Kalaallit Nunaanni nannut eqqissisimatitaanerat pillugu Namminersornerullutik Oqartussat nalunaarutaat nr. 10, 19. marts 1985.

Kalaallit Nunaanni pinngortitamik allanngutsaaliuineq pillugu Inatsisartut inatsisaanni nr. 11-mi 12. november 1980-imeersumi 2, imm. 1, kiisalu Inuutissarsiutigalugu piniarnermut aallaaniarnermullu Inatsisartut inatsisaanni nr. 12-imi 22. november 1984-imeersumi 4, imm. 1 a) naapertorlugit aalajangersarneqarput:

 

1. Nannut (ursus maritimus) taamaallaat piniarneqarsinnaapput inunnit Kalaallit Nunaanni najugaqartunit kalaallinullu inooqatigiinnut aalajangersimasumik attuumassuteqartunit, kiisalu piniarnermik aallaaniarnermillu inuutissarsiuteqavinnerminnut allagartamik kommune-mi najugarisaminni kommunalbestyrelse-mit tunineqarsimasunit.
Imm. 2. Taamaattoq kinaluunniit, inunnit 1-imi piumasaqaatinik naammassinninngitsunit angallanneqartoq imaluunniit akissarsiaqarluni ingiortaasoq nannunniarsinnaatitaanngilaq.
Imm. 3. Naak imm. 2-mi aalajangersagaq taamaakkaluartoq, akissarsiaqarluni ingiortaasoq nammineq imm. 1-imi piumasaqaatinik naammassinnittoq nannunniarsinnaatitaavoq, akissarsiffigalugu ingiugaa tassaasimappat pisortani atorfeqarluni angalasoq.

2. Nannut piaqqat ataatsimik ukioqalernertik tikillugu kiisalu nannut arnavissat taamaattunik piaqqisartut ukioq kaajallallugu eqqissisimatitaapput.
Imm. 2. Nannut allat 1. juli-mit 31. august-usimut eqqissisimatitaapput. Taamaattoq Tunumi Kangerlussuarmit Lindenows Fjord-imut nannut allat tamarmik 1. august-usimit september-ip 30-at ilanngullugu eqqissisimatitaapput.
Imm. 3. Kalaallit Nunaanni pinngortitamik allanngutsaaliuineq pillugu Inatsisartut inatsisaanni nr. 11-mi 12. november 1980-imeersumi -it 15, 16-ilu naapertorlugit nunami, Nunatut uumasui ilanngullugit eqqissisimatitanngortitaasumi nannut eqqissisitaalluinnarput.

3. Timmisartut, helikopter-it nunakkullu angallatit motor-illit, tamatumani ilanngullugit snescooter-it nannunniarnermi, imaluunniit piniariarfimmut utimullu angallatitut atoqqusaanngillat.
Imm. 2. Toqunartut, kiisartut, nigartuutit aallaasilluunniit namminneq aallartussiat atorneqarnissaat inerteqqutaapput.

4. Nannut uumasuutigeqqusaanatillu Kalaallit Nunaannit aallaruteqqusaanngillat Kalaallit Nunaanni Namminersornerullutik Oqartussanit akuerineqanngitsumik.

5. Nannup unioqqutitsinikkut pisarineqartup neqaanik amianik ilaanilluunniit sumik arlaanik pisineq pinerluunniit inerteqqutaavoq.

6. Maleruaqqusanik siuliini allassimasunik unioqqutitsineq akiliisitsissutaasinnaavoq, kiisalu nannut unioqqutitsilluni pisarineqarsimasut pissarsiarineqarsimasulluunniit neqaat amiilu pisataallu allat arsaarinnissutaassallutik. Arsaarinnissutaasut sumut atornissaat Kalaallit Nunaanni Namminersornerullutik Oqartussanit aalajangiiffigineqartassapput. 3-mi aalajangersakkanik unioqqutitsinermi angallatigineqartut sakkugineqartullu arsaarinnissutaasinnaapput.
Imm. 2. -ini 1-3-mi aalajangersakkanik unioqqutitsinermut piniartoq kisimi akisussaanngilaq, aammali akisussaavoq angallammik, qimussimik imaluunniit sakkumik allamik piniarnermi atorneqarsimasumik piginnittoq, piniariaqataasimaguni imaluunniit sakkut pineqartut taakku unioqqutitsilluni piniarnermut atorneqarumaarnissaat ilisimaguniuk.

7. Namminersornerullutik Oqartussat ilisimatuut misissuinissaannut siunertanullu allanut nalunaarummi maleruaqqusanit allaasunik immikkut akuersissuteqarsinnaapput.

8. Nalunaarut erniinnaq atulerpoq tamatumalu  peqataanik Kalaallit Nunaanni nannut eqqissisimatitaanerat pillugu nalunaarut nr. 596, 5. december 1974-imeersoq kingusinnerusukkut allannguuteqartoq atorunnaarpoq.




Kalaallit Nunaanni Namminersornerullutik Oqartussat, ulloq 19. marts 1985.




Jonathan Motzfeldt

/

John E.Jensen