Kalaallit Nunaata Kitaani timmissanik aallaaniarneq pillugu Namminersornerullutik Oqartussat nalunaarutaat nr. 11, 19. marts 1985.
Kalaallit Nunaanni pinngortitamik allanngutsaaliuineq pillugu Inatsisartut inatsisaanni nr. 11-mi 12. november 1980-imeersumi § 2, imm. 1, kiisalu Inuutissarsiutigalugu piniarnermut aallaaniarnermullu Inatsisartut inatsisaanni nr. 12-imi 22. november 1984-imeersumi § 4, imm. 1 a) naapertorlugit aalajangersarneqarput:
§ 1. Timmissat makku Kitaani piniarneqarsinnaapput:
Alleq Naluumasortoq Appa Naajaannaq Appa sigguttooq Naajarluk Appaliarsuk Naajarujussuaq Apparluk Oqaatsoq Aqisseq Paaq Isunngaq Papikkaaq Isunngarsuaq Saarfaarsuk Qajorlak Serfaq Qaqulluk (malamuk) Taateraaq Qaqullunnaq Taliffak Qarsaaq Tuujuk Qeerlutooq Tuullik Qingalik (sioraki) Tulugaq Miteq Imm. 2. Timmissat allat tamarmik eqqissisimatitaalluinnarput. Timmissat eqqissisimatitaalluinnartut Kalaallit Nunaannit aallarunneqarnissaat inerteqqutaavoq, aamma asiunaveersaganngorlugit Kalaallit Nunaannut utertinneqarnissaat siunertaralugu Kalaallit Nunaannit nassiunneqarnissaat inerteqqutaavoq. Inerteqqutaasunut ilaapput timmissat uumasut toqungasullu, aammalu toqungasut qerititat allatulluunniit asiunaveersakkat kiisalu timmissat kivikkat timmissallu amii siaarlugit panertitat.
Imm. 3. Timmissat toqungasut nassaat taaneqartutut ittut politi-nut tunniunneqartassapput.§ 2. Piffissami 15. juni-p 15. august-usillu akornanni timmiarniarneq tamarmi inerteqqutaavoq. Aammalu oqaatsoq piffissami 1. april-imit 30. september-imut piniarneqassanngilaq. Nassuttuup kujataani miteq piffissami 1. juni-p 30. september-illu akornanni piniarneqassanngilaq.
Imm. 2. Isunngat, naajaannaat, naajarujussuit, naajarluit, taateraallu arlaannisat erniortuunngitsut 5-iullutik amerlanerullutilluunniit ataatsimoortut eqqissisimatitsinerup nalaani pisarineqarsinnaapput.
Imm. 3. Mitit qingallit allerillu arlaannisat erniortuunngitsut 5-iullutik amerlanerullutilluunniit ataatsimoortut eqqissisimatitsinerup nalaani Nassuttuup avannaani pisarineqarsinnaapput. Qeerlutuunik, miternik, qingalinnik allernillu isanik ungoorneq Kalaallit Nunaanni tamarmi inerteqqutaavoq.
Imm. 4. Taateraat appallu aasaq tamaat Upernaviup Uummannallu kommune-ni piniarneqarsinnaapput, taamaattoq § 3-mi aalajangersakkatigut killiliinerit malinneqassallutik.
Imm. 5. Appat imm. 4-mi maleruaqqusat naapertorlugit pisarineqartut Kalaallit Nunaanni allanut nassiunnissaat inerteqqutaavoq. Inerteqqummi pineqanngillat Upernaviup kommune-ani Aappilattormiunit, Tussaarmiunit Tasiusarmiunillu nassiussaasut.§ 3. Sumiluunniit timmissat imarmiut nuliariikkuutaat qulit amerlanerusulluunniit erniorfii tamarmik timmissat ineqarfiisut isigineqassapput.
Imm. 2. Timmissat ineqarfimminniitsillugit eqqarneq allatulluunniit pisariaqanngitsumik pisorpalutsitsineq inerteqqutaavoq innamit timmissat ineqarfiannit ungasissutsip matuma iluani:
2 km., innaq timmissat ineqarfiat taateraanit, appanit, apparlunnit, appaliarsunnit, qaqullunnit (malamuk), oqaatsunillu inigineqarpat.
200 m., timmissat ineqarfiat tassaappat qeqertannguaq miternit, serfanit, imeqquutaallanit naajanilluunniit allanit taateraajunngitsunit inigineqartoq.§ 4. Mannissarneq ajornartitaavoq.
Imm. 2. Imeqqutaallat, isunngat, naajarluit, naajaannaat, naajarujussuit taateraallu manniinik, 1. juli tikillugu mannissarniartoqarsinnaavoq, Upernaviulli kommune-ani 10. juli tikillugu. Mannissaat taamaallaat nammineq atorneqassapput inuutissarsiutitullu tuniniarneqassanatik.
Imm. 3. Appat, apparluit serfallu Upernaviup kommune-ani mannissarniarneqarsinnaapput 10. juli tikillugu aammalu ulloq taanna tikillugu qaqulluit (malamut) Nassuttuup avannaani mannissarniarneqarsinnaallutik.§ 5. Timmissat suulluunniit piaraat timmisinnaanngitsut ullunit ulloqarfiilluunniit eqqaannit peernissaat inerteqqutaavoq, piaqqallu uumasuutigeqqusaanngillat.
