Kalaallit Nunaanni neriniartarfinnik akunnittarfinnillu ingerlatsinerni Inatsisartut inatsissaat nr. 7, 16. november 1984-imeersoq.

 

Kapitali I

§ 1. Inatsimmi tassani pineqarput namminersorluni Kalaallit Nunaanni suliffiit:
1) Nerisassanik najugassanillu sassaalliisarfiit
2) Unnuisitsisarfiit neriniarfiusinnaasuttaaq
3) Ininik katerisimaarfiusinnaasunik sassaalliinermilli nammineq isumaginniffiusinnaasunik attartortitsisarneq.
Imm. 2. Ingerlatseqatigiiffinnut (andelsforeninger) peqatigiiffinnullu allanut inatsit aamma atorpoq taamatut inuussutissarsiuteqarneq avammut sammisinneqarpat imaluunniit ilaasortat akiliisillugit imigassanik kimittuunik sassaalliiffigineqartarpata.
Imm. 3. Pisortat suliffeqarfiinut inatsimmi kapitali 2 aamma 3 atunngillat.

 

Kapitali II
Aalajangersakkat nalinginnaasut

§ 2. Kinaluunniit § 1-imi taaneqartutut inuussutissarsiummik ingerlataqartoq Inuutissarsiummik ingerlatsisinnaatitaanermut uppernarsaammik pigisaqassaaq, taamaattoq takuuk kap. IV, nerisitsisarfiit, ineqarfiullutillu aalajangersumik nerisitsisarfiit assigisaallu.
Imm. 2. Interessentskabit kommanditselskabillu ingerlatitaaneranni akisussaaqataallutik ingerlatseqataasut inuussutissarsiummik ingerlatsisinnaatitaanermut uppernarsaammik tamarmik namminneq peqassapput.
Imm. 3. Allagartat kommunalbestyrelsemit inuutissarsiummik ingerlataqarniartup najugaani kommunalbestyrelseusumit suliarineqartassapput. Suliffik sumi ingerlanniarneqarnersoq allagartami akuersissummi nalunaarsimassaaq, takuuk § 6, imm. 1.
Imm. 4. Sullivik ammarneqassanngilaq akuersissut pissarsiarineqartinnagu aammalumi sumi ingerlanneqarnissaanut allagartaq pissarsiarineqartinnagu, taamattaarlu init ingerlatsiviusussat siunertamut atorneqarnissaannut akuersissut pissarsiarineqartinnagu. Init sumilu  ingerlatsinissaq akuerineqarpata aktieselskabit anpartsselskabillu aallarnisarniarneqartut aallartereersinnaapput ingerlatseqatigiinniat aallarnisarniarnertik aktieselskabit nalunaarsorneqartarfiannut nalunaarutigereersimappassuk kiisalu direktørit siulersuisunilu  ilaasortat § 3-mi piumasarineqartunik eqqortitsisimasut kommunalbestyrelsep nalunaarutigereerpagu.

§ 3. Inuit inuutissarsiummik ingerlatsinissamut akuerineqarsinnaapput
1 ) danskisut innuttaassuseqarunik
2) ukiuni kingullerni marlunni Kalaallit Nunaanni aalajangersumik najugaqarsimagunik
3) nammineersinnaatitaagunik
Imm. 2. Inuit danskisut innuttaassuseqanngitsut, imm.  1-imili piumasarineqartunik allanik naammassinnissimasut inuutissarsiummik ingerlatitsisinnaatitaanermut allagartartaarsinnaapput namminersorluni inuussutissarsiorsinnaatitaanermut inatsisini § 3, imm. 2-mi aalajangersakkat naammassisinnaagunikkik.
Imm. 3. Niuernermut inuutissarsiutinillu ilinniartitaanermut Naalakkersuisoq inuussutissarsiornermik ingerlatsisinnaatitaanermut allagartamik tunisisinnaatitaavoq inunnut imm. 1-imi piumasarineqartunik naammassinnissimanngikkaluartunut. Inuk Kalaallit Nunaanni najugaqavinngitsoq nammineersinnaatitaanngitsorluunniit, nammineersinnaatitsinermut inatsit malillugu inuutissarsiummik nammineerluni ingerlatsinissamut akuerineqarsimanngippat, sullivik immikkut pisortalerneqassaaq (bestyrer). Taassumap imm. 1-imi aalajangersakkat, takuuk imm. 2_f aamma 4, eqqortissimassavai, Naalakkersuisut immikkut illuinnartumik akuersissuteqarsimassanngippata.
Imm. 4. Pinerluttaalisitsinermik inatsimmi § 110 oqaaseqatigiit aappaat tamakkunani atortussaapput.

