Kalaallit Nunaanni Namminersornerullutik Oqartussat Tunisassiornermi ingerlatsiviini tunisassiornermut ataatsimiititaliat pillugit Namminersornerullutik Oartussat nalunaarutaat nr. 26, 2. oktober 1985-imeersoq.

Kalaallit Nunaanni Namminersornerullutik Oqartussat tunisassiornermi ingerlatsivii tuniniaanerallu pillugit Inatsisartut peqqussutaat nr. 6 22. november 1984-imeersoq, § 5, najoqqutaralugu tunisassiornermutataatsimiititaliat matumuuna ima aalajangersaavigineqarput.

 

Kapitali 1.
Tunisassiornermut ataatsimiititaliat siunertaat.

§ 1. Namminersornerullutik Oqartussat tunisassiornermi ingerlatsiviisa ingerlanneqarnerat - tunisassiorfiit minnerusut suliffissuillu - ima aaqqissuunneqassaaq ingerlatsiviit ataasiakkaat Tunisassiornerup tamarmiusup ataanniittut sapinngisamik annertunerpaamik aningaasarsiornikkut ingerlatsinikkullu namminersortutut ataasiakkaarlutik ingerlasussanngorlugit.
Imm. 2. Tunisassiorfinnut ataasiakkaanut atasunik tunisassiornermut ataatsimiititaliortoqassaaq tunisassiorfiit ataasiakkaat ingerlanneqarnerannut pilersaarusiornermut aalajangiisinnaassuseqartussanik.

§ 2. Nalunaarutip matuma periarfissarititaasa iluanni tunisassiornermut ataatsimiititaliat ataasiakkaat malittarisassiuuneqassapput. Malittarisassani ilaatigut aalajangersarneqassapput tunisassiornermut pillugu ataatsimiititaliat piginnaatitaaffissaasigut malittarisassat nalunaarummi matumani kap.4 naapertorlugu aammalu ikaarsaariarnermi aalajangersakkat kap. 5-imiittut naapertorlugit.
Imm. 2. Tunisassiornermut Qullersaqarfik Nuummiittoq isumaqatiginiareerlugu malittarisassat Inuutissarsiornermi Pisortaqarfimmit aalajangersarneqassapput.

 

Kapitali 2.
Tunisassiornermut ataatsimiititaliat inuttalersorneqarneri.

§ 3. Tunisassiornermut ataatsimiititalianut ilaasortat taakkulu sinniisussaat ukiut marlukkaartumik toqqarneqartassapput. Toqqagaaqqissinnaaneq periarfissaqarpoq.
Imm. 2. Tunisassiornermut ataatsimiititaliamut ilaasortaq ukiuni marlunni qinigaaffiup ingerlanerani tunuarpat pisortaqarfimmit ilaasortamik tunuartumik toqqaasuusimasumit ilaasortassamik nutaamik toqqaasoqassaaq. Malittarisassaq taanna sinniisussanuttaaq atuuppoq.
Imm. 3. Ilaasortassanik sinniisussanillu toqqaanermi tutsuviginassutsimut malittarisassat Kalaallit Nunanni kommunalbestyrelset bygderådillu pillugit Inatsisartut inatsisaanni nr. 2-mi 14. maj 1979-imeersumi pineqartut atuupput aammalu Kalaallit Nunaanni kommunet Nakkutilliisoqarfiata sukkulluunniit periaaserisai atuullutik. Taamaattumik tunisassiornermutataatsimiititalianut ilaasortanngortinneqarsinnaanatillu taakkununnga sinniisussanngortinneqarsinnaanngillat inuit tunisassiornermut ataatsimiititaliat aalajangernerinut toqqaannartumik soqutigisaqartussat. Inuit tunisassiornermi unammillersumi siulersuisunut ilaasortaasut, piginneqataasut allatigulluunniit tamakkua pissuseqataasigut attuumassuteqartut tunisassiorneq pillugu ataatsimiititalianut ilaasortassatut taakkualuunniit sinniisussaattut toqqarneqarsinnaanngillat.
Imm. 4. Aammattaaq inuit tunisassiorfimmi pineqartumi suliaqartut tunisassiorfiup pineqartup tunisassiornermut ataatsimiititaliaani ilaasortatut tassungaluunniit sinniisussatut toqqarneqarsinnaanngillat.

