Namminersornerullutik Oqartussat nalunaarutaat nr. 4, 3. januar 1985-imeersoq uiluinniarnermut tunngasoq.
Inatsisartut inatsisaanni nr.11 21. november 1984-imeersumi inuutissarsiutigalugu aalisarnermut tunngasumi §§ 8, imm. 2 aamma 3, 9, 10, 12 aamma 14 najoqqutaralugit aalajangersarneqarpoq:
§ 1. Nalunaarut Kalaallit Nunaata aalisarfittaani inuutissarsiutigalugu uiluinniarnermik ingerlatsisunut, inunnut piginneqartigiiffinnullu Kalaallit Nunaanni aalisarsinnaanermik akuersissuteqartunut atuuppoq.
Imm. 2. Nalunaarummi angallatit angissusii allassimapput uuttueriaatsit inatsit nr. 203-mi 18. maj 1977-imi umiarsuarnik uuttuisarnermut tunngasumi aamma siusinnerusukkut maleruagassani atuuttuni aalajangersakkat naapertorlugit. Angallatip usisinnaassusia aalajangiisuussaaq nalunaarut malillugu angallatip pineqartup angissusianut killigitinneqartup sorliup atorneqarnissaanut.§ 2. Uiluinniarsinnaaneq uiluinniarsinnaanermik akuersissummik tunngaveqartinneqassaaq.
Imm. 2. Akuersissut qaammatisiutit malillugit ukiuusumut qinnutigineqartassaaq. Qinnuteqaat imm. 3-imi paasissutissanik ilallugu Naalakkersuisunut ilaasortamit tiguneqareersimassaaq kingusinnerpaamik 5. december qaammatisiutit malillugit ukiumi siuliani. 1985-imi qinnuteqaatit killeqartinneqarput 15. januar 1985-imut. Immikkut ittumik peqqutissaqartillugu killigititaq taanna Naalakkersuisunut Ilaasortap qinnuteqaatini ataasiakkaani allanngortissinnaavaa.
Imm. 3. Qinnuteqaat immersugassamut nalunaarummut matumunnga ilanngunneqartumut immersorneqassaaq.
Imm. 4. Uiluinniarsinnaanermut akuersissutinik tunniussinissamut piumasarineqarpoq angallatip inuttaasa minnerpaamik 70 %-iisa Kalaallit Nunaanni aalajangersimasumik ukiuni marlunni najugaqarsimanissaat najugaqartuarnissaallu kiisalu kalaallinut inuiaqatigiinnut aalajangersimasumik attuumassuteqarnissaat aalisarnermillu inuutissarsiuteqavilluni ingerlataqarnermik uppernarsaateqarnissaat. Piumasarisap naammassineqarsimaneranut uppernarsaat Kalaallit Nunaanni Aalisarsinnaanermut Akuersissutinik Nakkutilliivimmut nassiunneqartassaaq piniariareernerit tamaasa inuttaasut allattorsimaffiannut immersuinikkut, tassunga ilanngullugu allanneqassalluni aalisarnermut uppernarsaatip normua.
Imm. 5. Akuersissuteqarnermi piumasarineqarpoq pisat agguarnerisa aalajangersimasut nunami tunisassiorfinni tunisassiassanngorlugit tulaanneqartarnissaat. Akuersissummi aamma piumasarineqarsinnaavoq nunami tunisassiorfinnut aalajangersimasunut tunisaqarnissaq.
Imm. 6. Immikkut peqqutissaqartillugu imm. 4-imi 5-imilu aalajangersakkat Naalakkersuisunut Ilaasortap atunngitsoortissinnaavai.§ 3. Akuersissummik piginnittup toqunerani, piginneqartigiiffiup akuersissummik piginnittup atuukkunnaarnerani angallatilluunniit akuersissummik piginnittup tunineqarnerani annaanneqarsinnaajunnaarluniluunniit umiunerani akuersissut atorurtnaarsinneqassaaq, isumaliutigineqaqqissinnaallunili paasineqarpat piumasarineqareersimasut nutaamik akuersissutitaarnissamut naammassineqarsimanersut.
