Aningaaserivinni il.il. ernianit isertitat akileraarutinut tunngatillugu nakkutigineqarnerat pillugu Namminersornerullutik Oqartussat nalunaarutaat nr. 6, 22. januar 1985-imeersoq.

Aningaasarsianit akileraarutit pillugit landstingip inatsisaanni nr. 15-imi 3. december 1984-imeersumi § 94 A, imm. 2 aamma § 94 B imm. 2 naapertorlugit imaattut aalajangersarneqarput:

 

Kontoqarfiit nalunaaruteqartarnerat pillugu aalajangersakkat assigiinngitsut.

§ 1. § 94 A imm. 1 naapertorlugu nalunaarut imaqassaaq kontoqartup aqqanik, najugaanik, inuup normuanik (cpr.nr.) imaluunniit piginneqatigiiffiup akileraartartutut normuanik (skr.nr.).
Imm. 2. Nalunaaruteqartussaanermut aamma ilaapput kontot il.il. ukiup ingerlanerani atorunnaarsinneqartut.
Imm. 3. Pissutissaqartillugu aammalu § 94 A naapertorlugu paasissutissat pingaaruteqanngikkaangata kontot ataasiakkaat imaluunniit ataatsimoortut imaluunniit kontot ilaat aalajangersimasumik ilusillit nalunaarutigineqartussaatitaasut nalunaarutigineqanngitsoorsinnaatitaapput imaluunniit taakkununnga tunngatillugu nalunaaruteqartussaatitaaneq annikillisinneqarsinnaalluni, aammalu aningaasat nalunaarutigineqartussat amerlassusiisa ammut killingat aalajangerneqarsinnaalluni.
Imm. 4. Nalunaaruteqartussaatitaasup kontoqartoq §94 A imm. 1 tunngavigalugu nalunaarutigineqartup angissusia pillugu ilisimatissavaa. Kontoqartoq kingusinnerpaamik qaamatisiutit malillugit ukiup nalunaaruteqaataasussap tulliani 1. februar nalunaarfigineqassaaq.

 

Kontoqartut Kalaallit Nunaata avataani najugaqarallartut imaluunniit najugaqartut.

§ 2. Kontot § 94 A imm. 1-imi pineqartut inunnit, piginneqatigiiffinnit peqatigiiffinnillu il.il. Kalaallit Nunaata avataani najugaqartunit imaluunniit najugaqarallartunit imaluunniit qaammatit 3 sinnerlugit Kalaallit Nunaanniissimanngitsunit pigineqartut pillugit inuup normua imaluunniit akileraartartup normua aatsaat nalunaarutigineqassaaq kontoqartoq normumik taamaattumik tunineqarsimappat. Aamma kontoqartup aqqa, najugaa nunalu najugaqarfia nalunaarutigineqassapput. Danmarkimi imaluunniit Savalimmiuni najugaqarallarneq najugaqarnerluunniit Kalaallit Nunaata avataani najugaqarnertut naatsorsuunneqassaaq. 1-imik ilisarnaaserlugu konto pilersinneqassaaq.

 

Kontoqartut Kalaallit Nunaanni najugaqarallartut imaluunniit najugaqartut.

§ 3. Kontomik § 94 B imm. 1-imi pineqartumik pilersitsisup paasissutissat tunniussani uppernarsassavai kontoqarfimmut kinaassutsimut uppernarsaammik (ID-kort) imaluunniit inuup normuanut uppernarsaammik imaluunniit pisortat uppernarsaasiussaannik allamik takutitaqarnermigut. § 94 B imm. 1-imi taanegartutut inuup normuanut imaluunniit akileraartartutut normumut tunngasumik paasissutissiinermut atatillugu kontoqartup aqqa najugaalu nalunaarutigineqassapput.
Imm. 2. Kontotaarniartoq paasissutissanik imm. 1-imi pineqartunik paasissutisseereertinnagu konto pilersinneqarsinnaanngilaq.
Imm. 3. Paasissutissat imm. 1-imi pineqartut kontoqartup ilisarineqarnissaanut pisariaqartut allanngorpata kontoqartoq pisussaavoq qaammat ataaseq qaangiutsinnagu allannguut pillugu kontoqarfiusumut nalunaaruteqarnissaminut.
Imm. 4. Piginneqatigiiffinnut, peqatigiiffinnut, aningaasaateqarfinnut kontoqartunullu allanut inuup normuanik peqaratilluunniit akileraartartutut normumik pigisaqanngitsunut tunngatillugu siulittaasup allalluunniit kontoqartoq sinnerlugu iliuuseqarsinnaatitaasup inuttut normua nalunaarutigineqassaaq. 2-mik konto ilisarnaaserneqassaaq.

 

Atortussanngortitsinermi maleruagassat

§ 4. Nalunaarut ukioq aningaasarsiorfik 1985 aallarnerfigalugu atortuulerpoq.

Namminersornerullutik Oqartussat, ulloq 22. januar 1985

Moses Olsen

/

Ole Sinkbęk