Sulisoqatigiikkuutaat isumaqatigiissutaasa il.il. sivitsorneqarneri nutaanngortinneqarnerilu kiisalu akitsuutisiat iluarsiissutitaasa allanngortinneqarneri pillugit Inatsisartut inatsisaat nr. 18, 19. november 1985-imeersoq.

 

§ 1. Inatsit akissarsianut il.il. Kalaallit Nunaanni Namminersornerullutik Oqartussani, kommuneni namminersortunilu atorfeqarnermi akissarsiarineqarsimasunut imaluunniit atorfeqarfinnit taakkunannga akissarsiaritinneqarsimasunut atuuppoq.

§ 2. Kalaallit Nunaanni akissarsiat atorfeqarnermilu atugarisat pillugit sulisoqatigiikkuutaanik isumaqatigiissutit il.il. akissaatitaat pristali Kalaallit Nunaanni iluarsiissutaasartoq tunngavigalugu iluarsiissuteqartinneqartartut, tak. akissarsiat il.il. akitsuutinut iluarsineqartarnerat pillugu Inatsisartut inatsisaat nr. 6 5. december 1983-imeersoq, akissarsiat allallu pillugit isumaqatigiissutit ataasiakkaat atorunnaarfianniit imaluunniit atorunnaarfigisinnaasaraluiniit naatsorsuullugu ukiunik marlunnik sivitsorneqarput imaluunniit nutaanngortinneqarlutik. Tamannali taamaallaat atuutissaaq akissarsiat allalluunniit pillugit isumaqatigiissut 19. november 1985 sioqqullugu suli nutaamik isumaqatigiissutigineqanngitsoq 1. april 1986-imut atorunnaartussanngortinneqarsimappat imaluunniit atorunnaartussanngortinneqarsinnaasimagaluarpat.
Imm. 2. Kalaallit Nunaanni akissarsiat atorfeqarnermilu atugarisat pillugit aalajangersakkat nalinginnaasut pisortanit aalajangersarneqarsimasut akuersissutigineqarsimasulluunniit inatsit imm. 1-imi taaneqartoq naapertorlugu akitsuutinik iluarsiissuteqarfigineqartartunut ilaatinneqartut inatsisillu atortuulersitaanerani atuuttut 31. marts 1987-imut sivitsorneqarput.
Imm. 3. Sivitsuineq nutaanngortitsinerluunniit imm. 1-imi aamma 2-mi aalajangerneqartoq pissaaq isumaqatigiissutit imaat allanngortinnagit, taamaallaat §-ini 3-mi 4-milu allannguutit allannguutigitillugit.

§ 3. Illuatungeriit isumaqatigiissuteqarnermikkut akissaateqarfiit § 2, imm. 1-imi ilaatinneqartut iluanni akissarsiat atorfeqarnermilu atugarisat pillugit isumaqatigiissuteqarfiit ataasiakkaat iluanni akissarsianik aalajangersimasunik ukiumut akissarsiat 31. marts 1985 naatsorsorneqarsimasut tunngavigalugit 5,95 % tikillugu qaffaasinnaapput. 3/4 tikillugu 1. april 1986-imiit sinnerilu 1. oktober 1986-imiit atorneqarsinnaapput.
Imm. 2. Akissaateqarfiit § 2, imm. 2-mi ilaatinneqartut iluanni imm. 1-misut ilusilimmik allannguisoqarsinnaavoq.

§ 4. Sulinikkut aningaasarsianut il.il. pristali Kalaallit Nunaanni iluarsiissutaasartoq tunngavigalugu akitsuutinut iluarsiissuteqartinneqartarnissaat isumaqatigiissutigineqarsimasunut aalajangersaavigineqarsimasunulluunniit tunngatillugu iluarsiissuteqartarneq atorunnaassaaq januar 1986-imi kinguliinilu pristalit iluarsiissutaasartut tunngavigalugit.
Imm. 2. Sulinikkut aningaasarsiat il.il. akitsuutitigut iluarsiiffigineqartarnissaat pillugit 1. april 1987 aallarnerfigalugu atuutilersussanik isumaqatigiissuteqarnernut aalajangersaanernulluunniit inatsit manna akornutaasussaanngilaq.

§ 5. § 2, imm. 1-imi 2-imilu kiisalu §4-mi aalajangersakkat apeqqutaatinnagit maannamutut aningaasat suliap suliarinerani aningaasartuutinut matussutissatut  tunniunneqartartut maannamutut iluarsiissuserneqartassapput akit maannakkumut atuuttut pillugit isumaqatigiissuteqarnermi aalajangersaanermiluunniit patsisissaatinneqartutut annertussusilikkat aningaasartuutinut matussutaasinnaanngorlugit.

§ 6. 1. april 1986 tikitsinnagu killiliussat § 3-mi aalajangersarneqartut isumaqatigiissutigineqanngippata apeqqut inummit eqqartuussisutut aalajangiisinnaassuseqartumit illuatungeriit toqqagaannit aalajangiiffigineqassaaq. Inummik eqqartuussisutut aalajangiisinnaassuseqartumik toqqaanissaq illuatungeriinnit isumaqatigiissutigineqarsinnaanngippat taanna isumaqatigiissitsiniartartunit toqqarneqassaaq, sulisulli kattuffii pineqartut Kalaallit Nunaanni angerlarsimaffeqarpata Kalaallit Nunaanni eqqartuussisut qullersaannit toqqarneqassaaq. Piffissaliussaq illuatungeriit isumaqatigiissuteqarnerisigut allangortinneqarsinnaavoq.
Imm. 2. Imm. 1-imi aalajangersakkanut atatillugu aningaasartuutit illuatungeriit tamarmik immikkut avillugit akilissavaat.

§ 7. Akissarsiat atorfeqarnermilu atugarisat pillugit isumaqatigiinniarfiusuni isumaqatigiissuteqanngitsoorfiusunili sullivinni eqqissisimasussaatitaanerit inatsisip matuma atortuulerneraniit eqquteqqinneqarput, taamaalillutillu illuatungeriit isumaqatigiissinnaannginnerata kingunerisaanik sulianik unitsitsinerit taamaatinneqassallutik.
Imm. 2. Aammattaaq akissarsiat atorfeqarnermilu atugarisat pillugit isumaqatigiinniarfiusartut sinnerini isumaqatigiissuteqarnermut atatillugu sullivinni eqqissisimasussaatitaanerit pillugit isumaqatigiissutaasimasut akissarsiat atorfeqarnermilu atugarisat pillugit isumaqatigiissutit sivitsorneqarnerisut sivisutigisumik sivitsorneqassapput.

§ 8. Akissarsiat atorfeqarnermilu atugarisat il. il. pillugit isumaqatigiissutinik inatsisikkut matumuuna nutaanngortinneqartunik sivitsorneqartunillu unioqqutsitsinerit aammalu imarisaat qanoq paasineqassanersut pillugit apeqqutit isumaqatigiinniarfiusartuni ataasiakkani sulisut sulisitsisullu aaqqiagiingissutaasa aaqqinniartarneri pillugit maleruagassat nalinginnaasut malillugit aalajangiiffigineqartassapput.

§ 9. Inatsit ingerlaannarluni atortuulerpoq.

Namminersornerullutik Oqartussat, ulloq 19.november 1985

Jonathan Motzfeldt

/

Moses Olsen