Meeqqanut tapisiat pillugit Namminersornerullutik Oqartussat nalunaarutaat nr. 6, 17. februar 1987-imeersoq.

Meeqqanut tapisiat pillugit inatsisartut peqqussutaanni nr. 4-mi 11. november 1986-imeersumi § 4 aamma § 7 naapertorlugit makku aalajangersarneqarput:

 

§ 1. Isumaginninnermi ataatsimiititat peqqussutip § 4-ni, imm. 4-mi aalajangersakkat malillugit aalajangersinnaavaat meeqqanut tapisisitsinermi isertitat tunngavigineqartussat tassaasinnaasut akileraaruteqaataasussatut isertitanit allaanerusut siunissami isertitassat allanngorsimappata ilimanarpalluunniit isertitassat annertuumik allannguuteqassasut. Taamaaliorneq matuma kinguliini aalajangersakkat malillugit pisinnaavoq.
Imm. 2. Meeqqanut tapisiat tunniunneqarsinnaapput siunissami akileraarutissatut isertitassatut naatsorsuutigisat tunngavigalugit, inooqatigiinnermi atukkat katinnikkut, toqusoqarneratigut, avinnikkut imaluunniit aalajangersimasumik inooqatigiinnerup taamaatinneratigut imaluunniit inuutissarsiorsinnaajunnaarnersiuteqalernikkut aammalu utoqqalinersiuteqalernikkut kiisalu ilinniagaqarnermik aallartitsinikkut sivisunerusumilluunniit ilinniaqqinnerup aallartirtneqarneratigut allannguuteqarpata.
Imm. 3. Katinnikkut aammalu katissimanatik inooqatigiit angajoqqaajusut isertitatut akileraarusigassatut isertitaat naatsorsorneqartassapput ataatsimut isertitat akileraaruteqaataasussat tunngavigalugit.
Imm. 4. Katissimanatik aalajangersimasumik aappariit akileraarusigassatut isertitaat naatsorsorneqartassapput akileraarusigassatut ataatsimut isertitatut, inooqatigiinnea minnerpaamik ukiumik ataatsimik sivisussuseqarsimappat.
Imm. 5. Peqqussummi § 10 sianigeqquneqarpoq, tassani aalajangersarneqarpoq meeqqanut tapisianik tigusisussaatitaasoq pisussaatitaammat isumaginninnermi ataatsimiititat nalunaarfigissallugit atukkat allannguuteqarnerinik meeqqanut tapisiaqarsinnaanerup taamaatinneqarnissaanik kingunilinnik, imaluunniit tigusassarinngisatut tigusimasat utertinneqartussaammata.

§ 2. Peqqussummi § 7, imm. 2 aamma 3 malillugit   isumaginninnermi ataatsimiititap aalajangersinnaavaa, meeqqanut tapisiat meeqqamut anaanaanngitsumut tunniunneqassasut, aammalu aalajangiisinnaavoq kvartalikkuutaanngikkaluamik tunniussisoqartassasoq. Tamanna matuma kinguliini aalajangersakkat malillugit pisinnaavoq.
Imm. 2. Meeraq anaanaminiinngippat meeqqanut tapisiat tunniunneqassapput meeqqamik pilersuisuulluni tigumminnittumut, taamaaliorneq anaanaasumut isumaqatiginnissutigineqarsimappat.
Imm. 3. Anaanaasoq isumaqatigiissuteqarfigineqarsimanngippat meerarlu anaanaminiinnani, taava isumaginninnermi ataatsimiititap aalajangersinnaavaa meeqqanut tapisiat meeqqamik pilersuisuulluni tigumminnittumut tunniuneqassasut, tamatuma meeqqamut iluaqutaanerusussamik kinguneqarnissaa pingaaruteqarpat.
Imm. 4. Aammattaaq isumaginninnermi ataatsimiititap aalajangersinnaavaa piffissami kvartalimit sivikinnerusumik akuttussusilimmik kvartalimut pisassat agguarlugit tunniussisoqartassanersoq, aammalu immikkorluinnaq pissutissaqartillugu tunniussassat tamakkiisumik ilaannakortumilluunniit inuuniutissanngoreerlugit tunniunneqassanersut, taamaaliornerup meeqqamut iluaqutaanerusussamik kinguneqarnissaa pisariaqartuutippagu.
Imm. 5. Ataataasoq meeqqamut kisimiilluni angajoqqaatut oqartussaassuseqarpat matuma siuliani aalajangersakkat malillugit tunniussisoqartassaaq.

§ 3. Nalunaarut manna atortuulerpoq 1. april 1987 aallarnerfigalugu.

Kalaallit Nunaanni Namminersornerullutik Oqartussat, 17. februar 1987.

Aqqaluk Lynge

/

Martha Labansen