§ 4. Nanortalimmi, Alluitsup Paani, Paamiuni, Maniitsumi, Sisimiuni, Kangaatsiami, Aasianni, Qasigiannguani, Ilulissani Uummannamilu suliffissuarni tunisassiorneq pillugu ataatsimiititaliat ima inuttalerneqassapput:
- sinniisut marluk kommunalbestyrelsemit toqqakkat,
- sinniisut marluk SIK-p immikkoortortaqarfianit toqqakkat,
- sinniisut marluk KNAPK-p immikkoortortaqarfianit toqqakkat.

Aammattaaq sinniisuutitallit tamarmik tunisassiornermut ataatsimiititaliamut ilaasortaatitamik sinniisussaanik ataatsimik toqqaassapput.
Imm. 2. Tunisassiornermut ataatsimiititaliamut ilaasortat KNAPK-p immikkoortortaqarfiinit Qeqertarsuup eqqaaniittunit toqqakkat Raajarniat Peqatigiiffiat siunersioqatigalugu toqqarneqassapput.

§ 5. Narsami suliffissuarmi tunisassiornermut ataatsimiititaliaq ima inuttalerneqassaaq:
- sinniisut pingasut kommunalbestyrelsemit toqqakkat,
- sinniisut pingasut SIK-p immikkoortortaqarfianit toqqakkat,
- sinniisut pingasut KNAPK-p immikkoortortaqarfianit toqqakkat.
- sinniisoq ataaseq Savaatillit Peqatigiit Suleqatigiissunit toqqagaq.

Aammattaaq sinniisuutitallit tamarmik tunisassiornermut ataatsimiititaliamut ilaasortamik sinniisussaanik ataatsimik toqqaassapput.
Imm. 2. Narsami suliffissuup tunisassiornermut ataatsimiititaliaa ataatsimiititaliaaqqanut marluinnut avinneqarsinnaavoq, siulleq aalisakkerivimmut atuuttussanngorlugu, aappaalu toqoraavimmut atuuttussanngorlugu.

§ 6. Tunisassiornermut ataatsimiititaliat nioqqutissiorfinni § 3-mi aammalu § 4-mi taaneqanngitsuniittut ima inuttalerneqassapput:
- sinniisoq ataaseq kommunalbestyrelsemit toqqagaq,
- sinniisoq ataaseq SIK-p immikkoortortaqarfianit toqqagaq,
- sinniisoq ataaseq KNAPK-p immikkoortortaqarfianit toqqagaq.

Ammattaaq sinnisuutitallit tamarmik tunisassiornermut ataatsimiititaliamut ilaasortamik sinniisussaanik ataatsimik toqqaassapput.
Imm. 2. SIK KNAPK-luunniit najukkami pineqartumi immikkoortortaqarfeqanngikkunik kattuffiit taakku najukkami pineqartumi ilaasortamik akornanni tunisassiornermut ataatsimiititaliamut ilaasortassaminnik taakkununngalu sinnisussanik toqqaasinnaapput. Tunumili taama pisoqartillugu aalisartut piniartullu ilaasortaatitassaat taassumalu sinniisissaa najukkami piniartut peqatigiiffiannit toqqarneqartassaaq.
Imm. 3. Nioqqutissiorfiit tamaasa tunisassiornermut ataatsimiititalialersunngikkaluarlugit kommuneqarfiup iluani nioqqutissiorfinnut arlariinnut oqartussaassuseqartussamik ataatsimik tunisassiornermut ataatsimiititaliortoqarsinnaavoq, kisiannili aatsaat Inuutissarsiornermi Pisortaqarfiup akuersereerneratigut.
Imm. 4. Tunisassiornermut ataatsimiititaliaq ataaseq tunisassiornermut ataatsimiititalianut arlariinnut oqartussaassuseqarpat ataatsimmiititaliap ilaasortai Inuutissarsiornermi Pisortaqarfiup ersarinnerusumik akuersissuteqarneratigut amerlisinneqarsinnaapput, amerlanerpaamilli ilaasortanut qulingiluanut.

