Namminerssornerullutik Oqartussat nalunaarutaat nr. 33, 19. december 1985-meersoq avammut tunisaqarsinnaanermut akuersissutinut tunngasoq.

Inatsisartut peqqussutaat nr. 5, 22. november 1984-imeersumi § 4 najoqqutaralugu aalajangersakkat makku aalajangersarneqarput:

 

§ 1. Aalisarnermut Suliffissuaqarnermullu Naalakkersuisup qinnuteqaatit tunngavigalugu piginneqatigiiffiit/aamma imaluunniit inuit ataasiakkaat aalajangersakkat atuuttut naapertorlugit ingerlataqartut, kalaallit tunisassiaannik avammut tunisaqarnissamut akuersissuteqarfigisinnaavai.

§ 2. Avammut tunisaqarsinnaanermik akuersissummik qinnuteqaat imaattunik paasissutissartaqartinneqassaaq:
a) Piginneqatigiiffiup aqqa/qinnuteqartup aqqa najugaalu.
b) Tunisassiat avammut tuniumaneqartut nassuiaateqarfiginerat (suussusii suliarineqarnerilu).
c) Annertussusii missiliorlugit nunallu pisiumasutut ilimagineqartut.
d) Tunisassiat suliareriikkat avammut tunineqartussat tunisassiorfinniit, niuerfinniit il.il. allaneerpata taakku aqqi najugaalu allanneqassapput.
e) Avammut tunisaqarsinnaanermut qinnuteqaat piffissap qanoq-ilineranut, imaluunniit nassiussassanut sunut qinnuteqaatigineqarnersoq.
Imm. 2. Avammut tunisaqarsinnaanermut qinnuteqaammut inuutissarsiornermut akuersissutip assilineqarnerat, kiisalu - piginneqatigiiffinnut - piginneqatigiiffiit nalunaarsorneqarfianni piginneqatigiiffiliornerup allagartaata assilineqarnera ilanngunneqassaaq.
Imm. 3. Avammut tunisaqarsinnaanermut akuersissummik qinnuteqarnermi nammineq tunisassiorfimmi tunisassiat pineqarpata qinnuteqaammut tunisassiornermut atortut tunisassiorfiullu peqqinnissakkut eqqiluisaarnikkullu akuersissutit pisariaqartut ilanngunneqassapput.
Imm. 4. Avammut tunisaqarsinnaanermut akuersissummi qinnuteqarnermi tunisassiorfinnit, nioqquteqarfinnit il.il. allanit tunisassiat pineqarpata taakkununnga akuersissutinut uppernarsaatit qinnuteqaammut ilanngunneqassapput, tak. imm. 3.

§ 3. Suliffeqarfinnut/piginneqatigiiffinnut pilersinneqalersunut qinnuteqarnerup kingorna Aalisarnermut Suliffissuaqarnermullu Naalakkersuisoq avammut tunisaqarsinnaanermut akuersissuteqarallarsinnaavoq, tassa avammut tunisaqarsinnaanermut akuersissutivik uppernasaateqartussaammat, tak. § 2.

§ 4. Avammut tunisaqarsinnaanermut akuersissummut aalajangiinissami paasissutissani pingaarutilinni eqqunngitsumik nalunaaruteqarsimatillugu, taamaaliorneq akuersissummik arsaagaanermik aamma/imaluunniit piffissami aalajangersimasumi suliffeqarfiup avammut tunisaqaqqusaajunnaarneranik kinguneqarsinnaavoq.

§ 5. Avammut tunisaqarsinnaanermut akuersissummik piginnittoq pisussaatitaavoq piaarnerpaamik Aalisarnermut Suliffissuaqarnermullu Naalakkersuisoq, Inuutissarsiornermí Pisortaqarfik nalunaarfigissallugu Avammut tunisaqarsinnaanermut pillugu aalajangiinermut tunngasunik pingaarutilinnik allanngortorqarsimappat.

§ 6. Avammut tunisaqarsinnaanermut akuersissut inummuinnaq/suliffeqarfimmuinnaq tunniussivigineqarsimasumut atuuppoq qaammatisiutillu malillugit ukiut naaneri tamaasa taarserneqartassalluni.
Imm. 2. Avammut tunisaqarsinnaanermut akuersissut taamaallaat tunisassianut akuersissummi avammut tunisarineqarsinnaasutut allassimasunut atuuppoq, aamma tunisassiorfiinnarniit, nioqquteqarfiinnarniit il.il. akuersissummi taaneqartuniit.
Imm. 3. Nalunaarut una malillugu arferit neqaannik inuussutissarsiutissatut avammut tuniniagassanik akuersissuteqartoqarsinnaangilaq.

§ 7. Piffissap avammut tunisaqarsinnaanermik akuersissuteqarfiusup naanerani avammut tunisaqartoq pisussatitaavoq avammut tunisaqarsimasutsimut Aalisarnermut Suliffissuaqarnermullu Naalakkersuisumut, Inuutissarsiornermi Pisortaqarfimmut nalunaaruteqassalluni.

§ 8. Inatsisartut inatsisaat nr. 5, 22. november 1984-imeersoq najoqqutaralugu avammut tunisaqarsinnaanermut akuersissutit uanngaaniit ingerlanneqarnerat isumagineqassaaq:

Inuutissarsiornermi Pisortaqarfik
Postbox 269
3900 Nuuk.

§ 9. Aalisarnermut Suliffissuaqarnermullu Naalakkersuisup nalunaarummi aalajangersakkat aalajangersareqarsimasut immikkut ittumik peqqutissaqartillugu immikkut akuersissuteqarsinnaavoq.

§ 10. Nalunaarummi aalajangersakkanik unioqqutitsineq akiliisitsinermik aamma/imaluunniit akuersissummik arsaagaanermik kinguneqarsinnaavoq pinerluttaasitsinermi inatsimmi aalajangersakkat naapertorlugit.

§ 11. Nalunaarut una nalunaarutigineqarnermigut atortuulissaaq. Tamatumunnga peqatigitillugu Namminersornerullutik Oqartussat Nalunaarutaat nr. 8, 8. februar 1985-imeersoq atorunnaarpoq.

Namminersornerullutik Oqartussat, ulloq 19. december 1985

Lars Emil Johansen

/

Einar Lemche