Namminersornerullutik Oqartussat nalunaarutaat nr. 15, 11. april 1986-imeersoq, 1986-imi saarullinniarsinnaanermut akuersissutinut tunngasoq.
Inuutissarsiutigalugu aalisarneq pillugu Inatsisartut inatsisaanni nr. 11-mi 21. november 1984-imeersumi §§-it 8, imm. 2 aamma 3, 9, 10, 12 kiisalu 14-imi inuutissarsiutigalugu aalisarnermut tunngasumi aalajangersarneqarpoq:
§ 1. Nalunaarut immami Kalaallit Nunaata aalisarfittaani inuutissarsiutigalugu saarullinniarnermut inunnit piginneqatigiiffinnillu Inatsisartut inatsisaat nr. 11-i 21. november 1984-imeersoq § 3 naapertorlugu aalisarsinnaanermut allagartaqartunut atuuttuuvoq.
Imm. 2. Nalunaarummi angallatit angissusii allassimapput uuttueriaatsit inatsimmi nr. 203-mi 18. maj 1977-imi umiarsuarnik uuttuisarnermut tunngasumi kiisalu siusinnerusukkut maleruagassani atuuttuni aalajangersakkat naapertorlugit. Angallatip usisinnaassusia aalajangiisuussaaq nalunaarut malillugu angallatip pineqartup angissusianut killigitinneqartup sorliup atorneqarnissaanut.§ 2. Angallatit BT 80-it, 80 BRT-inillu anginerusut atorlugit saarullinniarsinnaanissaq akuersinissami tunngavigineqassaaq.
Imm. 2. Akuersissut qaammatisiutit malillugit ukiumut qinnutigineqartassaq. Qinnuteqaat imm. 3-mi paasissutissanik taaneqartunik ilallugu Naalakkersuisunut ilaasortamit tiguneqareersimassaaq kingusinnerpaamik 5. november qaammatisiutit malillugit ukiumi siuliani. Immikkut ittunik pissutissaqartillugu killigititaq taanna Naalakkersuisunut ilaasortap qinnuteqaatini ataasiakkaani allanngortissinnaavaa.
Imm. 3. Qinnuteqaat immersugassamut nalunaarummut matumunnga ilanngunneqartumut immersuinikkut qinnutigineqassaaq.
Imm. 4. Akuersissutinik tunniussinissami piumasarineqarpoq angallatip inuttaasa minnerpaamik 70%-iisa Kalaallit Nunaanni aalajangersimasumik ukiuni marlunni najugaqarsimanissaat najugaqartuarnissaallu kiisalu kalaallinut inuiaqatigiinnut aalajangersimasumik inuutissarsiuteqavinnermik uppernarsaateqarnissaat. Piumasarisap naammassineqarsimaneranut uppernarsaat Kalaallit Nunaanni aalisarsinnaanermut Uppernarsaatinik Nakkutilliivimmut nassiunneqassaaq piniariareernerit tamaasa inuttaasut allattorsimaffiannik immersuinikkut, tassungalu ilanngullugu allanneqassalluni aalisarsinnaanermut uppernarsaatip normua.
Imm. 5. Immikkut pissutissaqartillugu imm. 4-mi piumasarineqartut Naalakkersuisunut ilaasortap atunngitsoortissinnaavai.
Imm. 6. Akuersissummi piumasarineqarsinnaavoq pisat agguarnerisa aalajangersimasut nunami tunisassiorfinni suliarineqartussanngorlugit nunnigunneqarnissaat. Akuersissummi aamma piumasarineqarsinnaavoq pisat nunami tunisassiorfinnut aalajangersimasunut tunineqarnissaat.§ 3. Akuersissummik piginnittup toqunerani, piginneqatigiiffiup akuersissummik piginnittup atuukkunnaarnerani angallatilluunniit akuersissummik piginnittup tunineqarnerani annaanneqarsinnaajunnaarluniluunniit umiunerani akuersissut atorunnaarsinneqassaaq, isumaliutigineqaqqissinnaallunili paasineqarpat piumasarineqareersimasut nutaamik akuersissuteqarnissamut naammassineqarsimanersut.
Imm. 2. Akuersissut umiarsuarmiitinneqassaaq.§ 4. Akuersissummi annerpaamik pisarisinnaasat allassimassapput, aamma piffissap qanoq-ilinerani aalisarfimmi sumilu pisarineqarnissaat agguataarneqarsinnaallutik. Taamaaliornermi tunulequtarineqassapput pisarineqarsinnaatitaasut annertussusiisa, angallatit pisaqarsinnaassusiisa nunallu sua-tungaani aalisarnerup ineriartortinneqarnissaata pitsaaneruneranik nalileereernikkut.
Imm. 2. Naalakkersuisunut Ilaasortamit imm. 1-imi pisassaritinneqartut annertussusissaatut aalajangerneqarsimasut allanngortinneqarsinnaapput, pisassaritinneqartut tamarmiusut aalajangiivigineqarneranni pisassaritinneqartut tamarmiusut pisarineqarsinnaanissaat eqqarsaatigalugu Naalakkersuisunut Ilaasortap naliliinera malillugu allanguuteqartitsinissaq pisariaqartinneqarpat. Aamma taamatut allanngortitsisoqarsinnaavoq piffissaq aalisarfiillu aalajangersimasut eqqarsaatigalugit.
Imm. 3. Aalisarneq taamaatinneqassaaq pisassat aanertussusii imm. 1-imi 2-milu aalajangersarneqarsimasut pisarineqarpata, imaluunniit imm. 1-imi 2-milu aalajangersakkat milillugit qanoq-iliuuseqartoqartariaqarpat. Aalisarnerli kingusinnerpaamik taamaatinneqassaaq Naalakkersuisunut Ilaasortaq radio-kkut tusagassiutitigullu taanna pillugu nalunaaruteqarpat. Piffissamut aalisarfinnullu aalajangersimasunuinnarnulli taamatut nalunaaruteqarneq attuumassuteqarsinnaavoq.§ 5. Nalunaarummi matumani aalajangersakkanik unioqqutitsineq akiliisitaanermik aamma/imaluunniit akuersissummik arsaaagaanermik kinguneqarsinnaavoq. suliassallu tassunga tunngassuteqartut Inatsisartut inatsisaanni inuutissarsiutigalugu aalisarnermut tunngasumi maleruagassat malillugit suliarineqartassapput.
§ 6. Nalunaarut manna atuutilerpoq 1. maj 1986.
Imm. 2. Namminersornerullutik Oqartussat nalunaarutaat nr. 8 3. december 1984-imeersoq saarullinniarsinnaanermut akuersissutinut tunngasoq nalunaarutip uuma atuutilerneratigut atorunnaarpoq.
Nuuk, ulloq 11. april 1986
Moses Olsen/
Einar Lemche
Ilanngussaq 1 (pdf-format)
Ilanngussaq 2 (pdf-format)