§ 7. Nioqqutissiorfiup ulluinnarni aqutsisua tunisassiornermut ataatsimiititaliamut taasisinnaatitaanani ataatsimiinnerni najuuttartunngortinneqassaaq. Taamaalilluni suliffissuarni (takuuk § 4 aamma § 5) sulifissuup aqutsisua ataatsimiinnernut najuuttartunngortinneqassaaq. Nunaqarfinni nioqqutissiassanik tunitsiviuinnartuni niuertoruseq ataatsimiinnernut najuuttartunngortinneqassaaq, illoqarfinnilu nioqqutissiassanik tunitsiviuinnartuni niuertoq ataatsimiinnernut najuuttartunngortinneqassaaq.
Imm. 2. Pisariaqartitsineq naapertorlugu tunisassiornermut ataatsimiititaliap inuit nioqqutissiorfimmi suliffeqartut taasisinnaatinnagit ataatsimiinnernut najuuttartunngortissinnaavai. Tamanna tunngavigalugu tunisassiornermut ataatsimiititaliap sulisut assigiinngitsut sinniisaat ataatsimiinnernut najuuttartunngortissinnaavai.

 

Kapitali 3.
Tunisassiornermut ataatsimiititaliat aaqqissuunneqarnerat sullissinerallu.

§ 8. Tunisassiornermut ataatsimiititaliap siulitqartassaaq ilaasortat najuuttut taasisinnaasut nalinginnaasumik amerlanerussuteqarnerisigut. Ataatsimiititaliami taasinerit naligiiffiutillugit siulittaasup taasinera aalajangiisuussaaq. Siulittaasoq peqartinnagu siulittaasup tulliata ataatsimiinneq siulersorpagu taava siulittaasup tulliata taasinera aalajangiisuussaaq.
Imm. 2. Suliffissuit tunisassiornermut ataatsimiititaliaanni (takuk § 4 aamma § 5) suliffissuup ulluinnarni aqutsisua (fabrikslederi) tunisassiornermut ataatsimiititaliami allattaassaaq.
Imm. 3. Tunisassiorfiit allat tunisassiornermut ataatsimiititaliaanni (takuuk § 6) allatsip suliassai tunisassiornermut ataatsimiititaliap ilaasortaviisa ilaannit isumagineqassapput imaluunniit nioqqutissiorfimmi suliffilimmit ataatsimiinnerni najuuttartumit ataatsimiinnerni najuuttartumit.
Imm. 4. Suliffissuit tunisassiornermut attatsimiititaliaasa ulluinnarni ingerlatsisorissavaat siulitaasoq taassumalu tullia. Ulluinnarni ingerlatsisut ilaasortaat pingasunngortinneqassapput SIK KNAPK-luunniit tamatumuuna ulluinnarni ingerlatsisuni sinniisuutitaqanngippata. Sulififfissuup aqutsisua taasisinnaanani najuuttartuussaaq ulluinnarnilu ingerlatsisunut allattassalluni.
Imm. 5. Siilittaasup tunisassiornermut atatsimiititaliaq ataatsimiigiaqqusassavaa ataatsimiinnerilu tamaasa siulersortassallugit, ukiumut ataatsimiinnerit minnerpaamik marluusassapput. Ataatsimiinnisat sapaatip akunnerinik pingasunik sioqqullugit nalunaarutigineqartassapput. Siulittaasoq peqataanngitsuussagaluarpat siulittaasup tulliata ataatsimiinnerit siulersortassavai. Aammaattaaq siulittaasup tunisassiornermut ataatsimiititaliaq pisariaqartitsineq naapertorlugu sapaatip akunnerinik pingasunit sivikinnerusumik nalunaaruteqarluni ataatsimiigiaqqusinnaavaa.
Imm. 6. Tunisassiornermut ataatsimiititaliaq aalajangiisinnaassuseqarpoq ataatsimiititaliap ilaasortaviisa (taasisinnaasut) affaat sinnerlugit najuukkaangata. Ataatsimiititaliami taasisoqartillugu aalajangiisoqartassaaq ilaasortat najuuttut taasisinnaasut nalinginnaasumik amerlanerussuteqarnerisigut. Ataatsimiititaliami taasinerit naligiiffiutillugit siulittaasup taasinera aalajangiisuussaaq. Siulittaasoq peqartinnagu siulittaasup tulliata ataatsimiinneq siulersopagu taava siulittaasup tulliata taasinera aalajangiisuussaaq.
Imm. 7. Tunisassiornermut ataatsimiititaliami ilaasortaq ataatsimiinnermi ataatsimi arlalinniluunniit peqataasinnaanngikkaangat sinniissussaata sinnersinnaasassavaa.