§ 4. Aktieselskabit anpartsselskabillu maani naalagaaffimmi nalunaarsorneqarsimasut ingerlatseqatigiillu killilimmik akisussaassuseqarfiusut allat naalagaaffimmi matumani najugaqartut (selskabit allanngorartunik ilaasortaqartut allanngorartunilluunnit aningaasaateqartut), peqatigiiffiit, inunnik sulissussiniarfiusutut pilersitaasimasut (stiftelser), ingerlatallu allat imminnut ingerlattut inuutissarsiummik ingerlatsisinnaanissamut allagartamik pisinnaatitaapput direktøriisa siulersuisunilu ilaasortaasa § 3-mi piumasarineqartut eqqortissimappatigik.
Imm. 2. Nunani allani ingerlatseqatigiiffiit imm. 1-mi taaneqartutut ittut immikkoortortaat inuutissarsiummik ingerlatsisinnaatitaarnermut allagartartaartinneqarsinnaatitaapput tamanna nunat tamalaat akornanni isumaqatigiissutigineqarsimalluniluunniit Naalakkersuisut aalajangigaannik tunngavissaqarpat. Tamatuma saniatigut Naalakkersuisut immikkoortortanut taamaattunut aamma  ingerlatsiviit Kalaallit Nunaanni najugaqartut immikkoortortaannut imm. 1-imi taaneqartutut ittunut allagartamik akuersissummik tunniussaqarsinnaapput § 3-mi piumasarineqartunik naammassinnissimanngitsunik direktørilinnut siulersuisulinnullu. Immikkoortortami pisortat § 3, imm. 1-imi, tak. imm. 2 aamma 4, piumasarineqartunik naamassinnissimassapput, Naalakkersuisut pissutsini immikkorluinnaq ittuni allatut aalajangiinngippata.

§ 5. Inuutissarsiummik ingerlatsisinnaanermut allagartaq tassani pineqartoq tassaavoq "neriniartarfiutilik akunnittarfiutilillu"
Imm. 2. Neriniartarfiutilittut akunnittarfiutilittut allagartaq assilineqarneralu Naalakkersuisut aalajangigaat tunngavigalugit akilerneqartassaaq. Akiliut   Landskassemut nakkartassaaq.
Imm. 3. Inuutissarsiummik ingerlatsisinnaatitaanermut allagartaq assilineqarneraluunniit pisortanit tamakkuninnga suliaqartussaatitaasunit suliarineqarsimasoq isertartunut takujuminartumi nivingatinneqassaq. Automatit piginnittup aqqanik ingerlataatalu najugaanik allagartaqassapput.

§ 6. Inatsit una tunngavigalugu inuutissarsiummik ingerlatsisinnaanissamut allagartartaarsimasoq Kalaallit Nunaanni ininit aalajangersimasuni.it neriniartitsinermik akunnittarfeqarnermillu ingerlatsisinnaavoq.
Imm. 2. Ingerlataniit taamaattuniit illumiit nerisassiat, iffiukkat kagellu kiisalu imigassat kisimik tuniniarneqarsinnaapput.

§ 7. Inuutissarsiummik ingerlatsisinnaatitaaneq atorunnaassaaq allagartamik piginnittoq toquppat, taaamaattoq § 8 takuuk. Aamma taama pisoqassaaq allagartamik pigisallip allagartartaarnermini piumasarineqartut eqqortissinnaajunnaarpagit.
Imm. 2. imm. 1-imi oqaaseqatigiit aappaanni aalajangersakkat saneqqullugit Naalakkersuisut iliuuseqarsinnaatitaapput.
Imm. 3. Inuutissarsiummik ingerlatsisinnaatitaaneq atorunnaarpat imaluunniit pinerluttaalisitsinermik inatsisini § 110-mi oqaaseqatigiit pingajui tunngavigalugit   arsaarinnissutaappat, allagartaq assilineqarnerilu pisortaqarfinunut allagartanik suliarinniffiusimasumut utertinneqassapput.

