1987-imi kapisilinniarsinnaanermut akuersissutit pilluqit Namminersornerullutik Oqartussat nalunaarutaat nr. 19, 6. juli 1987-imeersoq.

Inuutissarsiutiqaluqu aalisarneq pilluqu inatsisartut inatsisaanni nr. 11 21. november 1984-imeersumi §§ 7, 8, 9, 12 aamma 14 tunngavigaluqit makku aalajangersarneqarput:

 

§ 1. Nalunaarut Kalaallit Nunaata kujammut isuata kitaani NAFO-llu killeqarfiisa ilaasa 1-imik taaneqartartup iluani inuutissarsiutigalugu aalisarnermut tunngavoq. Tassa tassani ilaatinneqanngilaq pisanik nammineq nerisassatut aalisarneq.
Imm. 2. Tunngaviusumik killeqarfimmiit (basislinien) avammut 40 sømilit avataani kapisilinniartoqaqqusaanngilaq.

§ 2. Akuersissummik tunineqarsimasut kisimik inuutissarsiutigalugu kapisilinniarsinnaatitaapput.
Imm. 2. Kapisilinniarsinnaatitaanermut akuersissut taamaallaat tunniunneqarsinnaavoq inunnut piginneqatigiinnullu il.il. inuutissarsiutigalugu aalisarnermik ingerlatsinermik uppernarsaatilinnut. Akuersissut angallammut qinnuteqarnermi tunuliaqutaasumut tutsinneqartassaaq.
Imm. 3. Angallatit 50 BRT/BT 50-nik taannalu qaangerlugu angissusilinnut akuersissummik tunineqarsinnaanngillat.
Imm. 4. Angallatit angissusaannut uuttueriaaseq inatsit nr. 203 18. maj 1977-imi siusinnerusukkullu aalajangersagaq nalunaarummi atorneqarpoq. Angallatip usitussusiata allagartaa malillugu nalunaarummi killiliussatut piumasarineqartut aalajangiunneqartassapput.
Imm. 5. Nalunaarummi piumasarineqartut malillugit akuersissutinik tunineqarsinnaasut, kommunenit allagartanik tunineqartassapput, kommunet aalisarnermi suliffissuaqarnermilu naalakkersuisoq sinnerlugu qinnuteqaatinik akuersisinnaatitaammata. Akuersissutinik tunineqartussat ataasiakkaat qanoq annertutigisunik pisassaqarsinnaatitaanerat kommunenit aalajangersarneqarsinnaatitaavoq.
Imm. 6. Aalisartut akornanni naleqquttumik agguaassinissaq anguniarlugu naalakkersuisunut ilaasortap piniutinut, piniutit ilusaannut imaluunniit piniariaatsinut inerteqqutinut killilersuinernulluunniit tunngasunik aalajangiisinnaavoq. Aalajangiineq pisassaaq KNAPK isumaqatiginiareerneratigut, taakkununngalu tunngasut tusagassiuutitigut nalunaarutigineqarsinnaapput.
Imm. 7. Qinnuteqaatinik itigartitsinerit aalisarnermi suliffissuaqarnermilu naalakkersuisumut maalaarutigineqarsinnaapput uunga: Inuutissarsiornermi Pisortaqarfik, Box 269, 3900 Nuuk.

§ 3. Kapisilinniarneq taamaallaat qarsorsanik qassutinillu 140 mm-terinik angitigisunik nigartalinnik (tasillugit) ingerlanneqassaaq, nigartaasa annertussusiat 8 pct-imik nikingatinneqarsinnaatitaavoq.
Imm. 2. Qassutit nigartaasa uuttornerat pisarpoq aalisakkanik misissuisup nigartanut uuttuutaata ikkunneratigut 1/2 kg-mik oqimaassusilimmik ikkussiffigalugu taannalu nakkartillugu. Nigartat tamarmik imm. 1-imi piumasaqaat eqquutissavaat.

§ 4. Kapisilinniarneq aamma kapisilinniarluni atortunik ningitsineq augustip 25-at nallertinnagu aallartinneqarsinnaanngilaq.
Imm. 2. Qarsorsanilli kapisilinniarsinnaatitaaneq 1. august aallartinneqarsinnaavoq. Aalisarnerit qanoq ingerlanneqassanersut KTU-p KNAPK-llu akornanni isumaqatigiissutigineqartassapput.

