Tuttunik eqqissisimatitsinissaq pillugu Namminersornerullutik Oqartussat nalunaarutaat nr. 10, 9. april 1987-imeersoq.

Inuutissarsiutigalugu piniarneq aallaaniarnerlu pillugit Inatsisartut inatsisaanni nr. 12-imi 22. november 1984-imeersumi § 4 naapertorlugu makku aalajangersarneqarput:

 

§ 1. Taamaallaat tuttunniartoqarsinnaavoq pifissami augustip 1-aniit aallaqqaataaniit septemberip 25-anut.
Imm. 2. Aalisarnermi Suliffissuaqarnermilu Naalakkersuisoq imm. 1-imi aalajangersagaq saneqqullugu akuersissuteqarsinnaavoq Kangaatsiap kommuneani kommunalbestyrelsep inassuteqarnera tunngavigalugu piffissami martsip 1-aniit martsip 15-anut tuttunniartoqarsinnaasoq.
Imm. 3. Pisutsinik immikkorluinnaq pisoqartillugu, soorlu sivisuumik piniagassaalatsisoqartillugu imaluunniit aalisarniarnermi sikut ajornartorsiutaatillugit, naalakkersuisunut ilaasortaq imm. 1-imi aalajangersagaq saneqqullugu akuersissuteqarsinnaavoq kommuneni ataasiakkaani inuit aalisarnermik pirtiarnermillu inuutissarsiuteqavinnerminnut allagartamik uppernarsaammik pigisaqartut piffissami martsip 1-aniit martsip 15-ianut killilimmik tuttunniarsinnaatillugit. Akuersissuteqarneq piumasaqaatitaalu radiokkut tusagassiuutitigullu naqitatigut nalunaarutigineqartassapput. Piffinni § 5, imm. 1-imi ilanngunneqarsimasuni kommunalbestyrelset aamma taamatut aalajangiisinnaatitaapput.
Imm. 4. Tuttunniarsinnaatitsinermi ulloq aallartiffissaq aamma naammassiffissaq ilaatinneqarput.

§ 2. Inuit piniarnermut aallaaniarnermullu inuutissarsiutigivillugu allagartallit killeqanngitsumik piffissami § 1, imm. 1-imi taaneqarsimasumi tuttunniarsinnaatitaapput.
Imm. 2. Inuit piniarnermut aallaaniarnermullu saniatigooralugu allagartallit piffissami § 1, imm. 1-imi taaneqarsimasumi tuttunik 8-nik illoqatigiinnut ataatsinut pisaqarsinnaatitaapput.
Imm. 3. Inuit sukkisaarsaatigalugu piniarnermut aallaaniarnermullu allagartallit aammalu danskinut innuttaaqataasut Kalaallit Nunaanni najugaqavissut piffissami § 1, imm. 1-imi taaneqarsimasumi tuttunik pingasut tikillugit illoqatigiinnut atatsinut pisaqarsinnaatitaapput.
Imm. 4. Inunnut nalunaarummi nr. 543-mi 11. november 1976-imeersumi aallaaniarnermut aalisarnermullu allagartaqarnermut tunngasumi aalajangersakkat malillugit pinngitsooratik piniarnermut allagartamik qinnuteqartussanut nalunaarummi matumani aalajangersakkat atuupput.

§ 3. Qoorortuuaqqat, timmiarsiutit aammalu qoorortuut eqqarasuartaatit eqittaannartakkallu tuttunniarnermi atornissaat inerteqqutaapput.
Imm. 2. Tuttut pissatat sapinngisaq malillugu piaartumik ujarneqassapput toqunneqarlutillu.
Imm. 3. Piffissani tuttunniarsinnaatitaaffiusuni qimmit piniarfiusunut nassaqqusanngillat.
Imm. 4. Piffissami martsip 1-aniit martsip 15-anut § 1, imm. 2 aamma 3 tunngavigalugit tuttunniarnissamik akuersisoqassappat, imm. 3-mi aalajangersagaq saneqqullugu ajornartinneqanngilaq qimmit qimuttut atorneqarnissaat. Ingerlaarnermi qimmit pitussimanngitsut nassaqquneqanngillat.
Imm. 5. Timmisartut, helikopterit nunakkoorutillu motorillit tuttunniarnissamut piareersarnermi tuttunniarnermilu imminermi atoqqusaanngillat aammalu tuttunniarnermi angallatigeqqusaanatik.

