Kalaallit Nunaanni Naalakkersuisunut, Landsrådimut, Inatsisartunut il.il. ilaasortaasimasut soraarnerussutisiaqartinneqarnerat pillugu Inatsisartut inatsisaat nr. 4, 9. juni 1986-imeersoq.
§ 1. Kalaallit Nunaanni Naalakkersuisunut, Landsrådimut Inatsisartunullu ilaasortaasimasut taakkulu aappaat soraarnerussutisiaqartinneqassapput malittarisassat inatsimmi matumani aalajangersarneqartut naapertorlugit.
§ 2. Soraarnerussutisiaqarsinnaatitaanissamut patsisissaatitaavoq inuup pineqartup Naalakkersuisunut ilaasortaasimanissaa toqqagaaffimmi ataatsimi arlalinniluunniit sivikinnerpaamik katillugit ukiunik aallartitanik arfineq-pingasunik sivisussuseqartuni, imaluunniit Landsrådimut Inatsisartunulluunniit ilaasortaasimanissaa qinigaaffimmi ataatsimi arlalinniluunniit sivikinnerpaamik katillugit ukiunik aallartitanik arfineq-pingasunik sivisussuseqartuni.
Imm. 2. Soraarnerussutisiaqartoqartassaaq qaammatip toqqakkatut qinikkatulluunniit aningaasarsiaqarfiup ilaasortaajunnaarnersiaqarfiulluunniit naaneraniit, aatsaalli inuk pineqartoq piffissap tamatuma nalaani 60-inik ukioqalersimappat, taamaassimanngippallu 60-inik ukioqalernerata kingorna qaammatip siulliup aallartinneraniit.
Imm. 3. Ilaasortaasimasoq toqqagaaffimmut qinigaaffimmulluunniit soraarnerussutisiaqarfimminut uteqqissimaguni piffissami aningaasarsiaqarfimmini ilaasortaajunnaarnersiaqarfimminiluunniit soraarnerussutisiaqassanngilaq.§ 3. Soraarnerussutisiaqartoqartassaaq aningaasarsiat soraarnerussutisiaqaataasinnaasut kingullermik tunniunneqarsimasut tunngavigalugit; soraarnerussutisiat iluarsiissuteqartinneqartassapput malittarisassat tjenestemandinut Kalaallit Nunaanni najugaqavissunut atuuttut malillugit.
§ 4. Inatsisartunut ilaasortaasimasut namminneq soraarnerussutisiaat annertussuseqassapput tjenestemanditut atorfimmit akissaateqarfimmi 31-miittumit soraarninngornermi soraarnerussutisiarineqarsinnaasut qaffasinnerpaaffiisa 1/20-iinik, ukiut ilaasortaaffigisimasat aallartinneri tamaasa naatsorsuutigalugit. Soraarnerussutisiat qaffasinnerpaassapput ukiuni 20-ni ilaasortaasimagaanni.
§ 5. Naalakkersuisunut ilaasortaasimasut namminneq soraarnerussutisiaat annertussuseqassapput tjenestemanditut atorfimmit akissaateqarfimmi 39-miittumit soraarninngornermi soraarnerussutisiarineqarsinnaasut qaffasinnerpaaffiisa 1/20-iinik, ukiut toqqakkatut suliffigisimasat aallartinneri tamaasa naatsorsuutigalugit. Soraarnerussutisiat qaffasinnerpaassapput ukiuni 20-ni
toqqakkatut sulisimagaanni.§ 6. Inuk Inatsisartunut kiisalu Naalakkersuisunut ilaasortaasimasutut soraarnerussutisiaqarsinnaatitaasoq annerpaamik soraarnerussutisiaqarsinnaatitaavoq § 5-imi aalajangersakkat malillugit.
Imm. 2. Inuk inatsit manna naapertorlugu soraarnerussutisialik soraarnerussutisiami saniatigut pisortanit akissarsiaqarsinnaatitaaguni soraarnerussutisiaqarsinnaatitaagunilluunniit inatsit manna naapertorlugu soraarnerussutisiaminik ikilileriffigineqassaaq akissarsiai soraanerussutisiaalu katillugit annertussuseqarsinnaanngorlugit Inatsisartut inatsisaat manna naapertorlugu qinikkatut sulisimanini tunngavigalugu ukiut soraarnerussutisiaqarfigisinnaasaasa qaffasinnerpaaffianni soraarnerussutisiarisinnaasaasut.§ 7. Aappamut qitornanullu soraarnerussutisiarititat malittarisassat Kalaallit Nunaanni tjenestemandinut atuuttut malillugit tunniunneqartassapput.
§ 8. Inatsisartut inatsisaatigut matumuuna inatsisit uku atorunnaarsinneqarput:
1) Kalaallit Nunaata Landsrådianut aamma Kalaallit Nunaata Landstingianut sivisuumik ilaasortaasimasunut soraarnerussutisiaqartitsinermik iluarsartuussinissaq pillugu Landstingip inatsisaa nr. 3 16. maj 1979-imeersoq.
"Ataqqinaammik tunissutisisitsisarneq pillugu inatsit".
2) Landsstyremut il.il. ilaasortaareersimasut soraarnerussutisiaqalernissaannik Landstingip inatsisaa nr. 7 14. juli 1982-imeersoq.
Imm. 2. Taamaattorli inatisisit imm. 1-imi taaneqartut naapertorlugit aningaasanik maannamut tunniussisarneq kiisalu pisinnaatitaaffiit atuuttut ingerlaannassaapput maannamutut annertussuseqarlutik aammalu malittarisassat maannamut atuuttut malillugit, aatsaallu taamaatinneqassallutik inatsisit pineqartut naapertorlugit pisinnaatitaaffiit atorunnaarpata.§ 9. Inatsisartut inatsisaat una atortuulerpoq 1. juli 1986.
Namminersornerullutik Oqartussat, ulloq 9. juni 1986.
Jonathan Motzfeldt/
John E.Jensen