Inuutissarsiutitigut tunngaviusumik ilinniagaqartut pisussaaffii pillugit Namminersornerullutik Oqartussat Nalunaarutaat nr. 18, 22. maj 1985-imeersoq.

Kalaallit Nunaanni inuutissarsiutitigut ilinniartitaanerit pillugit inatsit nr. 582, aammalu landstingip inatsisaa nr. 1 25. februar 1985-imeersoq naapertorlugit matumuuna inuutissarsiutitigut tunngaviusumik ilinniagaqartunut maleruagassat makku aalajangersarneqarput:

 

Kapitali 1.
Tiguneqarneq.

§ 1. Kalaallit Nunaanni EFG-mi ilinniagaqarnernut tiguneqarneq pisarpoq Namminersornerullutik Oqartussat ilinniagaqarfinnut ataasiakkaanut Nalunaarutai naapertorlugit, taakkulu siuliarineqarsimapput landstingip peqqussutaani nr. 2 16. november 1984-imeersumit § 2 naapertorlugu.

 

Kapitali 2.
Atuarneq.

§ 2. Inuutissarsiutitigut ilinniagaqarfiit ilinniartut tiguneqartut atuartinnissaannik neqeroorfigissavaat Nalunaarutit § 1-imi taaneqartut naapertorlugit.
Imm. 2. Inuutissarsiutinut immikkoortoqarfinnut tamanut brancheudvalgiliortoqassaaq, brancheudvalgit pillugit Namminersornerullutik Oqartussat Nalunaarutaat nr. 4 3. april 1981-imeersoq naapertorlugu, tamatumani brancheudvalgit piumaffigineqarlutik qulakkiissagaat ilinniartut ilinniakkaminnut ima annertutigisumik atuartinneqassasut, ilinniarsimasutut Kalaallit Nunaanni inuutissarsiorsinnaasutut angusaqassallutik.

§ 3. Ilinniartut atuarfissat aalajangerneqarsimasut malittarissavaat pinngitsooratillu atuarnernut peqataasussaallutik.
Imm. 2. Pissuteqavissumik - napparsimanermi allamilluunniit pissuteqavissumik pissuteqarluni - pissuteqanngitsumillu agginngitsoornerit ilinniagaqarnernut ataasiakkaanut agginngitsoorsinnaanerit qaangersimappatigit, tamatuma kingunerissavaa ilinniartup ilinniagaqarsinnaasutut isigineqarunnaarnera taamaattumillu nangillugu atuarsinnaasutut ilinniagaqarnermillu tapiissutinik tunineqarnissamut piumasarisat nammassisinnaanngikkai.
Imm. 3. Ilinniartup, pissuteqavissumik agginngitsoortarnini - napparsimanerit imaluunniit allamik pissuteqavissumik pissuteqarluni - ilinniagaqarnini unitsippagu, ilinniagaqarnermi nangeqqinnissaanut periarfissinneqassaaq, pissutsit tamanna periarfissaqartippassuk.

§ 4. Piffissamut atuarfissamut tunngatillugu atuarfiup malittarisassaanik unioqqutitsineq atuarfiup pisortaanit oqaatsitigut assuarinninnermik kinguneqassaaq. Taamaalioqqittoqarnerani allakkatigut mianersoqqusissummik tunniussaqartoqassaaq.
Imm. 2. Unioqqutitsinerit taamaattut ilinniartup allalluunniit inuuneranik peqqissusaannillu navianartorsiortitsisimappat imaluunniit atuartitsinermut ima annertutigisumik akornutaappata atuartitsineq ingerlanneqarsinnaanani, erniinnarluinnaq atuartitaajunnaarnermik kinguneqassaaq. Ilinniartup ineqarfiani maleruagassanik unioqqutitsineq, atuartitaajunnaarnermik kinguneqassanngilaq.
Imm. 3. Ilinniartut, ilinniakkaminnik pisinnaasakippallaarnertik pissutigalugu, atuarfiup tungaaniit ilinniakkaminnik aaqqiiviginiarfigineqareerlutik, atuarnerminnik ingerlatsisinnaanngitsutut atuarfimmit isigineqartut, atuarfiup brancheudvalgianit atuarunnaarsinneqassapput.
Imm. 4. Ilinniartut 2. del-erlutik atuarnertik  naammaginartumik angusaqarlutik ingerlassimanngippassuk, atuarfiup inassutigisinnaavaa atuarneq tamaat ilaaluunniit uteqqissagaat.
Imm. 5. § 3 aamma § 4 naapertorlugit aalajangiinerit brancheudvalgimut saqqummiunneqassapput_r takuuk Namminersornerullutik Oqartussat brancheudvalgit pillugit Nalunaarutaat.
Imm. 6. Aalajangiinerit brancheudvalgimit nalunaarutigineqartut erhvervsuddannelsesrådimut suliassiissutigineqarsinnaapput, takuuk Namminersornerullutik Oqartussat brancheudvalgit pillugit Nalunaarutaat.