§ 4. Kommuneni tuttoqarfiusuni nunataasup tallimararterutaa tuttoqarfiussaq eqqissisimatitsiffiusoq. Taamatut eqqissisimatitsiviusuni ukiup qanoq ilineraluunniit tuttunniarneq inerteqqutaavoq.
Imm. 2. Kommunalbestyrelsep aalajangissavaa sumi tuttunik eqqissivissiisoqassanersoq. Eqqissivissiiviigineqarsimasut nunap assinganut nalunaarsorneqassapput Naalakkersuisunullu nassiunneqarlutik.

§ 5. Piffinni Qeqertarsuup kommuneani, Nuusuarmi, Tasiilap kommuneani aammalu Nuup kommuneani Qeqertarsuarmi Qoornullu Qeqertarsuani kiisalu Avanersuup kommuneani ukiut tamaasa taamaallaat tuttutarineqarsinnaapput sumiiffimmi pineqartumi kommunalbestyrelsep pisarineqarsinnaasutit amerlassusiliussai. Tamakkulu atugassaritinneqartut aamma atuupput piffissami 1. martsimiit 15. martsimut, piffimmi kommunalbestyrelse ukiukkut tuttunniarsinnaatitsippata.
Imm. 2. Nuussuarmut tunngatillugu imm. 1 tunngavigalugu aalajangiineq pisassaaq Ilulissani Uummannamilu kommunalbestyrelset isumaqatigiissuteqarneri malillugit.
Imm. 3. Kommunalbestyrelsep pineqartup Naalakkersuisoq nalunaarfigissavaa imm. 1 tunngavigalugu qanoq aalajangiisoqarsimanersoq. Taamatut nalunaarutiginninnerit pisassapput ukiut tamaasa tulleriinneri malillugit 15. februar aamma 15. juli nallertinnagit.
Imm. 4. Sumiiffimmi pineqartumi aalisartut piniartullu peqatigiiffiata inassutai tunngavigalugit imm. 1 tuttutassatut amerlassusiliussat kikkunnit piniarneqarnissaat pillugit kommunalbestyrelse agguataarisassaaq, taamatullu agguataarinermi inuit aalisarnermut, piniarnermut aallaaniarnermullu inuutissarsiuteqavissutut allagartallit salliutinneqartassapput.

§ 6. Tuttut nassuinik katersineq piniarfiusup nalaani kisimi pisinnaavoq.

§ 7. Tuttut pisarineqartut neqaat amiilu pisarineqarfiini tamakkerlutik atorneqartassapput imaluunniit tassanngaanniit nassarneqarlutik.

§ 8. Tuttunik unioqqutitsilluni pisarineqarsimasunik imaluunniit taakku ilaannik pisinissaq allatulluunniit pissarsinissaq inerteqqutaavoq.

§ 9. Nalunaarummi aalajangersakkanik unioqqutitsinerit akiliisitsissutaasinnaapput. Tamakku pillugit suliassat inuutissarsiutigalugu piniarneq aallaaniarnerlu pillugit Inatsisartut inatsisaanni aalajangersakkat malillugit suliarineqartassapput.

§ 10. Nalunaarut una atortuulerpoq 15. juli 1987.
Imm. 2. Peqatigitillugu atorunnaarsinneqarpoq Namminersornerullutik Oqartussat nalunaarutaat nr. 3, 26. februar 1986-imeersoq Namminersornerullutik nalunaarutaatigut nr. 26-kkut 12. august 1986-imeersukkut aammalu Namminersornerullutik Oqartussat nalunaarutaatigut nr. 30-kkut 5. september 1986-imeersukkut allannguuteqartinneqartarsimasoq. Peqatigitillugu atorunnaarsinneqarpoq landsrådip ileqqoreqqusaa 23. juli 1969-imeersoq Qeqertarsuarmi, Ilulissat kommuneani Nugssuarmilu tuttunik eqqissisimatitsilluinnarnermut tunngasoq landsrådip ileqqoreqqusaasigut 17. december 1973-imeersukkut aammalu 8. august 1978-imeersukkut kiisalu aamma Inatsisartut ileqqoreqqusaatigut 25. april 1980-imeersukkut allannguuteqartinneqarsimasoq,

Nuuk, ulloq 9. april 1987

Moses Olsen

/

Einar Lemche