Kalaallit Nunaanni inuutissarsiutitigut iliniartitaaneq, ilinniagaqartunut tapiissutit inuutissarsiutinullu tunngasunik ilitsersuisarneq pillugit Inatsisartut peqqussutaat nr. 2, 16. november 1984-imeersoq.

Suliassaqartitsiniarneq inunnillu isumaginninneq pillugit Kalaallit Nunaannut inatsimmi nr. 580-imi 29. november 1978-imeersumi § 1, imm. 1, meeqqat atuarfiini ilinniartitsisussat ilinniartitaasarnerat pillugu ikiuisarnermillu suliaqartussanik ilinniartitsisarnerit pillugit Kalaallit Nunaannut inatsit nr. 581, kiisalu   inuutissarsiutinik ilinniartitsisarnermik Kalaallit Nunaannut inatsit nr. 582 29. november 1978-imeersoq tunngavigalugit matumuuna makku aalajangersarneqarput.

 

Kapitali 1
Inuutissarsiutitigut ilinniartitaaneq.

§ 1. Inuutissarsiutitigut ilinniartitsinerit naammassillugit ingerlanniarneqassapput inuutissarsiornermi suliffissaqartitsiniarnermilu naalakkersuinikkut anguniagassatut Inatsisartunit aalajangersarneqartut anguniarlugit.
Imm. 2. Ilinniagassanut ataasiakkaanut maleruagassat erseqqinnerusut nalunaarutini Naalakkersuisunut ilaasortamit aalajangersarneqassapput. Maleruagassat ilinniakkap suuneranik, siunertaanik, ilinniarfissamut isernissamut piumasaasunik, ilinniakkap katitigaaneranik sivisussusianillu, siulersorneqarneranik, annertussusiligaaneranik, piffissamik ilinniarfiusussamik, sulinikkut ilinniarnermik, naliliisarnermik misilitsinnernillu kiisalu ilinniakkap qanoq naammassinissaanik aalajangersakkanik imaqassapput.
Imm. 3. Ilinniartitsinissamik pilersaarusiat kaajallaasitani aalajangersarneqassapput.

§ 2. Inuutissarsiutitigut ilinniartitaanerit kikkunnulluunniit tamanut ammapput:
a) Kalaallit Nunaanni najugaqartunut imaluunniit 
b) 6-inik ukioqalinnginnermi Kalaallit Nunaanni najugaqarsimasunut, 6-inillu ukioqalereernerminni Kalaallit Nunaata avataani najugaqartunut imaluunniit najugaqarsimasunut, Kalaallit Nunaata avataani najugaqarneq 6-inik ukioqalernermit naatsorsorlugu ukiut ataatsimut katillugit 10-t sinnersimanngippatigit. Kalaallit Nunaata avataani najugaqarnertut naatsorsuunneqanngillat qimagusimanerit allamik pissuteqarnatik taamaallaat ilinniarnermik imaluunniit isumaginninnermut tunngasumik pissuteqartut.
Imm. 2. Pissutsinik immikkut ittunik pissutissaqartillugu Naalakkersuisunut ilaasortaq imm. 1-imi aalajangersakkanik saneqqutsisinnaavoq.

§ 3. Ilinniartitaaneq peqataasunut akeqanngilaq.
Imm. 2. Naalakkersuisunut ilaasortap aalajangersinnaavaa inuutissarsiutitigut ilinniartitaanermi peqataasut atuarnermut atortut pigiligassatik tamakkiisumik ilaannakortumilluunniit akiligassagaat.