Imm. 8. Tunisassiornermut ataatsimiititaliap allattaata aalajangersakkat allattaavinnut allattortassavai, allattaaviillu ataatsimiititaliap ilaasortaanit najuuttunit atsiorneqartassapput.
Imm. 9. Ataatsimiigiaqqusissutit, imaqarniliuinerit, allattukkat tunisassiornermut ataatsimiititaliamut oqallisissiat tamarmik kalaallisut suliarineqartassapput - pisariaqartitsinerlu naapertorlugu aamma qallunaatut. Tunisassiornermut ataatsimiititaliap ilaasortai  tamarmik kalaallisut oqalussinnaanngippata nutserisoqarnissaq periarfissaqartinneqassaaq.
Imm. 10. Tunisassiornermut ataatsimiititaliap sulinerani sapinngisamik annerpaamik avammut ammanissaq anguniarneqassaaq, ilaatigut ataatsimiigiaqqusissutit, imaqarniliuinerit il.il. tamanut saqqummiuttarnerisigut. Tamatumani ilaatinneqassanngillat apeqqutit inatsisinik tunngaveqartumik imaluunniit niuernikkut periaatsit nalinginnaasut naapertorlugit anngiussassatut suliarineqartussat. Kisianni tunisassiornermi ataatsimiititaliap ataatsimiinneri matoqqasumik ingerlanneqartassapput.
Imm. 11. Kinaluunniit tunisassiornermutataatsimiititaliap suliassaataanik suliaqaqataasoq Kalaallit Nunaanni pinerluttulerinermi inatsimmi kapitalit 9-anni pisortani atorfeqarnermi sullissinermiluunniit pinerluuteqarnermut tunngasunik aalajangersakkat naapertorlugit akisussaalluni pisussaavoq pissutsit taamatut suliaqarnermini ilisimasaqalerfigisimasani nipangiusimassallugit, aammalu anngiussimaneqarnissaat ileqqussat naapertorlugit pisussaaffigineqarpat imaluuunniit siulittaasumit imaluunniit Tunisassiornermi Qullersaqarfimmit taamaalioqquneqaruni. Ullormut oqaluuserisassatut nassiunneqartutigut imaluunniit ataatsimiinnerup nalaani ersersinneqassaaq oqaluuserisassat immikkoortuini sorlerni ataatsimiititaliami ilaasortat taasisinnaanatillu najuuttartut nipangiussisussaatitaanissaat.
Imm. 12. Tunisassiornermut ataatsimiititaliamut ilaasortaajunnaarsimagaluaraanniluunniit imaluunniit taasisinnaanani najuuttartuujunnaarsimagaluaraanni nipangiussisussaatitaaneq atuutiinnassaaq.
Imm. 13. Tunisassiornermut ataatsimiititaliap suleriaasissani nammineerluni erseqqinnerusumik aalajangersassavaa, tamatumanilu aallaavigissallugu Inuutissarsiornermi Pisortaqarfiup suleriaasissiornissamut najoqqutassialiaa.
Imm. 14. Tunisassiornermut ataatsimiititaliap ataatsimiinnerinut atatillugu aningaasartuutit nioqqutissiorfiup pineqartup maleruagassat Tunisassiornermi Qullersaqarfimmit aalajangerneqartut malillugit akilertassavai. Tunisassiornermut ataatsimiititaliamut kajumissaatissiisoqartarnanilu allatigut immikkut ajunngitsorsiassaqartitsisoqassanngilaq. Tamatumunnga taarsiullugu tunisassiornermut ataatsimiititaliani ilaasortat ataatsimiinnersiaqartinneqassapput sulinikkullu isertitassaagaluanut taartissanik aningaasarsiaqartitsisoqassalluni, tamatumanilu najoqqutarineqassapput Kalaallit Nunaanni kommuneqarfiit Nakkutilliisoqarfiata kommunalbestyrelset bygderådillu pillugit kaajallaasitaani 24. oktober 1983-imeersumi imm. 1-imi aamma 2-mi aalajangersakkat. Taamaattorli pisortani atorfilinnut, tamatumani aamma nioqqutissiorfimmi pineqartumi atorfillit ilanngullugit, aammalu inunnut inuiaqatigiinni qinnikkatut pisussaaffeqartitaanertik tunngavigalugu aalajangersimasumik aningaasarsiaqartinneqartunut ataatsimiinnersiaqartitsisoqaranilu sulinikkut isertitassaagaluanut taartissanik aningaasarsiaqartitsisoqassanngilaq.

