Namminersornerunermi Oqartussat nalunaarutaat nr. 18, 30. december 1983-imeersoq allorniusat 68°00'N-ip aamma 69°15'N-ip akornanni aamma 56°00'W-p kangiani kinguppanniarsinnaaneq pillugu.

Kalaallit Nunaanni inuutissarsiutigalugu aalisarneq, piniarneq aallaaniarnerlu pillugit inatsit nr. 4 13. oktober 1980-imeersumi §§ 5 aamma 6 naapertorlugit aalajangersarneqarpoq:

 

§ 1. Allorniusat 68°00' N-ip aamma 69°15' N-ip akornanni kiisalu 56°00' W-p kangiani kinguppanniutinut uutiterivittaligassanngorlugit sanaajunngitsunut kinguppanniarfigisassatut naatsorsuutigineqarpoq.

§ 2. Allorniusat 68°00' N-ip aamma 69°15' N-ip akoranni kiisalu 56°00 W-p kangiani pisassat tamakkiisumik 1984-imi 4.000 tonsiupput tamatumani igiinnakkat ilanngullugit.
Imm. 2. Sumiiffimmi pineqartumi pisassarititaasut tamarmik pisarineqarpata aalisarneq unitsinneqassaaq. Tamanna pillugu aalisarnermut, niuernermut suliffissuaqarnermullu naalakkersuisoq radiokkut tusagassiutitigullu
nalunaaruteqassaaq.

§ 3. Nalunaarummi matumani aalajangersakkanik unioqqutitsinerit mianersoqqussummik, akiliisitaanermik akuersissummilluunniit arsaagaanermik kinguneqarsinnaapput. Suliassat taamaattut suliarineqassapput Inatsisartut inuutissarsiutigalugu aalisarneq, piniarneq aallaaniarnerlu pillugit inatsimmi nr. 4 13. oktober 1980-imeersumi aalajangersakkat naapertorlugit.

§ 4. Nalunaarut saqqummiunneqarnermini atortuulissaaq. Taanna ilutigalugu Namminersornerullutik Oqartussat kinguppanniarsinnaaneq pillugu nalunaarutaat nr. 15, 30. november 1982-imeersoq allorniusat 68°00'N-ip aamma 69°15' N-ip akornanni kiisalu 56°00 W-p kangiani, Namminersornerullutik Oqartussat nalunaarutaasigut nr. 10, 21. oktober 1983-iminngaaneersukkut allanngortinneqarsimasoq matumuuna atorunnaarsinneqarpoq.

Nuuk, ulloq 30.december 1983.

Lars Emil Johansen

/

Emil Abelsen