§ 4. Naalakkersuisunut ilaasortaq inuutissarsiutitigut ilinniartitaanermut siunnersuisoqatigiinnik (erhvervsuddannelsesråd) pilersitsissaaq siulittaasumik saniatigut 10-nik ilaasortaqartussanik. Siulittaasoq Naalakkersuisunut ilaasortamit toqqarneqassaaq. Ilaasortat allat 3 Inatsisartunit, 2 sulinermik inuutissarsiuteqartut kattuffiannit SlK-mit, ilaasortaq 1 Kalaallit Nunaanni aalisartut piniartullu kattuffiannit KNAPK-mit, 1 Kalaallit Nunaanni sulisitsisut peqatigiiffiannit DGA-mit, 1 Kalaallit Nunaanni kommuneqarfiit kattuffiannit KANUKOKA-mit kiisalu 2 kalaallit ilinniagaqartut kattuffiinit toqqarneqassapput. Ilaasortat taaneqartut kingulliit 10-t sinniisussaannik toqqaasoqassaaq.
Imm. 2. Naalakkersuisoqarfimmi inuutissarsiutitigut ilinniartitaanerup attavigisaani pisortaq (direktør) aamma inuutissarsiutinut tunngasuni naalakkersuisoqarfimmi pisortaq (direktør) siunnersuisuni aalajangersimasumik ataatsimeeqataasassapput.
Imm. 3. Siunnersuisut immikkut paasisimasalinnik aggersaasinnaapput.
Imm. 4. Siunnersuisut suleriaasissartik namminneq aalajangissavaat.
Imm. 5. Ilinniartuunersiutinut tunngasumik apeqqutit suliarineqarnissaannut inuutissarsiutitigut ilinniartitaanermi siunnersuisut akunnerminni ataatsimiititaliorsinnaapput. Ilinniagaqartut sinniisaat ataatsimiititaliami peqataatinneqassapput.
Imm. 6. Siunnersuisut inuutissarsiutitigut ilinniartitaanerit ingerlanerat malittarissavaat aammalu inuutissarsiutitigut ilinniartitaanerit pilersaarusiornerini piviusunngortinneqarnerinilu aammalu ilinniartuunersiutit pillugit maleruagassanik aalajangersagaliornermi Naalakkersuisunut ilaasortamut siunnersuisuussallutik. Siunnersuisut apeqqutit inuutissarsiutitigut ilinniartitaanermut tunngassutilik sunaluunniit oqaluuserisinnaavaat. Ilinniartitsinissanut nataanut siunnersuutit, ilinniagassat pioreersut allangortinneri kiisalu inuutissarsiutitigut ilinniartitaanermut Inatsisartut inatsisissaannut missiliuutit siunnersuisunut oqaaseqarfigisassanngorlugit saqqummiunneqassapput.

§ 5. Inuutissarsiutitigut ilinniartitsinerit aallartinniarneqartut tamakkiisumik ilaannakortumilluunniit pisortanit aningaasalersorneqartussat, siunnersuisoqatigiinnut nalunaarutigineqassapput. Nalunaarut ilinniartitsinerup siunertaanik imarisaanillu nassuiaatinik imaqassaaq.

§ 6. Naalakkersuisut ilinniartitsinermut pisortaqarfimmik pilersitsissapput inspektør-imit pisortaaffigineqartumik. Pisortaqarfiup inuutissarsiutitigut ilinniartitsineq siulersussavaa ilinniartitsinissanillu pilersaarusiorneq isumagisarissallugu.
Imm. 2. Ilinniartitsinermi inspektør-i aammattaaq inuutissarsiutitigut ilinniartitaanermi siunnersuisunut allattuuvoq.

§ 7. Inuutissarsiummik pingaarnermik nutaamik ilinniartitsinissaq pilersaarusiorneqassasoq aalajangerneqarpat, tassunga tunngasumik ataatsimiititaliaq (fagudvalg) Naalakkersuisunut ilaasortamit pilersinneqassaaq. Suliassamut aalajangersimasumut ataatsimiititaliap (fagudvalg) ilinniartitsinissaq pissamaarutaasoq pilersaarusiorlugu siunnersuusiussavaa atuakkatigut sulinikkullu qanoq imaqarnissaa eqqarsaatigalugu. Ilinniartitsinissap inerlugu pilersaarusiornera inuutissarsiutitigut ilinniartitaanermi siunnersuisunut (erhvervsuddannelsesråd) saqqummiunneqassaaq, taakkulu Naalakkersuisunut ilaasortamut inassuteqassapput.

§ 8. Ilinniartitsinissap aallartinnissaa aalajangerneqarpat inuutissarsiummut pingaarnermut pineqartumut ilinniakkamut aalajangersimasumut tunngasumik ataatsimiititaliaq (brancheudvalg) Naalakkersuisunut ilaasortamit pilersinneqassaaq.
Imm. 2. Sulisartoqarnermi illuatungeriit ataatsimiititaliami ilaasortaqassapput.
Imm. 3. Ilinniakkamut aalajangersimasumut tunngasumik ataatsimiititaliap suliassai Naalakkersuisunit aalajangersarneqassapput.

 

Kapitali II
Ilinniagaqartunut tapiissutit.