Imm. 2. Akuersissut umiarsuarmiitinneqassaaq.§ 4. Umiarsuarnut BT 50-ilinnut 50 BRT-linnullu pisassarisinnaatitat artnerpaaffissaat aalajangersarneqassaaq. Aamma taamatut umiarsuit umiarsuarmi tunisassiornissamut akuersissuteqarfigineqarsimasut, apeqqutiginagu qartoq angitiginerat. Pisassat annertunerpaaffissaat akuersissummi aalajangersarneqarsinnaapput piffissallu qanoq-ilinerani aalisarfimmi sumilu pisarineqarnissaat agguataarneqarsinnaallutik. Taamaaliornermi tunulequtarineqassapput pisarineqarsinnaatitaasut annertussusiinik, angallatit pisaqarsinnaassusiinik nunallu suatungaani aalisarnerup pitsaanerusumik ineriartortinneqarnissaanik nalileereernikkut.
Imm. 2. Naalakkersuisunut Ilaasortamit imm. 1-imi pisassaritinneqartut annertussusissaattut aalajangerneqarsimasut allanngortinneqarsinnaapput, pisassaritinneqartut tamarmiusut aalajangiivigineqarneranni pisassaritinneqartut tamarmiusut pisarineqarnissaat eqqarsaatigalugu Naalakkersuisunut Ilaasortap naliliinera malillugu allannguuteqartitsinissaq pisariaqartinneqarpat. Aamma taamatut allanngortitsisoqarsinnaavoq piffissaq aalisarfiillu aalajangersimasut eqqarsaatigalugit.
Imm. 3. Aalisarneq taamaatinneqassaaq pisassat annertussusii imm. 1-imi 2-milu aalajangerneqarsimasut pisarineqarpata, imaluunniit imm. 1-imi 2-milu aalajangersakkat malillugit qanoq-iliuuseqartoqartariaqarpat. Aalisarnerli kingusinnerpaamik taamaatinneqassaaq Naalakkersuisunut ilaasortaq radio-kkut tusagassiuutitigulluunniit taanna pillugu nalunaaruteqarpat. Piffissamut aalisarfinnullu aalajangersimasunuinnarnulli taamatut nalunaaruteqarneq attuumassuteqarsinnaavoq.§ 5. Ministereqarfiup nalunaarutaani nr. 629-imi 22. december 1976-imeersumi amma nr. 176-imi 14. maj 1980-imeersumi Kalaallit Nunaata aalisarfittaanut tunngasumi aalajangersakkat najoqqutaralugit tunngaviusumik killigititamiit 3 sømilinik ilorpasinnerusup sinerissallu akornani angallatit BT 80-illit 80 BRT-llillu taakkunanngalu annerusut uiluinniarsinnaatitaanngillat.
Imm. 2. Immikkut peqqutissaqartillugu Naalakkersuisunut Ilaasortaq tunngaviusumik killigititamiit 3 sømilinik ilorpasinnerusumi kalaallit angallataannut pioreersunut BT 80-ilinnut 80 BRT-linnullu taakkunanngalu annerusunut aalisarsinnaanermut akuersissuteqarsinnaavoq, taamaaliorneq pisuussutit uumassusillit angallatillu pisaqarsinnaassusiisa atorluarneqarnissaat eqqarsaatigalugit iluaqutaappat.§ 6. Umiarsuarmi tunisassiornermi perlukut ikkannersuarnut uilueqarfinnut iginneqassanngillat.
§ 7. Immersugassaq Inuutissarsiornermi Pisortaqarfimmi pissarsiarineqarsinnaasoq atorlugu allattuisoqartassaaq. Piniariareernerit tamaasa immersugassaq uunga nassiunneqassaaq: Aalisarsinnaanermut Akuersissutinik Nakkutilliivik, Postbox 501, 3900 Nuuk.
§ 8. Nalunaarummi matumani aalajangersakkanik unioqqutitsineq akiliisitaanermik aamma/imaluunniit akuersissummik arsaagaanermik kinguneqarsinnaavoq. Suliassallu tassunga tunngassuteqartut Inatsisartut inatsisaanni inuutissarsiutigalugu aalisarnermut tunngasumi maleruagassat malillugit suliarineqartassapput.
§ 9. Nalunaarut manna atortuulerpoq 3. januar 1985.
Nuuk, ulloq 3. januar 1985.
Lars Emil Johansen/
Emil Abelsen
Ilanngussaq 1 (pdf-format)
Ilanngussaq 2 (pdf-format)