§ 6. Inuutissarsiutigalugu aallaaniartartut timmissanik qanorluunniit amerlatigisunik pisaqarsinnaapput. Taamaattoq ullormut mitit amerlanerpaamik 50-it aallaaniamit ataatsimit pisarineqartassapput. Piniarnermut allagartaq timmiarniarsinnaanermut naqissuserneqassaaq. Aallaaniat allat namminneq kisimik ilaquttamillu atugassaannaannik pisaqarsinnaapput, pisaminnillu tuniniagassanngortitsisussaanatik.
§ 7. Aallaaniarnermi pisat tamatigut inunnut nerisassanngorlugit atorneqartassapput, Inatsisartut allamut atuinissamik akuersissuteqanngippata. kiisalu akuerineqarsimatinnani timmiarniarnermi pisat avammut tunissassiarinissaat inerteqqutaavoq.
§ 8. Angallatit sukkasuuliat aallaaniarfissamukaaserineqarsinnaapput, kisianni 10 knob sinnerlugu sukkatigitillugit timmissanik imaaniittunik ungoorissutaaqqusaanngillat imaluunniit aallaanninniarnermi malersuutaaqqusaanatik.
§ 9. Timmisartut qamutillu motor-illit aqqusernit avataanni aputikkoorsinnaasut (snescooter-it) aallaaniarnermi atorneqassanngillat.
Imm. 2. Immikkut peqqutissaqartillugu kommunalbestyrelse-t ataasiakkaat kommune-mi malittarisassatigut aalajangersinnaavaat aputisiutit scooter-it assartuutitut atorneqarnissaat.§ 10. Timmiarsiutit kaliber 12 tikillugu annnerpaamillu marlullit (marlunnik patron-illit) kiisalu qoorortuuaqqat qoorortuullu nalinginnaasut aallaaniarnermi atorneqarsinnaatitaapput. Aallaasit eqqarasuartaatit (automatiske) timmiarsiutillu affarmik eqqarasuartaatit (halvautomatiske) atornissaat inerteqqutaavoq.
Imm. 2. Pisissit qarsullu, nuffit, aallaaseqqat (slangebøsser) sakkulluunniit taamaangajattut aallaaniarnermi atorneqarsinnaatitaapput.
Imm. 3. Nigartuutinik, pullatinik sunilluunniit (kiisartunik, nippuffissianik, karsinik pullatinik il. il.), isumaminnnik igittussianik timmissanillu ussassaarutinik uumasunik atuinissaq inerteqqutaavoq. Toqunartunik ilisimajunnaarnartunillu sunilluunniit tamanik atuinissaq inerteqqutaavoq.
Imm. 4. Timmiarniutigalugit qassutit suulluunniit (aalisakkanut qassutit, qassutit silaannarmi nigarsiniutit, immap iluani pullaviliat) immap iluanut silaannarmulluunniit ikkunneqassanngillat.§ 11. Aallaaniarneq, piniarneq, aamma mannissarneq imaluunniit ullutarneq sunaluunniit inerteqqutaavoq ikkarlunni Avissuni (qeqertat Imerissut eqqaanniittut), Nunatsiami (qeqertaq Kitsissuarsuit eqqaanniittoq) kiisalu Naternap tunuani kangerluup affarliani Tasiusarsuarmi Nordenskiold Bræ-p iluani. Nunani taakkunani allagartat paasisassiissutit politi-nit ivertitaapput.
Imm. 2. Sumiiffiit taakku taaneqartut avataanni eqqissisimatitsinerup nalaani taamaallaat mitit qingallillu ullutarneqarsinnaapput 21. juli-mit.§ 12. Nalunaarummi matumani aalajangersakkanit immikkut akuersissuteqarneq Kalaallit Nunaanni Inatsisartunit nalunaarutigineqarsinnaavoq Inatsisartut eqqissisimatitsinermut ataatsimiititaliaannut saqqummiussereernikkut.
§ 13. Timmissanik nujuarlutik uumasuusunik uumasunik, Kalaallit Nunaanni nalinginnaasumik timmiaariinngitsunik tikisitsineq uumasuliinerlu inerteqqutaavoq Inatsisartunit akuerineqarsimatinnani.
§ 14. Aalajangersakkanik siuliiniittunik unioqqutitsineq akiliisitsissutaassaaq pisallu arsaarinnissutigineqassallutik. Arsaarinnissutaasut landskasse-p pisassarai.
Imm. 2. Arlaleriartumik unioqqutitsineqartillugu piniarnermi sakku arsaarinnissutaasinnaavoq.
Imm. 3. Pisat/pissarsiat arsaarinnissutaasut qanoq pineqarnissaannik aalajangiineq kiisalu § 1, imm. 3-mi taaneqartut timmissat toqungasut nassaat qanoq pineqarnissaat Kalaallit Nunaanni Naalakkersuisunit aalajangiiffigineqassaaq.§ 15. Nalunaarut manna Kalaallit Nunaata Avannaanut Tunumullu atunngilaq.
§ 16. Nalunaarut erniinnaq atulerpoq tamatumalu peqataanik Kitaani timmissanik piniarneq pillugu landsråd-ip ileqqoreqqusaa 21. december 1977-imeersoq atorunnaarpoq.
Kalaallit Nunaanni Namminersornerrullutik Oqartussat, ulloq 19. marts 1985.
Jonathan Motzfeldt/
John E.Jensen