Kalaallit Nunaanni vicebiskoppissamik qinersisarneq pillugu Namminersornerullutik Oqartussat nalunaarutaat nr. 1, 27. januar 1984-imeersoq.
Kalaallit Nunaanni ilageeqarneq pillugu Inatsisartut peqqussutaata nr. 2 martsip 30-anni 1982-imeersup § 3, imm. 3-a naapertorlugu Ilagiit kalaallit siulersuisuisa makku aalajangersarpaat:
§ 1. Kalaallit Nunaata vicebiskoppia qinerneqassaaq palasit, Kalaallit Nunaanni palasitut atorfeqartut imaluunniit palasitut atorfeqarsimasut akornanni.
Imm. 2. Atorfiup inuttaarunnerata kingornagut sapinngisamik piaarnerpaamik sap.akunnerisa 4-t iluanni Naalakkersuisunit aalajangerneqartunti qinersineqartassaaq.
Imm. 3. Qinersineq ilagiit kalaallit siulersuisuinit siulersorneqassaaq.§ 2. Qinersinermi tassani qinersisinnaasut tassaapput ilagiit sinnersaannut ilaasortaasut ilagiinnilu kalaaliusuni palasiusut, taakkununnga ilaallutik palasit suligallartut palasillu qinersinerup nalaani sulinngikkallartut.
§ 3. Qinersinissaq qaammammik sioqqullugu Ilagiit Siulersuisuisa qinersisinnaasut allassimaffiat Kalaallit Nunaannut tamarmut atortoq suliarissavaat, tassani inuit qinersisinnaasut palasillu § 2 naapertorlugu qinersisariaqartutut isigisariaqartut allattorsimassallutik.
Imm. 2. Piffissami qinersiviusussami naalakkersuisunit aalajangerneqartumi ilagiit sinnersaanni ilaasortat allattorsimaffiat ilaasortat aqqinik, inuuiinik najugaannillu allattuiffigisimasoq qinersinermi atugassaq ilagiit sinnersaanni siulittaasuusunit nassiunneqassaaq
Imm. 3. Qinersisinnaasut arlaat suli taasineqariartinnagu taasinissamut peqataassalluni piumasarisanik unioqqutitsisimaguni qinersisinnaasut allassimaffiannit ilagiit siulersuisuinit peerneqassaaq.
Imm. 4. Nalornisoorneqartillugu ilagiit siulersuisuisa inissutaasumik aalajangertassavaat inuit ilaat qinersisinnaasut allassimaffiannut ilanngunneqassanersoq imaluunniit tassannga peerneqassanersoq.§ 4. Inuit vicebiskoppissamik qinersinissami qinigassanngortinniarlutik kissaateqartut qinersinissap nalunaarutigineqareerneratigut qinigassanngortinnermik nalunaarummik ilagiit siulersuisuinut nassiussissapput.
Imm. 2. Qinigassanngortinnermik nalunaarut qinersisartunit qinersisinnaatitaasunit ikinnerpaamik 20-nit amerlanerpaamillu 30-nit qinigassanngortitsisunit atsiorneqarsimassaaq. Nalunaarutip imarissavai qinigassanngortitsisut ataasiakkaat aqqi, inuuii najugaallu pillugit paasissutissat. Qinersisartoq qinigassanngortittunut arlalinnut qinigassanngortitsisuusinnaanngilaq. Qinigassanngortinniartut nunap ilaani allami atsiornernik qinersisinnaasut akornanni katersuisinnaapput. Qinigassanngortinneqartup atsiorluni nalunaarsimassavaa qinigassanngortinneqarnini akuerigini. Atsiornerit pisinnaapput nalunaarummi namminermi imaluunniit taassuma nuutinnerini.
Imm. 3. Qinigassanngortinnermik nalunaarut kingusinnerpaamik ilagiit siulersuisuineeriissaaq nal. 16 ullormi allagarsiinikkut allatulluunniit tamanut nalunaaruteqarnikkut siulersuisut aalajangersimasaanni.§ 5. Ilagiit siulersuisuisa qinigassanngortitsisinnaaffik qaangiunniariarpat sapinngisamik piaarnerpaamik aalajangissavaat qinigassanngortinniakkanik nalunaarutit atorsinnaanersut. Qinigassanngortittunit akuerisat kikkuunerat tamatuma kingornatigut piaarnerpaamik ilagiit sinnersaasa siulittaasuinut tamanut nalunaarutigineqassapput.