§ 8. Kommunemut nalunaaruteqareernikkut toqusup qimataasa, aapparisap illumi kingornussarsiarineqanngitsumi qimataasup, akiliisinnaajunnaarnerluunniit pissutigalugu qimataasumi najugaqartup imaluunniit allap nammineersinnaajunnaarsitaasimasoq sinnerlugu akisussaatinneqartup, toqusup, akiliisinnaajunnaartup nammineersinnaajunnaarsitaasulluunniit suliffiutaa ingerlateqqiinnarallarsinnaavaat suliffiup tunineqarnissaa allatulluunniit ingerlaannarnissaa siunertaralugu. Ukiorli siulleq ataasiinnaq taamaaliortoqarsinnaavoq. Immikkut pissutissaqartillugu piffissaq kommunalbestyrelsemit sivitsorneqarsinnaavoq.

§ 9. Suliffiup ingerlanera allagartamik piginnittumit pisortaatitaasumilluunniit siulersorneqassaaq. Ingerlataq illunit arlalinniit ingerlanneqarpat_r taakku ilaat ataasiinnaaq allagartamik piginnittumit ingerlanneqarsinnaavoq. Allat tamarmik immikkut pisortaatitaasumit ingerlanneqassapput.
Imm. 2. Allagartamik piginnittoq selskabit § 4-mi taagorneqartut ilagippassuk suliffiit tamarmik immikkut pisortalerneqassapput (bestyrer). Aamma § 8-mi toqusoqarneratigut qimatat taama pineqassapput.
Imm. 3. Pisortanngortitat ingerlatsiviusumi kommunalbestyrelsemut nalunaarutigineqassapput. Pisortaatitaasut § 3-mi piumasarineqartut eqqortissimassavaat. Kommunalbestyrelse akuersisinnaavoq piginnittup pisortaatitaasulluunniit arlalinnik pisortaaffeqarnissaanut.
Imm. 4. Pisortaatitaasoq allagartamik piginnittup pinerluttaalisitsinermik inatsit malillugu akisussaatitaaneratut akisussaassusilerneqassaq.

§ 10. Inuutissarsiummik ingerlatsisinnaatitaanermut allagartat akuersissutilluunniit Naalakkersuisut inatsisit malillugit akuersisinnaatitaaneratigut tunniunneqarsimasut Naalakkersuisut aalajangiineratigut killiliiffigineqarssinnaapput immikkulluunniit piumasaqaatitaqarsinnaallutik.
Imm. 2. Inatsit taanna tunngavigalugu kommunalbesyrelsep aalajangigai Naalakkersuisunut suliassanngortinneqarsinnaapput.

 

Kapitali III
Nerisitsisarfiit (marketenderier)aalajangersumillu najugaqarfigiitigalugit neriffiusartut (pensionater) allallu.

§ 11. Aalajangersumik nerisaqarfiit (kantiner) allagartaqanngikkaluarluni ingerlanneq ajornanngillat. Pineqartut tassaapput sulliviup ilaani init ilaat naleqqussarlugit neriniarfiliat sulisunut naatsorsuussat sulisunilluunniit takuniaasunit (pulaartunit) neriffigineqarsinnaasut, kiisalu bilinik ingerlatsisunit, aatsisartunit assigisaannilluunniit sullivimmut atassuteqartunit. Naalakkersuisut taamaattut ilaat immikkut aalajangersagaliuussinnaavaat neriniarsinnaasut killilerneqarnissaat siunertaralugu.
Imm. 2. Pinerluttaalisitsinermut tunngatillugu sullivik imm. 1-imi pineqartoq pillugu sullivik neriniarfimmik ingerlatsisuusoq akisussaatinneqartussaavoq. Sulliviup   neriniartarfianit sullivimmi sulisut akissarsiaanniit ilanngaavigineqarsinnaanngillat. Sulliviup neriniartarfiani niueqatigiinneq inerteqqutaavoq. Taamaattorli Naalakkersuisut aalajangersagaliorsinnaapput neriniartarfinni taamaattuni nerisassanik najugassanillu namminneq atugassaannik assigisaannillu nioqquteqarsinnaatitaanermut tunngavissanik.
Imm. 3. Naalakkersuisut immikkut pissutissaqartillugu akuersissuteqarsinnaapput sullivimmi neriniartarfiup matoreerneratigut § 12-imi pineqartutut ittunik sassaalliisoqarnissaanut.

