Namminersornerullutik Oqartussat nalunaarutaat nr. 17, 9. maj 1985-imeersoq arfanniarnerup killilersugaaneranut tunngasoq.

Namminersornerullutik Oqartussat inatsisaat nr. 12, 22.  november 1984-imeersumi inuutissarsiutigalugu piniarnermut aallaaniarnermullu tunngasumi § 4 najoqqutaralugu aalajangersarneqarpoq:

 

§ 1. Nalunaarut tikaagullinniarnermut tikaagullinnillu annerusunik arfanniarnermut Kalaallit Nunaata aalisarfittaani immanilu Kalaallit Nunaata eqqaaniittuni atuuttuuvoq.

§ 2. Piniarneq pillugu nalunaarummi aalajangersakkani pineqarput arfernik § 1-imi taaneqartunik pisaqarneq imaluunniit pisaqarniarneq qanoq ittorluunniit.
Imm. 2. Arfernik taakkuninnga eqqaassineq pisaqarnissamik siunertaqanngitsoq inerteqqutaavoq.

§ 3. Arferit arnavissat piaqqisarpata taakku piaraalluunniit pisarineqassanngillat.

§ 4. Arfiviit (grønlandshval) arfiviilluunniit allat pisarineqaqqusaanngillat.

§ 5. Tunnullit pisarineqaqqusaanngillat.

§ 6. Arferit tikaagullinniit annerusut piniarneqarnerini unaat tuukkartallit igeriuttakkat 50 mm-imik qaangerluguluunniit sulloqqortussusillit (kaliber) taamaallaat atorneqaqqusaapput.

§ 7. Qaammatisiutit malillugit ukiup ingerlanerani tikaagulliusaat amerlanerpaamik arfineq-pingasut Kitaani pisarineqaqqusaapput.
Imm. 2. Ukiumut tikaagulliusaartassat 1986 aallarnerfigalugu imatut agguataarneqarput :
a) Tikaagulliusaaq ataasiinnaq kommuneni ukunani pisarineqarsinnaatitaavoq : Nanortalik, Qaqortoq, Narsaq, Ivittuut Paamiullu.
b) Amerlanerpaamik katillugit tikaagulliusaat marluk kommuneni ukunani pisarineqarsinnaatitaapput : Nuuk, Maniitsoq Sisimiullu.
c) Amerlanerpaamik katillugit tikaagulliusaat tallimat kommuneni ukunani pisarineqarsinnaatitaapput:
Kangaatsiaq, Aasiaat, Qeqertarsuaq, Qasigiannguit, Ilulissat, Uummannaq, Upernavik Avanersuarlu.
Imm. 3. Imm. 1-imi 2-milu pisarineqarsinnaatitaasut qaammatisiutit malillugit ukiumi qaangerneqarsimagaangata ukiup tulliani amerlaqataannik ikilisinneqartassapput.
Imm. 4. Tikaagulliusaat 15,2 meterinik anginerusut taamaallaat pisarineqarsinnaatitaapput .
Imm. 5. Neqit aallallu tikaagulliusaanik tunisassiat taamaallaat Kalaallit Nunaanni inunnut nerisassatut uumasunullu nerukkaatissatut atorneqarsinnaapput.

§ 8. Qaammatisiutit malillugit ukiumut amerlanerpaamik qipoqqaat arfineq-pingasut pisarineqarsinnaatitaapput.
Imm. 2. Qipoqqaat ukiumut pisarineqarsinnaatitaasut 1986 aallarnerf igalugu imatut agguataarneqarput:
a) Amerlanerpaamik katillugit qippoqqaat sisamat kommuneni ukunani pisarineqarsinnaatitaapput : Nanortalik, Qaqortoq, Narsaq, Ivittuut Paamiullu.
b) Amerlanerpaamik katillugit piqoqqaat sisamat kommuneni ukunani pisarineqarsinnaatitaapput : Nuuk, Maniitsoq Sisimiullu.
c) Kommuneni ukunani qipoqqarniartoqarsinnaanngilaq: Kangaatsiaq, Aasiaat, Qeqertarsuaq, Qasigiannguit, Ilulissat, Uummannaq, Upernavik Avanersuarlu.
Imm. 3. Imm. 1-imi 2-milu pisarineqarsinnaatitaasut qaammatisiutit malillugit ukiuni qaangerneqarsimagaangata ukiup tulliani amerlaqataannik ikilisinneqartassapput.
Imm. 4. Qipoqqaat 10,7 meterinik anginerusut taamaallaat pisarineqarsinnaatitaapput.
Imm. 5. Angallatit 50 BRT-inik mikinerusuinnaat qipoqqarniarsinnaatitaapput.
Imm. 6. Neqit allallu qipoqqarnit tunisassiat taamaallaat Kalaallit Nunaanni inunnut nerisassatut uumasunullu nerukkaatissatut atorneqarsinnaapput.

§ 9. Tikaagulliusaartassat qipoqqartassallu tamakkerneqarsimanerat pillugu Naalakkersuisunut Ilaasortaq radiokkut tusagassiutitigullu nalunaaruteqarsinnaavoq.
Imm. 2. Naalakkersuisunut Ilaasortaq taamatut nalunaaruteqareeraangat qaammatisiutit malillugit ukiumi pineqartumi tikaagulliusaartoqaqqinnanilu qipoqqartoqaqqissanngilaq.

§ 10. Tikaagulliusaartat qipoqqartallu pillugit nalunaarut arfanniartunit Namminersornerulluni Oqartussani Inuutissarsiornermi Pisortaqarfimmut nassiunneqassaaq.
Imm. 2. Naalakkersuisunut Ilaasortap qanoq ukulikitsigisumik qanorlu iliorluni nalunaaruteqartarnissaq aalajangissavaa.

§ 11. Arferit tunnullit 10,7 meterinik anginerusut  taamaallaat pisarineqarsinnaapput.
Imm. 2. Neqit allallu arfernik tunnulinnik tunisassiat taamaallaat Kalaallit Nunaanni inunnut nerisassatut uumasunullu nerukkaatissatut atorneqarsinnaapput.

§ 12. Kigutilissuit 10,7 meterinik anginerusut taamaallaat pisarineqarsinnaatitaapput.

§ 13. §§ 9, 11 aamma 12-imik unioqqutitsinerit aamma § 10 najoqqutaralugu nalunaaruteqanngitsoorsimanerit  mianersoqqussummik akiliisitsinermilluunniit kinguneqarsinnaapput.

§ 14. Nalunaarut atortuulerpoq 1. juni 1985.
Imm. 2. Taanna ilutigalugu Kalaallit Nunaannut Ministereqarfiup nalunaarutaa nr. 484 30. november 1979-imeersoq arfanniarnermik killilersuinermut tunngasoq Kalaallit Nunaannut Ministereqarfiup nalunaarutaatigut nr. 18, 18. januar 1984-imeersukkut allanngortinneqarsimasoq atorunnaarsinneqarpoq.

Nuuk, ulloq 9. maj 1985.

Lars Emil Johansen

/

Finn Jakobsen