Ilinniagaqartut ilinniarnerminni taarsigassarsiaminnut taarsersuinerminni pisortanit tapiiffigineqartalernerannut Namminersornerullutik Oqartussat nalunaarutaat nr. 4, 19. marts 1987-imeersoq.

Ilinniagaqartut taarsigassarsiaasa taarsersorneqarneranni tapiissuteqartalernissamut Inatsisartut 13. november 1986 inatsisiliaanni nr. 9-mi §§-it 7 aamma 9 tunngavigalugit ima aalajangiisoqarpoq:

 

Kapitali 1
Piumasaqaatit tamanut atuuttut tapiissutillu naatsorsorneqartarnerat.

§ 1. Taarsersuinermut tapiineq pissaaq tapiissuteqarsinnaanermik periarfissat marluk atorlugit, apeqqutaatinnagu qanoq aningaasatigut isertitaqqortutigisimaneq imaluunniit qanoq aningaasanngorlugit pigisaqqortutigisimaneq, imaalillugu: Taarsigassarsianut taarsersuutissanut tapiinikkut aammalu aningaasaateqarfinniit taarsigassarsiarisimasat erniaannut tapiinikkut, tamanna pisimappat Namminersornerullutik Oqartussat qularnaveeqqusiisoralugit, kiisalu Namminersornerullutik Oqartussat qularnaveeqqusikkanik akilerallartariaqalersimassaannik.
Imm. 2. Ukiumi qaangiuttumi akilersuinissamut isumaqatigiissut eqqorlugu akilersuisimasut kisimik tapiifigineqarsinnaapput. Tassa isumaqatigiissut naapertorlugu akilersugassat akilersuutaasimasullu annertuumik assigiinngissuteqassanngillat. Akilersuinissamik kinguartitsigallarnissamik allakkatigut isumaqatigiissutaasimasut tapiiffigineqarnissamut akornutaassanngillat.
Imm. 3. Tapiissutit akuersissutigineqarlutillu tunniunneqartassapput ukiut ataasiakkaarlugit. Tunniunneqartassapput ullormi aningaaseriviit ernialiiffigisaanni. Akiitsorisat sinnerlugit tapiissuteqartoqarsinnaanngilaq. Taamaakkaluartorli tapiissutit taarsiissutissanit amerlanerusimappata, sinneqartoorutit atorneqarsinnaapput akiitsullip allanut akiligassaanut, akiitsut tamakku ikiorsiissuteqartarnermi piumasaqaataasunut naapertuuppata.

§ 2. Akilisuinermut tapiissutissat annertussusilerneqartassapput akiitsoqartup ukiumi qaangiuttumi akiliutigisimasaata annertussusiat naapertorlugu, inatsimmi § 3 naapertorlugu.
Imm. 2. Qinnuteqartut nunaqarfinneersut isorliunerusuneersullu, taakkunninngaaneerlutillu pappiaramik uppernarsaatissaqartut, ukiumi qaangiuttumi akilersuutitik marloriaatinngorlugit tapiffigineqaatigisinnaavaat.

Nunaqarfiit illoqarfiillu taamatut pineqartut makkuupput:
a) Kommuneqarfiit Uummannaq, Avanersuaq, Tasiilaq aamma Ittoqqortoormiit.
b) Nunatsinni nunaqarfiit.

Matumani ilanngunneqanngillat:
a) Kangaatsiaq.
b) Inoqarfiillu kommuneqarfittut naatsorsuussaanngitsut.

§ 3. Ernianut tapiissutit ukiukkuutartumik naatsorsorneqarlutillu tunniunneqartassapput.
Imm. 2. Aningaasaateqarfinniit taarsigassarsiat Namminersornerullutik Oqartussanit qularnaveeqquserneqarsimasut erniaannut tapiissutit naatsorsorneqartassapput, ukiumi qaangiuttumi ernialersuutaasimasut, december-illu 31.-ani akiitsut sinnerisa 4%-iisa nikingassutaattut. Tapiissutit aningaasaateqarfiit ernialiinerat peqatigalugu tunniunneqartassapput.
Imm. 3. Aningaasaateqarfinniit taarsigassarsiat  Namminersornerullutik Oqartussanit akilertariaqalersimasut erniaannut tapiissutit naatsorsorneqartassapput, ukiumi qaangiuttumi ernialersuutaasimasut, december-illu 31.-ani akiitsut sinnerisa 8%-iisa nikingassutaattut. Tapiissutit aningaasateqarfiit ernialiinerat peqatigalugu tunniunneqartassapput.

 

Kapitali 2
Qinnuteqarnermi periusissat.

