22. maj 1985 FM II 5/1985
Inatsisissamut siunnersuummut nassuiaatit.
Nalinginnaasumik nassuiaatit.Inatsisartut 1985-imi februarimi ataatsimiinneranni kalaallit erfalasussaata qanoq isikkoqarnissaa aalajangiiffigineqarpoq. Tamatuma kingorna Kalaallit Nunaannut ministerip Folketingimut siunnersuutigaa Kalaallit Nunaat namminerisaminik erfalasoqalissasoq.
Inatsisissamut pisinnaatitsissutissamut siunnersuut taanna aqqutigalugu naalagaaffimmi oqartussaasut anguniarpaat kalaallit efalasoqarnermik tungaatigut Savalimmiuni aaqqissuussinertut ittumik periarfissaqalersinneqassasut. Kalaallit namminerisaminnik erfalasoqalernissaat akuersissutigineqassaaq, taavalu taassuma ilusissaa Kunngip peqqussutaatigut aalajangersarneqassalluni. Kalaallit erfalasuata Kalaallit Nunaanni kiisal u umiarsuarni Kalaallit Nunaanni angerlarsimaffilittut nalunaarsorneqarsimasuni atorneqartarnissaanut Oqartussaaneq Namminersornerullutik Oqartussaniitinneqassaaq.
Naalagaaffimmili oqartussaasut maannamutuut Dannebrog atussavaat, aammalu inui t ataasiakkaat piumagunik Kalaallit Nunaata nunataani Dannebrog maannamutuut atorsinnaassavaat. Tamakku saniatigut inatsimmi pisinnaatitsissummi periarfissiisoqarpoq kalaallit erfalasuat Danmarkimi Savalimmiunilu atorneqarsinnaanngorlugu.
Kalaallit Nunaata erfalasua pillugu Inatsisartut inatsisissaannut siunnersuutip erfalasup Kalaallit Nunaanni atorneqarnissaanut aalajangersakkat imarai, aalajangersakkatigut taakkunuunatigut siunertarineqarpoq kalaallit erfalasuata ataqqineqarnissaata qularnaarunneqarnissaa. Taassuma saniatigut aalajangersarneqarpoq umiarsuit Kalaallit Nunaanni angerlarsimaffilittut nalunaarsorneqarsimasut naalagaaffimmi oqartussaasut umiarsuarinngippatik kalaallit erfalasuat inuiaassutsimut ilisarnaatitut erfalasorissagaat.
Inatsisartut inatsisissaannut siunnersuummi aalajangersakkanut ataasiakkaanut nassuiaatit.
§ 1-imut.
Imm. l-imi aalajangersakkakkut qularnaarniarneqarpoq erfalasup isikkua allanngortinniarlugu inassuteqartoqassappat aatsaat taamaaliortoqarsinnaassasoq Inatsisartut tamarmiusut aalajangerneratigut.
Imm. 2-mi aalajangersarneqarpoq ilisarnaatit aalajangersimasut allallu erfalasumi atorneqartassanngitsut. Savalimmiormiut erfalasuat pillugu lagtingiata inatsisaani taamatut aalajangersagaqarportaaq.
Imm. 3-mi aalajangersakkakkut siunertarineqarpoq erfalasut eqqortumik ilusiligaanngitsut nioqqutigineqannginnissaata qularnaarneqarnissaa. Aalajangersakkami pineqartut tassaapput erfalasut erfalasuvittuulli tamanut takusassiatut atorneqartussat, erfalasuaqqat nerriviit qaanni allatullu pinnersaatitut taamaaqataattulluunniit atorneqartussat pineqaratik. Savalimmiormiut erfalasuat pillugu lagtingiata inatsisaani taamatut aalajangersagaqarportaaq.
§ 2-mut.Naalakkersuisut ullunik erfalasulerfissanik aalajangersaasarnissaminnut pisinnaatitaanerat taamaallaat Namminersornerullutik Oqartussat kommunellu illuutaanni kalaallit erfalasuannik erfalasulertarnissamut tunngavoq, tassa naalagaaffimmi oqartussaasut maannamutuut Dannebrog atortussaammassuk.
§ 3-mut.Aalajangersakkatigut anguniarneqarpoq erfalasup ataqqineqarnissaata tunngavilersorneqarnissaa, erfalasut nalinginnaasumik atorneqartarnerattut atorneqartartussanngorlugu. Kisianni erfalasoq kalaallit nioqqutissiaasa tuniniarneqarneranni atorneqarsinnaassasoq akuersissutigineqarpoq. Savalimmiormiut erfalasuat pillugu lagtingiata inatsisaani taamatut aalajangersagaqarportaaq.
§ 4-mut.Imarsiornermi ileqquusut malillugit erfalasoq umiarsuarni inuiaassutsimut ilisarnaatitut atorneqartarpoq. Taamaammat siunnersuutigineqarpoq kalaallit umiarsuaasa Kalaallit Nunaata erfalasua inuiaassutsimut ilisarnaati tut erfalasorissagaat. Angallatit mikinerusut angallatinut nalunaarsuiffimmi umiarsuarnulluunniit nalunaarsuiffimmi nalunaarsorneqarsimanngitsut aalajangersakkani ilaatinneqanngillat, aammalu aalajangersakkat naalagaaffimmi oqartussaasut umiarsuaannut atuunnatik. Savalimmiormiut erfalasuat pillugu lagtingiata inatsisaani taamatut aalajangersagaqarportaaq.
§ 5-mut.Siunnersuutigineqarpoq inatsit akiliisitsisoqartassasoq.
unioqqutinneqaraangat Savalimmiormiut erfalasuat pillugu lagtingiata inatsisaani taamatut aalajangersagaqarportaaq.
§ 6-imut.Ulloq inatsisip atulerfissaatut siunnersuutigineqartoq tassa kalaallit inuiaattut ullorsiorfiat.
Pisariinnerusumik periuseqarnissaq siunertaralugu imm. 2-mi siunnersuutigineqarpoq § 4-mi umiarsuit erfalasoqartarnissaat pillugu aalajangersakkat aatsaat kingusinnerusukkut atulersinneqassasut.