Kinguppaat akitsuusiissutaat pillugu Namminersornerullutik Oqartussat nalunaarutaat nr. 6, 11. marts 1986-meersoq.
Inatsisartut inatsisaanni nr. 11-mi 21. november 1984-imeersumi inuutissarsiutigalugu aalisarnermut tunngasumi § 10, imm. 1 najoqqutaralugu kinguppaat piniarneqartut kalaallit tunisassiorfiini suliassanngorlugit nunnigunneqartussaanngitsut akitsuutaasa tiguniarneqartarnerat atorunnaarsinneqartarnerallu pillugit aalajangersakkat makku aalajangersarneqarput:
§ 1. Nalunaarummi pineqarput angallatit 80 BRT/BT 80 taakkulu qaangerlugit angissusillit, kinguppattaminnik uutitigaanngitsunik kalaallit tunisassiorfiini suliarisassanngorlugit tamakkiisumik nunnigussisartuunngitsut aamma Namminersornerullutik Oqartussat nalunaarutaat tunngavigalugu kinguppaanniarsinnaanermut akuersissummik tunineqarsimasut atorlugit kinguppanniarnermi piginneqatigiiffinniit inunnillu ataasiakkaaniit akitsuusiissutit tiguniarneqartarnerat.
§ 2. Akitsuusiissut aningaasatigut inatsimmi qanoq ilisukkulluunniit atuuttumi annertussusilerneqassaaq kinguppattanullu Kalaallit Nunaanni tunisassiorfinni suliarisassanngorlugit tunineqartuunngitsunut atuulluni.
§ 3. Akitsuusiissut qaammatit pingasukkaarlugit akiliuteqartitsigallarnikkut tiguniarneqartassaaq, tassanilu pisat nunami suliarisassanngorlugit nunnigunneqartussaanngitsut annertussusii tunngavigineqassallutik.
Imm. 2. Kvartalimut siullermut akitsuutip 50%-ia 15. maj akilerneqassaaq.
Imm. 3. Kvartalit aappaannut akitsuutip 80%-ia 15. august akilerneqassaaq.
Imm. 4. Kvartalit pingajuannut akitsuutip 80%-ia 15. november akilerneqassaaq.
Imm. 5. Kvartalit sisamaannut akitsuutip 80%-ia 15. februar akilerneqassaaq.
Imm. 6. Kinguppattat nioqqutigineqarsimasut tunineqartussaatitaanngitsulli kg-nngorlugit annertussusiisa naatsorsuusiornerat kukkunersiuisumit akuerisaq 15. februar nallertinnagu tunniunneqarsimassaaq, aamma kinguppaqarpat quersuarmiititanik tunineqartussaatitaanngitsunik januarip aallaqqaataani decemberillu naggataani ukiup siuliani.
Imm. 7. Akiligassap akilerneqartussanngornerata kingorna ullut 30-t qaangiutsinnagit akiligassaq akilerneqarpat akiliineq akiliiffissamik eqquinertut naatsorsuutigineqassaaq.§ 4. Paasissutissat kingusinnerusukkut saqqummiunneqartut takutippassuk, tassunga ilanngullugit nioqquteqarnermi naatsorsuuteqarnermilu paasissutissat, § 3, imm. 5 tunngavigalugu akitsuusiissutinik naatsorsuinermi ukiumi ataatsimi pisat annertussusiinut paasissutissat eqqunngitsumik naatsorsorluagaanngitsumilluunniit tunngaveqartinneqarsimasut, akuersissummik piginnittoq ukioq tulliuttoq naatinnagu inaarutaasumik akiliuteqartinneqarsinnaavoq.
§ 5. Akuersissummik piginnittoq pisussaatitaavoq kinguppanniareernerit tamaasa Kalaallit Nunaanni Akuersissuteqartarnermut Nakkutilliisuutitanut pisanut paasissutissanik nassiussaqassalluni. Paasissutissani takuneqarsinnaassapput pisat tamakkerlugit qanoq annertutiginerat kiisalu taakkunanit kinguppaat qanoq annertutigisut uunneqanngitsut Kalaallit Nunaanni tunisassiorfinnut nunnigunneqarsimasut.
Imm. 2. Akuersissummik piginnittoq nalunaaruteqanngitsoorpat amigartunilluunniit nalunaaruteqarpat akitsuusiissutissaq akiliutigineqarallartorlu pisassatut akuersissutit pisarissamaakkalluunniit tunngavigalugit naatsorsorneqarsinnaapput.§ 6. Ajutoornermi, sivisuumik amutsivimmiinnermi imaluunniit assigisaanik immikkut nammineq pisuussutiginngisamik pisoqarsimatillugu Aalisarnermut Suliffissuaqarnermullu Naalakkersuisup akuersissutigisinnaavaa tamakkiisumik ilaannakortumilluunnit akitsuusiissummik akiliinngitsoorsinnaanissaq.
Imm. 2. Aalisarnermi aningaasarsiatigut akitsuusiissuteqarfissaatigut periarfissat ajortunngoriangaarsimatillugit Aalisarnermut Suliffissuaqarnermullu Naalakkersuisoq aamma taamatut akuersissuteqarsinnaavoq tamakkiisumik ilaannakortumilluunnit akitsuusiissummik akiliinngitsoornissamik.
Imm. 3. Imm. 1 aamma 2 tunngavigalugit qinnuteqaatit akuersissuteqarfigineqarsinnaanerat tunngavissaqanngippat immikkut ittutigut Aalisarnermut Suliffissuarqarnermullu Naalakkersuisoq akitsuusiissutip akilerneqarnissaanik kinguartitsisinnaavoq.§ 7. Akuersissut Naalakkersuisunut Ilaasortamit arsaarinnissutigineqarsinnaavoq akitsuusiissutip akilerneqartussanngorsimasup akilerneqarnisaata tungaanut.
§ 8. Nalunaarutip unioqqutinneqarnera akiliisitsinermik kinguneqarsinnaavoq. Suliassallu ingerlanneqartassapput Inatsisartut inatsisaanni nr. 11-mi 21. november 1984-imeersumi inuutissarsiutigalugu aalisarnermut tunngasumi maleruagassat malillugit.
§ 9. Nalunaarut saqqummiunneqarnermini atortuulerpoq. Taanna ilutigalugu nalunaarut nr. 13, 21. december 1984-imeersoq kinguppaat akitsuusiissutaasa tiguniarneqartarnerannut tunngasoq atorunnaarsinneqarpoq.
Nuuk, ulloq 11. marts 1986
Moses Olsen/
Einar Lemche