Namminersornerullutik Oqartussat nalunaarutaat nr. 27, 1. december 1987-imeersoq 1988-imi aalisarnermi pisassarititaasunut tunngasoq.
Inatsisartut inatsisaat nr. 11 21. november 1984-imeersumi inuutissarsiutigalugu aalisarnermut tunngasumi §§ 7, 9, 14 aamma 23 najoqqutaralugit aalajangersarneqarpoq:
§ 1. Nalunaarut Kalaallit Nunaata aalisarfittaanut atuuppoq.
Imm. 2. Nalunaarummi matumani "Kalaallit Nunaata Kitaa" tassaavoq Kalaallit Nunaata aalisarfittaani NAFO-p killeqarfiisa ilai 1-inik taaguuteqartut. "Tunu" tassaavoq Kalaallit Nunaata aalisarfittaani ICES-ip killeqarfiisa ilai II, V, XII aamma XIV.
Imm. 3. "Tunngaviusumik killigititat" tassaapput tunngaviusumik titarnerit ministeriuneqarfiup nalunaarutaani nr. 629-imi 22. december 1976-imeersumi aamma nr. 176-imi 14. maj 1980-imeersumi Kalaallit Nunaata aalisarfittaanut tunngasuni aalajangersarneqarsimasut.§ 2. Aalisagaatini ilanngussaq 1-imi taaneqartuni 1988-imi pisassarititaasut tamarmiusut (TAC) aalajangersarneqassapput ilanngussami kolonnit 1-annitut.
§ 3. Kalaallit aalisariutai (tak. inatsisartut inatsisaat inuutissarsiutigalugu aalisarnermut tunngasoq) aalisagaatinit ilanngussaq 1-imi taaneqartunit 1988-imi pisassarititaasuni ilanngussami kolonnit 2-annit annerusunik pisaqassanngillat. Tassani piumasarineqartut malillugit aalisartoqassaaq.
§ 4. Angallatit Savalimmiuni nalunaarsorneqarsimasut 1988-imi pisassarititanit taamaallaat katillugit pisarisinnaavaat ilanngussami kolonnit 3-anni allassimasut tassanilu piumasarineqartuinnaat malillugit.
§ 5. Angallatit nunami EF-imut ilaasortami nalunaarsorneqarsimasut 1988-imi pisassarititanit taamaallaat katillugit pisarisinnaavaat ilanngussami kolonnit 4-anni allassimasut tassanilu piumasarineqartuinnaat malillugit.
§ 6. Angallatit Norge-mi nalunaarsorneqarsimasut 1988-imi pisassarititanit taamaallaat katillugit pisarisinnaavaat ilanngussami kolonnit 5-anni allassimasut tassanilu piumasarineqartut malillugit.
§ 7. Angallatit allat §§ 3-miit 6-imut taaneqarsimanngitsut taamaallaat katillugit pisarisinnaavaat ilanngussami kolonnit 6-anni allassimasut tassanilu piumasarineqartut malillugit.
§ 8. Akuersissutit amerlassusii piffissallu atorsinnaafii Naalakkersuisunut llaasortamit angallatinut §§ 4-miit 7-imut taaneqartunut tunniunneqartut pisassarititaasunut naleqquttunngorsagaassapput akuersissuteqarnermilu angallatit pisaqarsinnaassusii eqqarsaatigineqassallutik.
§ 9. Ilanngussami pisassarititatut allanneqarsimasut aalisarneqarnerat Naalakkersuisunut Ilaasortap unitsissavaa aalisakkat ataasiakkaat angallatinit ataatsimoortunit §§ 3-miit 7-imut taaneqartunit aalisarneqartut tunngavigalugit.
Imm. 2. Kalaallit angallataasa (tak. § 3) aalisarunnaarnissaat radiokkut tusagassiuutitigullu nalunaarutigineqassaaq.
Imm. 3. Angallatinut §§ 4-miit 7-imut taaneqartunut aalisarunnaarnissaq allakkasuaatikkut telegramikkulluunniit angallammut pineqartumut piginnittuanulluunniit nalunaarutigineqassaaq. Angallatit § 5-imi taaneqartut pillugit nalunaarut taamaattoq aamma EF-kommissionimut nassiunneqassaaq.