§ 5. Kapisilinniarnermi pisassaritinneqartut ima killilersorneqarput (aalisakkat ilivitsukkaarlugit):
a) Akuersissutinik tunineqarsimasut tamarmik pisassaritinneqartut 533 tonsit nungutserlugit kapisilinniarsinnaatitaapput. Tamanit pisassat nunguppata aalisarnermi atortut qaqinneqassapput. Qarsorsalinnillu aalisarneqartut augustup 25-ata siornatigut tamanit pisassaritinneqartunut ilanngunneqassapput.
b) Pisassaritinneqartut aalisarlugit naammassineqareernerisigut ulloq unnuarlu ataaseq qaangiunneratigut inuit piginneqatigiiffiit il.il. 30 fod ilanngullugit angallatillit kapisilinniarneq ingerlateqqissinnaavaat kommuneni ataasiakkaani pisassaritinneqartut ima agguataarlugit:

Nanortalik kommune	28 tons
Qaqortoq kommune	33 tons
Narsaq kommune	28 tons
Paamiut kommune	43 tons
Nuuk kommune	38 tons
Maniitsoq kommune	38 tons
Sisimiut kommune	30 tons
Kangaatsiaq kommune	23 tons
Aasiaat kommune	30 tons
Qasigiannguit kommune	15 tons
Ilulissat kommune	15 tons
Qeqertarsuaq kommune	25 tons
Uummannaq kommune	5 tons
Upernavik kommune	5 tons
	356 tons

c) a-mi b-milu pisassat taaneqartut nunguppata, kingorna qarsorsarsorluni 20 tonsit aalisarneqarsinnaapput. Aalisarneq qanoq ingerlanneqassanersoq KTU-p KNAPK-llu akornanni isumaqatigiissutigineqassaaq.
Imm. 2. Pisat Kalaallit Nunaanni tunitsivinnuttulaanneqassapput. Angallatit tulaassisut suminngaanneernersut tunitsiviup allattussavai, taamaalilluni pisassarititat qaangerneqannginnersut nakkutigineqarniassammat.

§ 6. Pisassaritinneqartut 533 tonsit § 2-mi taaneqartut aalisarlugit nungungajalerpata naalakkersuisunut ilaasortap taakku aalisarnerat tunitsivinnullu tulaanneqartarnerat qaqugu unissanersut nalunaarutigissavaa.
Imm. 2. Pisassarititat 533 tonsit § 2-mi taaneqartut qaangerlugit imaluunniit ataallugit pisarineqarsimappata naalakkersuisunut ilaasortap kommunekkuutaarlugit pisassarititat aqqutigalugit aaqqiissaaq.
Imm. 3. Kommunekkuutaarlugit pisassarititat aalisarlugit nungungajalerpata naalakkersuisunut ilaasortap taakku aalisarneqarnerat tunitsivinnullu tulaanneqartarnerat qaqugu unissanersut nalunaarutigissavaa.
Imm. 4. Naalakkersuisunut ilaasortaq KNAPK isumasioqatigeriarlugu kommunekkuutaarlugit pisassarititat pisarineqanngitsut kommunenut allanut nuussinnaavai. Kisiannili aatsaat taamatut iliortoqarsinnaavoq kommunekkuutaarlugit pisassarititaasut qaangerneqarsimanngippata, tak. imm. 2.
Imm. 5. Qarsorsarsorluni pisassat tamakkerneqalerpata, taava naalakkersuisunut ilaasortaq ilisimatitsissaaq qaqugu aalisarneq tunisinerlu unitsinneqassanersut.
Imm. 6. Pisariaqartillugu nalunaarutigisassat imm. 1-4-mi taaneqartut tusagassiuutitigut tusarliunneqartassapput. Piffissani aalisarnerup unitsiffissaani arlaannaatigulluunniit inuutissarsiutigalugu kapisilinniarneq inerteqqutaavoq, taassunga nammineq atugassatut pisat ilanngullugit.

§ 7. Nalunaarummi aalajangersakkanik unioqqutitsineq akiliissitsinernik/akuersissummilluunniit arsaarinninnermik kinguneqarsinaavoq. Suliassallu tassunga tunngassuteqartut Inatsisartut inatsisaanni inuutissarsiutigalugu aalisarnermut tunngasumi maleruagassat malillugit suliarineqartussaapput.
Imm. 2. Akiliisitsinerit aningaasartaasa affai naalagaaffiup karsianut nakkartinneqassapput, affai Namminersornerullutik Oqartussanut taakkulu KNAPK-p ikiorsiisarnermi aningaasaateqarfianut (Carl Egedes fond) nakkartinneqassallutik aalisartunut atugarliortunut aalisartullu qimataannut ikiuutitut agguaatassanngorlugit.

§ 8. Nalunaarut ingerlaannaq atuutilerpoq. Ilutigalugu Namminersornerullutik Oqartussat nalunaarutaat nr. 23 2. juli 1986-imeersoq kapisilinniarsinnaatitaanermut akuersissutinut tunngasoq atortunnaarpoq.

Nuuk, ulloq 6. juli 1987

Moses Olsen

/

Einar Lemche