 

Kapitali 4.
Tunisassiornermut ataatsimiititaliap oqartussaaffii.

§ 9. Tunisassiornermut ataatsimiititaliap nioqqutissiorfiup aningaasatigut missingersersuusiornerani ingerlanneqarneranilu pilersaarusiornerit nalunaarut manna naapertorlugu aammalu nalinginnaasumik maleruagassat Inatsisartut peqqussutaannik tunngaveqartumik Aalisarnermut Suliffissuaqarnermullu Naalakkersuisup pilersitai akisussaaffigai.
Imm. 2. Tunisassiornermut ataatsimiititaliaq apeqqutini innersuussuteqarfiusussaniluunniit tamatigut Tunisassiornermi Qullersaqarfimmut saaffiginnittassaaq, taamaalillunilu aalajangersakkat, innersuussutit, imaqarniliuinerit siunnersuutillu tamaasa Tunisassiornermi Qullersaqarfimmut Nuummiittumut nassiuttassallugit.
Imm. 3. Ulluinnarni ingerlatsineq tamarmi aqutsisutut atorfilinnit isumagineqassaaq (suliffissuup aqutsisuanit, niuertortutsimit imaluunniit niuertumit) tunisassiornermut ataatsimiititaliaq aammalu tunisassiornermut ataatsimiititaliap aningaasartuutissatut missingersersuutitut aalajangiussai taakkunanilu maleruagassarititat akisussaaffeqarfigalugit.
Imm. 4. Tunisassiornermut ataatsimiititaliat piginnaatitaaffii sulinerilu pillugit maleruagassat erseqqinnerusut aalajangersarneqarput tunisassiornermi ataatsimiititaliat ataasiakkaat malittarisassaanni matumani taaneqartumi § 2-mi.