Imm. 4. Angallatit aalisarunnaassapput piffissaq Naalakkersuisunut Ilaasortamit aalajangersarneqartoq eqqorlugu.§ 10. Angallatinut §§ 3-miit 7-imut taaneqartunut Kalaallit Nunaata Kitaani Tunumilu saarullinniarsinnaatitaasunut nataarnarniarsinnaatitaasunulluunniit (tak. ilanngussaq) pisarisuukkanut maleruagassat makku atuupput:
a) Kalaallit Nunaata Kitaani Tunumilu saarulliit pisassarititaasut tamarmiusut pisarineqarpata angallatit pineqartut piffinni taaneqartuni saniatigooralugu saarullinnik pisaqarsinnaatitaanngillat.
b) Kalaallit Nunaata Kitaani Tunumilu nataarnat pisassarititaasut tamarmiusut pisarineqarpata angallatit pineqartut piffinni taaneqartuni saniatigooralugu nataarnanik pisaqarsinnaatitaanngillat.
Imm. 2. Angallatinut §§ 3-miit 7-imut taaneqartunut Kalaallit Nunaata Kitaani Tunumilu saarullinniarsinnaatitaangitsunut nataarnarniarsinnaatitaanngitsunulluunniit (tak. ilanngussaq) pisarisuukkanut maleruagassat makku atuupput:
a) Angallatit qalorsuarsortut immikkoortiterereernerup kingorna saarulliit pisarisuukkat suluppaagartat oqimaassusiisigut 10 procentiat qaangersimassanngilaat aamma pisarisat allat 3 procentia qaangersimassanagu.
b) Angallatit ningittagarsortut immikkortiterereernerup kingorna saarulliit pisarisuukkat nataarnartat qaleralittallu oqimaassusiisigut 10 procentiat qaangersimassanngilaat aamma pisarisat allat 3 procentia qaangersimassanagu.
c) Nataarnat pisarisuukkat pisat allat oqimaassusiisigut 3 procentiat qaangersimassanngilaat.
d) Pisarisuukkat immikkoortut a)-miit c)-mut taagorneqartut immikkoortiterereernerup kingorna, imaluunniit aalisakkat tamarmiusut lastimiitinneqartut nunnigussalluunniit oqimaassusiinit procentinnguinermi naatsorsuisoqassaaq ataasiarluni arlaleriarluniluunniit misissuereerneq tunulequtaralugu.
e) Pisarisuukkanik aatsaat naatsorsuisoqarsinnaavoq siusinnerpaamik aalisarneq nal.ak. 48-nik ingerlanneqareerpat.
Imm. 3. Angallatit § 3-mi taaneqartut aalisakkanik aatsaat akuersissuteqarluni aalisarneqarsinnaatitaasunik tigumminnissinnaatitaapput. Angallatit pisarisuukkanik taamaattunik umiarsuarmiititsisinnaanngillat aalisakkat pisarisuukkat pisat tamarmiusut (ilivitsuutillugit) oqimaassusiisa 10% qaangersimappassuk (annerpaamilli 2,5 t).
Imm. 4. Angallatit §§ 4-miit 7-imut taaneqartut saarulliunngitsunik nataarnaanngitsunillu, nunat allat pisassaqartinneqanngikkaluarlutilluunniit (tak. ilangussaq) aalisakkanik allanik saniatigut pisaqarsinnaatitaapput. Angallalli pisarisuukkaminik umiarsuarmiititaqaqqusaanngilaq aalisakkat aalajangersimasut ataatsit pisat tamarmiusut oqimaassutsimikkut (ilivitsuutillugit) 10 procentiat (taamaattorli annerpaamik 2,5 tons) qaangersimappassuk.
Imm. 5. Pisarisuukkat inerteqqutaasumik aamma pisarisuukkat, imm. 2,3 aamma 4-mi piumasaasunit amerlanerusut angallammi tigummiinnarneqarsinnaanngillat, ingerlatiinnarluguli avalatseqqinneqassallutik.§ 11. Nalunaarummi aalajangersakkat unioqqutinneqarnerat akiliisitsinermik/akuersissummilluunniit arsaagaanermik kinguneqarsinnaavoq. Suliassat tassunga attuumassuteqartut Inatsisartut inatsisaat inuutissarsiutigalugu aalisarnermut tunngasoq malillugu aamma suliarineqartussaapput.
§ 12. Nalunaarut ingerlaannartumik atortuulissaaq 1. januar 1988-imiit.
Nuuk, ulloq 1. december 1987.
Emil Abelsen/
Einar Lemche
Ilanngussaq (pdf-format)