 

Kapitali 3.
Sungiusaammik sulinermi isumaqatigiissutit.

§ 5. Aallaavittut ilinniagaqarneq naammassereerlugu ilinniartoq sungiusaammik sulinermik ilinniagaqassaaq, tamatumanilu malittarisassat ilinniagaqarnerit ataasiakkaat brancheudvalginit aalajangersarneqarsimasut malittarineqassapput, takuuk brancheudvalgit ataasiakkaat pillugit Nalunaarutit.

§ 6. Sungiusaammik sulinermut isumaqatigiissutit, EFG-mi aallavittut ilinniagaqareernerup kingorna ilinniartup sungiusaammillu sulliviup akornanni isumaqatigiissutaasoq allassimasuussaaq, isumaqatigiissutitullu allaffissiaq, brancheudvalgip inassuteqarneratigut Inuutissarsiutitigut Ilinniartitaanermi Qullersaqarfimmit akuerineqarsimasoq atorneqassaaq. Isumaqatigiissummi ilaatigut allassimassaaq ilinniartup sungiusaammik sulinermi nalaani akissarsiassai.
Imm. 2. Isumaqatigiissut aalajangersagartaqarsinnaavoq, imaattumik, qaammatit pingasut siulliit illuatungeriinnut tamanut misiliiffiussasut.
Imm. 3. S.I.K.-p sulisitsisullu kattuffiisa akornanni isumaqatigiissuteqarneranni akissarsiaq aalajangersarneqassaaq. Isumaqatigiissummik taamaattumik peqartoqanngippat S.I.K.-p Pisortallu Isumaqatiginninniartartuisa akornanni isumaqatigiissut atorneqassaaq.

§ 7. Ilinniagaqarnermut isumaqatigiissummi allannguutit ilassutilluunniit taamaallaat pisinnaapput fagimi immikkoortoqarfimmi pineqartumi brancheudvalgip akuersineratigut.
Imm. 2. Sungiusaammik sullivik pisussaavoq, malittarisassat brancheudvalgimit aalajangersarneqarsimasut naapertorlugit, ilinniartup sungiusaammik sulineranut oqaaseqaateqassalluni.
Imm. 3. Atuarfiup inassuteqarneratigut brancheudvalgip sungiusaammik sulineq sivitsorsinnaavaa, sungiusaammik sulinermut oqaaseqaatit tamatumannga patsisissaqartitsippata. Tamatumannga inassuteqaat brancheudvalgimut piffissaalluartillugu tunniuneqassaaq, sungiusaammik sulineq nalinginnaasoq naatinnagu.
Imm. 4. Naartunermut atatillugu ilinniartoq pisinnaatitaavoq sungiusaammik sulinerup unitsikkallarnissaanik. Unitsitsigallarnermi sungiusaammik sulineq nalinginnaasumik unitsitsigallarnerup sivisoqataanik sivitsorneqartarpoq.
Imm. 5. Napparsimaneq pissutigalugu ilinniartoq katillugit qaammatit 4-t sinnerlugit agginngitsoortarsimappat ilinniartup sungiusaammillu sulliviup piumasarisinnaavaat sungiusaammik sulinerup sivitsorneqarnissaa, piffissamik brancheudvalgimit akuerineqarsimasumik.
Imm. 6. Sungiusaammik sulinermik unitsitsigallarnerit allat, napparsimanermik naartunermilluunniit patsiseqanngitsut, brancheudvalgimit akuerineqassapput, taassumalu aalajangissavaa sungiusaaminik sulineq sivitsorneqassanersoq sungiusaammik sulliviup oqaaseqaateqareerneratigut atuarfiullu inassuteqarneratigut.
Imm. 7. Nalinginnaasumik ingerlanerup allanngortinnissaanut brancheudvalgi immikkut akuersissuteqarsinnaavoq, pissutsit immikkut ittut tamanna pissutissaqartippassuk.

