Inuit timimikkut eqqarsartaatsimikkullu annertuumik innarluuteqartut ikiorneqarnissaat pillugu Namminersornerullutik Oqartussat nalunnaarutaat nr. 17, 28. december 1983-imeersoq.

Inuit timimikkut eqqarsartaatsimikkullu annertuumik innarluutillit pillugit Inatsisartut Peqqussutaat nr. 3, 20. oktober 1983-imeersoq § 5, imm. 3 najoqqutaralugu aalajangerneqarput:

 

§ 1. Peqqussummi § 1 tunngavigalugu Isumaginninnermi Pisortaqarfiup aalajangertussaavaa inuk pineqartoq peqqussut malillugu innarluuteqartutut isigineqarsinnaanersoq.
Imm. 2. Peqqussut najoqqutaralugu inuk innarluutilittut isigineqassappat Isumaginninnermi Pisortaqarfiup aalajangertussaavaa ikiuutip suunissaa annertussusissaalu.

§ 2. Peqqussutip § 1 imm. 3-at malillugu inuk innarluutilittut isigineqassanersoq aalajangiinermi tunngavigineqassaaq immikkut ittumik isumaginninnermi pissusiusarsimasoq. Tamanna imatut paasineqassaaq peqqussut malillugu ikiorneqarnissamut periarfissinneqassasut innarluutit taamaallaat immikkut ittunik ikiuinermi ilanngunneqartuartarsimasut, tassaasullu eqqarsartaatsimikkut amigaatillit, tutsarluttut, noqartartut, timimikkut innarluutillit, tappiitsut isigiarsuttullu, oqalulluarsinnaanngitsut tusilartul1u.
Imm. 2. Taakkununnga immikkut ittumik ilanngunneqarsinnaapput tarnikkut annertuumik nanertuuteqartut

§ 3. Innarluut annertuutut annertunngitsutulluunniit isigineqassanersoq aalajangiiniartoqartillugu immikkut ittumik ikiuinermi tunngavigineqartartut aammattaaq najoqqutarineqartassapput. Taamatullu aamma ikiuinissamut iliuusissat pisariaqartut suussusii annertussusiilu najoqqutarineqartassapput, matuma ataani aningaasartuutit annertussusissaat ilanngullugu.
Imm. 2. Ikiuinerup qanoq sivisutigisumik pisariaqartinneqarnera naliliiniarnermi aalajangiisuussaanngilaq .

§ 4. Ikiuutip suussusianik annertussusianillu aalajangiinermi tunngavigineqartarpoq annertuumik innarluutip kingunerisaanik aningaasartuutit annertuumik alleriarnerat matuneqartassasoq innarluutillip isertitai pigisaasalu nalingi naatsorsuutiginagit.
Imm. 2. Annertuumik innarlutilinnut 18-nit inorlugit ukiulinnut ikiorsiinissami isiginiartariaqarpoq angajoqqaat pilersuisussaatitaanerat aalajangiusimaneqassasoq imaalillugu, angajoqqaat innarluuteqanngitsunik meerallit taamatut ukiulinnut aningaasartuutigisartagaasa annertoqataannik pilersuisussanngortillugit.
Imm. 3. Pisortanit ikiorsiissutit, meeqqanut inuusuttuaqqanullu ikiorsiissutit imaluunniit inuutissarsiorsinnaajunnaarnersiutit utoqqalinersiutilluunniit pillugit maleruaqqusat malillugit naammattunik ikiuineqarsinnaappat, taava maleruaqqusat taaku malillugit ikiuisoqartassaaq. Maleruaqqusat taaneqareersut allat malillugit ikiuinermut peqatigitillugu annerusumik ikiuisoqarsinnaavoq annertuumik innarluutillit pillugit peqqussut najoqqutaralugu.
Imm. 4. Nakorsaqarfiup tungaanit ikiorsiissutigineqartareersimasut ingerlaannassapput.
Imm. 5. Atuartitsinermut aningaasartuutit pisarneq malillugu atuartitaanermi oqartussaasunit maleruaqqusat atuuttuusut malillugit akilerneqartassapput.

§ 5. Innarluutillit najukkamik avataanut paaqqinnittarfinnut inissinneqarsimasut ukiumut ataasiarlutik nunaminnut akeqanngitsumik tikeraartinneqarsinnaapput. Innarluutilik pissutsit assigiinngitsut pillugit nunaminut tikeraartinnissaa akuerineqarsinnaanngippat, taarsiullugu anaanaa ataataaluunniit imaluunniit inuk alla innarluutilimmut qanittoq tikeraartinneqarsinnaavoq.

§ 6. Peqqussutip § 6-iat najoqqutaralugu Isumaginninnermi Pisortaqarfik pisariaqartitsineq naapertorlugu Nakorsaaneqarfimmut aammalu Piorsarsimassusermut atuartitaanermullu Pisortaqarfimmut siunersiuisassaaq. Kiisalu Isumaginninnermi Pisortaqarfiup isumagisinnaavaa suliassat qitiusumik attaveqatigiiffimmi (Den centrale Kontaktgruppe) oqallisigineqarnissaat, tassani oqallisigitinneqartartussaassapput KalaallitNunaata avataani paaqqinnittarfinnut inissiinissat tamakkerlugit, taamatullu aamma inissinneqareersimasut angerlartussat.

§ 7. Isumaginninnermi Pisortaqarfiup aalajangigai allakkatigut nalunaarutigineqartassapput aammalu ikiuutissap akuersissutigineqarsimasup suunera annertussusialu erseqqissumik nalunaarsimassallutik. Taamatullu ingerlaannartumik ikiuutinik tunisisoqartassatillugu nalunaarsimassalluni piffissaq suna killiliunneqarsimanersoq.
Imm. 2. Aalajangiinerittaaq nalunaarsimasassavaat aningaasat akuersissutigineqartut qanoq ilillugit tunniunneqartassanersut.
Imm. 3. Qinnuteqaatinut itigartitsissutip imarissavai itigartitsinermut tunngavilersuutit.

§ 8. Nalunaarut manna atulerpoq 1. januar 1984.

Kalaallit-Nunaanni Namminersornerullutik Oqartussat ulloq 28.december 1983

Agnethe Davidsen

/

Jørgen Munk