§ 10. Tunisassiornermut ataatsimiititaliaq apeqqutini makkunani aalajangiisinnaassuseqarpoq aammalu tamatumunnga atasumik akisussaaffeqarluni.
Imm. 2. Tunisassiornermut ataatsimiititaliaq ingerlatsinermi aningaasartuutissanut missingersersuutinik siunnersuuteqarnermut aalajangiisinnaassuseqarpoq, pissutigalugu tunisassiornermut ataatsimiititaliap ukiup tullissaanut nioqqutissiornissamut pilersaarutit ingerlatsinermilu aningaasartuutissatut missingersersuutit suliassarimmagit. Siunnersuut Tunisassiornermi Qullersaqarfimmut nassiunneqassaaq aningaasat pillugit inatsisissap siunnersuusiornissaanut atugassatut.
Imm. 3. Tunisassiornermut ataatsimiititaliaq aningaasartuutissatut missingersersuutit Inatsisartut akuerisaasa - aammalu taakkunani tunngavigineqartut - piviusunngortinneqarnissaannut akisussaavoq. Aningaasartuutissatigut missingersersuutit tunngavigisaat allanngussagaluarpata tunisassiornermut ataatsimiititaliaq pisariaqartunik iliuuseqassaaq. Inatisartut Tunisassiornermut tamarmiusumut aningaasartuutissanik akuersereernerisigut tunisassiornermut ataatsimiititaliap suliassarilissavaa ulluinnarni tunisassiornermi naammassisat ingerlaannartunik malittarinissaat nalilernissaallu - aningaasartuutissatut missingersersuutinut akuerineqarsimasunut naleqqiullugit. Tamanna pisassaaq ulluinnarni aqutsisut tunisassiornermut ataatsimiititaliamut nioqqutissiornerup ingerlasimaneranik nalunaarutaat tunngavigalugit. Ataatsimiititaliap suliassaraa ingerlatsinermi pilersaarusiat allanngortinneqarnissaat aningaasartuutissatut missingersersuutit akuerineqarsimasut iluanni aalajangiiffigissallugu - tassa nioqqutissiornerup ingerlaannartumik nalilerneqarnera tunngavigalugu ataatsimiititaliaq taamaaliornissamut qanoq isummeriataassagaluarpat.
Imm. 4. Suliffiup aningaasartuutissatut missingersersuutigineqartut nioqqutissiornermilu anguniakkat naammassinngitsuussagaluarpagit, aammalu ajornartorsiut tunisassiornermut ataatsimiititaliap nammineerluni iliuusaasigut aaqqinneqarsinnaassanngikkaluarpat, sapinngisamik piffissaq siusinnerpaaq atorlugu ataatsimiititaliaq Tunisassiornermi Qullersaqarfimmut ajornartorsiutit paasineqartut qaangerneqarnissaat pillugu siunnersuuteqassaaq. Taama pisoqartillugu Tunisassiornermi Qullersaqarfiup suliffiup ingerlatsinermini ajornartorsiutaasa qanoq ittuunerinik isummerfiginninnini saqqummiutissallugu pisussaavoq, aammalu pisussaalluni tunisassiornermut ataatsimiititaliaq suleqatigalugu pisariaqartunik iliuuseqarnissamut.
Imm. 5. Aningaasartuutissatut missingersersuutit annertuumik ajorneruleriarsimatillugit - tamannalu tunisassiornermut ataatsimiititaliap iliuusaanik imaluunnit iliuuseqanngipallaarneranik patsiseqartillugu, Tunisassiornermi Qullersaqarfiup innersuussuteqarneratigut naalakkersuisup tunisassiornermut ataatsimiititaliaq pissutsit iluarsitserlugit oqartussaassusersinnaavaa.