 

Kapitali 4.
Sungiusaammik sulinermi isumaqatigiissutip atorunnaarsinnera.

§ 8. Sungiusaammik sulinermi isumaqatigiissut atorunnaarsinneqassaaq ima pisoqarsimappat:
a) Sungiusaammik sullivik tamatumannga naammassinninnissaminut periarfissaaruppat, piginnittup toqunera pissutigalugu.
b) sungiusaammik sullivik tamatumannga naammassinninnissaminut periarfissaaruppat, suliffeqarfiup unitsinneqarnera, akilersinnaajunnaarnera pissutsilluunniit allat pisutigalugit - taamaattorli tamatumani ilaanatik suliumajunnaarneq sulisitsiumajunnaarnerluunniit - tamakku qaammatinik 2-nik sivisunerunngippata.
Imm. 2. Brancheudvalgip paasiguniuk, sungiusaammik sulliviup akuerineqarnissamut piumasaqaatit naammassisinnaajunnaarai, sungiusaammik sulinermi isumaqatigiissut atorunnaarsissinnaavaa, taamaattoqarpallu ilinniagaqartut atuarfik sungiusaammik sullivimmik nutaamik pissarsiniassaaq.
Imm. 3. Ilinniartoq ima napparsimalertigisimappat sungiusaammik sulinermi isumaqatigiissutip ingerlatiinnaarnissaanut piumasaqartoqarsinnaanani, isumaqatigiissut brancheudvalgip akuersineratigut atorunnaarsinneqarsinnaavoq qaammatinik 2-nik sioqqutsilluni kalerriinikkut, qaammatip naanerani atorunnaartussatut. Periarfissaq siulleq atorlugu ilinniargaqarneq nangeqqinneqarsinnaassaaq.

§ 9. Ilinniagaqarnermi isumaqatigiissutip naammassineqarnissaanut sungiusaammik sulliviup ilinniartullu akornanni aaqqiagiinngittoqalersillugu brancheudvalgi tamatumannga nalunaarfigineqassaaq, aaqqiagiinngissutillu iluarsineqarnissaanut iliuuseqarniassalluni.
Imm. 2. Aaqqiagiinngissutit imm. 1-mi taaneqartut  brancheudvalgip akuliunneratigut aaqqinneqanngippata ilinniartup sungiusaammilluunniit sulliviup aaqqiagiinnginneq akerleriissutit suliarineqartarneranni eqqartuussivimmi aalajangiivigisassatut tunniussinnaavaat,  S.I.K.-p Pisortallu Isumaqatiginninniartartuisa isumaqatigiissutaallu sulinermut tunngasumik akerleriissutit suliarineqartarneranni eqqartuussiviup aalajangiineragut ilinniagaqarnermi isumaqatigiissut atorunnaarsinneqarsinnaavoq aammattaarlu ajoquserneqartoq taarsiivigineqarsinnaavoq. Ilinniartoq 18-it inorlugit ukioqarpat nakkutiginnittup peqataasarneranut tunngasumik ileqqoq Kalaallit Nunaanni atorneqartoq atorneqassaaq.
Imm. 3. Imm. 2. naapertorlugu aalajangiinerit eqqartuussivinnut ingerlateqqinneqarsinnaanngillat.

 

Kapitali 5.
Ilinniagaqarnerup inaarneqarnera.

§ 10. Ilinniartut ilinniagaqarnermik naammassinnissimasut ilinniagaqarfittut atuarfimmit brancheudvalgimillu ilinniagaqarsimanermi uppernarsaammik tunineqassapput, Namminersornerullutik Oqartussat ilinniagaqarnernut immikkoortoqarfinnut ataasiakkaanut Nalunaarutaanni maleruagassat naapertorlugit.

 

Kapitali 6.
Ilinniartuunersiutit.

§ 11. Atuarnerup nalaani ilinniartoq Kalaallit Nunaata Landskasseanit ilinniartuunersiuteqartinneqassaaq. Ilinniartuunersiutit annertussusaat landstingimit aalajangerneqassapput ilinniagaqartut kattuffiinik isumaqatigiinniuteqareernikkut.

 

Kapitali 7.
Atortuulernera.

§ 12. Nalunaarut 15. juni 1985-imiit atortuulerpoq.

Nuuk, ulloq 22. maj 1985.

Josef Motzfeldt

/

Ejvind Christoffersen