§ 12. Inuit Kalaallit Nunaanni najugaqartut allagartaqarnissaat piumasarineqanngilaq
1) inunnik minnerpaamik arfinileriarluni unnuisitsinissamut taakku ilaatigut nerisaqartiitigalugit,
2) isumaqatigiissuteqareerneq tunngavigalugu nerisaqartitsinissamut.
Imm. 2. Ukiumik ataatsimik sivisussusilertarlugu kommunalbestyrelse akuersissuteqartarsinnaavoq, sulliviup imm. 1 naapertorlugu unnuisitsisarsinnaanissaanut minnerpaamik unnuani marlunni tulleriiginnarni, pissutissaqarpat akuersissut atorunnaarsinneqarsinnaavoq.

§ 13. Nalliuttorsiornermi, ataatsimeersuartitsinerni, silaannarmi nuisitsinerni, qinersisoqarnerani takutitsigallarnernilu allanilu taamaattuni politit akuersisinnaapput inuk immikkut tamatumunnga toqqagaq, soorlu sutorniartarfiutilik, inatsisini piumasarineqartut malillugit allatut ililluni akuerineqarani tuniniaanissamut.
Imm. 2. Højskolet assigisaasalu katerisimaartitsinerini peqataasut sassaalliiffigineqarsinnaaput kommunalbestyrelse immikkut akuersisimanngikkaluarpalluunniit.

 

Kapitali IV.
Pineqaatissiinissamut aalajangersakkat

§ 14. § 2, imm. 1-imi_, aamma imm. 2a aamma 4, oqaaseqatigiit siulliit, § 5, imm. 3, § 6, imm. 2, § 7, imm. 3, § 9, imm. 1, aamma imm. 2, aamma imm. 3, oqaaseqatigiit siulliit, § 11, imm. 2, oqaaseqatigiit aappaat pingajuilu unioqqutinneqarpata akiliisitsineqarsinnaavoq.
Imm. 2. Kinaluunniit inatsit unioqqutillugu atuisoq, pisisoq allatulluunniit iliorluni nerisassanik imigassanilluunniit pissarsisoq akiliisinneqassaaq.
Imm. 3. Maleruagassani inassuteqaatiniluunniit inatsit malillugu suliarineqartuni maleruagassani inassuteqaatinilu maleruagassat naapertorlugit suliarineqartunik   aalajangersakkanik unioqqutitsinerit akiliisitsinermik pineqaatissiissutigineqarnissaat aalajangersarneqarsinnaavoq.
Imm. 4. Aktieselskabi, anpartsselskabi, andelsselskabi assigisaalluunniit unioqqutitsippat akiliisussaatitaaneq ingerlatsivimmut akisussaaffigitinneqarsinnaavoq.

§ 15. Politit ininut ingerlatsivinnut inatsimmi uani   pineqartunut atasunut isitsaaliorneqarsinnaanngillat. Tamannali atortuunngilaq ininut unnuiffissatut attartortinneqarsimasunut.

 

Kapitali V
Atortuulersitsinissamik aalajangersakkat,

§ 16. Inatsisartut inatsisaat 1. januar 1985 atortuulerpoq.
Imm. 2. Neriniartarfinnik akunnittarfinnillu il.il. ingerlatsineq pillugu inatsit, Kalaallit Nunaanni atuutsinneqartoq, tak. inatsimmik nalunaarut nr. 262 10. maj   1973-imeersoq, atuukkunnaarpoq.
Imm. 3. Inuussutissarsiummik ingerlatsisinnaatitaanermut uppernarsaatit inatsisip matuma atortuulernera sioqqullugu tunniunneqarsimasut atortuuginnassapput.

Kalaallit Nunaanni Namminersornerullutik Oqartussat, ulloq 16. november 1984.

Jonathan Motzfeldt

/

Josef Motzfeldt