§ 4. Akiitsunut akilersuinermut tapiiffigeqqulluni qinnuteqaateqartoqartassaaq ukiumut ataasiarluni tapiissutissallu aamma ukiumut ataasiarlutik akuersissutigineqartassallutik. Qinnuteqaatit Ilinniartitaanermut Qullersaqarfimmi kingusinnerpaamik apilip aallaqqaataani tiguneqareersimasassapput. Ukioq tapiiffigineqarfiusoq tassaassaaq ukioq qaangiuttoq.
Imm. 2. Immersugassaq qinnuteqaatissaq Naalakkersuisut akuerisimasaat illoqarfikkuutaartuni allaffinni suliffissarsiuussisarfinni kiisalu Ilinniartitaanermut Qullersaqarfimmi pineqarsinnaavoq.
Imm. 3. Allaganngorlugu qinnuteqaammi makku nalunaarsorsimassapput:
- Ateq, inuttut normu (cpr.-nr.), sumi najugaqarneq, tassa illoqarfimmiuuneq imalt. nunaqarfimmiuuneq erseqqissumik nalunaarlugit, inuit allattorneqarsimaffiannut sorlermut nalunaarsimanerup uppernarsaataa ilanngullugu.
- Ilinniagaqarsimanermik uppernarsaat, imalt. ilinniagaqarnerup ingerlateqqissimaneranik uppernarsaat, taarsersuisussaatitaanerlu nallereersimappat tamatumunnga uppernarsaat. Pappiaqqat pisariaqartut ilanngunneqassapput.
- Namminersornerullutik Oqartussanut akiitsoqarsimagaanni ukiumi naatsorsuuteqarfiusimasumi qanoq akiliisimatiginermut uppernarsaatit, akilersuinissamik isumaqatigiissutit pappiarartaat kiisalu ukiumi pineqartumi akilersuinissamik kinguartitigallarsima
gaanni pappiaqqat tamatumunnga uppernarsaatit.
- Aningaasaateqarfinni taarsigassarsisimagaanni Namminersornerullutik Oqartussat qularnaveerusersimasaannik makku nalunaarneqassapput: taarsigassarsiat konto-at, tassunga ilanngullugu 31. december qanoq akiitsoqartigineq, erniat %-mik annertussusiat, ukiumut erniaqaataasut, aammalu ukiumut qanoq akiliuteqarsimanermik pappiaqqat uppernarsaatissatut tamarmik ilanngunneqartassapput. Qinnuteqaat uppernarsarlugu atsiorneqassaaq.
Imm. 4. Qinnuteqaatit piffissarititaasoq qaangiutereersoq Ilinniartitaanermut Qullersagarfimmi tiguneqarsimasut amigartumillu immersorneqarsimasut imaluunniit nammattumik uppernarsaatissartaqanngitsut tunuartinneqarsinnaapput.
Imm. 5. Tapiiffigineqarnissamut akuerineqassagaanni taarsersuinissamik isumaqatigiissut allaganngorlugu piffissami tapiissuteqarfiusumi kingusinnerpamik 31. december pigereertariaqarpoq.

§ 5. Tapiiffigineqarnissamut akuerineqassagaanni taarsersuinissamik isumaqatigiissut qinnuteqaammi nalunaarsimasuugaluanik allannguuteqarsimappat Ilinniartitaanermut Qullersaqarfik ilisimatinneqassaaq.

 

Kapitali 3
Pissutsit immikkut ittut.

§ 6. Qinnuteqartoq ajornartorsiuteqavitsillugu Naalakkersuisut imaluunniit taakkua piginnaatitaat aalajangersinnaapput aningaasanut inatsimmi atugassiissutaasut iluanni Namminersornerullutik Oqartussanut ilinniagaqarnermut akiitsut isumakkeerneqarnissaannik imaluunniit ikilineqarnissaannik. Aamma taamaliortoqarsinnaavoq inatsimmi § 4-mi nalinginnaasumik aalajangersakkat najoqqutarineqarsinnaanngippata.
Imm. 2. "Immikkut ittumik ajornartorsiuteqavissutut" taaneqarsinnaavoq qinnuteqartoq piffissap qinnuteqarfimmi nalaani aammalu atasuinnarmik sivikinnerpaamik ukiumi ataatsimi ilinniagaqareernermi kingorna imaluunniit ilinniagarigaluaminik unitsitsinermi kingorna makku tunngavigalugit ikiorserneqartarsimappat:
a) Inatsisartut peqqussutaat nr. 7, 28. oktober 1982-imeersoq utoqqalinersiutit il.il. pillugit.
b) Inatsisartut peqqussutaat nr. 8, 28. oktober 1986-imeersoq inuutissarsiorsinnaajunnaarnersiutit pillugit.
c) Inatsisartut peqqussutaat nr. 10, 1. november 1982-imeersoq pisortanit ikiorsiissutit pillugit.
d) Inatsisartut peqqussutaat nr. 11, 1. november 1982-imeersoq pisortat annertussusileriikkamik ikiorsiisarnerat pillugu.
Tamatumani naatsorsuutigineqassalluni qinnuteqartoq pigisaqqortussutsimigut isertitaqqortussutsimigullu ilimanaateqanngitsoq qanittukkut akiitsuminik akiliisinnaanissaminut.

§ 7. Inatsimmi § 9 malillugu akiitsut isumakkeerneqaqqullugit ikilineqaqqullugilluunniit qinnuteqaatit annertuunik aningaasartaqarsimappata inunnik isumaginninnermi pisortat paasiniaaffigineqarsinnaapput.
Imm. 2. "Immikkut ittumik ajornartorsiuteqavissutut" qinnuteqaatini pissusiusut kiisalu tamatigut aningaasarsiaqarnermut pigisaqqortussutsimullu tunngasut erseqqarilluinnartumik nassuiarneqartassapput pappiaqqanillu uppernarsaatissaqartariaqarlutik. Aamma nalunaarneqarsimassaaq suut peqqutigalugit akiitsoqalersimaneq kiisalu qinnuteqarneq tikillugu qanoq taarsersuisimaneq.

§ 8. 150.000 kronet angullugit akiitsut isumakkeerneqarsinnaanerat Ilinniartitaanermut Qullersaqarfiup aalajangiiffigisassarai. 250.000 kronet angullugit akiitsut Niuernermut ilinniartitaanermullu Naalakkersuisup aalajangiiffigisassarai. 250.000 kronet sinnerlugit akiitsut Naalakkersuisut aalajangiiffigisassaraat.

 

Kapitali 4
Atortuulersitsineq.

§ 9. Nalunaarut manna atuutilerpoq 1. januar 1987.

Nuuk, ulloq 19. marts 1987.

Josef Motzfeldt

/

Ejvind Christoffersen