1985-imi kapisilinniarsinnaanermut akuersissutit pillugit Namminersornerullutik Oqartussat nalunaarutaat nr. 22, 23. juli 1985-imeersoq.

Inuutissarsiutigalugu aalisarneq pillugu inatsisartut inatsisaanni nr. 11 21. november 1984-imeersumi 1, 8, 9, 12 aamma 14 tunngavigalugu makku aalajangersarneqarput:

 

1. Nalunaarut inuutissarsiutigalugu kapisilinniarnermut kalaallit aalisarnikkut imartaanni 1985-imi Kap Farvel-ip kitaani ingerlanneqartumut tunngavoq.

2. Inuutissarsiutigalugu kapisilinniarneq taamaallaat pisinnaatitaavoq kapisilinniarsinnaanermut akuersissummik peqaraanni. Akuersissuteqarnermut atatillugu pisassat akuerineqarsimasut akornanni agguaanneqarsinnaapput. Agguaassineq naapertuuttoq anguniarlugu Aalisarnermut Suliffissuaqarnermullu Naalakkersuisoq qanoq iliuutsit nalunaarummi 4-mi taaneqartut saniatigut, KNAPK sioqqutsisumik isumaqatiginiareerlugu aalajangersaasinnaavoq aalajangersakkanik piniutit, piniutit ilusaat aalajangersimasut piniariaatsilluunniit radiokut aviisitigullu nalunaaruteqaataasinnaasut inerteqqutaanerannut killiligaanerannulluunniit tunngasunik.
Imm. 2. 1985-imi kapisilinniarsinnaanermut akuersissut taamaallaat tunniunneqarsinnaavoq inunnut piginneqatigiinnullu inuutissarsiutigalugu aalisarnermik, piniarnermik aallaaniarnermillu ingerlatsisunut.
Imm. 3. Kapisilinniarnissamut akuersissut tunniunneqassanngilaq angallatinut 150 BRT/150 BT sinnerlugu angissusilinnut.
Imm. 4. Angallatit angissusaat angissusilerneqarsimapput inatsit nr. 203 majip 18-ani 1977-imeersoq umiarsuit angissusaasa uuttortarneqarnissaannut, siornatigullu maleruagassaasut tunngavigalugit. Angallatip uuttortarneqarsimanerata allagartaa aalajangiisuuvoq, maleruagassat malillugit, tassunga angallammut killiliineq suna atorneqassanersoq.
Imm. 5. Kommunet akuersissummik, Aalisarnermut Suliffissuaqarnermullu Naalakkersuisoq sinnerlugu, qinnuteqaatit suliarissavaat, qinnuteqartut maleruagassamik naammassinnissimasunut, uani nalunaarummi pineqartut tunngavigalugit.
Imm. 6. Qinnuteqaatinik itigartitsinerit Aalisarnermut Suliffissuaqarnermullu Naalakkersuisumut orulussutaasinnaapput. Adressea: Inuutissarsiornermi Pisortaqarfik, Box 269, 3900 Nuuk.

3. Kapisilinniarneq pisassaatitat makkua (aalisakkat ilivitsukkoorlugit) iluaniinnaq pisinnaatitaavoq:
a) Akuersissummik tunineqarsimasut tamarmik aalisarsinnaapput, pisassaritinneqartup iluani tassaasorlu 620,3 t.
b) Angallatit 80 BRT/80 BT-miit qummut 150 BRT/150 BT raajanut akuersissummik peqareersut, raajanut akuersissutiminni annerpaamik angallammut ataatsimut aalisarsinnaavaat kapisillit 15 tons.
c) Aalisarnermut pisassarititaasoq nunguppat, inuit piginneqatigiillu 26 fod tikillugu angallatillit kommuniminni nangillutik aalisarsinnaapput ataani kommunini pisassareqqusaasut malillugit:

Nanortalik kommune 19 tons
Qaqortoq kommune 19 tons
Narsaq kommune 12 tons
Paamiut kommune 30 tons
Nuuk kommune 30 tons
Maniitsoq kommune 30 tons
Sisimiut kommune 20 tons
Kangaatsiaq kommune 15 tons
Aasiaat kommune 17 tons
Qasigiannguit kommune 10 tons
Ilulissat kommune 10 tons
Qeqertarsuaq kommune 10 tons
Uummannaq kommune 5 tons
Upernavik kommune 5 tons
katill. 232 tons