§ 9. Kalaallit Nunaanni Inatsisartunit atugassiissutigineqartut naapertorlugit ilinniartunut ilinniartuunersiuteqartitsineqarsinnaavoq meeqqat atuarfiata avataani ilinniarnermik ingerlatsisunut tunniunneqartussanik, aammalu ikiorsiiffigineqarsinnaasutut Naalakkersuisunut ilaasortamit akuerineqartunut.
Imm. 2. Ilinniartuunersiutit tunniunneqassapput ilinniarnernut Kalaallit Nunaanni ingerlanneqartussanut, kiisalu Kalaallit Nunaata avataani ilinniarnernut, ilinniarnerit taakku inuiaqatigiinnit kalaallinit pisariaqartinneqartunut naapertuuttuusimappata aammalu ilinniarneq Kalaallit Nunaanni pineqarsinnaasimanngippat.

§ 10. Ilinniartuunersiutit tunniuneqarsinnaapput inunnut danskisut innuttaassuseqartunut, aammalu:
a) Inunnut Kalaallit Nunaanni najugaqartunut, aammalu ilinniakkap, ilinniagaqartunut ikiorsiissutinik qinnutiginnissutaasup, aallartinginnerani ukiuni kingullerni marlunni Kalaallit Nunaanni najugaqarsimasunut, imaluunniit
b) 6-inik ukioqalinnginnerminni Kalaallit Nunaanni najugaqarsimasunut, 6-inillu ukioqalereernerminni Kalaallit Nunaata avataani najugaqartunut imaluunniit najugaqarsimasunut, Kalaallit Nunaata avataani najugaqarneq 6-inik ukioqalernermit naatsorsorlugu ukiut ataatsimut katillugit 10-t sinnersimanngippatigit. Kalaallit Nunaata avataani najugaqarnertut naatsorsuunneqanngillat qimagusimanerit allamik pissuteqaratik taamaallaat ilinniarnermik imaluunniit isumaginninnermut tunngasumik pissuteqartut.
Imm. 2. Nunani allamiut ilinniagaqartunut ikiorsiissutinik pisarsinnaapput nunat tamalaat akornanni isumaqatigiissutit malillugit.
Imm. 3. Pissutsinik immikkorluinnaq ittunik pissutissaqartillugu Naalakkersuisunut ilaasortaq imm. 1-imi 2-milu aalajangersakkanik saneqqutisisinnaavoq.

§ 11. Ilinniartuunersiutit peqqussut una malillugu tunniunneqarsinnaanngillat inatsit isumaqatigiissulluunniit immikkut ittoq malillugu inuit qitornamik Kalaallit Nunaata avataani ilinniarnerinut tapiissutisisinnaasut qitornaannut.
Imm. 2. Ilinniagaqartut inuuniarnerminni aningaasartuutaasa akilerneqarnissaat siunertaralugu pisortanit ikiorsiissutinik pisartagaqartut iliniartuunersiuteqanngitsoortitaasinnaapput.

§ 12. Ilinniartuunersiutit angissusaat aammalu tunniunneqarnissaannut patsisissaatitat Inatsisartunit aalajangersarneqassapput ilinniagaqartut kattuffii isumaqatiginiareerlugit aammalu inuutissarsiutitigut ilinniartitaanermi siunnersuisoqatigiit oqaaseqartereerlugit.

§ 13. Naalakkersuisunut ilaasortaq aalajangiisinnaavoq ilinniartuunersiutit saniatigut ilinniagaqartut ilinniarnermik nalaani pisariaqartitaminnut aningaasatigut tapiiffigineqarsinnaasut, taamalu inuutissarsiutitigut ilinniartitaanermi siunnersuisoqatigiit oqaaseqartereerlugit ikiorsissutit tunniunnerini patsisissaatinneqartussat aalajangersarlugit.
Imm. 2. Paragraf taanna malillugu tunniunneqarsinnaasut tapissutitut (Stipendium) imaluunniit taarsigassarsiatut tunniunneqarsinnaapput.
Imm. 3. Ilinniarnermut atasumik angalanerit, tassunga ilangullugit atuangiffeqarnermi angalanerit tapiissutitut (stipendium) tunniunneqartassapput tamatumani allaasumik pisoqartinnagu.

§ 14. Ilinniartitaanermi pisortaqarfiup ilinniagaqartunut ikiorsiissutit siulersorneqarnerat ingerlatissavaa.

