Kalaallit Nunaanni inuutissarsiutitigut ilinniagaqarfiit sungiusaammillu sulliviit akornanni pisussaaffiit pillugit Landstingip inatsisaat nr. 1, 25. februar 1985-imeersoq.
§ 1. Sungiusaammik sulinissamut isumaqatigiissut, EFG-mi tunngaviusumik ilinniagaqareernerup kingorna ilinniartup sungiusaammillu sulliviup akornanni isumaqatigiissutaasoq, allassimasuussaaq isumaqatigiissutitullu allaffissiaq Naalakkersuisunit akuerineqarsimasoq atorneqassalluni. Isumaqatigiissummi ilaatigut nalunaarsimassaaq ilinniartup sungiusaammik sulinerup nalaani akissarsiassaasa annertussusaat.
Imm. 2. Akissarsiat annertussusaat sulisitsisut sulisartullu kattuffiini ataatsimut isumaqatigiissuteqarnikkut aalajangiiffigineqassapput. Ataatsimut isumaqatigiissutinik taamaattunik peqartoqanngippat akissarsiassat qanoq naatsorsorneqarnissaannut Naalakkersuisut erseqqinnerusunik maleruagassiussapput.
Imm. 3. Ilinniartup sungiusaammik sulinermi nalaani pisussaaffiinut isumaqatigiissutip imarisaanut aalajangersagaanullu allanut maleruagassat, Erhvervsuddannelsesrådimit inassuteqaatit tunngavigalugit Naalakkersuisunit aalajangersarneqassapput.§ 2. Ilinniagaqarnissamut isumaqatigiissutip naammassineqarnissaanut atasumik sungiusaammik sulliviup ilinniagaqartullu akornanni isumaqatigiinngittoqarpat brancheudvalgi ilisimatinneqassaaq suliniuteqassallunilu aaqqiagiinngissutip isumaqatigiinniutigitinneqarnissaanut.
Imm. 2. Isumaqatigiinngissutit imm. 1-mi taaneqartut brancheudvalgip suleqataaneratigut isumaqatigiissutigitinneqarsinnaanngippata ilinniagaqartup sungiusaammilluunniit sulliviup aaqqiagiinngissut akerleriissutit suliarineqartarneranni eqqartuussivimmut aalajangiiffigisassanngorlugu ingerlateqqissinnaavaat, SIK-p, Sulinermik Inuutissarsiuteqartut Kattuffiata, Pisortallu Isumaqatiginninniartartoqatigiivisa isumaqatigiissutaanni sulinermut tunngasumik akerleriissutit suliarineqarnissaannut maleruagassat malillugit suliarineqassallutik. Akerliissutit suliarineqartarneranni eqqartuussiviup aalajangiineratigut ilinniagaqarnissamut isumaqatigiissut atorunnaarsinneqarsinnaavoq soorluttaaq illuatungerisaq ajunaaruteqaateqartoq taarsiiffigineqarsinnaasoq, Ilinniartoq 18-it inorlugit ukioqarpat, angajoqqaatut oqartussaassuseqartup akuersissutaa pissarsiarineqassaaq.
Imm. 3. Aalajangiinerit imm. 2 naapertorlugu aalajangerneqartut eqqartuussivinnut suliassanngortinneqarsinnaanngillat.§ 3. Inatsit, 15.marts 1985-mi atortuulersinneqartussaq, kingusinnerpaamik ukiut marluk qaangiuppata iluarsartuussivigisassanngorlugu suliarineqassaaq.
Namminersornerullutik Oqartussat, ulloq 25. februar 1985.
Jonathan Motzfeldt/
Josef Motzfeldt