Imm. 2. Taakku pisat Kalaallit Nunaanni tunisassiorfinnut nunniunneqarsinnaapput. Tunisiffiup allassavaa, angallatit suminngaaneernersut, taamaalilluni pisassat imm. 1-mi taaneqartut qaangerneqannginnersut nakkutigineqarsinnaaniassammata.
Imm. 3. Angallatit 80 BRT/80 BT-illit anginerusulluunniit kapisilinniarnissamut allagartallit nalunaartassapput (nalunaaqqutarput malillugu) ullaap tungaaarfineq pingasut qulillu akornanni radiokkut imaluunniit telexikkut 90 400 telegramadresse LICKON Kalaallit Aalisarnermi akuersissutit Nakkutilliisoqarfiannut. Ullormoortumik nalunaarutit makku imarisassavaat:
a) Nalunaarutip qanoq ittuunera (ullormut nalunaarut,  apisilinniarneq)
b) Angallatip aqqa
c) Angallatip radiokkut attaveqaataa.
d) Piffissaq (ulloq) aaliangersimasoq nalunaarneq tunngavigalugu
e) Kapisillit pisat (kilunngorlugit) kingullermit nalunaarnermiit.
f) Angallatip naalagaata aqqa.

4. Amerlassusissaatitat taaneqartut naapertorlugit aalisarnerup kipinissaa Kalaallit Nunaanni Aalisarnermut Suliffissuaqarnermullu Naalakkersuisumit nalunaarutigineqassaaq, isumaqarnarpat aalisarnerup taamaativinnginnerani pisat amerlassusissaat taaneqartut  anguneqartussaasut. Pisat amerlassusiat paasineqarpat annertussusissaatitamit 3, imm. 1 c-mi taaneqartumik allaasoq annertussusissaatitat taaneqartut naapertuuttumik iluarsissuserneqassapput, imaluunniit pisassarititaasut tamakkerneqarsimappata atorunnaarsinneqarsinnaallutik. Amerlassusissaatitat 3, Imm. 1 c-mi taaneqartut tamakkerlutik pisarineqarnissaat anguniarlugu pissusiusut pisariaqartitsiffiisigut KNAPK sioqqutsisumik isumaqatiginiareerlugu Inuutissarsiornermi Naalakkersuisup aalajangersinnaavaa najugarisani pisassarititatut aalajangikkat ilaat akuersissutinik pigisaqartunut tamanut pisassanngortitaasussat kommunenut agguaassinertaqanngitsumik.
Imm. 2. Qanoq iliuusissat imm. 1-mi taaneqartut radiokkut avisitigullu nalunaarutigineqassapput. Aalisarnerup kipinissaata nalunaarutigineqarnerata kingorna inuutissarsiutigalugu kapisilinniarneq tamarmi inerteqqutaavoq, aamma Kalaallit Nunaata iluani tuniniagassanik.

5. Kapisilinnik aalisarneq aamma kapisilinnut aalisarnermut atortunik ningitsineq augustip 1-a 1985 tikitsinnagu aallartinneqassanngilaq.

6. Kapisilinnik aalisarneq kisimi qassutinik 140 mm-nik putui annertussusilinnik (tasillugit) ingerlanneqarsinnaavoq, tassunga atatillugu qassutit putuisa sanioqqutitsisinnaanerannik akuerineqarsinnaavoq 8 pct.
Imm. 2. Qassutit putuisa uuttorneqarnerat pisarpoq aalisakkanik misissuisup putunut misissuutaata qasungasumik ikkunneratigut 1/2 kg-mik oqimaassusilimmik nivinngaavigalugu nakkartillugulu. Putut 20-it misissorneqassapput qimiaa akuttoqatigiimmik akuttussusilerlugu. Qassutit putuisa angissusiat imm. 1-mi taaneqartutut angitigissapput.

7. Nalunaarummi aalajangersakkanik unioqqutitsineq akiliisitaanermik akuersissummilluunniit arsaarinninnermik pillaateqartinneqarsinnaavoq.
Imm. 2. Arsaarinninnermi atorneqartussaapput Kalaallit Nunaanni pinerluttaalisitsinermut maleruagassat peqqusaanngitsumi pisaasimanerannut erseqqissumik uppernarsaatissaqanngikkaluarpalluunniit.
Imm. 3. Akiliisitsinermi akiliutit affaat naalagaaffiup aningaasaateqarfianut nakkartassaapput, affaallu Namminersornerullutik Oqartussanut tunniunneqassapput KNAPK-ip ikiuutissanik aningaasaateqarfianut (Carl Egedep aningaasaateqarfia)   pisassanngorlugit aalisartunut ikiuutissanngorlugit.

8. Nalunaarut tamanut saqqummiunneqarnermini  atortuulissaaq.




Namminersornerullutik Oqartussat, ulloq 23. juli 1985




Lars Emil Johansen

/

Hans Hornbech