060686 NUISINA, j.nr. 5-00-01

 

Kommuneni suliffissaqartitsiniarnernut tapiissutit pillugit Namminersornerullutik Oqartussat nalunaarutaannut nr . 1986-imeersumut oqaaseqaatit.

 

§ 1 pillugu.

Siusinnerusukkut aalajangersakkani taaneqakulaaqaaq suliffissaqartitsiniarnernut tapiissutit suliffissat ataavartut siunertaralugit tapiissutaasassasut. Nalunaarummi uani erseqqissarneqarpoq, tapiissutit piffissap ingerlanerani suliffinnik ataavartunngortussanik pilersitsinissaq siunertaralugu tapiissutigineqartariaqartut. Aammattaaq pissutsit immikkut ittut pissutigalugit suliffissaaruteriataarnermik ikiorsiiniartoqartillugu suliffissaqartitsiniarnernut tapiisoqarsinnaavoq.

Imm. 2-mi erseqqissarneqarpoq tapiissutit suliniutinut kommunemit namminerluinnarmit aqunneqartunut tapiissutigineqartartut.

Nalunaarutip uuma suliffiit nainminersortut tapiiffigineqarsinnaanerat atulersippaa. Suliffeqarfiup inuiaqatigiinnut iluaqutaassuseqarneranut naliliiniarneq taamaallaat politikkikkut suliaqartuniippoq. Aammattaaq suliffeqarfiup ingerlatsinikkut suliffimmik aningaasalersuisinnaaneranik naliliinissaq politikkikkut suliaqartuniippoq. Taamaattumik namminersortunik ingerlatsiviup suliassamik suliarinninnissamut atugassatut paasissutissat tamaasa tunniuttariaqarpai. Taamaattumik suliffeqarfiup siunertaa suliffissaqartitsiniarnermillu naammassinnissinnaanera immikkut ittumik §§ 5, 7 aamma 8-mi aalajangersakkat naapertorlugit suliarineqartariaqarpoq.

§ 2 pillugu.

Ukiuni 1984-imi 1985-imilu misiliutitut sikukkut aalisakkanik assartuineq tapiiffigineqartarpoq. Misiliinerit takutippaat taamatut aaqqiineq arlalinnik sanngeequteqartoq. Aaqqissuussinerup tunuliaqutaa maannakkut sammiveqarluarnerusumik naammassiniarneqalerpoq, PROEKS-ip Namminersornerullutik Oqartussanit tiguneqarnerata kingorna. Taamaattumik aalisakkanik assartuinermik aqutsineq PRO-EKS-imit ingerlanneqarpoq. Imm. 2 SIK-mik, PRO-EKS-imik, KANUKOKA-mik imaluunniit suliffeqarfinnik suliassavimmut tunngassuteqartunik allanik immikkut ittumik isumaqatiginninniareernikkut periarfissiivoq, siunertanut akkord-ertutut akissarsititsinertut isikkulinnut tapiisoqarsinnaaneranik.

§ 3 pillugu.

Namminersortumik ingerlatani suliffinnut tapiisarnissamik aaqqissuussinerup nutaap kinguneratut ima aalajangersaaneqarpoq, namminersortumik ingerlatsiviup nammineq akissarsiap pingajorarterutaa akilissallugu taavalu kommunep pineqartup Namminersornerullutillu Oqartussat immikkut tamarmik aamma pingajorarterutaat.

§ 4 pillugu.

Siornatigut kommunet qaammat allortarlugu nalunaaruteqartarput. Nutaamik aaqqiinermi kommune ukiup affakkaartumik nal. akunneri atorsimasat pillugit nalunaaruteqarnissamut pisussaaffeqalerpoq. Kommunep nammineq qanoq isikkulimmik nalunaaruteqassanerluni aalajangersinnaavaa, taamaattumillu tamatumunnga immersugassat tamanut atortut siornatigut suliaasimasut suli atorsinnaallugit.

Namminersortuni suliffinnut tapiiffigineqarsimasunut nalunaarusiornissaq aamma atuuppoq.

§ 5 pillugu.

Soorlu siunertami taaneqartoq tapiissutit suliffinnut ataavartussanut pilersitsiniarnernut iluaqutaassapput, taamaattumillu peqanigiiffilioriaatsit imminut aningaasalersuisitsisinnaalersinnaasut soorunami pilersinnissaat anguniarneqartariaqarpoq.

