Aningaasarsiat A-t pillugit Namminersornerullutik Oqartussat nalunaarutaat nr. 34, 20. december 1985-imeersoq.

Aningaasarsianit akileraarutit pillugit landstingip inatsisaani nr. 5-imi 19. maj 1979-imeersumi, kingusinnerpaamik landstingip inatsisaani nr. 9-mi 28. oktober 1985-imeersumi allanngortinneqartumi, § 37, imm. 2 aamma imm. 4, § 38 imm. 1 aammalu § 91 naapertorlugit makku aalajangersarneqarput:

 

Aningaasarsiat A-t

§ 1. Landstingip inatsisaani § 37, imm. 1-imi taaneqartut saniatigut makku aningaasarsiatut A-tut naatsorsuunneqarput:
1) soraarnerussutisiat aningaasat utaqqiisit akiliutaasartullu akileraaruteqaataasussat taakku assigisaat, taakku siusinnerusukkut atorfeqarsimanermut atasuuppata,
2) soraarnerussutisiat (pisartakkatigoortumik akiliutisiat) akileraaruteqaataasussat § 17, nr. 4-mi taaneqartutut ittut,
3) aningaasarsianut annaasanut imaluunniit suliffissaagaluanut annaasanut taartisiat,
4) kisimiilluni erinarsortartutut nipilersortartutullu, timersornikkut aliikkusersuisartutut, nipilersortartutut, atuakkiortutut, allatut tamatigut eqqumiitsuliortutut, timersortartutut, aviisitigut allaaserinnittarnikkut, dommeritut, eqqartuusseqataasutut, illersuisutut free-lancetullu nutserisartutut akissarsiat aammalu
5) Kalaallit Nunaanni sulinermi ajutoornermi sillimmasiinissamut peqqussut, tak. Kalaallit Nunaanni sulinermi ajutoornermi sillimmasiinissamut peqqussut, nr. 558, 28. december 1979-imeertoq naapertorlugu akiliutisiat makku:
a) inatsisitigut piumasaasut malillugit ajunaarnissamut sillimmasiineq najoqqutaralugu sulliveqarluni akissarsiortunut ullormusiat,
b) innarluuteqarnermut taartisiat aamma qimataasunut taartisiat, taartisiat ukiumut pisassarititatut tunniunneqartarpata,
6) Aalisarnermit, piniarnermit, aallaaniarnermit, savaateqarnermit tuttuuteqarnermillu tunisassianik Kalaallit Nunaanni tunisinermi isertitat, piginneqatigiiffiit, peqatigiiffiit assigisaasaluunnit tunisarinngippatigit.

 

Aningaasarsiat aningaasarsiatut A-tut isigineqanngitsut

§ 2. Aningaasarsiaasartut ilaat makku aningaasarsiatut A-tut isigineqanngillat:
1) kiffartuussinermi kajumissaatissiissutit (drikkepenge) aamma
2) inuinnaat illumi ikiortiminnut ikiortiminnullu allanut aningaasarsiarititaat, sulisitsisoq taassumaluunniit aapparisaa aningaasarsiat akileraaruteqaataasussat naatsorsorneranni pineqartumut akissarsiarititat ilaannik sumilluunniit ilanngaateqarsinnaanngippata.

 

Feriarnersiutit aamma nalliuttuni sapaataanngitsuni akissarsiat.

§ 3. Akileraarutinik A-nik feriarnersiutinit sapaataanngitsunilu nalliuttuni akissarsianit unerartitsinermut piffissaq aamma akissarsiat taakkua akileraarusigaanerat pillugu makku atuupput:
1) Akissarsiortup feriaqarnerani sulisitsisoq akissarsianik akiliisarpat akissaatinit taakkunannga akileraarutinik unerartitsineqassaaq maleruagassiat aningaasarsianut A-nut allanut atuuttut malillugit, tak. landstingip inatsisaani § 38 imm. 1, oqaaseqatigiit siulliit. Feriarnersiat akissarsiortut atorfeqarnerminni akissarsiaqarlutik feriartussaatitaasimasut atorfimminnit soraarnerminni pisassaasa tungaasigut unerartitsineqassaaq maleruagassiat ataani 2)-mi, oqaaseqatigiinni siullerni allassimasut malillugit.
2) Sulisitsisup atorfilik feriaqarnerani akissarsiaqartinnagu, taamaattorli ukiup feriarnersiaqaataasussanik aningaasarsiorfiup tulliani ukiumi feriarfissami akiligassanngorlugit toqqorneqartunik feriarnersiaqartippagu, taava feriarnersiat feriemærket atuagaasamut nipititerivissamut nipititerneqarnerannut, feriarnissamut allagartap (feriekortip) tunniunneqarneranut il.il. atasumik akileraarutinik unerartitsineqassaaq. Taamaattoq akileraarutinik unerartitsineq kingusinnerpaamik ukiumi feriarnersiaqaataasussanik aningaasarsiorfimmi 31. december pissaaq. Taamaakkujortaaq sapaataangitsuni nalliuttuni akissarsiarisassat ukiup feriarnersiaqaataasussanik aningaasarsiorfiup ingerlanerani tunniunneqarsimanngitsut tungaasigut.
3) Feriarnersiat aamma sapaataangitsuni nalliuttuni akissarsiat akileraarutigineqassapput qaammatisiutit malillugit ukiumi, siuliini 1) aamma 2) malillugit unerartitsiviusussaasumi. Akileraarusiinermut akileraarutillu naaatsorsorneqarneranni paasissutissat landstingip inatsisaani § 88, imm. 1 malillugu atugassat ukiumut aningaasarsiorfimmut taannaasumut tunngasumik tunniunneqassapput.

§ 4. Nalunaarut atuutilerpoq 1. januar 1986-imiit.
Imm. 2. Nalunaarutip matuma Namminersornerullutik Oqartussat nalunaarutaat nr. 4, 26.juni 1979-imeersoq tassungalu atatillugit maleruagassat saqqummiunneqarsimasut atorunnaarsippai.

Namminersornerullutik Oqartussat, ulloq 17. december 1985

Moses Olsen

/

Ole Sinkbæk