Ilanngussaq 1.

1. Nigartanik uuttuutinut nassuiaat.

a) Nigartat angissusiinik aalajangiiniarnermi atorneqartarpoq nigartanik uuttuut 2 mm-inik issussusilik, manissoq, ninngusuumik ilutsimikkullu allanngujaatsumik sanaaq. Iluseqarpoq killingi akuttoqatigiinnik sammivilinnik, taakku 1:8-mik amiliartortunik illuttut attaveqartunik, imaluunniit narluinnartunik killilimmik amiliartussutsip taaneqartup assinganik. Nigartanik uuttuut nuuatigut putoqartinneqassaaq.

b) Nigartanik uuttuutip saqqaata silissusia mm-ikkaarlugu nalunaaqutsersorneqarsimassaaq killingisigut akuttoqatigiinnik sammivilitsigut iluseq taanna atorneqarpat, kiisalu killingisigut amiliartortutigut. Kingullertut taaneqartumik iluseqartinneqarpat silissusia mm-imik akuttussusilinnik nalunaaqutsersorneqassaaq akuttoqatigiinnillu silissusia kisitsisilerlugu nalunaaqutsersorneqassalluni.

2. Nigartanik uuttuutip atorneqarnera.

a) Aalisarnermut atortut tasissimatinneqassapput nigartat teqeqqui atortup takissusia malillugu imminnut ungasinnerpaanngorlugit.

b) Nigartanik uuttuutip imm. 1-imi taaneqartup nuua nigartamut mangunneqassaaq uuttuut nigartanut naleqqiullugu uingatinnagu.

c) Nigartanik uuttuut nigartanut mangunneqassaaq assaannarmik imaluunniit oqimaalutaq naqitsinermilluunniit uuttuut atorlugu nigartanik uuttuutip nigartat killinginut uninnissaata tungaanut.

3. Nigartanik uuttorneqartussanik toqqaaneq.

a) Nigartat uuttorneqartussat tulleriiaaginnaat 20-usussaapput aalisarnermut atortup tanneranoortuat malillugu.

b) Ilaartornerniit, allunaasaniit qilersuutinilluunniit 50 cm-imik qaninnerusuni nigartanik uuttuisoqassanngilaq. Ungasissusissaa ilaartornerniit, allunaasaniit qilersuutaanniilluunniit kipunganngitsumik uuttorneqassaaq, aalisarnermut atortut uuttuiffiup tungaanut isivillugit. Nigartat iluarsarsimasut alissimasulluunniit uuttorneqassanngillat imaluunniit atortunut iluaqutinik ikkussivigineqarsimasut.

c) b)-mi maligassat peqqutigalugit a)-mi taaneqartut nigartat uuttugassat tulleriaarnissaannik maligassaq atunngitsoortinneqarsinnaavoq.

d) Atortut masatsillugit taamaallaat uuttorneqarsinnaapput qerisimassanngillalli.

4. Nigartat ataasiakkaat nerutussusiat.

Nigartap nerutussusiat tassaavoq uuttuutip uninnerani nalunaaqutip killiffiusup silissusia, uuttuut imm. 2 malillugu atorneqarpat.

5. Piniutit nigartaasa nerutussussiisa aalajangiivigineqarnerat.

a. Piniutit nigartaasa nerutussusii mm-inut uutorneqassapput imm. 3 aamma 4 malillugit uuttugassatut toqqarneqarsimasut amerlassusiisa nerutussusiinik agguaqatigiissitsinikkut. Agguaqatigiissitsineq mm-imut qaninnerpaamut allisinneqassaaq.

b) Nigartat uuttorneqartussat amerlassusissaat imm. 6-imi aalajangersarneqarput.

6. Nigartanik uuttuinermi periaaseq.

a) Nakkutilliinermi pisortat nigartat tulleriiaat 20-t imm. 3 malillugu toqqarneqarsimasut uuttussavaat, nigartanik uuttuutip assaannarmik mangunneqarneratigut oqimaalutaq naqitsinermilluunniit uuttuut atornagu. Tamatuma kingorna imm. 5 malillugit piniutit nigartaasa nerutussusaat aalajangerneqassaaq.

b) Naatsorsuereernerup kingorna nigartat nerutussusaat aalajangersakkanut atuuttunut unioqqutitsippata nigartat tulleriiaat 20-t marluk, imm. 3 malillugu toqqakkat uuttortaqqinneqassapput. Tamatuma kingorna imm. 5 malillugu nigartat uuttukkat 60-it tunngavigalugit nigartat nerutussusaat naatsorsoqqinneqassaaq. Inernerineqartoq tassaavoq piniutit nigartaasa nerutussusaat, tak. kisianni imm. C.

c) Imm. a) imaluunniit b) malillugu nigartanik aalajangiineq angallatip naalagaaniit assortorneqarpat, nigartat nerutussusiinik uuttuilluni naatsorsugaagaluaq atunngitsoortinneqassaaq, piniutinillu naatsorsugaagaluaq atunngitsoortinneqassaaq, piniutillu uuttortarneqaqqillutik. Uuttueqqinnermi oqimaalutaq naqitsinermilluunniit uuttuut nigartat nerutussusiinik uuttuummut ikkullugu uuttuisoqassaaq. Oqimaalutap naqitsinermillunniit uuttuutip toqqarneqarnissaa nakkutilliinermi pisortanit aalajangerneqassaaq.(Teknologistyrelsemit). Oqimaalutaq nigartanik uuttuutip nuuanut putumut ikkunneqassaaq. Naqitsinermik uuttuut nigartanik uuttuutip nuuani putumut imaluunniit uuttuutip silinnersaanut ikkunneqarsinnaavoq. Oqimaalutap naqitsinermillu uuttuutip eqqorluinnassusia Teknologistyrelsemit akuerisaasussaavoq. Piniutinut 35 mm-inik nerutussusilinnik nerukinnerusunulluunniit imm. a) malillugu aalajangersaavigineqartutut nigartalinnut naqitsineq 19,61 newton (taassuma assigaa oqimaassuseq 2 kg) atorneqassaaq, piniutinullu allanut naqitsineq 49,03 newton (taassuma assigaa oqimaassuseq 5 kg). Imm. 5 malillugu nigartat nerutussusiinik uuttuinermi, oqimaalutaq naqitsinermilluunniit uuttuut atorneqartillugu, nigartat tulleriiaat 20-iinnaat uutorneqassapput.