Ineqarnermut tapiiffigineqartarneq pillugu inatsisartut peqqussutaata nr. 1, 17. oktober 1983-imeersup allanngortinneqarnera pillugu inatsisartut peqqussutaat nr. 2, 13. august 1985-imeersoq.

 

§ 1

Inatsisartut peqqussutaanni nr. 1 17. oktober 1983-imeersumi ineqarnermut tapiiffigineqartarnermut tunngasumu kingusinnerusukkut allannguutai ilanngullugit imaattunik allanngortitsineqarpoq:

1. § 1, imm. 3 imatut allanngortinneqarpoq:
"§ 1. imm. 3. Ineqarnermut tapiiffiginittoqarsinnaavoq aamma inissiani ataatsimut isaariaqarluni ataatsimullu iggaveqarluni ineeqqani najugaqarfigineqartuni imaluunniit inissiani taakkua assigisaanni pisortat pigalugit inissialiarititaanni. Akerlianik ineqarnermut tapiiffiginnittoqarsinnaanngilaq ineeqqani pisortat namminersortulluunniit najugaqarfigititaanni."

2. § 3, imm. 2 aamma imm. 3 imatut allanngortinneqarpoq:
"§ 3, imm. 2. Init najugaqarfigineqarsinnaasut najugaqartunit ataaseq sinnerlugu amerlaneruppata malittarisatut pingaarnertut ineqarnermut tapiissuteqartoqarsinnaanngilaq.
Imm. 3. Kommunalbestyrelsi imm. 2-mi aalajangersakkamit allaasumik aalajangiisinnaavoq pissutsit immikkut ittut pisariaqartippassuk."

3. § 5, imm. 2 aamma 3 imatut allanngortinneqarput, imm. 4-lu nutaaq ilanngunneqarpoq:
"§ 5. imm. 2. Isertitat ilanngaatissat ilanngaatigereerlugit iluarsisat naatsorsorneqassapput inoqutigiinni inoqutaasut ukiumi isertitaqarfiusumi inaarutaasumik akileraarusiiffigineqarsimasumi kingullermi akileraarutaasussanik isertitaat tunngavigalugit. Tassunga ilanngullugit naatsorsuutigineqassapput ingerlatsinermi aningaasartuutit, ingerlatsinermut atasumik nalikilliliissutit ernianullu aningaasartuutit isertitat pilernerannut attuumassuteqanngitsut, taamatullu aalajangersimasumik angissusileriikkamik ikiuutit aammalu utoqqalinersiaqarpat taakkua aningaasat tunngavigisaat imaluunniit inuussutissarsiorsinnaajunnaarnersiutit aningaasat tunngavigisaat ilanngullugit naatsorsuutigineqassallutik.
Imm. 3. Inoqutigiit isertitaat annertuumik ataavartumillu ikileriarsimappata imm. 2-mi naatsorsuinermi tunngavigineqartumut sanilliullugit taava ineqarnermut tapiissutit naatsorsorneqassapput inoqutigiit ukiumi ingerlasumi isertitariumaagaat tunngavigalugit.
Imm. 4. Naalakkersuisut piginnaatitaapput erseqqinnerusumik aalajangersaanissamut pisortaniit pisartakkat suut akileraarutaasussaanngitsut naatsorsuinermi tunngaviusunut ilaatinneqassanersut ineqarnermut tapiissutit naatsorsorneqarpata ukiumi ingerlasumi isertitaajumaartut tunngavigalugit, takuuk imm.3.

4. § 6 imatut allanngortinneqarpoq:
"§ 6. Ineqarnermut tapiiffiginnittoqarsinnaavoq inoqutigiit ukiumut isertitaat § 5-imi malittarisassat naapertorlugit naatsorsorlugit aningaasanut killissaliutap ukiut tamaasa Kalaallit Nunaanni Inatsisartut aalajangersartagaasa ataanniippata. Inoqutigiit aningaasanut killissaliutaq inorlugu isertitaqartut namminneq ineqarnermut aningaasartuutinut akileeqataassutissaat procentinngorlugit naatsorsukkat akilissavaat (ineqarnermut akiliut imaluunniit terminimut aningaasartuut).
Imm. 2. Nammineerluni akileeqataassutissat naatsorsunnginneranni inoqutigiit isertitaat ikilineqassapput 4.000 kr.-nik meeqqanut tamanut 18 inorlugit ukiulinnut angerlarsimaffimmi najugaqartunut.
Imm. 3. Inoqutigiit namminneq akileeqataassutissaasa procentinngorlutik annerpaaffissaat ukiut tamaasa Kalaallit Nunaanni Inatsisartut aalajangertassavaat. Procentinngorlugu angissusiliussaq 2-mik appartinneqartassaaq 4.000 kr,-ngornerit tamaasa, inoqutigiit isertitaannit meeqqat angerlarsimaffimmi najugaqartut ilanngaatigereerlugit aningaasanut killiliutap ataaniippata. Procentinngorluguli angissusiliutaq 5%-imit minninngorlugu appartinneqarsinnaanngilaq.
Imm. 4. Isertitat annertussusiisa nikerarfiisa ataasiakkaat iluanni inoqutigiit isertitaat iluarsineqartassapput agguaqatigiissillugit nalinginut nammineerluni akileeqataassutissat naatsorsunnginnerini.

5. § 7 imatut allanngortinneqarpoq:
"§ 7. Ineqarnermut tapiiffiginnittoqarsinnaavoq ineqarnermut aningaasartuutit amerlaneruppata inoqutigiit namminneq akileeqataassutissaannit § 6-imi malittarisassat naapertorlugit naatsorsorlugit.
Imm. 2. Kalaallit Nunaanni Inatsisartut ukiut tamaasa aalajangertassavaat aningaasat amerlanerpaaffissaat ikinnerpaaffissaallu ukiumut ineqarnermut tapiiffiginnissutissanut, taamaalillutik aningaasat taakkunannga amerlanerussutaasut ikinnerussutaasulluunniit tunniunneqarsinnaatinnagit. Kalaallit Nunaanni Inatsisartut aamma aalajangersarsinnaavaat aningaasat ikinnerpaaffissaat nammineerluni akileeqataassutissatut najugaqartumut akilersinniagassat."

6. § 12 atorunnaarpoq.

 

§ 2.

Peqqussut manna atortuulissaaq ulloq 1. oktober 1985.

Kalaallit Nunaanni Namminersornerullutik Oqartussat, 13. august 1985.

Jonathan Motzfeldt

/

Aqqaluk Lynge