§ 6 pillugu.

Suliffissaaleqisup suliffissaanik pissarsissunneq ajornavissimagaangat, uppernarsaatit suliffissarsiuussisarfimmit imaluunniit suliffissamik innersuussisarfimmit suliarineqartassapput.

§ 7 pillugu.

Kommunenit aqunneqartut suliffissaqartitsiniarnerit imaluunniit suliffeqarfiit namminersortunit aallartitat inuussutissarsiutinut imaluunniit inuussutissarsiutinik ineriartortitsinernut allanut nalingiinngitsumik unammillertuunnginnissaannik aalajangersagaq ersissitsisuuvoq.

§ 8 pillugu.

Aalajangersagaq taamaallaat ilanngunneqarpoq pilersaarutit ilaat tapiissutip nalunaarutigineqannginnerani sukumiinerusumik suliarineqarnissaanik pisariaqartitsisinnaanermik paasissutissiimmat.

§§ 9 10-lu pillugit.

Aalajangersakkat suliniutit akisussaanerlu kommunemut pineqartumut tunngasuunerat erseqqissarpaat.

§ 11 pillugu.

Nalunaarutip taassuma tassanilu nutaamik aaqqissuussinerup kommune pineqartoq periarfissippaa,tapiissutinik ingerlaannartunik aammalu nammineq suliniuteqarnermigut   kommunet Namminersornerullutillu Oqartussat akornanni akiliiffigeqatigiittarneq nalinginnaasoq aqqutigalugu tapiissutinik pisarnissaanik.

§ 12 pillugu.

Siornatigut atuussimasumut sanilliullugu kommunep tapiiffigeqqulluni qinnuteqaataa suliniutip aallartinneqarnissaa ukiumik sioqqullugu 1. maj tikitsinnagu Namminersornerullutik Oqartussanit tiguneqareersimanissaa allannguutaavoq.   Qinnuteqarnissamut killiliussaq taamatut aalajangerneqarpoq siumoortumik naatsorsuutit missingersuusiornerisa tamatuma nalaani pisarnerat pissutigalugu. Aammattaaq taamaaliornikkut kommunemi Namminersornerullutillu Oqartussani ungasinnerusoq eqqarsaatigalugu pilersaarusiorsinnaaneq anguneqassaaq. Piffissaq sivikitsoq atorlugu suliffissaqartitsiniarnernik aallartitsiniarnernut suli periarfissaqarpoq, tassa tamatumunnga tapiiffigeqquluni qinnuteqaatit pisariaqartitsineq naapertorlugu suliarineqartarmata.

§ 13 pillugu.

Aamma namminersortumik ingerlatsivinnut tunngatillugu tapiissutinik qinnuteqaatit kommunalbestyrelsep nassiuttassavai. Manna tikillugu inuussutissarsiutinik siunnersortinik kommunemilu teknikikkut aningaasanullu ingerlatsisoqarfinnik suleqateqartarnissaq pingaaruteqartarsimavoq. Aalisarnermut piniarnermullu atatillugu tapiissutit tunisassiornermik ataatsimiititaliami oqallisigineqartariaqarput. Tapiissutit pillugit qinnuteqaat NUISINA-mit tiguneqaraangat Proeks (qitiusoq) Inuutissarsiornermullu pisortaqarfik tusarfiginiaaffigineqartassapput.

§ 14 pillugu.

Namminersortumik ingerlatsiviup suliffissaaleqisunut suliffissat nammineerluni aningaasalersorsinnaannginnerinut uppernarsaateqartarnissaanut immikkoortoq immikkut maluginiarneqartariaqarpoq. Aalajangersakkami tassani suliffeqarfiup paasissutissanik pisarialinnik tamanik tunniussinissaanut piginnaatitsisoqarpoq.

§ 16 pillugu.

Kommuneni suliffissaqartitsiniarnernut aningaasatigut akuersissutit Namminersornerullutik Oqartussat aningaasanut inatsisaatigut pissarsiarineqartarput, taannalu akuerineqariaraangat tapiissutissanik akuersisoqavinnera sapinngisamik piaartumik nalunaarutigineqartarpoq.