Namminersornerullutik Oqartussat nalunaarutaat nr. 13, 11. april 1986-imeersoq arfanniarnerup killilersugaaneranut tunngasoq.
Inatsisartut inatsisaat nr. 12 22. november 1984-imeersumi inuutissarsiutigalugu piniarnermut aallaaniarnermullu tunngasumi § 4 najoqqutaralugu aalajangersarneqarpoq:
§ 1. Nalunaarut arfanniarnermut, tikaagullinnit annerusunut, immami Kalaallit Nunaata aalisarfittaani immanilu Kalaallit Nunaata eqqaaniittuni atuuttuuvoq.
§ 2. Piniarneq pillugu nalunaarummi aalajangersakkami pineqarput arfernik § 1-imi taaneqartunik pisaqarneq imaluunniit piniarniarneq qanorluunniit ittoq.
Imm. 2. Arfernik taakkuninnga eqqaassineq pisaqarnissamik siunertaqanngitsoq inerteqqutaavoq.§ 3. Arferit arnavissat piaqqisarpata taakku piaraalluunniit pisarineqassanngillat.
§ 4. Arfiviit (grønlandshval) arfiviilluunniit allat piniaqqusaanngillat.
§ 5. Tunnullit piniaqqusaangillat.
§ 6. Qipoqqaat piniaqqusaanngillat.
§ 7. Kigutilissuit piniaqqusaanngillat
§ 8. Arfanniarnermi unaat tuukkartallit igeriuttakkat 50 mm-imik qaangerluguluunniit sulloqqortussusillit (kaliber) taamaallaat atorneqaqqusaapput.
§ 9. Qaammatisiutit malillugit ukiup ingerlanerani tikaagulliusaat amerlanerpaamik qulit Kitaani pisarineqarsinnaapput.
Imm. 2. Ukiumut tikaagulliusaartassat 1986-i aallarnerfigalugu imatut agguataarneqarput:
a) Tikaagulliusaaq ataasiinnaq kommuuneni ukuani pisarineqarsinnaatitaavoq: Nanortalik, Qaqortoq, Ivittuut Paamiullu.
b) amerlanerpaamik tikaagulliusaat pingasut kommuunini ukunani pisarineqarsinnaatitaapput: Nuuk, Maniitsoq Sisimiullu.
c) Amerlanerpaamik tikaagulliusaat arfinillit kommuunini ukunani pisarineqarsinnaatitaapput: Kangaatsiaq, Aasiaat, Qeqertarsuaq, Qasigiannguit, Ilulissat, Uummannaq, Upernavik Avanersuarlu.
Imm. 3. lmm. 1-imi 2-milu pisarineqarsinnaatitaasut qaammatisiutit malillugit ukiumi qaangerneqarsimagaangata, ukiup tulliani pisassat amerlaqataannik ikilisinneqartassapput.
Imm. 4. Tikaagulliusaat 15,2 meterinit anginerusut taamaallaat pisarineqarsinnaatitaapput.§ 10. Tikaagulliusaartassat tamakkerneqarsimanerat pillugu Naalakkersuisunut ilaasortaq radiokkut tusagassiuutitigullu nalunaaruteqarsinnaavoq.
Imm. 2. Naalakkersuisunut ilaasortaq taamatut nalunaaruteqareeraangat qaammatisiutit malillugit ukiumi pineqartumi tikaagulliusaartoqaqqittassanngilaq.§ 11. Arferit pisat piniartunit kommunemut piaarnerpaamik nalunaarutigineqartassapput tassanngaanillu piaarnerpaamik Aalisarnermut Suliffissuaqarnermullu Naalakkersuisoqarfimmutf telex nr. 90613-imut, nassiuteqqinneqarlutik.
§ 12. Arferit tunnullit 10,7 meterinit anginerusut taamaallaat pisarineqarsinnaapput.
§ 13. Nalunaarummi aalajangersakkanik unioqqutitsinerit mianersoqqussummik akiliisitsinermilluunnit kinguneqarsinnaapput. Suliassat tassunga tunngassuteqartut inuutissarsiutigalugu piniarnermut aallaniarnermullu Inatsisartut inatsisaani malittarisassat malillugit suliarineqartassapput.
§ 14. Nalunaarut saqqummiunneqarnermigut atortuulerpoq.
Imm. 2. Nalunaarutip atuutilerneratigut Namminersornerullutik Oqartussat nalunaarutaat nr. 17, 9. maj 1985-imeersoq arfanniarnerup killilersugaaneranut tunngasumik imaqartoq atorunnaarsinneqarpoq.
Nuuk, ulloq 11. april 1986
Moses Olsen/
Emil Abelsen