§ 15. Ilinniartitaanermi pisortaqarfiup ilinniartuunersiutit, § 13 malillugu immikkut tapiissutinut, utertillugit akilersuinissamut pineqaatissiinermullu tak. § 16, aalajangiineri ilinniartuunersiutinut Orulluteqarfimmut allakkatigut suliassanngortinneqarsinnaapput aalajangiinerup orulluteqartumit tiguneqarneranit sapaatip akunneri sisamat nallertinnagit. Orulluteqartarfiup  aalajangiinera inerneruvoq.
Imm. 2. Orulluteqartarfimmi ilaasortaapput siulittaasoq, aamma ilaasortat allat marluk. Ilaasortassat Inatsisartunit toqqarneqassapput inuit nakerisarsiunngitsut akornannit.
Imm. 3. Orulluteqartarfiup suleriaasissaa Naalakkersuisunut ilaasortamit aalajangersarneqassaaq.

§ 16. Ilinniagaqartut pissutsit imminerminnut tunngasut ikiorsiissutinik tunisinissamut pingaaruteqartut tamaasa nalunaarutigissavaat, aamma kingusinnerusukkut tamakkununnga tunngasunik allannquutit.
Imm. 2. Ilinniagaqartoq pissutsit imm. 1-imi taaneqartut pillugit eqqunngitsumik imaluunniit amigartumik nalunaaruteqarsimappat imaluunniit allannguutit pillugit nalunaaruteqanngitsoorsimappat, aningaasat eqqunngitsumik pissarsiarineqartut utertillugit akileqquneqarsinnaapput erniaat ilanngullugit. Ilinniartitaanermi pisortaqarfik aamma aalajngiisinnaavoq pineqartup piffissami aalajangersimasumi qaqugumulluunniit ikiorsiissutinik tunineqarsinnaajunnaarsinneqarnissaannik. Tamanna aamma atortuussaaq ilinniagaqartoq siornatigut ikiorsiissutinik tunineqarnermini patsisissarititaasunik unioqqutitsisimappat.

 

Kapitali III
Inuutissarsiutinut tunngasumik ilitsersuineq.

§ 17. Kalaallit Nunaanni ilinniagaqarnermut inuutissarsiutinullu tunngasumik ilitsersuineq pillugit Naalakkersuisunut ilaasortaq maleruagassanik erseqqinnerusunik aalajangersaassaaq.
Imm. 2. Ilinniartitaanermi pisortaqarfiup ilinniartitaanermut inuutissarsiutinullu tunngasumik ilitsersuineq pillugit qitiusumik ataatsimiititaliornikkut qularnaarlugu isumagissavaa Namminersornerullutik Oqartussat tungaannit ilitsersuinermik ingerlanneqartut ataqatigiissinneqarnissaat, taamaalilluni kommuneni suliffissarsiuussisarfiit paasissutissanik, sulisunik aammalu ilinniarnissamut periarfissanik pisariaqartunik periarfissinneqartussanngorlugit.

 

Kapitali IV
Atulersitsineq il.il.

§ 18. Peqqussut atulerpoq 1. januar 1985.
Imm. 2. Peqqussutip atulernera ilutigalugu Kalaallit Nunaanni inuutissarsiutitigut tunngaviusumik ilinniartitaanermut Inatsisartut peqqussutaat nr. 5, 24. oktober 1980-imeersoq atorunnaarpoq.
Imm. 3. Isumaginninnerup tungaatigut perorsaanikkut ilinniartitaaneq pillugu Inatsisartut peqqussutaat nr. 14, 22. oktober 1979-imeersoq kingusinnerusukkut allanngortitaasoq atortuuinnassaaq § 1 imm. 2 naapertorlugu nalunaarummik taarteqartinneqarnissaata tungaanut.
Imm. 4. Peqqussutip matuma taarserpaa Kalaallit Nunaanni inuutissarsiutitaarniarluni ilinniartitaanermut, ilinniarnermut tapiisarnermut inuutissarsiutinillu ilitsersuinermut Inatsisartut peqqussutaat nr. 4, 24. oktober 1980-imeersoq.
Imm. 5. Ingerlatsinermut tunngasumik aalajangersakkat, peqqussutit imm. 1-4-mi taaneqartut tunngavigalugit suliarineqarsimasut atortuuinnassapput peqqussut  una naapertorlugu aalajangersakkanik taarserneqarnissamik tungaannut.
Imm. 6. Ilinniagaqartunut ikiorsiissutit Inatsisartut peqqussutaat nr. 4 naapertorlugu akuersissutigineqarsimasut tunineqartut inernissaat tikillugu atuutissapput.

Kalaallit Nunaanni Namminersornerullutik Oqartussat, ulloq 16. november 1984.

Jonathan Motzfeldt

/

Josef Motzfeldt