Namminersornerullutik Oqartussat ineqarnermut tapiissuteqartarneq pillugu nalunaarutaat nr. 23, 19. august 1985-imeersoq.

Ineqarnermut tapiissuteqartarneq pillugu inatsisartut peqqussutaanni nr. 1-imi 17. oktober 1983-imeersumi § 5, imm. 4, allanngortinneqarsimasorlu inatsisartut peqqussutaanni nr.2 13. august 1985-imeersumi naapertorlugit makkua aalajangersarneqarput:

 

§ 1. Ineqarnermut tapiissuteqartarneq aningaasatigut ukiumut isertinneqartussatut ilimagineqartut tunngavigalugit naatsorsorneqarsimappata, pisortanit ikiuutit pilersuinermut tunngassuteqartut akileraaruserneqarnerli ajortut tunngaviusumik naatsorsuinermi makkua ilanngunneqassapput.
1) Angissuserititat tunngavigalugit pisortanit ikiuutit pillugit Inatsisartut peqqussutaat nr. 11, 1. november 1982-imeersoq, Inatsisartut peqqussutaatigut nr. 2-kut 20. oktober 1983-imeersumi, Inatsisartullu peqqussutaatigut nr. 3-kut 19. november 1984-imeersumi aammalu Inatsisartut peqqussutaatigut nr. 1-kut 21. februar 1985-imeersumi allanngortinneqarsimasoq naapertorlugu nalaani imaluuniit naartunermi erninermilu angissuserititat tunngavigalugit ikiuutit tunniunneqartartut.
2) Utoqqalinersiutit aamma utoqqarnut inissiat pillugit Inatsisartut peqqussutaat nr. 7 28. oktober 1982-imeersoq naapertorlugu utoqqalinersiutit aningaasartaasa tunngavigisaat tunniunneqartartut.
3) Inuussutissarsiorsinnaajunnaarnermi pisartakkat pillugit Inatsisartut peqqussutaat nr. 8 28. oktober 1982-imeersoq naapertorlugu inuussutissarsiorsinnaajunnaarnermi pisartakkat aningaasartaasa tunngavigisaat tunniunneqartartut.
4) Pisortanit ikiuutit pillugit Inatsisartut peqqussutaat nr. 10 1. november 1982-imeersoq naapertorlugu pissaaleqineq naapertorlugu ikiuutit aamma pisariaqartitsineq naapertorlugu ikiuutit annertusisat tunniunneqarsimasut.

§ 2. Nalunaarut una 1. oktober 1985-imi atortuulersinneqarpoq. Peqatigitillugulu Namminersornerullutik Oqartussat ineqarnermut tapiissuteqartarneq pillugu nalunaarutaat nr. 13 30. november 1983-imeersoq atorunnaarsinneqarpoq.

Nuuk, ulloq 19. august 1985.

Aqqaluk Lynge

/

Storch Lange