§ 11. Tunisassiornermi ataatsimiititaliaq suliffiup ulluinnarni pisortaata atorfinitsinneqartarnerani soraarsinneqartarneranilu oqaaseqarsinnaatitaavoq, tassa pineqartoq Namminersornerullutik Oqartussat atorfeqartitarippasuk Aalisarnermut Suliffissuaqarnermullu Naalakkersuisoqarfiup iluani. Ulluinnarni pisortaq Tunisassiornermi Qullersaqarfimmit atorfinitsinneqartarlunilu soraarsinneqartarpoq.
Imm. 2. Suliffimmi sulisut allat - aalajangersimasumik atorfillit nalunaaquttap akunnermusiallillu - suliffiup ulluinnarni pisortaanit, tunisassiornermut ataatsimiititaliamut iliuuserisaminik ilisimatitsisussaatitaasumit, atorfinitsinneqartarlutillu soraarsinneqartarput.
Imm. 3. Tunisassiornermut ataatsimiititaliaq suliffiup piorsarneqarnissaanut siunnersuuteqarsinnaatitaavoq - tassa suliffimmi nutarterinissanut nutaanillu aningaasaliissuteqarnissanut siunnersuuteqarsinnaatitaalluni. Suliffik pillugu   aningaasaliissuteqarnissanut pilersaarutit tamarmik tunisassiornermut ataatsimiititaliamut saqqummiunneqartassapput, aningaasat pillugit Inatsisartut siunnersuutip Inatsisartuni isummerfigineqarnissaa siunertaralugu tassunga ilanngunneqartinnatik.

§ 12. Tunisassiornermut ataatsimiititaliap ulluinnarni aqutsisoq suleqatigalugu iliuuserisamigut suliffiup nioqqutissiorfiata pitsaanerpaamik iluaqutigineqarnissaata sulissutiginissaa pisussaaffigaa, tassa tunisassiassanik pisiortorneq sapinngisamik annerpaaq tunisassiassat suliarineqarneranni pitsaanerpaamik aningaasarsiornikkut aaqqiiffiusoq.
Imm. 2. Tunisassiornermut ataatsimiititaliap ulluinnarni aqutsisut suleqatigalugit pissussaafigaattaaq nioqqutissiat pitsaalluinnartuunissaat minguilluinnartuunissaallu anguniassalugu - aammalu pisussaavoq sulisut illersorneqarnissaannut, sunniuteqaqataalernissaannut, suliffiup iluani avammullu paasissutissiisarnernik inerititsiartuaassalluni.
Imm. 3. Tunisassiornermut ataatsimiititaliaq aqutsisutut atorfillit suleqatigalugit ukiumoortumik nalunaarusiortassaaq suliffiup ingerlanneqarnera ingerlatsinermilu naammassisat pillugit, aammalu siunissami pilersaarutit ilanngullugit nalunaarusiortassallugit. Ukiumoortumik nalunaarut suliarineqartassaaq Tunisassiornermi Qullersaqarfiup tamakku pillugit ersarinnerusumik maleruagassiai tunngavigalugit.

 

Kapitali 5.
Ikaarsaariarnermi aalajangersakkat.

§ 13. Tunisassiornermut ataatsimiititaliat sulinerisa nunaqqatigiillu sunniuteqarsinnaanerannik qulakkeersimatitsinerisa - matumuuna anguniarneqartup - nuna tamakkerlugu Tunisassiornermi suliffinnilu ataasiakkaani maannakkut aqutseriaatsip, aningaasatigut missingersersuusiortarnerup taakkuninngalu nakkutilliinerup annertuumik allanngortinneqarnissaa pisariaqartippaat. Ikaarsaariarnerup nalaani tunisassiornermut ataatsimiititaliat aalajangiisinnaassuseqarnerat tusarniaasinnaatitaanerallu aaqqissuussinikkut allanngoriaatsit pilersinneqarsinnaaneri ilutigalugit nalimmassarneqassapput.
Imm. 2. Tunisassiornermut ataatsimiititaliat aalajangiisinnaassuseqarnerat tusarniaasinnaatitaanerallu ingerlaannartumik nalimmassarneqassapput § 2-mi tunisassiornermut ataatsimiititaliat ataasiakkaat pillugit malittarisassatigut.
Imm. 3. Nalunaarusiaq una iluarsaateqqinneqassaaq kingusinnerpaamik 1986 naatinngagu.

Aalisarnermut Suliffissuaqarnermullu Naalakkersuisoqarfik, ulloq 2. oktober 1985.

Lars Emil Johansen

/

Einar Lemche