§ 6. Taasisinnaaffik atuutilerniariarpat ilagiit sinnersaanni siulittaasoq qinersisinnaatitaasut tamarmik peqataaffigisinnaasaannut ataatsimiigiaqqusissaaq.
Imm. 2. Ataatsimiinnermi siulittaasup ilaminut qinersisinnaasunut tamanut tusarliutissavai qinigassanngortitassatut akuerisat aqqi kiisalu aamma qinersinissamut pisariaqartut tassani oqallisigineqassallutik.§ 7. Qinersineq ingerlanneqassaaq allakkatigut taasinikkut, taakku ilagiit siulersuisuinut Nuummiittunut nassiunneqassapput kingusinnerpaamillu apuutereersimassallutik taasisinnaaffiup uniffiani ullormi nal. 16, takuuk § 1, imm. 2.
§ 8. Allakkatigut qinersinissami atortussat ilagiit siulersuisuisa suliaritissavaat qinersinissallu siornagut piffissaalluartillugu pisariaqartutut amerlassuseqartut ilagiit sinniisaanni siulittaasunut nassiutissallugit.
Imm. 2. Siulittaasup allakkatigut qinersineq siulersussavaa, tamanna pissaaq ataatsimiinnermi § 6-imi oqaatigineqartumi imaluunniit piffissani allani isumaqatigiissutigineqareersuni taasinissap inaarnissaa sioqqulluarlugu.§ 9. Allakkatigut taasineq ilagiit sinnersaasa siulittaasuannit nakkutigineqartumik ingerlanneqassaaq, taassumali kina taaneqarnersoq takusinnaassanngilaa, taasivissap immikkut ittup ilagiit siulersuisuinit tiguneqarsimasup immersorneqarneratigut. Taanna taasinerup allareerneratigut allakkap puuanut erniinnaq ikineqassaaq allakkallu puua taanna sumilluunniit allaffigineqarani. Allakkat puui tamarmik taasinermik ataasiinnarmik ikisiffigineqartassapput. Taava taamaalereerpat allakkat puuannut allamut ilagiit siulersuisuisa nassiunneranut akia allatsereerlugu ilagiit siulersuisuinukartussatut qaatiguuliortereersimasaannut ikineqassaaq. Allakkat puuata silarliup taassuma tunuatigut qinersisup atini, inuuini najukkanilu allassavai ilagiillu sinnersaasa siulittaasuannut tunniullugu, taassumalu piaarnerpaamik allakkatigut taasinerit ilagiit siulersuisuinut ingerlateqqissavai.
§ 10. Taasivik atortussaatinneqassanngila:
1) qinigassaq ataaseq sinnerlugu allaffigineqarsimaguni,
2) qularnaalluinnartumik takuneqarsinnaanngippat qinigassanngortittuni sorleq qinersisup taaniarsimagaluarneraa,
3) taasiviup puuanut taasivimmik ataasiinnaanngitsumik ikisisoqarsimappat,
4) isumaqarnarpat taasivissaq unioqqutitsisumik sanaaq atorneqarsimasoq.§ 11. Ilagiit siulersuisuisa tigoreerpatigik misissorneqassapput nassiussisut qinersisussat allassimaffianni allassimanersut, tamatumalu kingornatigut allakkat puuat ilorleq ammarnagu taasivinnut nakkartitsivissiamut parnaarsimasumut ikineqassaaq taasinernut allanut ammareersimanngitsunuttaaq ilanngullugu. Allakkat puui silarliit paarineqassapput inernerat pissarsiarineqareerserlugu.
§ 12. Taasisinnaaffik naariarpat karsi taasivinnut ikioqqaaffik parnaarsimasoq ilagiit siulersuisuisa ammassavaat qinigassanngortitanillu taasinerit immikkoortiterlugit kisissallugit.
§ 13. Qinigassanngortitat arlaat taasisinnaatitaasut affaat sinnerlugit taaneqarsimappat naalakkersuisut taanna qinigaasutut nalunaarutigissavaat vicebiskoppinngortutut. Arlaanaataluunniilli taagorneqarneq taanna angusimanngippagu naalakkersuisut København-ip Biskoppiata oqaaseqarfigereerpagu aalajangissavaat taaguunneqartut arlaat sorleq vicebiskoppinngussanersoq.
§ 14. Qinersinermi aningaasartuutit ilagiit siulersuisuinit akilerneqassapput.
§ 15. Nalunaarut manna erniinnaq atulerpoq.
Namminersornerullutik Oqartussat, ulloq 27. januar 1984
Stephen Heilmann/
Ricard Petersen