

Ittujaarsineq.

§ 11. Angallatit § 2, imm. 1-imi taaneqartut tunisassiarineqarsimasunik ittujaarsaarissapput tunisassiarineqarsimasut suussusii immikkoortiterlugit. Assigiit lastimi assigiinngitsunut iliorarneqarsinnaapput, nalunaarsornerili erseqqilluinnartuussapput. Kinguppaalli qalipaajakkat qalipaajarneqanngitsunit qerititanillu immikkoortillugit ittujaarneqartassapput.
Imm. 2. Angallatit soorlu imm. 1-imi taaneqartoq ittujaarsinissanut pilersaarusiussapput tunisassiat lastimi inissinneqarsimanerat tunisassiallu annertussusii umiarsuarmiitinneqartut tonsinngorlugit takuneqarsinnaanngorlugit. Ittujaarsinissamut pilersaarut angallatip usingiarnissaata tungaanut angallammi pigineqartassaaq.

 

Usingiarneq.

§ 12. Angallatip Kalaallit Nunaata imartaani aalisarsimasup usingiarneqarnerata imaluunniit aalisakkanik aalisakkanilluunniit tunisassianik immamiit aalisarfiusumiit assartuinerata kingorna ullut 14-it qaangiutsinnagit Kalaallit Nunaanni Aalisarsinnaanermut Akuersissutinik Nakkutilliivik, Postbox 501, 3900 Nuuk uppernarsaammik nassiussivigineqartassaaq.
Imm. 2. Uppernarsaammi aalisakkat aalisakkanillu tunisassiat annertussusiinik tamarmiusunik paasissutissaqassaaq, suuneri sunullu tunisassiarineqarsimaneri immikkoortiterlugit. Tassunga ilanngunneqassapput paasissutissat ukununnga tunngasut:
a) Tamakkerlugit ilaannakumilluunniit usingiarnerit avataani umiarsualivimmiluunniit qanga ulloq pisimanersut.
b) Ulloq Kalaallit Nunaata imartaanut aalisarfiusumut tikiffik qimaguffillu.
c) ullut Kalaallit Nunaanni umiarsualivinnut tikiffiit allarfiillu.

 

Pineqaatissat.

§ 13. Nalunaarummi aalajangersakkanik unioqqutitsineq akiliisitaanermik/akuersissummilluunniit arsaagaanermik kinguneqarsinnaavoq. Suliassat tassunga tunngasut Inatsisartut inatsisaanni inuutissarsiutigalugu aalisarnermut tunngasumi maleruagassat malillugit aamma suliarineqartussaapput.

 

Atortuulernera.

§ 14. Nalunaarut atortuulerpoq 1. januar 1988.
Imm. 2. Taanna ilutigalugu atorunnaarsinneqarput nalunaarut nr. 14 2. april 1985-imeersoq aalisarnermik nakkutilliinermut tunngasoq.

Nuuk, ulloq 10. december 1987.

Emil Abelsen

/

Einar Lemche

---

Ilanngussaq 1 (pdf-format)

Ilanngussaq 2 (Kitaa) (jpeg-format)

Ilanngussaq 3 (Tunu) (jpeg-format)