Kalaallit Nunaanni Arnat Angutillu Naligiissitaalernissaat Pillugu Ataatsimiititaliaqarnissaanik Inatsisartut inatsisaat nr. 17, 8 november 1985-imeersoq.

 

1. Kalaallit Nunaanni Inatsisartut arnat angutillu naligiissitaalernissaat pillugu ataatsimiititaliamik Kalaallit Nunaanni Arnat Angutillu Naligiissitaalernissaat Pillugu Ataatsimiititaliamik taaguuserneqartussamik pilersitsissapput, ataatsimiititaliallu taassuma suliassarissavaa kalaallini inuiaqatigiinni arnat angutillu naligiissitaalernissaasa angulertorniarnissaat, tamatumani ilanngullugu sulissutigissallugu suliffeqarfinni, atuartitsinermi ilinniartitsinermilu, kulturip tungaatigut kiisalu ilaqutariit inuuneranni arnat angutillu naligiissitaalernissaasa anguniarnissaat.
Imm. 2. Arnat Angutillu Naligiissitaalernissaat Pillugu Ataatsimiititaliap imm. 1-imi taaneqartutuut arnat angutillu naligiimmik pineqalernissaasa angulertornissaannik sulissuteqarnermini makku suliassarissavai:
a) Inuiaqatigiinni ineriartorneq inatsisiliorneq ilanngullugu malinnaaffigissallugit, kiisalu pissutsit arnat angutillu naligiissitaanissaannut akornutaasut misissugarissallugit taamaattoqartillugulu allannguutissanik siunnersuuteqartassalluni.
b) Arnat angutillu naligiissitaanissaat pillugu apeqqutini Namminersornerullutik Oqartussani oqartussaasunut kommunenullu siunnersuisartuussalluni.
c) Arnat angutillu naligiissitaalernissaannut tunngasunik misissuinissanut siunnersuuteqartassalluni, aammalu apeqqutit arnat angutillu naligiissitaalernerinut tunngasut qaammarsaatigineqartarnissaannut kaammattuisuullunilu ingerlatseqataasassalluni.
d) Danmarkimi arnat angutillu naligiissinneqarnissaat pillugit siunnersuisoqatigiinnut attaveqaataassalluni.
Imm. 3. Arnat Angutillu Naligiissitaalernissaat Pillugu Ataatsimiititaliap suliassat Inatsisartunit suliassissutigineqartut nammineerluniluunniit suliariniakkani suliassatut tigusassavai.
Imm. 4. Arnat Angutillu Naligiissitaalernissaat Pillugu Ataatsimiititaliaq inunnik immikkut ilisimasalinnik ataatsimiititaliamut ilaasortaanngitsunik taaseqataasinnaatinnagit ataatsimiinnermini peqataatitsisinnaavoq imaluunniit apeqqutit ataatsimiititaliami suliarineqartut inunnut taakkununnga itisilertissinnaallugit.

2. Arnat Angutillu Naligiissitaalernissaat Pillugu Ataatsimiititaliap ilaasortarissavai siulittaasoq Kalaallit Nunaanni Inatsisartut toqqagaat, kiisalu ataatsimiititaliamut ilaasortat arfinillit aammattaaq Inatsisartunit toqqarneqartussat. Ilaasortat tallimat uku inassuteqarnerit tunngavigalugit toqqarneqartassapput:
1) Kalaallit Nunaanni kommuneqarfiit Kattuffiat
2) Kalaallit Nunaanni arnat peqatigiiffiisa Kattuffiat
3) Kilut, Arnat Suleqatigiit aamma Aalisartut Piniartullu Nuliaasa Aappaasalu Peqatigiiffiat ataatsimoorlutik
4) Sulinermik Inuutissarsiuteqartut Kattuffiat (SIK)
5) Kalaallit Nunaanni Sulisitsisut Kattuffiat
Imm. 2. Ataatsimiititaliap suleriaasissani nammineerluni aalajangersassavaa.
Imm. 3. Ataatsimiititaliap ilaasortai piffissamut Inatsisartut qinigaaffiannik sivisussusilimmut qinerneqartassapput.

3. Inatsisartut allattoqarfiat Arnat Angutillu Naligiissitaalernissaat Pillugu Ataatsimiititaliamut allattoqarnikkut ikiuutissaaq.
Imm. 2. Ataatsimiititaliap sulineranut atatillugu aningaasartuutit landskassemit akilerneqartassapput.

4. Inatsisartut inatsisaat atortuulerpoq 1. januar 1986.




Kalaallit Nunaanni Namminersornerullutik Oqartussat, ulloq 8. november 1985.




Jonathan Motzfeldt

/

John E.Jensen