Inatsisartut inatsisaat nr. 2, 24. april 1986-imeersoq umiartortut isumaqatigiissusioqatigine- qartarnerannut tunngasoq.

 

§ 1. Isumaqatigiissusiortoqartassaaq umiartortoq umiarsuarmut Kalaallit Nunaanni pigineqartumut ikigaangat tassanngaanniillu niugaangat.
Imm. 2. Imm. 1-imi maleruagassani uku pineqanngillat
a) umiarsuit ilaasartaataanngitsut 20 BRT/BT 20 inorlugit angissusillit
b) angallatit nuannaariartaatit 20 BRT/BT 20-inik minnerusut
c) umiarsualiviit eqqaanni prammit, usingiaatit, itisilerinermut maskinat kranillu puttasut.
Imm. 3. Imm. 1-imi aalajangersakkanut Naalakkersuisunut ilaasortaq pitsaasorinnuseq najoqqutaralugu naleqquttunngorsaatinik aalajangersaasinnaavoq.

§ 2. Inatsimmi uani isumaqatigiissusiorneq ima paasineqassaaq, umiartortup ikinerani isumaqatigiissutip immersorneqartarnissaa umiartulersumillu umiarsuullu naalagaanit atsiorneqartarnissaa.
Imm. 2. Oqaaseq "umiartortoq" atorneqartillugu inatsimmi uani inuk kanaluunniit umiarsuarmi angalasumi suliaqartoq pineqarpoq, taamaallaat umiarsuup naalagaa pinnagu.
Imm. 3. Angutit arnallu 16-it inorlugit ukiullit umiarsuarmi sulisorineqassanngillat.

§ 3. Umiarsuarnut Kalaallit Nunaanni pigineqartunut naalagaasut allamik inuttalerneqartarnerat pillugu nalunaaruteqartarnermut Naalakkersuisunut Ilaasortaq maleruagassanik erseqqinnerusunik aalajangersaassaaq.

§ 4. Umiarsuarmi naalagaasup ikinermi isumaqatigiissusiornermi paasiniassavaa umiartortup atorfimmut ingerlatassamut ilinniagarisai inatsit malillugu piumasarisanik naammassinnissimanersut. Umiarsuup naalagaata ingammik maluginiassavai pineqartup ukiui, peqqissusia ilinniagaalu inatsimmi piumasarineqartunik naammassinnissimanersut.
Imm. 2. Ikinermi isumaqatigiissusiornermi inuttaasunut immersugassaq Aalisarnermut Suliffissuaqarnermullu Naalakkersuisumit atortussanngortinneqarsimasoq atorneqassaaq.
Imm. 3. Inuttaasunut immersugassap § 2, imm. 1-imi taaneqartup assinga umiarsuarmi pappialaasivimmiitinneqassaaq. Pappialaasivik taanna umiarsuarmi inuttaasut allattorsimaffiannik taagorneqassaaq.
Imm. 4. Inuttaasut allattorsimaffiisa assinginik nassiussisarnissaq pillugu Naalakkersuisunut Ilaasortaq erseqqinnerusunik maleruagassaliussaaq.

§ 5. Kikkunnulluunniit umiarsuarnut Kalaallit Nunaanni pigineqartunut atuuttuuvoq, inuttaasunut immersugassap § 2, imm. 1-imi taaneqartup assinga umiartortumit tigummineqartoq ikinermi uppernarsaatitut atorsinnaanera.
Imm. 2. Danskit umiartornermut uppernarsaataannik piginnittoq pisinnaatitaavoq taanna umiartulernermi uppernarsaatitut atussallugu. Taamaattoqarpat taanna umiarsuup naalagaanit atsiorneqarsimassaaq.

§ 6. Inunnut 16-it inorlugit ukiulinnut inuttaasunut immersugassap atsiornissaa inerteqqutaavoq.
Imm. 2. Inunnut 18-it inorlugit ukiulinnut aappaganngitsunut inuttaasunut immersugassaq aatsaat atsiorneqarsinnaavoq angajoqqaatut oqartussaassuseqartoq atsiornikkut akuersissuteqarsimappat pineqartup umiartorsinnaaneranut.
Imm. 3. Umiartortut peqqinnissap tungaatigut misissorneqartarnerat pillugu Naalakkersuisunut Ilaasortaq erseqqinnerusunik maleruagassaliussaaq.

§ 7. Ikinermi isumaqatigiissuteqarnermi isumaqatigiissummillu nakkutilliinermi maleruagassat Naalakkersuisunut Ilaasortap maleruagassat erseqqinnerusut aalajangersassavai.
Imm. 2. Naalakkersuisunut Ilaasortaq umiarsuaatileqatigiinnut umiarsuulluunniit naalagaanut piumasaqarsinnaavoq paasissutissat nakkutilliinermut pisariaqartut pissarsiarinissaannut. Naalakkersuisunut Ilaasortaq aamma umiarsuarni tamani Kalaallit Nunaanni pigineqartuni nakkutilliinermut pisariaqartunik misissuisitsisinnaavoq.
Imm. 3. Naalakkersuisunut Ilaasortaq imm. 2-mi oqartussaassutsimik kommunemut pisortanulluunniit allanut tunniussisinnaavoq.

§ 8. §§ 1, 2, imm. 3, 4, imm. 1, aamma 3 aammalu 6, imm. 1 aamma 2-mik unioqqutitsin?rit akiliisitsinermik kinguneqartassapput, Kalaallit Nunaanni pinerluttaalisitsinermut inatsimmi sakkortunerusumik pineqaatissiisinnaanermik tunngavissaqanngippat.
Imm. 2. Aamma taamatut pineqaatissiisoqartassaaq § 7, imm. 2 malillugu paasissutissat piumasarineqartut nalunaarutigineqanngikkaangata.
Imm. 3. §§ 3, 4, imm. 4, 6, imm. 3 aamma 7, imm. 1 naapertorlugit aalajangersakkanik unioqqutitsinerit akiliisitaanermik pineqaatissiissutaasinnaasutut aalajangersaavigineqarsinnaapput.

§ 9. Inatsit atortuulerpoq 1. juli 1986.

Namminersornerullutik Oqartussat, ulloq 24. april 1986

Jonathan Motzfeldt

/

Moses Olsen